―Itepo, tee inikaꞌa oꞌouta inim itomak yoemrata, ka yanti aꞌ eltuamta te aꞌ juꞌuneiyaa. Jukaꞌ tomita jum bweꞌu joꞌara Romapo, juꞌu cheꞌa yoꞌo yaꞌaritau bicha weyemta, ka itom aꞌ bejjeꞌetuaneꞌe ti jiia. Intok ketchia, aapo au juꞌu cheꞌa yoꞌo yaꞌari aꞌ Krijtotukaꞌu aꞌ teuwaa ―ti jiakai.

3 Junak juꞌu Pilaato inen au nattemaek:

―Jaisa empo junaꞌa jaꞌani, juꞌu, jumeꞌ juriommeu cheꞌa yoꞌo yaꞌari ―ti jiiak.

Jesus intok:

―Ineponee junaꞌa, jiba em aꞌ teuwaari benasi ―ti aꞌ yoopnak.

4 Junak intok juꞌu Pilaato, jumeꞌ teꞌopopo tekiakammeu yoꞌowemmeu intok juꞌu junamaꞌa yoemratau:

―Tua ne kaita ka tuꞌik inia yoemtat aꞌ bicha ―ti ameu jiiak.

5 Taa inimeꞌe cheꞌa juniꞌi jiian:

―Iniꞌi, yee aꞌ majtaꞌue inim jurea bwiaraapo, siꞌime yoemrata ka yanti eltua. Kalilea bwiaraaꞌ teaꞌpo naateka intok iꞌan inim ket junaen aꞌ weetua ―ti jiian.

6 Juꞌu kobanaao Pilaato inikaꞌa jikkajaka, jukaꞌ yoemta, bwiaraa Kalileaꞌ teaꞌpo aꞌ jometukaꞌuta nattemaek. 7 Intok junak junaman aꞌ jometukaꞌu tejwaawakai, juꞌu Kalilea bwiaraaꞌ teaꞌpo kobanaao, Eroorej teamtau aꞌ bittuak. Bweꞌituk iniꞌi ket junameꞌe taewaimmet, bweꞌu joꞌara Jerusalen teaꞌpo anekai.

8 Iniꞌi Eroorej teame, Jesujta bichakai, tua alleak. Bweꞌituk binwatuk naateka aꞌ bitpeaka ean. Bweꞌituk aapoꞌik betana etejowamta jikkajilatukan. Intok ket jita aꞌ joaꞌuta, machilaata aet bitbaeka ean. 9 Aapo tua juebenak au nattemaek, taa juꞌu Jesus kaita aꞌ yoopnak. 10 Ketchia junamaꞌa jumeꞌ teꞌopopo tekiakammeu yoꞌowe intok jumeꞌ Moiseejtukaꞌuta nesaurim yee majtame, inimeꞌe ka yaateka aꞌ naꞌatejoka ama aanen. 11 Junak intok juꞌu Eroorej teame intok jumeꞌ aꞌ sontaaowam, kia jak waꞌam aꞌ bichak. Intok ka aꞌ yoꞌorekai, ujyooik intok bejeꞌemta, yoꞌo yaꞌari tajoꞌori benakue aꞌ tajoꞌotuak. Junamaꞌa juꞌu Eroorej teame juchi juꞌu Pilaatoꞌ teamtau aꞌ bittuak. 12 Jiba junae taewait juꞌu Pilaato intok juꞌu Eroorej teame emo nau tuꞌuteka emo eiyaa japtek. Bweꞌituk bat naataka bempo emo bejjeꞌeen.

