Lukaj teamta jiꞌojtekaꞌu
Jitasa aꞌ jiꞌojteneeka inia bepat teuwaawame
1
Juebenaka au jiꞌopla, jukaꞌ inim ito nasuk yeu sikamta siꞌimeta yumaꞌisi, tuꞌisi aꞌ jiꞌojtebaekai, 2 tua junama waꞌam intok jumeꞌ aꞌ wee taitek naateka aꞌ bichakame, intok junak inikaꞌa, Krijtota betana nok lutuꞌuriata tekiaka, yee majtakame, itom aꞌ majtakaꞌa benasia. 3 Inepo juniꞌi ket nee inikaꞌa aet nee suaka, tua aꞌ naatelaapo naateka nee ino aꞌ majtai. Intok nee inikaꞌa yumaꞌisi in eu aꞌ jiꞌojteneeꞌu, nee junuen aꞌ tuꞌi machia, tua in naksi eiyaaꞌu Teopiloꞌ teame. 4 Junuen, jukaꞌ lutuꞌuriata em majti, tuꞌisi intok yumaꞌisi em aꞌ taꞌaaneꞌ betchiꞌbo.
El Comienzo
Senu ankeles, Joan juꞌu yee babatoowamta yeu tomineeꞌu aꞌ juꞌuneiyaa tebo
5 Junak jukaꞌ Eroorej teamta, bwiaraa Jureaꞌ teaꞌpo cheꞌa aꞌ yoꞌotuko, seenu, teꞌopopo tekiakame, Sakariaj teaka ama jiapsan. Iniꞌi, senu Abiaj teamtaim betana tekiakammak weyen. Juꞌu inia jubiawa, Elisabet tean. Intok iniꞌi ket, juꞌu cheꞌa bat naataka, juꞌu teꞌopopo tekiakammeu cheꞌa yoꞌowe, Aaron teamta yoemrata betana yeu simriakan. 6 Inimeꞌe nau, Liojta bichapo yumaꞌisi siꞌimeku tuꞌisi jiapsan. Intok Liojta betana jukaꞌ nesauri jiꞌojteita, yumaꞌisi aꞌ boꞌo joorian. Junuen beja, kaabe jita ka tuꞌik betana a amet nokakai. 7 Taa inimeꞌe ka yoemiakan, bweꞌituk juꞌu Elisabet teame ka a yoemian. Ketchia bempo nawit jaibu tua yoꞌotuimtukan.
8 Senu taꞌapo, junak juꞌu Sakariajta, aamak tekiakame, inimeꞌe junuen, Liojta bichapo, jumeꞌ teꞌopopo tekiakame joaꞌuta bem aꞌ yaꞌaneeꞌuta ameu aꞌ yumako, 9 jumeꞌ teꞌopopo tekiakame nasuk, bem aꞌ boꞌo jooriaꞌa benasia, junuen, juꞌu Sakariaj teamtau yeu puꞌawaka au yuumak, aapoꞌik jum Liojta teꞌopopo wajiwa aneka, junamaꞌa, kopaalim benak win jubak aꞌ tayaꞌaneꞌ betchiꞌbo. 10 Junakaꞌa kopaalim benak win jubak ket aꞌ tayaꞌawaao, siꞌime jumeꞌ ama aneme, paꞌaku aneka Liojtau bicha nookan. 11 Junako, juꞌu Sakariiaj teamtau, Liojta betana ankeles, junamaꞌa junakaꞌa win jubak aꞌ tattaawaꞌpo, batatana weyeka au yeu machiak. 12 Jukaꞌ ankelejta bichakai, juꞌu Sakariias, kaachin an machiakan. Intok tua majaen. 13 Taa juꞌu ankeles iniau:
―Sakariias, kat emo majjaitua ―ti au jiiak―. Bweꞌituk juꞌu Lios, aapoꞌiku bicha em emo nokriakaꞌuta aꞌ juꞌuneiyaala. Intok Elisabeet em juubi, oꞌouta yoemiane, junakaꞌa intok, empo Joan ti aꞌ teatuane ―ti au jiiak―. 14 Tua em alleaꞌu intok Liojtau bicha em aꞌ baisaeꞌu et aune. Intok juebenaka inikaꞌa yeu yoemtuko tua alleene. 15 Bweꞌituk juꞌu em yoemia, Liojta bichapo tua eiyaawaka bitnaa. Iniꞌi, paꞌasi baꞌawata intok jukaꞌ baꞌata yee nanaakoamta ka jiꞌine. Intok Liojta tuꞌu jiapsi, kia kee yeu aꞌ tomteo naatekai yumaꞌisi aet annee. 16 Iniꞌi, jumeꞌ Ijraꞌel yoemrata betana, juebenam, bem achai Liojta, juchi am sualeꞌ betchiꞌbo am aniane. 17 Iniꞌi Joan, itom yoꞌowata bepa weene. Intok iniꞌi, juꞌu bat naatakai Liojta betana noktuawakame, Eliaj tukaꞌuta benaka, Liojta betana utteꞌata aet aune. Junuen, jumeꞌ achaiwaim, bem yoemiammak am tuꞌute betchiꞌbo. Intok jumeꞌe, kaita yoꞌoreme, Liojta bem yoꞌori taꞌaaneꞌ betchiꞌbo. Iniꞌi inien, juꞌu yoemratau noknee, junuen jukaꞌ itom yoꞌowata, tuꞌisi bem aꞌ mabetneꞌ betchiꞌbo ―ti au jiiak.
