Joan teamta jiꞌojtekaꞌu
Jukaꞌ Liojta betana nok lutuꞌuriaꞌati teakamta inim aꞌ yoemtukaꞌu
1
Keꞌesamriapo, siꞌimeta aet naateko, juꞌu Krijto, Liojta betana nooki ti taꞌeewame jaibu jiapsan. Iniꞌi nooki ti teakame, aapo Liojta mak aanen. Intok aapo Liojtukan. 2 Junuen san, aapo keꞌesamriapo siꞌimeta aet naateo, aman Liojta mak aanen. 3 Siꞌimeta jukaꞌ inim ayukamta aapo aꞌ juꞌunaktei. Tua kaita aayuk, juꞌu ka aapoꞌik betana weyeka ayukame. 4 Juꞌu jiapsiwame aapoꞌikut ayukan. Iniꞌi jiapsiwame intok, inim jumeꞌ jiapsame betchiꞌbo, tuꞌuwataka tachiriata benasi aapo aꞌ weiyaan. 5 Iniꞌi, tachiriapo teuwaawame intok, jum ka machiku, ka tuꞌisi weyemta bejeꞌeka, tachiriata yeu aꞌ machialaa. Juꞌu ka machiria intok ka aꞌ kobaꞌamachi.6 Senu inim aanek, Joan ti teakai, Liojta betana aꞌabo bittuaritakai. 7 Iniꞌi, aapo jukaꞌ tachiriapo taꞌeewamta betana aꞌ nokneꞌ betchiꞌbo aꞌabo yepsak. Junuen aapoꞌik teuwaaꞌue, junakaꞌa bem sualneꞌ betchiꞌbo. 8 Iniꞌi Joan, aapo ka junaꞌatukan juꞌu tachiriapo taꞌeewame. Taa aapo wepulsi junae betana aꞌ lutuꞌuriatukaꞌuta nokneꞌ teaka aꞌabo bittuaritukan. 9 Juꞌu tachiriapo taꞌeewame, lutuꞌuriapo Liojta betana weyeme, juꞌu siꞌime jumeꞌ inim jiapsammeu tuꞌik weiyaame, aapo aꞌabo inim yebissusekan.
10 Intok waꞌa nooki ti teakame, aapo inim bwiapo aanen. Intok aapo inikaꞌa aniata aꞌ juꞌunakteka juniꞌi, jumeꞌ inim jiapsame, aꞌ jabetukaꞌpo ka aꞌ taꞌaak. 11 Aapo inim bwiapo, aapoꞌik juꞌunakteipo yepsak. Taa inim jumeꞌ aapoꞌik betana kateka jiapsame, inimeꞌe ka aꞌ mabetak. 12 Junuentaka juniꞌi, waate tuꞌisi aꞌ mabetaka intok aꞌ sualek. Inimeꞌe, bempoꞌimmeu aapo, Liojta betana bem yoemiam tuneeꞌuta ameu chupuk. 13 Inimeꞌe ka jak weyeo senu yoemratat yeu katriam bebena intok ka inim yoemem yeu tom tomteꞌebenakai. Intok kia ka jabe yoemta junuen aꞌ eaꞌ betchiꞌbo junuen Liojta yoemiarim. Ala inimeꞌe, Liojta betana yoemiarim.
14 Intok junaꞌa nokipo taꞌeewame, aapo ito benasi au yoem yaak. Intok inim ito nasuk jiapsak, tua yee nak taꞌaakai intok lutuꞌuria aet ayukai. Intok jiba aapoꞌik Liojta betana wepulaika aꞌ yoemia tukaꞌ betchiꞌbo, aapoꞌik jukaꞌ tua ujyooik intok eiyaawatchik aet ayukaꞌuta, itepo tee aꞌ bitlaa. 15 Juꞌu Joan, yee babatoowame, inia betana juꞌuneaka, ka aꞌ essoka, siꞌimem bichapo inen jiiak:
―Iniꞌi junaꞌa waꞌa, junak aet nokaka: “Net chaꞌaka yebijneeme, junaꞌa cheꞌa nee bepa eiyaawatchi, bweꞌituk aapo nee bepa cheꞌa bat jiapsan” ―ti jiakai.
