Jesujta, woo busanika jumeꞌ aꞌ majtim, bawepo anemmeu yeꞌa machiakaꞌpo
21
Iniat chukula juꞌu Jesus, jumeꞌ aꞌ majtimmeu juchi au yeu machiak, jum bweꞌu bau baꞌa Tibeeriaj teaꞌpo bwikola. Inen aapo ayukai. 2 Inimiꞌi, Simoo Peeo, intok Toomas juꞌu woꞌori ti taꞌeewame, juꞌu Natanaꞌel teame, iniꞌi jum bwiaraa Kalileapo ili joꞌara Kanaaꞌ teapo joome, jumeꞌ Sebereeoꞌ teamta uꞌusim intok juchi wate woika jumeꞌ Jesujta majtim, inimeꞌe ama nau aanen. 3 Waꞌa Simoo Peeoꞌ teame inimmeu:―Kuchum ne yeu bause ―ti ameu jiiak.
Bempo:
―Itepo ket te aman emak katbae ―ti au jiiak.
Inimeꞌe aman sajaka intok kuta kanoau jaꞌamuk. Taa bempo junae tukaariat kaita yeu wikek. 4 Junak junamaꞌa jaibu yeu matchuu, Jesus junamaꞌa bawe mayoat yeu machiak. Taa jumeꞌ aꞌ majtim ka juꞌunean, jukaꞌ ama anemta aapoꞌik junaꞌatukaꞌpo. 5 Junak juꞌu Jesus, inimmeu:
―Uusim, jaisa emeꞌe kee jita yeu wike jaꞌani ―ti ameu nattemaek.
Bempo intok:
―Kaita ―ti aꞌ yoopnak.
6 Junak intok juꞌu Jesus, inimmeu:
―Batatana bicha am jimmaanee jumeꞌ jiteꞌim, intok emeꞌe junamaꞌa yeu am wikne ―ti ameu jiiak.
Inien inimeꞌe aayuk. Intok chukula bempo, jumeꞌ jiteꞌim junama baꞌapo ka a yeu am wiken, kuchum inim tua yuꞌin am weiyaakai. 7 Junako juꞌu aapoꞌik majti, Jesujta tua nakeꞌu, juꞌu Peotau:
―Juꞌu itom yoꞌowa ama weama ―ti au jiiak.
Juꞌu Simoo Peeo, junakaꞌa jukaꞌ bem yoꞌowata ama aneꞌuta aꞌ jikkajakai jiba, tajoꞌpo kobateka, baꞌau au jimaak, mayoau tajtia bajumbaekai. Bweꞌituk tajoꞌowattilatukan. 8 Jumeꞌ waate Jesujta majtim, kuta kanoapo baꞌa mayoau yeu yajak. Inimeꞌe, jumeꞌ jiteꞌim kuchummea tapunim yeu wik sakakai. Bweꞌituk junamaꞌa mayoau tajtia kia jumak mamni taka waaktitukan jiba. 9 Bwiau yeu yajakai, inimeꞌe junamaꞌa taji oubampo kuchuta ama boꞌokamta intok ket paanim ama teak.
10 Juꞌu Jesus inimmeu:
―Jumeꞌ kuchum juꞌubwa enchim yeu wikekaꞌum watem aꞌabo tojine ―ti ameu jiiak.
11 Juꞌu Simoo Peeo, kuta kanoau jaꞌamuka intok mayoau tajti jumeꞌ jiteꞌim, kuchummea tappunim yeu wikek. Woo busan taka ama woj mamni ama baji kuchum tukan. Inimeꞌe intok tua juebenaeka juniꞌi, ka chuktek jumeꞌ jiteꞌim. 12 Junak juꞌu Jesus, inimmeu:
―Aꞌabo kateka em jiꞌibwa ―ti ameu jiiak.
Inimeꞌe aꞌ majtim betana, tua kaabe au nattemaek aapoꞌik jabetukaꞌut, bweꞌituk jukaꞌ bem yoꞌowata ama aneꞌuta emo juꞌuneaꞌati ean. 13 Junako juꞌu Jesus, aman rukteka intok jumeꞌ paanim nuꞌuka intok bempoꞌimmeu am bwisek. Intok jukaꞌ kuchuta juniꞌi jiba junaen ameu aꞌ bwisekai.
14 Inim iniamak juꞌu Jesus, aꞌ majtimmeu bajisi ameu au yeu machialatukan aapo chukula kokkoarim nasuk jiabijtesukai.
Jesujta, Simoo Peeoꞌ teamtamak aꞌ etejoꞌpo
15 Junamaꞌa ketwoo, bempo jiꞌibwasukai, juꞌu Jesus, Simoo Peeotau:
―Simoo, Jonaj teamta yoemia, jaisa empo inimeꞌebepa nee nakke jaꞌani ―ti au nattemaek.