18 Juꞌu Sakariaj teame juꞌu ankelejtau:
―Jaisa tua ne witti iniat juꞌuneene ―ti au nattemaek―. Bweꞌituk jaibu nee tua yoꞌotui intok kia juꞌu in jubi juniꞌi ―ti au jiiak.
19 Juꞌu ankeles inikaꞌa inen yoopnak:
―Inepo nee Jabiel tea. Intok inepo, Liojta betana jukaꞌ tekilta nee aꞌ jooa. Jiba aapo junuen inia bemelak betana nee eu nokneꞌ betchiꞌbo ne eu bittuak. 20 Taa iꞌan, jukaꞌ in eu teuwaakaꞌuta, ka em aꞌ sualekaꞌ betchiꞌbo, ka nokaka empo tawane. Intok empo ka a noknee, jukaꞌ em yoemiata yeu aꞌ tomteꞌpo tajtia. Iniꞌi, taewai au yeu aꞌ puꞌarit chupne ―ti au jiiak.
21 Intok junamaꞌa, juꞌu yoemra, paꞌaku aneka, jiba jukaꞌ Sakariajta aꞌ boꞌo bichan. Intok inimeꞌe ka juꞌunee machiakan, aapoꞌik junamaꞌa teꞌopopo binwatuka, ka yeu aꞌ weyeo. 22 Paꞌakun yeu sikaa, juꞌu Sakariaj teame ka a ameu nookan. Junak bempo juꞌuneꞌeak, aapoꞌik junamaꞌa teꞌopopo wajiwa, Liojta betana jita aꞌ bittuawakaꞌpo. Intok iniꞌi maammea ameu nookan. Bweꞌituk ka nokaka tawalatukan.
23 Junak taewaim simsuko, Sakariaj teamta jum teꞌopopo aꞌ jooꞌeaꞌuta yaꞌasuka, aꞌ joꞌau bicha siika. 24 Iniat chukula juꞌu aꞌ jubiawa, Elisabet teame, jukaꞌ chukula yeu aꞌ yoemianeeꞌuta mabetak. Intok mamni mechammeu tajtia aꞌ joꞌa betana ka mekka bicha yeu siika, naas waateka: 25 “Juꞌu in yoꞌowa Lios, inile benak nee bittuak, iꞌan junuen, watem ka intok jaana nee eiyaaneꞌ betchiꞌbo”, ti ean.
Senu ankeles, Jesujta yeu tomtineeꞌu aꞌ juꞌuneiyaa tebo
26 Busan meecham am weyeo, juꞌu Lios senu ankeles, Jabiel teamta, bwiaraa Kalileaꞌ teaꞌpo, ili joꞌara Nasaret teaꞌu aꞌ bittuak, 27 junuen inikaꞌa, senu jamut bemeta, Mariaꞌ teamtau aꞌ noitineꞌ betchiꞌbo. Iniꞌi beeme, seenuk, Joseꞌ teamta aꞌ kunaneeꞌut juꞌuneaka jiapsan. Inikaꞌa, juꞌu bat naataka cheꞌa yoꞌo yaꞌari Labiitukaꞌuta yoemiam betana yeu simriata. 28 Juꞌu ankeles, jum aapoꞌik katekaꞌu au yepsak. Intok iniꞌi:
―Alleewame eu aune, empo, Liojta betana tuꞌik bichame. Juꞌu itom yoꞌowa Lios emak aane. Intok juꞌu Lios, siꞌime jaamuchim bepa tuꞌik eu yaꞌari ―ti au jiiak.