13 Junak intok juꞌu Pilaato, jumeꞌ teꞌopopo tekiakammeu yoꞌowe intok jumeꞌ junamaꞌa jurio yoemratau yoꞌowem intok jukaꞌ buꞌuuraata nau aꞌawaka, 14 intok inimmeu inen jiiak:

―Emeꞌe inikaꞌa yoemta inim neu aꞌ tojak. Intok inim yoemrata, ka yanti aapoꞌik am eltua ti jiakai. Taa inepo, jiba inim enchim bichapo nee aꞌ temaisuk intok emeꞌe juꞌunea, juꞌu enchim aꞌ naꞌatejooꞌu betana, ka tuꞌik kaita in aet teula tukaꞌu. 15 Intok kia juꞌu Eroorej teame juniꞌi, bweꞌituk aapo juchi aꞌabo itou aꞌ bittualaa. Joo, emeꞌe juꞌunea, iniꞌi kaita ka tuꞌik yaꞌari junae aꞌ meꞌetuneꞌ betchiꞌbo. 16 Junuen san, nee aꞌ bepsu teboka intok chukula nee aꞌ suꞌu tojine ―ti jiiak.

17 Junae pajko taewait, jukaꞌ yoemrata alleetua betchiꞌbo, juꞌu Pilaatotau utteꞌatukan, senuk etaꞌita, aapoꞌik aꞌ jiokoeka yeu aꞌ suꞌu tojineꞌpo. 18 Taa junameꞌe siꞌime nanancha chai japtek:

―Inikaꞌa ka jiokoeka, aꞌ meꞌe tebone. Jukaꞌ Barabaaj teamta yeu suꞌu tojine ―ti jiakai.

19 Iniꞌi Barabaaj teame, jum bweꞌu joꞌarapo, yaꞌuraata bejeꞌeka nassuawamta yaꞌalatukan intok yee suꞌari betchiꞌbo, ama etaꞌitukan. 20 Juꞌu Pilaato, jukaꞌ Jesujta suꞌu toji peaka ean intok juchi ameu nookak. 21 Taa bempo cheꞌa juniꞌi, kusisi:

―Kuuset aꞌ popon tebone ―ti chaaek.

22 Iniamak bajisi juꞌu Pilaato:

―Jitasa ka tuꞌik yaꞌalatakai. Nee kaita aet teulaa junae aꞌ meꞌetuneeꞌuta au chupneꞌ betchiꞌbo. Aꞌ bepsu teboka, intok chukula ne aꞌ suꞌu tojine ―ti ameu jiiak.

23 Taa bempo cheꞌa juniꞌi naa buusti chaaeka nookan, kuuset aꞌ popontuneeꞌu aꞌawakai. Intok jukaꞌ buꞌuuraata intok jumeꞌ teꞌopopo tekiakammeu yoꞌowe junuen ka yaateka am chaaeꞌ betchiꞌbo, inimeꞌe jukaꞌ bem aꞌawaꞌuta am yaꞌariawak. 24 Juꞌu kobanaao Pilaato, jukaꞌ bem aꞌawaꞌuta junen su aꞌ yaꞌababaek. 25 Intok junuen aapo, jukaꞌ bem suꞌu toji iꞌaꞌuta ameu yeu aꞌ suꞌu tojak. Jukaꞌ bem bweꞌu joꞌarapo yaꞌuraata bejeꞌeka, nassuawamta yaꞌalatuka intok yee aꞌ suꞌariakaꞌ betchiꞌbo ama etaꞌita. Jesujta intok bempoꞌim mampo aꞌ suꞌu tojak.

26 Junamaꞌa jukaꞌ Jesujta, kuuset aꞌ popontuneeꞌu bicha aꞌ weiyaawaꞌpo, junameꞌe, senu yoemta, bweꞌu joꞌara Sireeneꞌ teaꞌa betana jometa, Simon teaka, waj betana weyemta nankeka, au nookak intok inikaꞌa, jukaꞌ kuujta aꞌ puꞌaktatuaka, Jesujtat chaꞌaka aꞌ weiyaatuan.

