Krijtota yeu puꞌarim, juꞌu bem yaꞌari
Juꞌu Jesus, jumeꞌ aꞌ sualemmeu, Liojta tuꞌu jiapsi amet aꞌ naꞌikiatuneꞌpo betana nooka
1
Tua in nakeꞌu Teopiloꞌ teame, jum cheꞌa bat weyeka jiꞌosiata in eu jiꞌojteipo, Jesukrijtota betana siꞌimeta, bat naataka naateka, intok aapoꞌik, teeka betana jikau aꞌ mabetwaꞌpo tajtia, siꞌimeta jukaꞌ aapoꞌik yaaka intok jukaꞌ yee aꞌ majtasukaꞌuta betana ne eu jiꞌojtek. 2 Aapo junak kee teekau nottekai, jumeꞌ yeu aꞌ puꞌarim, aapo, Liojta tuꞌu jiapsie aniawaka, bem jooneeꞌut am tejwaak. 3 Chukula, aapo meꞌetuka, jiabijtesukai, aapo juꞌu Jesus jiapsaka ameu au yeu machiak. Intok chukula, aapo junuen junamaꞌa woi taka taewaimmeu tajtia ameu au yeu mamachiakai. Junuen tua lutuꞌuriapo aꞌ jiapsaꞌuta bempoꞌim aꞌ juꞌuneiyaatuakai. Intok ket aapo, achai Liojta yoꞌo nesaweka aꞌ katekaꞌu betana jukaꞌ lutuꞌuriata ameu aꞌ teuwaakai.4 Intok aapo ketuni amemak anekai, jum bweꞌu joꞌara Jerusalen teaꞌpo kaakun am katneeꞌpo betana am tejwaak. Inimmeu aapo:
―Inim emeꞌe boꞌo bitne, achai Liojta betana wakaꞌa emou aꞌ chupneꞌeti jiaka aꞌ teuwaarita, jiba in emou aꞌ teuwaakaꞌa benasia. 5 Bweꞌituk juꞌu Joan, yee babatoowame baꞌammea yee babatoowak. Taa ka juebena taewaim sikaa, inepone, Liojta betana, jukaꞌ aꞌ tuꞌu jiapsita ne emou aꞌ bittuane ―ti ameu jiiak.
Jukaꞌ Jesujta teekau jikau sikaꞌapo
6 Junak bempo Jesujtamak siꞌime nau anekai, aapoꞌiku nattemaek:
―Itom yoꞌowa, jaisa jiba iꞌan junen empo inim itom jumeꞌ juriom, romaano yaꞌuraata betana suꞌu tojiwaka, juchi inim itom nesauneeꞌut iniat itom aniaka itom aꞌ tuꞌuteriane, jaꞌani ―ti jiakai.
7 Aapo intok inimmeu:
―Emeꞌe, jakwoo, oo jita taꞌapo jukaꞌ in yoꞌowa Liojta, aapoꞌik jiba au lutuꞌuriaka aꞌ yaꞌaneeꞌuta, junae betana enchim aꞌ juꞌuneiyaaneeꞌuta ka emou lutuꞌuria ―ti ameu jiiak―. 8 Taaemeꞌe chukula, jukaꞌ Liojta tuꞌu jiapsita mabetsukai, emeꞌe inim siꞌimekuu yumaꞌanee intok ka jain eaka, yeu sajaka nee betana weyeka, jukaꞌ nok lutuꞌuriata inim bweꞌu joꞌara Jerusalen teaꞌpo intok bwiaraa Jureaꞌ teaꞌpo intok ket jumun bwiaraa Samaariaꞌ teaꞌpo, intok kia inim bwiapo, cheꞌa mekka bicha tajti emeꞌe aꞌ teuwaane ―ti ameu jiiak.
9 Inikaꞌa aapo teuwaasukai, bempoꞌim ketun aꞌ bitchuu su, juꞌu Jesus junamaꞌa yeeu, teekau jikau siika intok aapo junaman namupo kaabetuk. Inimeꞌe intok ka intok inim aꞌ bichak. 10 Bempoꞌim junuen jukaꞌ Jesujta aꞌ simeo, aman teekau aꞌ bitchuu su, junamaꞌa oꞌowim woika, tojsassaalaik atteaka bempoꞌim naapo yeu machiak. 11 Inimeꞌe intok bempoꞌimmeu:
―Emeꞌe, bwiaraa Kalileaꞌ teaꞌpo joomem, ka intok teekau jikau aꞌ bitchune. Jiba iniꞌi Jesus, inim emo tana, teekau jikau sikame, aapo jiba inien, junuen aꞌ sika enchim aꞌ bichakaꞌa benasia juchi nottine ―ti ameu jiiak.