29 Taa junak aapo, jukaꞌ ankelejta bichakai, kaachin an machika taawak inikaꞌa au aꞌ teuwaakaꞌu betana. Intok juꞌuneepean, jitat tua, junuen jiaka aꞌ nokaꞌut. 30 Junako juꞌu ankeles:
―Maria, kat majjae. Bweꞌituk Lios enchi yeu puꞌari, junuen jukaꞌ kaitau a tamachiatuka tuꞌik enchi bittua betchiꞌbo ―ti au jiiak―. 31 Iꞌan empo, chukula em yoemianeeꞌuta mabetnee intok empo oꞌouta yoemianee intok inikaꞌa empo Jesuj ti aꞌ teatuane ―ti au jiiak―. 32 Bweꞌituk iniꞌi, aapo tua eiyaanaa. Lios juꞌu aman teekau jiapsaka, siꞌimem bepa yoꞌorisi machika, Liojta yoemia ti taꞌeenaa. Juꞌu achai Lios intok, juꞌu cheꞌa yoꞌo yaꞌatukaꞌu, Labiita, aapoꞌik inikaꞌa aet yeu simriatukaꞌuta benasia, cheꞌa aꞌ yoꞌo yaꞌane. 33 Junuen, jiba betchiꞌbo, jukaꞌ Ijraꞌel yoemrata, aapoꞌik am kuaktaneꞌ betchiꞌbo. Intok juꞌu aꞌ nesaweeꞌu jakwoo juniꞌi ka luꞌutineekai.
34 Junak juꞌu Maria, juꞌu ankelejtau:
―Jaisa tua iniꞌi yeu weene, inepo kaabe oꞌoutamak katekai ―ti au nattemaek.
35 Juꞌu ankeles inikaꞌa inen yoopnak:
―Liojta betana juꞌu aꞌ tuꞌu jiapsiwa junaet enchi aniane. Intok teekau cheꞌa eiyaawatchika Liojta, juꞌu a jita aꞌ joaꞌu, ka bittaka, namuta benasi enchi roptane. Junuen san, juꞌu oꞌou, yeu tomtineeme, wepulsi Liojta betchiꞌbo jiba jiapsine. Intok iniꞌi, Liojta betana yoemiari ti taꞌeenaa. 36 Ketchia, waꞌa em wawaai, Elisabet teame oꞌouta yoemiane, iniꞌi jaibu tua yoꞌotuitaka juniꞌi. Junuen san juꞌu ka a yoemiaꞌ teame, iꞌan busan mecham po weye, bweꞌuukai. 37 Bweꞌituk Liojta betchiꞌbo, tua kaita aayuk, ka aꞌ joaꞌu.
38 Junak juꞌu Maria:
―Inepo, juꞌu in yoꞌowa Liojta betchiꞌbo jiba ne jiapsa. Elaꞌpo juꞌu Lios junuen em neu jiaꞌa benasi neu aꞌ chupaꞌane ―ti au jiiak.
Junak juꞌu ankeles siika.
Juꞌu Maria, senuk Elisabet teamta joꞌau aꞌ noitekaꞌpo
39 Junameꞌe taewaimmet juꞌu Maria, tua au bamijtuakai, ili joꞌarau, bwiaraa Jureaꞌ teaꞌu, kaupo katekaꞌu bicha siika. 40 Intok junaman, juꞌu Sakariaj teamta kariu yepsaka, tawabaeka aman kibakek. Intok jukaꞌ ama Elisabet teamtau tebotek. 41 Junak juꞌu Elisabet, aapoꞌiku tebotewakamta, aapoꞌik aꞌ jikkajako, inia tompo juꞌu uusi au yoyoak. Intok juꞌu Elisabet junamaꞌa lautipo, yumaꞌisi Liojta tuꞌu jiapsi aet aanek. 42 Junak aapo, tua kusisi nokaka:
―Juꞌu Lios, cheꞌa siꞌime jaamuchim bepa, inim kaita ale benaka tuꞌik eu yaꞌari. Intok kia juꞌu em yoemiabeu juniꞌi tuꞌik yaꞌarialaa. 43 Ka neu lutuꞌuriak junuen jukaꞌ in yoꞌowata ae aꞌabo sikaa, nee aꞌ bitneꞌ betchiꞌbo. 44 Bweꞌituk kia jukaꞌ em tebotekaꞌuta, nee aꞌ jikkajak jiba, juꞌu in asoa, alleerimmea in tompo au yoyoak. 45 Tua alleenee empo aꞌ sualekame. Bweꞌituk junuen yeu yumaꞌane, juꞌu achai Liojta eu teuwaari ―ti au jiiak.
