Kokolam nasuk Jesujta aꞌ jiabijtekaꞌpo.
28
Junak jukaꞌ taewai, aet yum joꞌewamta aꞌ simsuko, intok woo busan taewaim aet naateꞌu yeu matchusekai, juꞌu Maria Maareenaꞌ teame intok juꞌu senu Mariaꞌ teame, inimeꞌe, aman jukaꞌ tetapo wojoꞌoria yaꞌarita bitbaeka sajak. 2 Junama lautipo intok, juꞌu bwia tua utteꞌaka au yoyoak. Achai Liojta ankeles teeka betana koꞌom yepsaka juneꞌelaekan. Iniꞌi junamaꞌa yepsaka, tetata, tetapo wojoꞌoriata ae aꞌ pattita, omola aꞌ kechaka intok ae bepa yejtek. 3 Iniꞌi ankeles, yuku beꞌoktiata benasi mamachiakai, aꞌ tajoꞌoriwa intok, sapam benasi tossaalaikai. 4 Aꞌ bichaka, jumeꞌ sontaaom ama aꞌ suuaꞌum, emo yooak majjaekai. Intok inimeꞌe, kia kokkolam benasi taawak. 5 Junak juꞌu ankeles, jumeꞌ jaamuchimmeu:―Kateꞌem majjae ―ti ameu jiiak―. Juꞌuneane, jukaꞌ Jesujta aꞌabo enchim jaiwaꞌpo, jukaꞌ kuuset popontukamta, 6 inim kaabe, bweꞌituk jiabijtelaa, aapoꞌik jiakaꞌa benasia. Aꞌabo kateka, jum aꞌ tekwakaꞌpo em aꞌ jiiwe. 7 Lauti emeꞌe sajaka intok jumeꞌ aꞌ majtimmeu emeꞌe: “Mukiatukan, taa iꞌan aapo jiabijtela. Intok jum bwiaraa Kalileaꞌ teaꞌu aapo emo pat anne. Junaman emeꞌe aꞌ bitne”, ti emeꞌe ameu jiune. Iniꞌi junaꞌa, juꞌu in emou teuwaaꞌeaꞌu ―ti ameu jiiak.
8 Junak jumeꞌ jaamuchim jum tetapo wojoꞌoria yaꞌari betana sep bamsi yeu sajak, majjaekai, intok tua alleakai ketchia. Intok inimeꞌe tenneka, Jesujta majtimmeu, jukaꞌ bemelasi ayukamta teuwaabaeka sajak. 9 Seej chukti inim, juꞌu Jesus ameu kikteka intok ameu tebotek. Bempo junak Jesujtau rukteka intok aꞌ wokiu aꞌ ibaꞌachaꞌaka aꞌ yoꞌorek. 10 Intok aapo:
―Kateꞌem majjae. Aman em sajaka, jumeꞌ nemak werim etejoriane, jum bwiaraa Kalileaꞌ teaꞌu bicha bem katneeꞌpo, intok aman bem nee bitneꞌpo ―ti ameu jiiak.
Jumeꞌ sontaaom aꞌ suuaꞌum, juꞌu bem teuwaakaꞌu
11 Ket jumeꞌ jaamuchim kateo su, waate jumeꞌ sontaaom, aꞌ suuatuawaꞌum, inimeꞌe, bweꞌu joꞌarau sajaka intok jumeꞌ teꞌopopo tekiakammeu yoꞌowemmeu, siꞌimeta jukaꞌ yeu sikamta ameu teuwaak. 12 Inimeꞌe teꞌopopo tekiakammeu yoꞌowe, jumeꞌ juriommeu cheꞌa yoꞌowemmeu sajaka, amemak etejok junuen jitat nau lutuꞌuriabaekai. Chukula inimeꞌe, jumeꞌ sontaaommeu yuꞌin tomita ameu naꞌikiak. 13 Intok inimmeu inen jiiak:
―Emeꞌe, tukaapo enchim ket kokkocheo, jumeꞌ Jesujta majtim ama yajaka, jukaꞌ takaata etbwak, ti jiune. 14 Intok jukaꞌ kobanaaota inikaꞌa aꞌ juꞌuneiyaak juniꞌi, itepo te aꞌ nok kobaꞌanee intok kaita emou weeneꞌ betchiꞌbo itepo enchim aniane ―ti ameu jiiak.
15 Junak intok jumeꞌ sontaaom junakaꞌa tomita mabetaka, intok sajaka, jukaꞌ bem tejwaawakaꞌuta aꞌ yaak. Intok jumeꞌ juriom iꞌan tajtia junuen aꞌ lutuꞌuriate.
Jesujta jumeꞌ aꞌ majtim, jitasa bempoꞌim aꞌ tekil makakaꞌu
16 Junuen san jumeꞌ woj mamni ama wepulaka, Jesujta majtim, bwiaraa Kalileaꞌ teaꞌu bicha sajak, jum kawi, Jesujta am tejwaalatukaꞌawi. 17 Intok junak, inimeꞌe, jukaꞌ Jesujta bichakai aꞌ yoꞌorek. Taa wate ala, ka junuen witti aꞌ junaꞌatukaꞌpo aꞌ taꞌaak oꞌoben. 18 Junak intok juꞌu Jesus ameu rukteka intok inimmeu:
―Teekau intok kia inim bwiapo juniꞌi, siꞌimekuu cheꞌa in yoꞌotuneeꞌuta, inepo ne iꞌan aꞌ mabetri ―ti ameu jiiak―. 19 Junuen san emeꞌe, inim siꞌime ka nanau machi yoemratau sajaka, intok inimeꞌe nee betana weyemta bem sualneꞌ betchiꞌbo ameu noknee. Liojta betana intok aꞌ yoemiawata intok aapoꞌik tuꞌu jiapsi betana lutuꞌuriaka, emeꞌe am batoꞌowaa sakane. 20 Intok emeꞌe, siꞌimeta jukaꞌ in enchim aet tejwaaꞌuta, junakaꞌa, bempoꞌim aꞌ boꞌo joorianeꞌ betchiꞌbo emeꞌe am majta sakane. Intok inim siꞌimeta luꞌuteꞌu tajtia, jiba taꞌapo in emomaktuneꞌpo emeꞌe aꞌ juꞌuneiyaane.