27 Yoemra buꞌuuka aet chaꞌaka kaaten. Intok juebena jaamuchim inimeꞌe, aapoꞌik betchiꞌbo tua ka bem alleaꞌuta teuwaakai bwaanan. 28 Taa juꞌu Jesus inimeꞌe bitchukai, inen ameu jiiak:

―Emeꞌe jaamuchim Jerusalenpo joomem, kateꞌem nee betchiꞌbo bwaana. Ala emeꞌe emo bwanriane, intok jumeꞌ enchim yoemiam. 29 Bweꞌituk chukula taewaim yumaꞌane, junak: “Tua alleenee jumeꞌ ka a yoemiakame intok jumeꞌ kaabeta chiꞌituakame”, ti jiunaao. 30 Junak intok juꞌu yoemra, jumeꞌ kawimmeu nokaka: “Itot wattine”, ti jiu japtene. Intok jumeꞌ ili bwia kawimmeu: “Itom essone”, ti jiune. 31 Bweꞌituk, nee, tuꞌik joamta juniꞌi inien jiokot joakai, emeꞌe, ka inien jiapsame, chukula cheꞌa juniꞌi jiokot joonaa ―ti jiiak.

32 Ketchia aamak woika jumeꞌ tua ka tuꞌika yaꞌarika weiyaawan, jum Jesujta mak nau suꞌabaawakai. 33 Junak bempo jum Mukia kobaꞌ teaꞌu yajakai, junamaꞌa jukaꞌ Jesujta kuuset poponak. Intok ketchia jumeꞌ woika ka tuꞌik yaꞌarika aamake. Senu aꞌ batatana, senu intok aꞌ mikoꞌotana. 34 Jukaꞌ Jesujta, jaibu kuuset aꞌ poponwao:

―Achai, am jiokoine, bweꞌituk inimeꞌe ka juꞌuneaka jukaꞌ bem joaꞌuta aꞌ jooa ―ti jiiak.

Intok jumeꞌ sontaaom, aapoꞌik Jesujta tajoꞌorita nat naꞌikimte betchiꞌbo, amet nau jaꞌatek.

35 Juꞌu yoemra junama aneka aꞌ bitchun. Intok kia junamaꞌa juꞌu yoemratau yoꞌoora juniꞌi, ama aneka, ka aꞌ yoꞌoreka nookan inen jiakai:

―Aapo watem jinneꞌuk. Iꞌan elaꞌpo aapo, aapola au jinneꞌune, lutuꞌuriapo aapo juꞌu Krijtoꞌ teame, Liojta betana yeu puꞌarituko ―ti jiian.

36 Jumeꞌ sontaaom juniꞌi ket junaen ka aꞌ yoꞌoreka au nookan, intok au rukteka chibusi choꞌokok baꞌata aꞌ jiꞌituabaekai. 37 Intok inen au jiian:

―Lutuꞌuriapo empo juꞌu juriommeu cheꞌa yoꞌo yaꞌarituko, empo emo jinneꞌune ―ti jiian.

38 Aapoꞌik aꞌ koba bepa intok jiꞌojtei chayaꞌatukan, iniꞌi rieeko nokpo intok latin nokpo intok ebreo nokpo jiꞌojteitukan: “Iniꞌi junaꞌa juꞌu juriommeu cheꞌa yoꞌo yaꞌari”, ti jiakai.

39 Jumeꞌ ka tuꞌik yaꞌarika junama kuusimmet aamak chayaꞌitukaꞌum betana seenu, ka aꞌ yoꞌoreka:

―Lutuꞌuriapo empo juꞌu Krijto tuko, empo emo jinneꞌunee intok itom ket jinneꞌune ―ti au jiiak.

40 Taa juꞌu seenu, iniamak ama jikat popontukaꞌu, iniau nookak:

―Jaisa kia jeela juniꞌi empo ka Liojtat ee majjae jaꞌani. Jiba empo inim itomak jiokot emo bichakai ―ti au jiiak―. 41 Itepo ala tee lutuꞌuriaka inien jiokot ito bicha bweꞌituk itom yaꞌari betchiꞌbo itou lutuꞌuria inien jiokot itom ito bitneeꞌu. Taa iniꞌi oꞌou, ka tuꞌik tua kaita yaꞌari.

42 Junak aapo:

―Jesus, neu waatine, chukula empo cheꞌa yoꞌotaka nesau taiteko ―ti jiiak.

43 Juꞌu Jesus iniau:

―Lutuꞌuriapo ne eu inen jiia, tua iꞌani, jum Liojta yoemiam cheꞌa bat yaajaꞌu, em nemak ama anneeꞌu ―ti au jiiak.