46 Junako inen jiiak juꞌu Maria:
Tua ne junen jiaka, in yoꞌowa Liojta, alleaka aꞌ bai sae.
47 Intok in jiapsi, jukaꞌ in yoꞌowata, juꞌu nee jinneꞌuneemta betchiꞌbo tua allea.
48 Bweꞌituk juꞌu Lios, inikaꞌa kaitaꞌpo cheꞌa eiyaawaka ae betchiꞌbo jiapsamta, tuꞌik aꞌ yaꞌarialaa.
Intok inim naateka juꞌu yoemra jiapsame, tua alleewamta bichame ti ne tana aꞌ teuwaane.
49 Bweꞌituk Lios, juꞌu siꞌimeku yumaka a jita joame, eiyaawatchika, tuꞌik nee bittualaa.
Wepulsi tuꞌuwata aet ayukame ti taꞌeewa.
50 Aapo, siꞌimem wameꞌe aꞌ yoꞌori taꞌaaka jiapsame, jiba am nak jiokoleka am bitne.
51 Eiyaawatchik bweresi weyemta yaꞌari.
Jumeꞌ emo cheꞌewareka jikat emo eiyaame, am koobak.
52 Jumeꞌ cheꞌa yoꞌotaka jokaa, nesaweme, junakaꞌa am uꞌaak.
Jumeꞌ intok, jitaꞌapo juniꞌi, ka cheꞌa eiyaawame, am yoꞌori tebola.
53 Jumeꞌ kaitae emo ania machim, tuꞌik yuꞌin am bittuak.
Jumeꞌ intok totomekame, kaitamak am tawaakai.
54 Ae betchiꞌbo jiapsisukamta, Ijraꞌel tukaꞌuta betana jukaꞌ yoemrata, aꞌ aniak.
Aapoꞌik aꞌ nak jiokolineeꞌuta ka koptak.
55 Inikaꞌa aꞌ chupneꞌeti jiaka, itom yoꞌowasukaꞌummeu aꞌ teuwaakaꞌpo amani.
Juꞌu Apraꞌam tukaꞌutawi intok jumeꞌ aet yeu katriammeu bicha, junuen jiba betchiꞌbo tuneekai.
56 Juꞌu Maria intok, junamaꞌa juꞌu Elisabetta mak, baji metpo ama taawak. Intok chukula, juchi iniꞌi aꞌ joꞌau bicha nottek.
Joan, jukaꞌ yee babatoowamta yeu yoemtukaꞌpo
57 Chukula intok yuumak juꞌu taewai, jukaꞌ Elisabetta junuen aet aꞌ yoemianeeꞌu betchiꞌbo. Intok iniꞌi, ili oꞌouta asoak. 58 Jumeꞌ ae naapo joꞌaakame, intok aꞌ wawaim, aꞌ uttiaka aꞌ alleetuabaeka aman au yajak, achai Liojta junuen tua tuꞌik aꞌ yaꞌarialaaꞌuta juꞌuneiyaatakai. 59 Jumeꞌ woj naiki taewaim weyeo, waate, jumeꞌ jukaꞌ usita sirkunsiraaroaneeme aman yajak. Junameꞌe intok, Sakariahta, aꞌ achaiwata team aꞌ teatuabaen. 60 Taa juꞌu aꞌ malawa:
―Eꞌe, ka junueni. Iniꞌi cheꞌa, Joanim ti teane ―ti jiiak.
61 Intok inimeꞌe:
―Jaisa betchiꞌbo, em wawaim betana, kaabe junuen teak ―ti au jiiak.
62 Junak, juꞌu usita achaibeu, inimeꞌe maammea au nattemaek, junuen aapoꞌik jachin aꞌ teatuabaeꞌpo juꞌuneebaekai. 63 Juꞌu aꞌ achaiwa, jita aet aꞌ jiꞌojteneeꞌuta aꞌawak intok: “Joanim ti teane”, ti jiꞌojtek. Intok iniet siꞌime suum eaka taawak. 64 Jiba junama lautipo juꞌu Sakariaj teame juchi a nookak. Intok aapo, Liojtau bicha tua alleaka aꞌ baisaeꞌuta teuwaa taitek. 65 Intok siꞌime jumeꞌ ae naapo joꞌaakame, tua suum eaka intok aet jachin eaka taawak. Intok junama Jurea bwiaraaꞌ teaꞌpo kawimmet, siꞌimekut joꞌarammet, juꞌu yeu sikame, naas etejowan. 66 Siꞌime jumeꞌ inikaꞌa juꞌuneiyaa sakame, au waateka intok bempo naas nau nattemaen:
―Chukula, jitasatunee tua iniꞌi ili uusi ―ti jiakai.