Juꞌu Peeo intok:
―Jeewi in yoꞌowe, empo juꞌunea in enchi eiyaaꞌu ―ti aꞌ yoopnak.
Juꞌu Jesus iniau:
―Inientuko, empo jumeꞌ juꞌubwa nee sual japteme, bwala asoꞌolam benasia in eiyaaꞌum, inimeꞌe am majtaka tuꞌisi nee am suuariane ―ti au jiiak.
16 Chukula juchia, iniamak woosa:
―Simoo, Jonaj teamta uꞌusi, jaisa empo nee nakke jaꞌani ―ti au nattemaek.
Juꞌu Peeo:
―Jeewi in yoꞌowe, empo juꞌunea in enchi eiyaaꞌu ―ti aꞌ yoopnak.
Aapo:
―Junuentuko, jumeꞌ nee sualeka, bwaram benasi in eiyaaꞌum, inimeꞌe nee betana weyemtat am aniane ―ti au jiiak.
17 Iniamak bajisia aapo:
―Simoo, Jonaj teamta uꞌusi, jaisa empo lutuꞌuriapo tuꞌisi nee eiyaa jaꞌani ―ti au nattemaek.
Juꞌu Peeo intok junak au sioktua taitek junuen, iniamak bajisia: “Jaisa empo tuꞌisi nee eiyaa”, ti au aꞌ nattemaekaꞌ betchiꞌbo, intok aapo:
―In yoꞌowe, empoꞌe siꞌimekut juꞌunea, empo juꞌunea junuen in enchi eiyaaꞌu ―ti au jiiak.
Juꞌu Jesus iniau:
―Junaentuko, empo wameꞌe nee sualeka, bwalam benasi in eiyaaꞌum, nee betana weyemtat am majtaka, nee am suuariane ―ti au jiiak―. 18 Iniat empo nee sualne, junak empo bat cheꞌa juꞌubwa yoꞌotukai, empo em tajoꞌpo kobateka intok empo em yeu weebaeꞌu bicha weweꞌaman. Taa chukula, empo jaibu yoꞌotuitakai, junak em mamam empo naꞌikim am toꞌone, intok taꞌabwika enchi tajoꞌotuane, intok junaꞌa, ka em weebaeꞌu bicha juniꞌi, enchi weiyaane ―ti au jiiak.
19 Inikaꞌa teuwaakai juꞌu Jesus, jukaꞌ Peota jachin ayuka, mukuka intok iniae aapoꞌik Liojta aꞌ yoꞌori teboneeꞌuta aꞌ teuwaak. Chukula intok aapo juꞌu Jesus, Peotau:
―Empo jiba nemak eaka jiapsine ―ti au jiiak.
Wepulaka juꞌu Jesujta tua aꞌ nakeꞌu
20 Juchi bicha kuaktekai, juꞌu Peeo, jukaꞌ Jesujta majti aapoꞌik tua nakeꞌuta, inikaꞌa amet chaꞌaka weyemta bichak. Jiba waꞌa, kupteo ka machiako, Jesujta amemak jiꞌibwakaꞌpo aapoꞌiku pitti katekaꞌuta, intok iniꞌi: “Achai, jabesa junaꞌatune, juꞌu enchi yeu bwijneeme”, ti au nattemaekaꞌuta. 21 Junako, juꞌu Peeo inikaꞌa bichakai, Jesujtau:
―In achai, iniau su, jaisa au chupne ―ti au nattemaek.
22 Jesus inikaꞌa:
―Junuen inikaꞌa, chukula nee aꞌabo notteo tajtia inim nee aꞌ jiapsi iꞌao juniꞌi, empo inim iniat kaachin eene. Empo jiba nemak eaka jiapsine ―ti aꞌ yoopnak.
23 Junako, jumeꞌ Krijto nau sualeme nasuk, inikaꞌa Jesujta majti ka aꞌ mukneeꞌuta etejowan. Taa Jesus iniau ka junuen ka aꞌ mukneeꞌuta au teuwaak, ala aapo: “Inikaꞌa, chukula nee aꞌabo notteo tajtia inim nee aꞌ jiapsi iꞌao juniꞌi, empo inim iniat kaachin eene”, ti jiiak jiba.
24 Iniꞌi jiba junaꞌa juꞌu Jesujta majti, inim ae betana etejowame, juꞌu inikaꞌa aꞌ lutuꞌuriateka aꞌ teuwaaka intok inikaꞌa weyemta jiꞌojtekame. Ite intok juꞌunea, siꞌimeta jukaꞌ aꞌ teuwaaꞌuta, lutuꞌuriataka aꞌ weyeꞌuta.
25 Ketchia tua juebenaka, wate weyeme aayuk, Jesujta yaꞌari, iniꞌi intok weꞌepulaka jiꞌojte tuko, siꞌime jumeꞌ jiꞌosia jiꞌojtei tuꞌeaꞌum, kia jumak inim aniapo ka kia ean, ti ne ea. Tua junuentune.