Juꞌu Matiaj teame yeu puꞌawak, Jurajtukaꞌuta aneꞌepo tawaneꞌ betchiꞌbo
12 Junak inimeꞌe junamaꞌa Oliibo kawiꞌ teaꞌa betana yeu sajaka intok bweꞌu joꞌara Jerusalen teaꞌu nottek. Junaꞌabo aman ka mekkaa, jumak wepul kiloometro tukan jiba. 13 Junak bempo jum Jerusalen teaꞌu yajakai, junamaꞌa kari bem ama jokaꞌapo, junamaꞌa karita bepa juchi senu bepaata yaꞌariu jikau jaꞌamuk. Inimeꞌ nasuk, inen teakame ama aanen: juꞌu Peeoꞌ teame, juꞌu Jakoobo, juꞌu Joan, juꞌu Anteej teame, juꞌu Jeriipe, juꞌu Toomas, juꞌu Baatolomeeꞌ teame, juꞌu Mateeo, juꞌu senu Jakoobo, iniꞌi senu Alpeoꞌ teamta yoemia, juꞌu Simoo, iniꞌi jumeꞌ kananijtam ti emo teuwaammak eaꞌu, intok juꞌu Juuras, jukaꞌ Jakooboꞌ teamta mak weri. 14 Inimeꞌe siꞌime jiba weeꞌpo, nau eaka, jumeꞌ Jesujta mak werimmak intok jukaꞌ aꞌ aewata Mariaꞌ teamta mak, intok junamaꞌa jumeꞌ waate jaamuchimmake emo nau totojan junuen Liojta yoꞌoreka intok au bicha yee nokria betchiꞌbo.
15 Junameꞌe taewaimmet juꞌu Peeo, junamaꞌa jumeꞌ Krijtota nau sualeme nasuk kiktek. Inimeꞌe jumak siꞌime nau, busan taka tukan. Aapo intok inimmeu:
16 ―Krijtopo nemak werim, utteꞌatukan, waꞌa, jum Liojta betana jiꞌosia jiꞌojteimpo, bat naataka jaibu Labiitukaꞌuta, Liojta tuꞌu jiapsie noktuawaka junuen Jurajtukaꞌuta betana, juꞌu, jumeꞌ Jesujta bwiseka aꞌ nuk sajakame am tejwaakamta betana aꞌ teuwaakaꞌuta junuen aꞌ chupneꞌpo ―ti ameu jiiak―. 17 Bweꞌituk juꞌu Juurajtukaꞌu itomak naꞌikiatukan intok ketchia aapo, jiba ito benasi itom tekil jooan. 18 Taa junaꞌa, sikaa, intok juꞌu tomie, ka tuꞌik yaꞌarika aꞌ makwakaꞌue, waj bwiata jinuk. Chukula intok aapo, jikat betana kobae koꞌom wecheka intok toma pejteka, intok aꞌ tompo ayukame siꞌime yeu wattek. 19 Chukula, jumeꞌe, bweꞌu joꞌara Jerusalen teaꞌpo jiapsame junae betana aꞌ juꞌuneiyaaka, bempo, junakaꞌa waj bwiata, Akellamak ti aꞌ teatuak. Iniꞌi nooki, bem nokpo, Waj bwia ojboe bejeꞌetuari, ti jiubae. 20 Bweꞌituk jum jiꞌosia jiꞌojteim, Salmom teaꞌpo:
Juꞌu aꞌ kariwa jimmaatunee
intok kaabe ama joꞌane,
ti jiia. Intok ketchia jiba junamaꞌa jiꞌojteimpo:
Taꞌabwika, tekil aꞌ joaꞌuu tawane,
ti jiꞌojtei.
21,22 ’Inim ito nasuk wate aane, inimeꞌe, jukaꞌ yoꞌowe Jesukrijtota inim itomak aꞌ anekaꞌpo tajtia, bat junak juꞌu Joan tukaꞌuta betana aꞌ batoꞌowaawakaꞌpo naateka, chukula aapoꞌik teekau aꞌ nottekaꞌpo tajtia, jiba taꞌapo itomak aneme. Inien san iꞌan junuen, inime betana seenuk, jukaꞌ yoꞌowe Jesukrijtota, kokkoarim nasuk aꞌ jiabijtekaꞌpo itomak aꞌ teuwaaneemta, inimeꞌe betana itom yeu aꞌ puꞌaneeꞌuta utteꞌa.
23 Junamaꞌa ame betana senuk amemak tawaaneꞌ betchiꞌbo, woika yeu puꞌawak. Juꞌu seenu, Jose Barsabaj teame, ket Jujtoꞌoti teuwaawame. Intok seenu, Matiaj ti teakai. 24 Intok chukula bempo Liojtau bicha am nokriak:
―Achai Lios, empo junen inim siꞌimem jiapsi taꞌaame, inimeꞌe woim betana jabeta em yeu puꞌaariakaꞌuta itom yeu aꞌ puꞌaneꞌ betchiꞌbo itom ania ―ti jiakai―. 25 Junuen aapoꞌik, jumeꞌ Krijtota betana yeu puꞌarim, tekilta bem joaꞌuta, jiba jukaꞌ Juraj tukaꞌuta, ka tuꞌik yaꞌarika junuen aꞌ tawaꞌeaꞌuta junuen au chupuka aꞌ taꞌarukaꞌuta, inikaꞌa aꞌ jooneꞌ betchiꞌbo.
26 Junako bempo junammet juꞌunee betchiꞌbo, jitae amet nau yeewekame benasi aayuk. Intok junak junuen inim juꞌu Matiaj teame ama teuwaatuk. Junama naateka iniꞌi, aapo, waate jumeꞌ woj mamni ama wepuꞌulaika jumeꞌ Krijtota yeu puꞌarimmak naꞌikiatuk.