―Jaisaaka emeꞌe inim kokkolam nasuk jukaꞌ jiapsamta jaiwa ―ti ameu jiiak―. 6 Kaabe inimiꞌi bweꞌituk kokkoarim nasuk juchi jiabijtela. Au waatine, aapoꞌik ketuni Kalilea bwiaraaꞌ teaꞌpo aneka, inien emou aꞌ jiakaꞌpo. 7 Aꞌ utteꞌatuneꞌeti jiakai, aapoꞌik jukaꞌ inim yoemta, ka tuꞌi yoememmeu aꞌ suꞌu tojinaaꞌuta. Junameꞌe, kuuset aꞌ poponneꞌeti jiakai. Intok baji taewaita weyeka, juchi aꞌ jiabijteneeꞌu betana.

8 Junako bempo, aapoꞌik Jesujta teuwaakaꞌubeu wawaatek,

9 intok chukula bempo jum tetapo wojoꞌoriata yaꞌari betana nottekai, siꞌimeta inikaꞌa, jumeꞌ woj mamni ama wepuꞌulaika yeu aꞌ puꞌakaꞌummeu intok siꞌime jumeꞌ waate ama anemmeu aꞌ teuwaak. 10 Jumeꞌ inikaꞌa lutuꞌuriata, jumeꞌ Krijtota yeu puꞌarimmeu aꞌ etejokame inimeꞌem tukan, juꞌu Maria Maareenaꞌ teame, intok juꞌu Joanaꞌ teame intok jukaꞌ Jakooboꞌ teamta ae, Mariaꞌ teame intok jumeꞌ waate jaamuchim. 11 Taa iniꞌi, bempoꞌim teuwaaꞌu, jumeꞌ Krijtota yeu puꞌarim betchiꞌbo, ka suawakamta benaekan. Intok bempo iniat ka am sualek.

12 Taa junuentaka juniꞌi, juꞌu Peeo junama yeu sikaa, intok buiteka junaman tetapo wojoꞌoriata yaꞌariu yepsak. Intok junuen aapo junama wajiwa jiwekai, jumeꞌ bweꞌu tosai tajoꞌorim omola katekame bichak. Junak intok aꞌ joꞌau nottek, junama yeu sikamta betchiꞌbo tua suumꞌeakai.

13 Jiba junae taewaitchi, jumeꞌ majtim betana woika, ili joꞌara Emaꞌuj teaꞌu bicha kaaten. Iniꞌi, jum bweꞌu joꞌara Jerusalen teaꞌu betana woj mamni ama wepul kiloometrom jiba. 14 Inimeꞌe, siꞌimeta jukaꞌ ama yeu simlata nau etejo sakan. 15 Intok ketuni nau am etejoka intok emo am tettemaeo su, jiba aapo juꞌu Jesus, ameu rukteka intok amemak wee taitek. 16 Taa inimeꞌe intok, kia aꞌ bichaka juniꞌi, aapoꞌik aꞌ jabe tukaꞌut san ka aet juꞌuneetuawan. 17 Junak intok juꞌu Jesus:

―Jitasa emeꞌe nau etejo saka boꞌo joakai. Jaisaaka emeꞌe tua sioka ―ti ameu nattemaek.

18 Inimeꞌe betana seenu, juꞌu Kleopaaj ti teame inen jiiak:

―Siꞌimekut juꞌuneewa inimeꞌe taewaimmet, jum bweꞌu joꞌara Jerusalen teaꞌpo yeu sikamta betana. Jaisa empo junama kateka juniꞌi, inikaꞌa ka juꞌuneiyaa jaꞌani ―ti au jiiak.

19 Aapo junak:

―Jitasa ama yeu siika ―ti ameu nattemaek.

Bempo intok:

―Juꞌu Jesus, jum Nasaret teaꞌpo jometau yeu sikame. Iniꞌi, chukula yeu weenemta aꞌ tetteuwaaꞌu. Aapo, Liojta bichapo intok yoemrata bichapo juniꞌi, jukaꞌ aꞌ joaꞌuta intok yee aꞌ majtaꞌuta tua machisi utteꞌaka aꞌ weetuan. 20 Intok inikaꞌa, jumeꞌ teꞌopopo tekiakammeu yoꞌowe intok jumeꞌ inim itom yoemratau yoꞌooraata, aapoꞌik kuuset popontuka aꞌ mukneꞌ betchiꞌbo, bempoꞌim aet nesawekaꞌuta. 21 Itepo intok te aet boꞌo bichan, aapoꞌik junuen, inim jukaꞌ Israꞌel yoemrata, taꞌabwi yaꞌuraata betana aꞌ jinneꞌuneꞌpo. Intok naa buustia, iꞌan iniat chukula, jaibu baji taewaim weye junaꞌa yeu sikaari. 22 Ito betana wate jaamuchim ala itom womtala oꞌoben. Bweꞌituk bempo tua ketwoo junaman tetapo wojoꞌorita yaꞌariꞌu noiteka, 23 intok inimeꞌe junuen, junaman aꞌ takaawata ka teakai, itom aneꞌu itou yajjak intok bempo, ankelesim, inimeꞌe Jesujta aꞌ jiapsaꞌpo am tejwaakame emo am bichak, ti jiakai. 24 Junama sepia, ito betana wate oꞌowim junaman tetapo wojoꞌoriata yaꞌariꞌu sajaka, intok bempo, jumeꞌ jaamuchim aꞌ teuwaꞌa benasi aman aꞌ mammateka aꞌ bichak. Taa aapoꞌik jukaꞌ Jesujta ka aꞌ bichak ―ti jiiak.

25 Junak juꞌu Jesus inimmeu:

―Tua emeꞌe ka suawaka, kaita a mammate. Intok siꞌimeta jukaꞌa, jumeꞌ Liojta betana juꞌuneetuawaka, bem teuwaakaꞌuta, aꞌ sual betchiꞌbo tua bibinwatu ―ti ameu jiiak―. 26 Jaisa emo betchiꞌbo jum jiꞌojteimpo ka juꞌunakkiachi jaꞌani, jukaꞌ Krijtoꞌo teamta, teekau kee cheꞌa yoꞌotaka aꞌ yejteeo, junuen tua jiokot au aꞌ bitneeꞌuta, au aꞌ utteꞌatukaꞌu ―ti ameu jiiak.

27 Junak intok aapo, jum Liojta nok lutuꞌuriapo, jum Moiseejtukaꞌuta jiꞌosia jiꞌojteim betana naateka, intok ket siꞌime jumeꞌ Liojta betana juꞌuneetuawaka nokaka bem jiꞌojteim betana, jukaꞌ aapoꞌik betana ama jiꞌojteita, jachin aꞌ jiubaeꞌpo, machisi ameu aꞌ teuwaakai.

28 Jum ili joꞌarau, Emaꞌuj ti teaꞌu jeela bempo yajibokai, juꞌu Jesus, naa buustia weebaemta benaekan. 29 Taa bempo, junamaꞌa aꞌ tawaneꞌ betchiꞌbo au nookak:

―Inim itomak tawane, bweꞌituk tua kupte intok abe ka machia ―ti jiakai.

Junak juꞌu Jesus ama joꞌarau amemak yepsak ama tawabaekai. 30 Intok aapo jaibu mesau amemak katekai, aapo, jumeꞌ paanim nuꞌuka, ame betchiꞌbo Liojtau bicha noksukai, junak am rebektaka intok ameu am bwisek. 31 Junama lautipo sep bempo aet juꞌuneetuawak, intok aapoꞌik aꞌ jabetukaꞌuta aꞌ taꞌaak. Taa junak aapo seej chukti ama kaabetuk. 32 Junak bempo inen nau jiian:

―Iꞌan te juꞌunea, jum boꞌot itomak aꞌ etejo simeka intok jukaꞌ Liojta nok lutuꞌuriapo jiꞌojteita juꞌunakkiachisia itou aꞌ teuwaao, aapoꞌik betchiꞌbo jukaꞌ jiapsipo itom siokꞌalleaꞌuta itom aꞌ ineꞌakaꞌpo ―ti nau jiian.

33 Junak bempo, ka intok boꞌo bichaka juchi yeu sajak. Intok bweꞌu joꞌara Jerusalen teaꞌu nottek. Junaman bempo, jumeꞌ woj mamni ama wepuꞌulaika, Jesujta yeu puꞌarim, intok jumeꞌ waate amemak rejteme nau emo tojilammeu yajak. 34 Inimeꞌe nau aneme intok:

―Lutuꞌuriapo jiabijtek juꞌu yoꞌowe Jesukrijto. Juꞌu Simooꞌ teame intok aꞌ bichak ―ti ameu jiiak.