44 Junama jumak jaibu luula yejten. Junak intok siꞌimekut junamaꞌa ka machika taawak. Iniꞌi junuen kupteo, bajim jiaꞌu tajtia ka machikai. 45 Juꞌu taꞌa juniꞌi ka tachiriaka taawak. Jumeꞌ intoko, jum Liojta teꞌopopo jumeꞌ bweꞌu tajoꞌorim ammea aꞌ pattitukaꞌum, inimeꞌe nananaꞌaku nasuk, jikat naateka, koꞌom tajtia siutek. 46 Junak intok juꞌu Jesus, kusisi inen chaaek:

―In yoꞌowa Lios, in jiapsita nee em mampo suꞌu toja ―ti jiakai.

Inikaꞌa intok teuwaaka, muukuk.

47 Junak juꞌu Romapo betana, junama sontaaommeu yaꞌut, siꞌimeta jukaꞌ ama yeu sikamta aꞌ bitchukai, Liojta yoꞌorek inen jiakai:

―Lutula weeꞌpo, iniꞌi yoeme, kaita ka tuꞌik yaꞌariakan.

48 Siꞌime juꞌu yoemra ama aneꞌu, jukaꞌ junama yeu sikamta jaibu bitchukai, tua bem aꞌ juiwaꞌuta teuwaaka, taupo emo chonaka, junama yeu sajak. 49 Taa siꞌime jumeꞌ aapoꞌik Jesujta taꞌaaꞌum intok ket jumeꞌ jaamuchim, jumeꞌ Kalilea bwiaraaꞌ teaꞌa betana naateka aꞌ sualeka, aamak rejtisukaꞌum, bempo junama ili aman mekka jaꞌabweka, inikaꞌa weyemta aꞌ bitchuka taawak.

50 Junama intok senu yoeme, iniꞌi tua tuꞌi yoemtaka, intok Liojta yoꞌori taꞌaakai, Joseꞌ teaka ama jiapsan. Iniꞌi, jurea bwiaraaꞌ teaꞌpo, ili bweꞌu joꞌara Arima teaꞌati teakaꞌpo jometakai. Aapo junama juriommeu yoꞌo yaꞌuraapo naꞌikiatukan. 51 Iniꞌi Joseꞌ teame, Liojta inim bwiapo cheꞌa yoꞌotaka kateka aꞌ nesauneeꞌuta aꞌ bit boꞌo bichan. Junuen san iniꞌi, junama juriommeu yoꞌoraata bem yaakaꞌu betana ka amemak ean. 52 Aapo junak juꞌu kobanaao, Pilaatoꞌ teamtau noiteka intok junau jukaꞌ Jesujta takaawata au aꞌawak. 53 Chukula junamaꞌa kuuset koꞌom aꞌ teksukai, aapo, bweꞌu tosai tajoꞌorimpo aꞌ biijtak. Intok inikaꞌa, tetapo yee maꞌa betchiꞌbo wojoꞌoriata yaꞌaripo, kee jabeta maꞌawaꞌpo, junama aꞌ teekak. 54 Inim junak yokoriapo aet yum joꞌe taewaitukaꞌ betchiꞌbo, junaet aꞌ yumaꞌ betchiꞌbo siꞌime tuꞌutewan. Junaꞌa taewai jaibu abe naatekai.

55 Jumeꞌ jaamuchim, Kalilea bwiaraaꞌ teaꞌa betana naateka, juꞌu Jesujta mak aman yajilamtukaꞌum, inimeꞌe junaman aꞌ maꞌawakaꞌu bicha sajaka aꞌ bichak. Intok jukaꞌ takaata jachin aꞌ tekwakaꞌut aꞌ mammatek. 56 Intok inimeꞌe jaibu bem joꞌarau nottisukai, bempo jukaꞌ baꞌata intok ochokok tua win jubak aꞌ yaꞌariak. Junak intok Moiseej tukaꞌuta junuen aꞌ nesawekaꞌpo aman, juꞌu aet yum joꞌe taewait bempo junuen yum joꞌekai.