16 Itepo tee siꞌime jukaꞌ tuꞌika, kaitau a tamachiatuka, aet ayukamta intok ka a luꞌutemta aꞌ mabetri. Inikaꞌa tuꞌik junuen nat chulukai. 17 Jumeꞌ nesauri jiꞌojteim, juꞌu Moiseej tukaꞌuta betana weyeka jiꞌojtewak. Juꞌu intoko, ka itou chaꞌaka juniꞌi, yee aꞌ nak jiokoleeꞌu intok aapoꞌik betana lutuꞌuriata, aapo juꞌu yoꞌowe Jesukrijto aꞌ weiyaa. 18 Inim tua kee jabe Liojta bicha, taa aapoꞌik Liojta betana juꞌu wepuꞌulaika jiba aꞌ yoemia, iniꞌi aapo aꞌ yoꞌowa Liojtamak wepuꞌulai benasi aamak jiapsame, aapo junaꞌa juꞌu itom aꞌ taꞌaatuakame.
Joan, juꞌu yee babatoowame, Jesukrijtota aapat tuka aꞌ taꞌaa tebokame
19 Jumeꞌ juriom jum bweꞌu joꞌara Jerusalen teaꞌpo joꞌaakame, inimeꞌe, wate teꞌopopo tekiakame intok waate, inimeꞌe teꞌopopo bem joaꞌut am aniame, Lebiitam teame, juꞌu Joan teamtau am bittuak, junuen aapoꞌik aꞌ jabetukaꞌut bem au nattemaineꞌ betchiꞌbo. 20 Aapo intoko tua machisi lutuꞌuriata nenkak inen jiakai:
―Ineponee ka junaꞌa juꞌu Krijtoꞌ teame ―ti jiakai.
21 Junak intok bempo juchi au nattemaek:
―Jabesaꞌakun empo. Jaisa empo junaꞌa jaꞌani, juꞌu Liojta betana juꞌuneetuawaka nokakame, juꞌu Eliaj tukaꞌu jaꞌani ―ti jiakai.
Juꞌu Joan intok:
―Kannee junaꞌa ―ti jiiak.
Chukula ket juchi:
―Junak su, jaisa empo junaꞌa jaꞌani, waꞌa Liojta betana juꞌuneetuawaka nokneeka boꞌo bitwame ―ti au nattemaiwak.
Aapo intok:
―Eꞌe ―ti am yoopnak.
22 Junak intoko:
―Junak su jabesa empo junuentuko. Bweꞌituk utteꞌa, jumeꞌ aꞌabo itom bittuakammeu lutuꞌuriata itom ameu teuwaaneeꞌu. Jaisa empo ee betana itom tejwaa machi ―ti au jiuwak.
23 Juꞌu Joan inimeꞌe inen yoopnak:
―Ineponee juꞌu, mekka paꞌaku, kaabeta joꞌarakaꞌpo, chaaeka inen nokamta jiawai: “Jukaꞌ yoꞌota aꞌabo yebijnemta aꞌ mabet betchiꞌbo, jukaꞌ ka tuꞌik suꞌu tojaka, aawas emo tuꞌutene”, ti jiame, tua juꞌu Isaꞌiajtukaꞌu, Liojta betana juꞌuneetuawaka aapoꞌik aꞌ teuwaakaꞌa benasia.
24 Jumeꞌ aman juꞌu Joanta mak etejokame, inimeꞌe, paiseeom teame betana aman au bittuarimtukan. 25 Inimeꞌe intok:
―Junak su, empo ka juꞌu Krijto tuko intok kia ka Eliaj tuko intok kia ka juꞌu Liojta betana juꞌuneetuawaka nokame yebijneeka boꞌo bitwame tuko juniꞌi, jaisaaka intok empo yee babatoowa ―ti au nattemaek.
26 Juꞌu Joan inimmeu inen jiiak:
―Ineponee baꞌammea yee babatoowa. Taa inim emo nasuku senu aane ka enchim taꞌaaꞌu. 27 Aapo net chaꞌaka yebijne, iniꞌi ala lutuꞌuriapo cheꞌa nee bepat weyeka juniꞌi. Inepo, jumeꞌ aapoꞌik bocha wikiam in aꞌ woitarianeeꞌu kia juniꞌi kanne ino jabele ―ti jiiak.
