—Piyurí nuꞌujnaká namena eꞌiyajé najwaꞌaté, apala pajluwaja cebada icha wayoꞌojeño nakiyana yurí nuwayoꞌoká nujluwa richa, nápumichu yuríjikaro.

—Piꞌijná aꞌajná —ke rumaká rojló.

3 Raú Rut jáchoꞌoyo ají ke namena eꞌiyajé. Ruphaka rejo ee, rukeñoꞌó richa, namataꞌaká riká chaya kujrúkaꞌakare teꞌerí eꞌiyajé wayoꞌokana. Riká wayoꞌokana nakú ruꞌujná ají ke nápumichu. Unká ruweꞌepila Booz menaka riꞌimaká. Elimélec michú ejénami nakiyana riꞌimaká. 4 Júpichami Booz jáchoꞌoko pajimila Belén eyá, iphari rimena eꞌiyajé. E rajalaka rijwaꞌaté jápajeño marí ke:

—Nuwata Tupana iꞌimaká ijwaꞌaté maare.

Raú naꞌajipá rijló:

—Je, ñaké riká, wawata kaja Tupana laꞌaká piká palá.

5 Rejomi Booz kemari rijwaꞌaté jápajeño amájerijlo:

—¿Mékajeru chi kaꞌajnaru inanaru? ¿Na chi roraꞌapá?

6 Raú namájeri kemari rijló:

—Moab eyájeru ruká. Noemí waꞌaté ruphá reyá majó iꞌimaká. 7 Rumicha nojló, nuyuríkaloje ruwayoꞌoká nápumichu richa rujluwa. Lapiyami eyá rukeñoꞌochá jápakaje. Wajé ruphíchaka majó, ruwatánaꞌakaloje meketánaja penaje.

8 Raú Booz iꞌijnari rojalákaje, rimá rojló:

—Pemaꞌá numájika pijló, piꞌijnaká piyá ajopana mená eꞌiyajé richa wayoꞌojé pijluwa. Maáreja piyuró. Inaana, nujwaꞌaté jápajeño waꞌaté pijápaje. 9 Piꞌijná richa mataꞌajeño iꞌijnajika ewá. Kaja numicha nujwaꞌaté jápajeñojlo, nakawílaꞌaka piyá pinaku. Makaꞌaní piꞌirajika juni kewá, piꞌijnajíkano juni iꞌirajé, aꞌajná iꞌichí kaje pitaró chiyá.

10 Ilé ke rimaká rojló aú rujlámaꞌo rijimaje, ruphákale raꞌapí, e rumá rijló:

—¿Naje palá wani paꞌaká pinakojó nuká? ¿Naje palájneꞌeke wani piká nujwaꞌaté? Ajopana teꞌeré eyájeru nuká, eꞌiyonaja pilaꞌá nuká palá wani.

11 Raú rimá rojló:

—Nomaꞌá riyukuna meke pilaꞌaká piyajnérumi nakú palá wani, piyajná michú takaꞌañáaka piꞌimaká ejomi. Nuweꞌepí kaja piyurika pichiꞌiná, piñakajela, kajemaká, piꞌijnakáloje majó rujwaꞌaté penaje. Kaja piphá majó wanaku, piꞌimakáloje maárowa wajwaꞌaté penaje, ajopana weꞌemaká piliyá eꞌiyonaja. 12 Eko Tupana aꞌá pijló palá pilaꞌakare wemí. Tupana, israelítana pechu iꞌimakare chojé kaphí, piwátakare kaja piñathé aꞌajeri penaje, eko rilaꞌá piká palá, palá pilaꞌakare wemí.

13 Rumá rijló:

—Palájneꞌeke wani piká nujwaꞌaté; palá wani pipurákaꞌalo liꞌichaka kaphí nupechu. Pijwaꞌaté jápajeño jaꞌapejé nuká, eꞌiyonaja pipuraꞌó palá wani nujwaꞌaté.

14 E kaja riphá rená chojé, najñákaloje naꞌajnewá penaje. E Booz wáꞌari Rutjlo, rimá rojló:

—Majó piꞌijná, pijñaꞌá pan nakiyana, kéchami panóroꞌotaka riká marí ralá jakojé.

E Rut yáꞌayo ajopana rijwaꞌaté jápajeño waꞌaté roꞌojnewá ajñaje. E Booz jaꞌapátari rojló trigo meríyaꞌakeja. Riká rojñá. Ruwátaka ejé rojñá roꞌojnewá, unká rutajátala piyuke aꞌajnejí naꞌakare rojló. 15 Rejomi ruꞌujná piño jápaje, e Booz kemari rijwaꞌaté jápajeñojlo:

—Iyurí kaja ruwayoꞌoká cebada icha, kaja jepoꞌokare penájemi iꞌimaká eꞌiyowá. Imaniña rojló, ruwayoꞌoká piyá riká. 16 Iyurí kaja rinakiyana kujrúkaꞌaka mapeja, ruwayoꞌokáloje riká rujluwa penaje. ¡Awíyoꞌoniña ta rojló richá!

17 Re Rut iꞌimayo Booz mená eꞌiyá richa wayoꞌokana nakú, aꞌajná rojúwaꞌaka ejená. Rejomi rukaꞌá richa nakiyá raꞌarú. Veinte kilos chaje rená ñaꞌakó, cebada waja riꞌimaká. 18 Riká ronapí ke rupaꞌakó pajimila ejo. Iphayo ruyajnérumi nakú, e ruyaꞌatá rojló richa rujñaꞌakare. Rejomi roꞌó Noemijlo roꞌojné, kaápuꞌuku naꞌakare rojló lupemí yuríkaro.

19 —¿Mere ke chi pijápicha? —ke Noemí kemaká rojló—. ¿Mere eyá chi piwayoꞌochá kajrú wani cebada icha? Eko Tupana laꞌá palá kele paminá aꞌachari piñathé.

Raú Rut iꞌimayo rojló riyukuna, e rumá rojló:

—Riká nujápichaje waꞌaté ií Booz.

20 Raú Noemí kemayo rojló:

—Eko Tupana laꞌá riká palá. Chuwa palá Tupana laꞌaká weká, ñaké kaja rilaꞌaká palá kaja takaꞌakaño michuna nakú iꞌimaká. Nuyajná michú ejénami wani nakiyana riká, ñakele riká joꞌó aꞌajeri rinakojó weká.

21 E Rut kemayo piño rojló:

—Rimicha kaja nojló, nujápakaloje rijwaꞌatéjena waꞌaté, aꞌajná nañapátajikaja richa ñaꞌakana ejená.

22 Raú Noemí kemayo rojló:

—Nuꞌurinumi, palani nojló reja pijápaka rijwaꞌaté jápajeño waꞌaté. Piꞌijnaniña ajopana mená eꞌiyajé jápaje, apala rewá nakawílaꞌajla pinaku.

23 Reyá aꞌajná ñoꞌojó, Rut jápakeyo inaana, Booz waꞌaté jápajeño waꞌaté. Nañapátaka cebada, trigo waꞌaté, icha ñaꞌakana ejená rujapa najwaꞌaté. Laínchu kaꞌalá keja rupaꞌajíkono ruyajnérumi ñakaré ejo.