Bweꞌituk tua lutuꞌuriapo, juꞌu achai Lios, siꞌimeku tuꞌik aꞌ bittuan.
Sakariaj teamta, juꞌu Liojta bai saeka au bicha tua alleaka aꞌ nokakaꞌu
67 Juꞌu aꞌ achaiwa, Sakariaj teame, juꞌu Liojta tuꞌu jiapsie yumaꞌisi aet aneka intok Liojta betana aꞌ noktuawakaꞌuta teuwaaka inen jiiak:
68 Aꞌ baisaeka aꞌ yoꞌorinaaꞌu, Ijraꞌel yoemrata achai Liojtau aune.
Bweꞌituk aꞌabo itou yebijlaa, aapoꞌik betana yoemratawi intok itom jinneꞌulaa.
69 Senuk, tua siꞌime utteꞌaka, itom jinneꞌuneemta itom maki.
Juꞌu aapoꞌik betchiꞌbo jiapsame, Labiitukaꞌuta nat tomti yoemrata betana.
70 Junuen aapoꞌik, jukaꞌ itou aꞌ chupaꞌaneeꞌuta aꞌ teuwaakaꞌa benasia.
Cheꞌa bat naataka taewaimmet naateka, jumeꞌ wepulsi aapoꞌik betchiꞌbo jiapsaka, chukula yeu weenemta teteuwaame am noktuakai.
71 Junuen aapo, wameꞌe itom bejeꞌeka aneme betana, intok siꞌime jumeꞌ itom omtame betana itom jinneꞌuka,
72 Intok aapo, jumeꞌ cheꞌa bat naataka itom yoꞌowasukaꞌum nak jiokoleka intok aapoꞌik betana jukaꞌ ameu bicha, bemela lutuꞌuriata aꞌ teuwaari, aapoꞌik ka aꞌ koptaneeꞌuta teuwaak.
73 Iniꞌi junaꞌatuk, juꞌu achai Liojta, tua aꞌ chupaꞌaneꞌeti jiaka, juꞌu itom yoꞌowa, Apraꞌamtukaꞌutau bicha aꞌ teuwaakaꞌu.
74 Junuen aapo, wameꞌe itom bejeꞌeka aneme betana, itom au jinneꞌuneꞌeti jiakai, junuen, kaabeta majaeka, aapoꞌik itom joo iꞌaꞌuta, itom jooneꞌ betchiꞌbo.
75 Siꞌimemmak wepulsi lutuꞌuriakamta jiba boꞌo jooriaka intok aapoꞌik betchiꞌbo jiba jiapsakai, taewaim, inim itom jiapsaꞌu tajtia.
76 Empo intoko in yoemia, Lios, teekau jiapsamta betana weyeka chukula yeu weenemta teuwaame ti empo taꞌeenaa.
Bweꞌituk empo itom yoꞌowata bepat weyeka, juꞌu yoemratau noknee.
77 Junuen jukaꞌ aapoꞌik yeu puꞌarik yoemrata juꞌuneetuaꞌ betchiꞌbo, bem ka tuꞌuwa yaꞌarimmet am jiokoituneꞌpo intok junuen a bem jinneꞌuituneꞌpo.
78 Bweꞌituk juꞌu itom Lios, aapoꞌik tua yee aꞌ nakeka intok yee aꞌ nak jiokoleꞌ betchiꞌbo, mekka jikat, teeka betana, bemela taewaita benaka itou aꞌ bittuari.
79 Junuen jumeꞌ Liojta betana lutuꞌuriat ka juꞌuneaka jiapsame, jumeꞌ ka tuꞌik betchiꞌbo, kokko maisi jiokot emo bichammeu, tachiriata benaka, lutuꞌuriata ameu nuꞌupa betchiꞌbo.
Intok junuen, iniae, yanti, ka jain eaka inim itom jiapsineꞌ betchiꞌbo.
80 Intok juꞌu ili uusi yoꞌotu simen. Intok iniꞌi, Liojta betana weyemtat suatu simen. Intok yoꞌotu chupuko, mekka, paꞌakun kaabeta tua joꞌaakaꞌpo joꞌaakan, junak taewai, chukula, juꞌu Ijraꞌel yoemratau, aapoꞌik au aꞌ taꞌaa tebok tajtia.