28 Siꞌime iniꞌi, jum ili joꞌara Betaabaraꞌ teaꞌpo yeu siika. Iniꞌi, batwee Jooraan teaꞌpo, taꞌata yeu weꞌe betana taawa. Jum jukaꞌ Joanta yee aꞌ babatoowaꞌawi.
Jesus, Liojta betana ili bwala ti taꞌeewame
29 Yokoriapo intok juꞌu Joan, jukaꞌ Jesujta aapoꞌiku bicha weyemta bichaka:
―Yuu, akeꞌem aꞌ bicha. Iniꞌi junaꞌa waꞌa Liojta betana ili bwala ti teuwaawame, juꞌu inim bwiapo jiapsame, bem ka tuꞌuwa yaꞌarita aapo aꞌ mabetneeme. 30 Aapoꞌik betana nee nookan junak inepo: “Chukula net chaꞌaka senu oꞌou yebijne, iniꞌi cheꞌa nee bepa eiyaawatchikai. Bweꞌituk aapo cheꞌa nee bepat jaibu jiapsan”, ti ne jiakai. 31 Jiba inepo juniꞌi, nee aapoꞌik aꞌ jabetukaꞌut ne ka juꞌunean. Taa inepo nee jiba junuen baꞌammea ne yee batoꞌowaaka ne yebijlaa, jiba junuen jukaꞌ Ijraꞌel yoemrata, tua lutuꞌuriapo aꞌ jabetukaꞌuta bem aꞌ taꞌaaneꞌ betchiꞌbo ―ti jiiak.
32 Juꞌu Joan ket inen jiiak:
―Ineponee intok, jukaꞌ Liojta tuꞌu jiapsita, wokkoita benaka, teeka betana koꞌom weyeka intok inia aapoꞌikut tawakamta ne bichak ―ti jiiak―. 33 Inepo ketun nee ka juꞌunean, junakaꞌa aꞌ jabe tukaꞌut, taa juꞌu, baꞌammea nee yee batoꞌowaaneꞌ betchiꞌbo nee aꞌabo bittuakame, junaꞌa ket: “Empo jak jukaꞌ Liojta tuꞌu jiapsita, senukut koꞌom weyeka intok junaet tawakamta aꞌ bichako, iniꞌi junaꞌatunee juꞌu, Liojta tuꞌu jiapsita emot autuaka, junae yee babatoowaneeme”, ti neu jiiak. 34 Inepo intok jaibu aꞌ bitlaa intok jiba ineponee inien weyeka aapoꞌik junuen Liojta betana aꞌ yoemiatukaꞌuta, nee aꞌ teuwaa ―ti jiiak.
Cheꞌa bat kateka, jumeꞌ Jesujta yeu puꞌakaꞌum
35 Juchi yokoriapo intok juꞌu Joan intok wooika jumeꞌ aꞌ majtim, jiba junamaꞌa juchi ama rejten. 36 Intok aapo, jukaꞌ Jesujta junama waꞌam weyemta bichakai:
―Yuu, akeꞌem aꞌ bicha. Iniꞌi junaꞌa juꞌu, Liojta betana ili Bwala ti teuwaawame ―ti ameu jiiak.
37 Jumeꞌ woika Joanta majtim aapoꞌik junuen jiamta aꞌ jikkajaka, bempo juꞌu Jesujta mak sajak. 38 Junak intok juꞌu Jesus, amau bitchuka intok bempoꞌim aet chaꞌaka kateme bichakai:
―Jitasa emeꞌe jaiwa ―ti ameu jiiak.
Bempo intok:
―Yee majtame, jakunsa empo joꞌaak ―ti au jiiak.
39 Jesus intok inimmeu:
―Aꞌabo kateka aꞌ bitne ―ti jiaka am yoopnak.
Junak intok bempo aman sajaka intok aꞌ joꞌaakaꞌpo aꞌ bichak. Intok junae taewait ama aamak taawak, bweꞌituk jaibu kupten, jumak naikim jiao.
