3 Juuras juꞌu yeu aꞌ bwisekame junak, jukaꞌ Jesujta meꞌetuneꞌ betchiꞌbo aet nesawakamta aꞌ juꞌuneiyaakai, au koptaka, jumeꞌ senu taka ama woj mamni tosai tomim, jumeꞌ teꞌopopo tekiakammeu yoꞌowe intok junamaꞌa juriommeu cheꞌa yoꞌowemmeu am nottak. 4 Intok:

―Liojta bichapo ne ka tuꞌik yaꞌari. Senuk, ka tuꞌik kaita yaꞌarik, aꞌ meꞌetuneꞌ betchiꞌbo yeu aꞌ bwisekai ―ti ameu jiiak.

Taa bempo:

―Iniꞌi, ito betchiꞌbo kaita teuwaa. Inikaꞌa empo aꞌ yaꞌari, em mampo aayuk ―ti au jiiak.

5 Junak juꞌu Juuras junakaꞌa tomita, jum teꞌopopo naꞌikim aꞌ woꞌotaka intok sikaa, au chayak.

6 Jumeꞌ teꞌopopo tekiakammeu yoꞌowe, junakaꞌa tomita nuꞌuka, intok:

―Inikaꞌa tomita, jum teꞌopo tomita aukaꞌpo, katte a aman aꞌ jipue. Bweꞌituk iniꞌi, senuk aꞌ meꞌetuneꞌ betchiꞌbo ae bejeꞌetuari ―ti jiiak.

7 Chukula inimeꞌe, wepulsi nau eaka, junae tomie, junuen, senu Babuta tekipanoamta waj bwia, ae jinu betchiꞌbo etejok. Junuen jumeꞌ ka ama joomem ama bem mamaꞌaneeꞌuta aꞌ jipuꞌ betchiꞌbo. 8 Inia betchiꞌbo san junaꞌa waasa iꞌan taewaimmeu tajtia, Ojbo bwia ti teuwaawa. 9 Intok inien yeu chupuk iniꞌi, juꞌu Liojta betana juꞌuneetuawaka, Jeremiaj teamta inikaꞌa: “Jumeꞌ senu taka ama woj mamni tosai tomim nuꞌuka. Tomita, jukaꞌ Ijraꞌel yoemrata ae betchiꞌbo aꞌ aꞌawakaꞌuta. 10 Intok inimmea, senuk babu bwiata ama tekipanoamta waj bwiata jinuk. Tua jukaꞌ achai Liojta nee aet sawekaꞌpo amani”, ti aꞌ teuwaariakaꞌuta.

11 Jesus, juꞌu kobanaota bichapo yeu tojiwak. Iniꞌi intok:

―Jaisa empo junaꞌa jaꞌani, juꞌu, jumeꞌ juriommeu cheꞌa yoꞌo yaꞌari ―ti au nattemaekai.

Juꞌu Jesus iniau:

―Lutuꞌuria, junuen em aꞌ teuwaari benasia ―ti au jiiak.

12 Intok junako jumeꞌ teꞌopopo tekiakammeu yoꞌowe intok jumeꞌ juriommeu cheꞌa yoꞌowe, jitat aꞌ nanaꞌatejoo, Jesus kaita am yoopnak. 13 Junak juꞌu Pilaato:

―Jaisa empo ka aꞌ jikkaja jaꞌani siꞌimeta jukaꞌ enchi bejeꞌeka teuwaawamta ―ti au jiiak.

14 Taa Jesus, kaita aꞌ yoopnak. Junuen san juꞌu kobanao, tua aꞌ suum eiyaaka taawak. Intok kaita ae tana teuwaa machiakan.

15 Intok ketchia, juꞌu kobanaao, junameꞌe pajko taewaimmet senuk etaꞌita yeu aꞌ weeneꞌpo junuen waatiawamta, yeu aꞌ suꞌu tojineꞌpo junuen aꞌ boꞌo joorian. 16 Junakriapo intok, senu tua taꞌeewaka, Barabaaj teaka etaꞌitaka jipuꞌuwan. 17 Intok bempoꞌim junako ama nau aneo, juꞌu Pilaato:

―Jabetasa emeꞌe suꞌu toji iꞌa, jukaꞌ Barabaj teamta oo jukaꞌ Jesujta, Krijto ti teuwaawamta ―ti ameu nattemaek.

18 Bweꞌituk aapo, bempoꞌim aet kopteꞌ betchiꞌbo, bem yeu aꞌ tojilatukaꞌpo, aꞌ mammatelatukan.

19 Jukaꞌ Pilaatota ket jum yoꞌotaka yeyesaꞌpo aꞌ katek su, juꞌu aꞌ jubiawa nokta au bittuak: “Ka au suuane, iniau siꞌimeku tuꞌi yoemtawi. Bweꞌituk tutukabiak tua nee jantiaachik tenkuk, jiba inia oꞌouta betchiꞌbo”, ti au jiakai.