35 Junak intok ket inimeꞌe, jum boꞌot bem bichakaꞌuta, intok Jesujta, aapoꞌik junuen jumeꞌ paanim rebektaka ameu am bwiseko bempoꞌim aet juꞌuneetuawakaꞌuta ameu aꞌ etejok.

36 Bempoꞌim inia weyemtat ketuni nau am etejoo su, junak juꞌu Jesus bempoꞌim nasuk kiktek intok ameu tebotek:

―Yanti elwame emou aune ―ti jiakai.

37 Bempo tua womtilataka intok tua majjaeka, senuk ka jiapsamta emo bichaꞌa ti eakai. 38 Taa juꞌu Jesus inimmeu:

―Jaisaakai emeꞌe womtilaa. Jaisa betchiꞌbo emeꞌe inia betana ka inien aꞌ lutuꞌuriaꞌati ea ―ti ameu jiiak―. 39 Mampo intok wokpo em nee bicha, jiba ne inepo junaꞌa. Net em mamma intok junuen em juꞌuneene. Bweꞌituk inien takaakamta enchim nee bichaꞌa benasi, juꞌu ka jiapsame, ka takaak ―ti ameu jiiak.

40 Inien ameu jiupat intok aꞌ mamam intok aꞌ wokiwam am bittuak. 41 Taa bempoꞌim junuen alleerimmea intok suumꞌeaka, ketun ka aꞌ sualeo, aapo juꞌu Jesus:

―Jitasa in bwaꞌaneeꞌu inim aayuk jaꞌani ―ti ameu nattemaek.

42 Junak intok bempo kuchuta sobaꞌita rebbeik intok muumum baꞌawakame au tojak. 43 Aapo aꞌ mabetaka intok ama ame bichapo jiꞌibwak. 44 Junama sepia aapo inimmeu:

―Juꞌu neu yeu sikame, jiba waꞌa ketuni emomak aneka juꞌu in emou teuwaakaꞌu. Iniꞌi, jum Moiseejtukaꞌuta jiꞌosia jiꞌojteipo intok jumeꞌ Liojta betana juꞌuneetuawakame nokaka bem jiꞌojteipo intok jumeꞌ bwikim benaka salmom teaꞌpo, juꞌu neu chupneꞌeti jiaka, siꞌime waꞌa nee betana ama jiꞌojtei junaꞌa ―ti ameu jiiak.

45 Junak aapo, inimeꞌe, Liojta betana jiꞌosia jiꞌojteimmet, machisi amet am juꞌuneetuak. 46 Intok inen ameu jiakai:

―Junuen jiꞌojtei, jukaꞌ Krijtoꞌ teamta, aꞌ utteꞌatukaꞌu aꞌ meꞌetuneeꞌuta, taa intok ket, baji taewaita weyeka, kokkoarim nasuk aꞌ jiabijteneeꞌuta ―ti jiakai―. 47 Intok ketchia, jiba aapoꞌik betana lutuꞌuriaka, siꞌime aniat yoemratau bicha, jum bweꞌu joꞌara Jerusalen teaꞌpo naateka, inimmeu, ka tuꞌik betana bem emo temaeka junuen bem ka tuꞌuwa yaꞌarimmet bem jiokoituneeꞌut aapoꞌik betana ameu noknaꞌa ―ti jiakai―. 48 Emeꞌe intok, inia betana siꞌimeta bitlamtaka, aꞌ teuwaa saka. 49 Intok aꞌ juꞌuneiyaane. Inepone, jukaꞌ in achai Liojta betana emou aꞌ chupneꞌeti jiaka emou naꞌikiarita, ineponee emou aꞌ bittuane. Taa inim bweꞌu joꞌara Jerusalen teaꞌpo emeꞌe tawane, Liojta betana weyeka, jukaꞌ utteꞌata emot aꞌ autuawaꞌpo tajtia ―ti ameu jiiak.

50 Junak intok juꞌu Jesus, junama bweꞌu joꞌarapo yeu am nuk siika, ili joꞌara Betaaniaꞌ teaꞌu tajtia. Junama intok ame bepa jikau mamteka Liojtau bicha ameu tuꞌik am aꞌauriak. 51 Intok ketuni junuen am nokriaka su, aapo laauti jikau siika intok junuen teekau jikau tojituk. 52 Bempo intok junamaꞌa aꞌ yoꞌorisukai, juchi junama Jerusalen teaꞌu nottek, tua alleakai. 53 Intok bempo, jiba jum Liojta teꞌopopo aanen, Liojta bem yoꞌoreeꞌuta, alleaka aꞌ teuwaakai. Junuentune.