40 Wooika jumeꞌ Joanta jikkajaka intok Jesujta mak sajakame betana, senu Antej ti teakan, Simoo Peeoꞌ teamtamak weri. 41 Iniꞌi Antej teame, tua bat, kee jita intok yaakai, jukaꞌ aamak werik, Simooꞌ teamta jaiwak, intok:
―Jukaꞌ Mesiaj ti teamta te aꞌ juꞌuneiyaa ―ti au jiiak. Iniꞌi, Krijto ti jiubae.
42 Junama sep juꞌu Antej teame jukaꞌ Simooꞌ teamta, jum Jesujta aneꞌu aꞌ tojak. Juꞌu Jesus intok inikaꞌa bichakai:
―Empo Simooꞌ tea jukaꞌ Jonaj teamta uꞌusi. Taa empo Sepaajpo taꞌeenaa ―ti au jiiak. Inimeꞌe team intok, ket Peeo ti jiubae.
Jesujta, jukaꞌ Jeriipeꞌ teamta intok Natanaꞌel teamta aamak am nunukaꞌpo
43 Juchi yokoriapo intok juꞌu Jesus Kalilea bwiaraaꞌ teaꞌu bicha weebaeka intok senuk, Jeriipeꞌ teamta bichaka, junau:
―Nemak weene ―ti au jiiak.
44 Iniꞌi Jeriipeꞌ teame intok, ili joꞌara Betsairaꞌ teaꞌpo jometukan. Jum Antejta intok Peota joꞌaakaꞌpo. 45 Iniꞌi Jeriipeꞌ teame intok, senuk Natanaꞌel teamta jaiwaka intok:
―Iꞌan itepo wakaꞌa oꞌouta, Moiseej tukaꞌuta jum aꞌ nesauri jiꞌojteimpo aapoꞌik betana jiꞌojtewakamta, intok ket jumeꞌ Liojta betana juꞌuneetuawaka nokame, inimeꞌe aapoꞌik betana jiꞌojtewakamta, junakaꞌa itepo aman te aꞌ bichak, juꞌu Jesus ti teakamta, juꞌu Joseꞌ teamta uꞌusi, joꞌara Nasaret teaꞌpo joome ―ti au jiiak.
46 Juꞌu Natanaꞌel intok:
―Jaisa aman ili joꞌara Nasaret teaꞌpo jitaa tuꞌika a ama yeu wee machi jaꞌani ―ti au jiiak.
Juꞌu Jeriipe intok:
―Aꞌabo sika aꞌ bitne ―ti au jiiak.
47 Junak Jesus intok, jukaꞌ Natanaꞌel teamta au weyemta bichaka:
―Inim senu weye, tua lutuꞌuriapo Ijraꞌel yoemrata betana usiaritakai, aapoꞌikut juꞌu yee bai taꞌaawame kaita aet aayuk ―ti jiiak.
48 Junak intok juꞌu Natanaꞌel teame:
―Jaisa empo nee taꞌaa ―ti au nattemaek.
Jesus intok:
―Jukaꞌ Jeriipeꞌ teamta kee enchi tejwaao, empo aman chunaꞌouwota betuk enchi kateko, nee enchi bichak ―ti au jiiak.
49 Junak juꞌu Natanaꞌel:
―Yee majtame, empo tua junaꞌa juꞌu Liojta yoemia. Empo tua junaꞌa waꞌa, inim Ijraꞌel yoemratau cheꞌa yoꞌo yaꞌari ―ti au jiiak.
50 Juꞌu Jesus iniau:
―Jaisa empo, chunaꞌouwota betuk enchi kateko nee enchi ino bichak ti in eu jiaꞌ betchiꞌbo jiba, empo nee suale jaꞌani ―ti au jiiak―. Iꞌan empo inia weemta bepa cheꞌa juniꞌi suum watchisi machik empo bitne ―ti au jiiak.
51 Ketchia juꞌu Jesus iniau:
―Tua ne aꞌ lutuꞌuriatuneꞌeti ne emou jiia, emeꞌe, jukaꞌ teekata au etapolaata intok jumeꞌ Liojta ankelesim, juꞌu inim yoemta aꞌ katekaꞌpo, ae bepa koꞌom bicha intok jikau bicha kateme emeꞌe am bitne ―ti au jiiak.