20 Taa jumeꞌ teꞌopopo tekiakammeu yoꞌowe intok jumeꞌ juriommeu cheꞌa yoꞌowe, jukaꞌ yoemrata ama anemta nok yuꞌuk junuen Barabaaj teamta aꞌ suꞌu tojinaaꞌuta aꞌawaka intok jukaꞌ Jesujta mukneeꞌuta bem aꞌ teuwaaneꞌ betchiꞌbo. 21 Juꞌu kobanaao juchi ameu nokaka inen ameu nattemaek:

―Inimeꞌe woim betana, jabetasa emeꞌe suꞌu toji iꞌa.

Bempo intok:

―Jukaꞌ Barabaaj teamta ―ti jiiak.

22 Juꞌu Pilaato intok:

―Jukaꞌ Jesujta su, jukaꞌ Krijtoꞌ teamta, jaisa nee aꞌ yaꞌane ―ti ameu nattemaek.

Siꞌime junameꞌe:

―Kuuset aꞌ popon tebone ―ti jiaka aꞌ yoopnak.

23 Junak intok juꞌu Pilaato:

―Jitasa ka tuꞌik iniꞌi yaꞌarikai ―ti ameu jiiak.

Taa bempo:

―Kuuset aꞌ popon tebone ―ti juchi chaaen.

24 Juꞌu Pilaato intok, junuen kaita a tuꞌutetuꞌpo juꞌuneakai, ala, junakaꞌa junamaꞌa ka nau eewamta ayukaꞌuta bichakai, baꞌam aꞌawaka intok siꞌime junamaꞌa aneme bichapo mam bajimak inen:

―Inikaꞌa yoemta ka tuꞌik kaita yaꞌarika aꞌ mukneemta betana juꞌu ka tuꞌuwa ka net aayuk, emeꞌe aꞌ yaꞌari ―ti jiakai.

25 Juꞌu yoemra intok siꞌime:

―Itepo intok jumeꞌ itom yoemiam aꞌ mukneeꞌu betana, itom aꞌ yaꞌariakaꞌpo itepo juꞌunea ―ti jiaka aꞌ yoopnak.

26 Junako juꞌu Pilaato, jukaꞌ Barabaaj teamta yeu aꞌ simtuaka, chukula jukaꞌ Jesujta bepsu teboka, kuuset aꞌ popontuneꞌ betchiꞌbo ameu aꞌ suꞌu tojak.

27 Chukula jumeꞌ kobanaaota betana sontaaom, kobanaaota bweꞌu kariu wajiwa tana, sontaom aneꞌu aꞌ tojak. Intok siꞌime juꞌu sontaoraa au nau tojiwak. 28 Junak sep, inimeꞌe, aꞌ supe wattak intok taꞌabwim, unnaa sikiim aꞌ supetuakai. 29 Intok juya wichakamta nat koꞌelai yaaka, kobat aet aꞌ yechak. Batatana mampo intok, bakata benak aꞌ makak. Junak intok ae bichapo tonommea jajapteka, intok aꞌ junn jiaawaka:

―Ketchi allea, juꞌu juriommeu cheꞌa yoꞌo yaꞌari ―ti au jiian.

30 Ketchia, inimeꞌe aet chit wat watten. Intok jukaꞌ bakata benak aꞌ nuꞌuka, kobat ae aꞌ beban. 31 Chukula junuen, jak waꞌam aꞌ bitchukai, jumeꞌ sikii supem aꞌ yechaꞌariak intok inimeꞌe aꞌ supewampo juchi aꞌ kobatuak. Chukula inimeꞌe junuen kuuset aꞌ poponneꞌ betchiꞌbo yeu aꞌ nuk sajak.

32 Junak junamaꞌa yeu katekai, senu yoemta, bweꞌu joꞌara Sireeneꞌ teaꞌa betana joꞌaaka, Simon teamta nankek. Inikaꞌa, inimeꞌe, kuujta Jesujta weiyaaꞌuta, utteꞌapo aꞌ puꞌaktituan.

33 Junuen kateka, inimeꞌe jum Kolkotaꞌ teaꞌu yajak. Iniꞌi nooki intok, Mukia kobata katekaꞌpo, ti jiubae. 34 Junamaꞌa inimeꞌe, jukaꞌ Jesujta, paꞌasi baꞌawata, chibu jittoatamak kuukuutita aꞌ jiꞌituak. Taa inikaꞌa jiwekai, juꞌu Jesus ka aꞌ waatak.

35 Junak, jaibu kuuset aꞌ poponsuako, jumeꞌ sontaaom, juꞌu Jesujta tajoꞌori nat aꞌ naꞌikimte betchiꞌbo, nau jaꞌatek. Junuen yeu chupukai juꞌu, jukaꞌ Liojta betana juꞌuneetuawaka aꞌ teuwaakaꞌuta: “In tajoꞌori, inimeꞌe nat naꞌikimtek, aet nau jaꞌatekai”, ti aꞌ jiakaꞌuta. 36 Chukula inimeꞌe junama jootek aꞌ suuabaekai. 37 Aꞌ koba bepa intok jiꞌojtei, inia betchiꞌbo junuen aꞌ meꞌewakaꞌu ama chayaꞌawak: “Iniꞌi junaꞌa juꞌu Jesus, juꞌu juriommeu cheꞌa yoꞌo yaꞌari”, ti jiakai.

38 Ketchia, woika jumeꞌ jita eꞌetbwame aamak kuusimmet poponwak. Seenuk aꞌ batatana, senuk intok aꞌ mikkoꞌotana. 39 Jumeꞌ intoko junamaꞌa aet waꞌam kateme, ka aꞌ yoꞌoreka nookan, jikau intok koꞌom kobatekai. 40 Intok inimeꞌe:

―Empo, jukaꞌ Liojta teꞌopota tatabeka intok baji taꞌapo juchi emo aꞌ yechaꞌaneꞌeti jiame, junum emo jinneꞌu. Empo tua Liojta yoemiatuko, junum kuuset em poponripo koꞌom weyeꞌe, ―ti jiakai.

41 Junuen ketchia jumeꞌ teꞌopopo tekiakammeu yoꞌowe intok jumeꞌ Moiseejtukaꞌuta nesaurim yee majtame, jumeꞌ paiseeom teammake intok jumeꞌ juriommeu cheꞌa yoꞌowe, ket junuen ka aꞌ yoꞌoren intok bempo nau:

42 ―Watem jinneꞌuk taa aapo ka a au jinneꞌu ―ti jiian―. Iniꞌi lutuꞌuriapo Ijraꞌel yoemratau cheꞌa yoꞌo yaꞌarituko, junum aꞌ poponripo koꞌom weene itom aꞌ sualneꞌ betchiꞌbo ―ti nau jiakai―. 43 Liojtat aꞌ eaꞌuta teuwaalaa. Iꞌan elaꞌpo Lios aꞌ jinneꞌune, lutuꞌuriapo naksi aꞌ eiyaakai, aapo su junuen itou, Liojta betana au yoemiariꞌiti jiakai.

44 Kia jumeꞌ jita eꞌetbwame aamak junamaꞌa kuusimmet popontukame juniꞌi, ket ka aꞌ yoꞌoreka au nookan.

45 Junak, junamaꞌa siꞌimekut ka machisi taawak, luula katek naateka, kupteo, bajim jiaꞌu tajtia. 46 Intok jumak ket jiba junamaꞌa bajim jiao, Jesus kusisi:

―Eli Eli, lama sabaktani ―ti chaaek. Iniꞌi: Achai Lios, achai Lios, jaisaaka empo nee inim inepolaik koptala, ti jiubae.

47 Waate, jumeꞌ junamaꞌa aneꞌum, junuen aꞌ jikkajaka:

―Iniꞌi, bat naataka juꞌu Liojta betana juꞌuneetuawaka nokakame, Eliaj teamtau chaae ―ti jiian.

48 Juname betana seenu, lauti buiteka, jita, baꞌata nunuꞌemta ejponjaꞌ teamta nuꞌuka, chukula intok junakaꞌa binaakretae aꞌ komoniaka, tebe kutat aꞌ sumaka intok aman jikau au aꞌ yumaꞌariak, junuen junakaꞌa aꞌ jiꞌineꞌ betchiꞌbo. 49 Taa jumeꞌ waate:

―Aꞌ suꞌu toja, boꞌo bitneete. Jumak juniꞌi juꞌu Eliaj teame aꞌabo aꞌ jinneꞌune ―ti jiiak.

50 Juꞌu Jesus juchi weeꞌpo kusisi chachaek. Intok junak muukuk. 51 Junama lautipo, Liojta teꞌopopo jumeꞌ bweꞌuu tajoꞌorim chaꞌakame, nananaꞌaku nasuk, jikat naateka koꞌom tajti siutek. Juꞌu bwia intok au yoyoak, jumeꞌ bwere tetam intok naꞌikim jamtek. 52 Jumeꞌ intok kokkoarim ama maꞌatukaꞌum, emo etapok. Juebenak intok waate jumeꞌ Liojta sualeka kokkokame, bem takaam juchi jiapsak. 53 Intok chukula, jukaