2 Bat naataka juꞌu Isaꞌiajtukaꞌu, Liojta betana noktuawakame, inikaꞌa inien weenemta aꞌ teuwaak, intok aꞌ jiꞌojtek, inen jiakai:

4 Inien aꞌ weyeꞌpo, juꞌu Joan yee babatoowame, junaꞌa junen ama yeu yepsak, bweka paꞌaku, intok Liojtau bicha bem emo jiapsi kuaktanamta ameu teuwaak. Intok bem ka tuꞌuwa yaꞌarim betana, aet emo jiokoituneꞌ betchiꞌbo, ket ameu nookak, intok inen auka, bem batoowatuneꞌpo amani. 5 Junaman intok, Jurea bwiara betana, bweꞌu joꞌara Jerusalen teaꞌpo betana, aꞌ jikkaji betchiꞌbo, juebenaka aman emo nau tojak, juꞌu Joantawi. Intok aꞌ nokaꞌpo aman aꞌ jikkajaka bem jiapsipo aꞌ sualekai. Junamaꞌa batwe Joran teaꞌpo emo batoowatebok; bem ka tuꞌuwa yaꞌarim Liojtau bicha am teuwaakai.

6 Iniꞌi Joan teame kameyo boa ausuꞌlik supe yaꞌarimpo kobakan; beata wikosakan. Aꞌ bwaꞌeeꞌu waka woꞌochim benaekan, intok jukaꞌ mumu baꞌawata jeꞌeen. 7 Intok ameu nokaka inen jiiak:

―Chukula senu aꞌabo yebijne, junaꞌa tua Liojta betana utteꞌakai. Ne intok, ka neu lutuꞌuriatu maisi maachi, kia au kom pokteka, aꞌ bocha wikiawam in aꞌ woitarianeꞌpo amani. 8 Ne intok ―ti jiia juꞌu Joan―, kia lautipo betchiꞌbo, baꞌammea ne enchim batoowa, taa junaꞌa, Liojta tuꞌu jiapsi emot autuane ―ti jiia.

9 Jesus intok, junameꞌe taewaimmet, senu ili joꞌara Nasaret teaꞌpo betana, bwia Kalileaꞌ teaꞌpo katekame, junaꞌabo tana, Joan yee babatoowamtau aman yepsak. Intok aapo ket batwe Joran teaꞌpo batoowatuk. 10 Intok junamaꞌa batwepo, baꞌapo yeu simsuka, sep, jukaꞌ teekata, naꞌikim au aꞌ etapolaata benasi bichak juꞌu Joan. Intok jukaꞌ Liojta tuꞌu jiapsi, wokkoita benasi, aet koꞌom yejtesusekamta bichak. 11 Intok junaꞌabo, teeka betana, jiawai aman koꞌom yuumak, inen jiakai:

―Empo juꞌu in yoemia ―ti jiia―, tua in nakeꞌu, intok etana in alleaꞌu, tuꞌisi net aayuk ―ti jiamta jikkajituk.

12 Junamaꞌa sepsu, juꞌu Liojta tuꞌu jiapsi, mekka bicha, senu bweka paꞌariau bicha aꞌ weeneꞌ betchiꞌbo, junuen aꞌ jiapsipo aꞌ eetuak jukaꞌ Jesujta. 13 Junaꞌa Krijto intok, woi taka taewaimpo tajtia, junamaꞌa bweka paꞌaku, aapola aanek. Juꞌu yoo bebejeꞌeri, Satanaj teame intok, ka tuꞌik aꞌ yaa iꞌakai, aꞌ utteꞌa jooriaka, au yepsaka ama aamak aanen. Pochoꞌoku ka nanau machik yoawara ame naat aanen ketchia. Intok Liojta saweꞌum, ankelesim teame, aꞌ ania betchiꞌbo ama aamak aanen.

14 Jukaꞌ Joan yee babatoowamta, yaꞌuraapo etaꞌituko, aet chukula, juꞌu Jesus, Kalileom bwiarau yepsak. Junamaꞌa intok, jukaꞌ Liojta nok lutuꞌuriata aꞌ teuwa simen. 15 Intok:

―Taewaim yumaꞌasuk ―tiaka―, Liojta amet yee sauneꞌ betchiꞌbo ―ti jiia juꞌu Jesus―. Inia betchiꞌbo ―tiia―, enchim ka tuꞌuwa yaꞌarim ka intok am boꞌo jooriaka, Liojta tuꞌi nok lutuꞌuriata sualeꞌem ―ti jiia.

16 Junamaꞌa intok, Kalileaꞌ teaꞌpo, intok bawe naat weamaka, woi yoemem ama bichak, emo sairakame. Jukaꞌ Simoꞌ teamta intok jukaꞌ Antej teamta bichak. Junameꞌe intok, kuchum yeu baubaekai, bem jiteꞌim baꞌau jimaalataka ama aanen. Bweꞌituk kuchuleomtukan. 17 Junammeu intok juꞌu Jesus inen jiiak:

―Nemak ne enchim kat iꞌa ―tiia―. Bweꞌituk taꞌabwi tekilta ne enchim joo iꞌa. Bweꞌituk yoemrata, bem jinneꞌutuneꞌ betchiꞌbo, enchim ne ameu nok iꞌa ―ti ameu jiiak juꞌu Jesus.

18 Junameꞌe intok, bem ae tekipanoaꞌuta, kia ama woꞌotaka, sep Jesujtamak sajak.

19 Junamaꞌa intok, cheꞌ a bichau jeela weyeka juꞌu Jesus, juchi jumeꞌ woi yoemem bichak, emo sairakame, Jakooboꞌ teamta, Sebereoꞌ teamta uꞌusi, intok jukaꞌ aꞌ sairawata Joan teamta bichak. Intok kuta kanoat jikat jokame, intok bem jiteꞌim chaꞌabwammeu yepsak. 20 Jesus intok sep junammeu, aapoꞌimak am katneꞌ betchiꞌbo ket ameu nookak. Junameꞌe intok, bem achaiwata, Sebereoꞌ teamta, intok aꞌ tekipanoareommak nau, jum barkopo toꞌo sajaka, Jesujtamak sajak.

21 Siꞌime nau, bweꞌu joꞌara Capernauꞌ teaꞌu yajak. Junamaꞌa intok, sabala taꞌapo beja, Liojta yoꞌori betchiꞌbo intok Liojtau bicha nok betchiꞌbo, jum juriom nau emo totojaꞌpo, bweꞌu kariwi kibakeka juꞌu Jesus, ama yee majta taitek. 22 Junameꞌe intok, Jesujta yee majtakaꞌut, tuꞌisim aꞌ sum eiyaak. Bweꞌituk aapo juꞌu Jesus, yee aꞌ majtaꞌue, seenu, yoꞌo lutuꞌuriakamta benasi ameu nookak, intok ka jumeꞌ bem maejtom amaꞌa yee majtaꞌum benasia. 23 Junaman lautipo intok, bweꞌu karipo nau emo totojiwaꞌpo, senu yoeme aman yeu yepsak, bebejeꞌeri jiapsita aꞌ jiapsipo aet aneo, ka tuꞌisaꞌa eetuaꞌu.

24 Junaꞌa intok, chai nokpo, inen au jiiak:

―Empo Jesus ―ti jiia―, bweꞌu joꞌara Nasaret teaꞌpo joꞌaakame, jitasa empo itomak lutuꞌuriak ―taꞌ temaek―. Empo jumak ka ammaꞌali itomak aꞌabo boꞌo jooseka weye jaꞌani ―taꞌ temaek―. Ette juꞌunea, Liojta betana em tuꞌu jiapsi usiaritukaꞌpo ―ti jiia.

25 Taa juꞌu Jesus, junae bebejeꞌerita ka tuꞌi jiapsita, yoemta jiapsipo wajiwa katekamta nok yaatituak.

―Junue yoem jiapsipo em katekaꞌpo yeu weyeꞌe ―tau jiiak.

26 Junak intok, junakaꞌa yoemta, juꞌu bebejeꞌeri jiapsi aet aneꞌu, tuꞌisi utteꞌaka aꞌ takaawata au yootuak, intok aet yeu weepatchi, kusisi aꞌ chachaituak. 27 Siꞌime ama aneme intok, Jesujta yaakaꞌuta bichaka aꞌ sum eiyaak. Junameꞌe intok aꞌ bichaka, inen nau jiu japtek:

―Jitasa tua iniꞌi ―ti nau jiu japtek―. Bemela wemta itom bittuabae, intok utteꞌakamta nooka. Intok jukaꞌ bebejeꞌeri jiapsitaka juniꞌi, aꞌ nesaweꞌpo aman auk.

28 Intok junamaꞌa naateka, aapoꞌik Jesujta a jita joaꞌapo aman, jum bwiara Kalileaꞌ teaꞌpo, siꞌimekut juꞌuneyya japteak.

29 Junamaꞌa nau emo totojiwaꞌpo yeu sikaa, Simoꞌ teamta intok Antej teamta joꞌau bicha sikaa, junaman kibakek juꞌu Jesus. Juꞌu intok Jakooboꞌ teame, intok juꞌu Joan teame aamak kaaten ketchia. 30 Juꞌu Simoꞌ teamta jamut aseꞌebwawa intok, tuꞌisi taji wecheka, ama boꞌokan. Intok aꞌ koꞌokoeꞌpo aman, Jesujtau sep nokwak. 31 Junaꞌa intok, mampo aꞌ bwiseka, aꞌ yechak. Juꞌu taji wechia intok, sep aꞌ suꞌu tojak. Sep intok am jiꞌibworia taitek.

32 Intok kuptisuko, intok juꞌubwa taꞌata aman wetchuko, jumeꞌ koꞌokoeme aman au yeu tojiwan, Jesujtawi. Intok jumeꞌ bebejeꞌeri jiapsim bem jiapsimpo jipueme, au tojiwan. 33 Intok junamaꞌa bweꞌu joꞌarapo joꞌakame, batte siꞌime au jeela, aman au yajak, puetawi. 34 Intok junamaꞌa juebenam, ka nanau machi koꞌokoakame, emo am ineꞌetetuak. Intok ket junalensu, jumeꞌ bem jiapsimpo jukaꞌ bebejeꞌerita betana ka tuꞌim jiapsekame, paꞌakun yeu am bepriak, intok kaita am noktuak. Bweꞌitukim aet juꞌunean.

35 Juchi yokoriapo, tuꞌisi ketwoo tana, matchuu, yejteka juꞌu Jesus, kaabeta aneꞌu bicha, ili mekkaꞌekun bicha siika. Junamaꞌa intok Liotau bicha nookak. 36 Juꞌu Simoꞌ teame intok jumeꞌ aamak rejteme, aet chukula aꞌ jariubaeka yeu sajak. 37 Aꞌ teak intok inen au jiiak:

―Juebenaka intok, aman enchi jaiwa ―tau jiiak.

38 Taa juꞌu Jesus, inen ameu jiiak:

―Omot, taꞌabwi joꞌarammeu bicha te sakaꞌane ―tameu jiiak―, Liojta nokta in ama nokneꞌ betchiꞌbo. Bweꞌituk inia betchiꞌbo ne aꞌabo yebijla ―ti jiia juꞌu Jesus.

39 Junaꞌa intok, Kalilea bwiarat siꞌimekut naj weyeka, emo nau totojiwaka ama emo majtawaꞌapo, ama ameu yepsaka, jukaꞌ Liojta nokta ameu teuwaak. Intok jumeꞌe bem jiapsimpo jukaꞌ ka tuꞌik, bebejeꞌeri jiapsekame, paꞌakun yeu am bepriak.

40 Senu intok, jitae juniꞌi ka a yoremta taka saꞌawakai, ama Jesujtau yepsak. Intok aapoꞌik bichapo tonommea kikteka, chikti aꞌ jiapsie au ujbwanaka:

―Achai ―ti jia―, in takapo, jukaꞌ saꞌawata, empo junen eaꞌateko, aꞌ yoreꞌetuane ―ti au jiiak.

41 Juꞌu Jesus intok, aꞌ jiapsipo tuꞌisi aꞌ jijiokoleka:

―Jeewi ―tau jiiak―. Yoreꞌeneeꞌe ―tau jiaka, aꞌ takawapo aet mamtek.

42 Junaꞌa intok, sep takaapo tuꞌireak. 43,44 Juꞌu Jesus intok, kaabetau aꞌ etejo saeka au nokaka, inen au jiiak:

―Tua kaabetau em etejoneꞌpo aman, aet emo suuaꞌe. Taa cheꞌa juni san, jumeꞌe bem teꞌopopo ama tekiata makritaka, ameu yoꞌo yaꞌarimmeu aman ameu sika, em taka saꞌawata, aꞌ yoreꞌetuawakaꞌpo aman, ama junammeu aꞌ etejoꞌe. Intok Moisejtukaꞌuta nesaulatukaꞌpo aman auneꞌe, em taka saꞌawata aꞌ tuꞌuteitukaꞌpo aman, jumeꞌ ama tekiakame, bem aet juꞌuneeneꞌ betchiꞌbo.

Intok inen au jiaka, aꞌ simtuak.

45 Taa junaꞌa intok, aman sika, siꞌimekut, siꞌimemmeu nas aꞌ etejo taitek. Intok inia betchiꞌbo san, juꞌu Jesus, bwere joꞌarammeu, ka witti a aman kibaken. Taa cheꞌa juniꞌi, bwere joꞌaram mayoat, paꞌariat tatawan. Junamaꞌa intok, siꞌimekut betana, yoemra ama au nau yaajan.