JUECES
1
Josué michú takaꞌañáaka israelítana iꞌimaká ejomi, napuraꞌó Tupana waꞌaté, naweꞌepíkaloje raú mékajenaka nanakiyana riwata iꞌijnaká cananéona waꞌaté nókajo. 2 Raú Tupana kemari najló Judá lakénami nakú, nayuríkaloje neká iꞌijnaká paineko najwaꞌaté nókajo, najñaꞌakáloje nateꞌeremi najluwa penaje. 3 Raú nemá nekáꞌana, Simeón lakénamijlo, naꞌakáloje nañathé nókakajo aú. Nemá najló: “Eko aꞌá wañathé náchoꞌotakana aú nateꞌeré, Tupana arukákare wajló iꞌimaká nakiyá. Rejomi waꞌajé kaja iñathé ajopana jáchoꞌotakana aú, ñaké kaja nateꞌeremi yuríkoloje ijló penaje”.4 Rejéchami nawakako pajluwa chojé, neꞌejnakáloje najwaꞌaté nókajo penaje. Nephaka nanaku najwaꞌaté nókajo ejéchami, Tupana aꞌaká nañathé nacháꞌatakaloje rewá iꞌimakaño: cananéona, ferezéona, kajena. Pajimila Bézec e nenota diez mil nanakiyana.
8 Judá penájeminaja nókako piño Jerusalén eyájena waꞌaté. Piyuke nakapichátaka inaꞌukena rewá iꞌimakaño. Nakapichátaka neká ejomi, nakáraꞌata riká pajimila. 9 Rejomi nenoko piño ajopana cananéona, yenuri Négueb eꞌiyowá iꞌimakaño waꞌaté. Ñaké kaja nakapichátaka ajopana, kawakajo iꞌimakaño piyukeja. 10 Nenoko kaja ajopana cananéona, pajimila Hebrón ewá iꞌimakaño waꞌaté. Piyukeja nakapichátaka neká, nateꞌeremi yuríkoloje najló penaje.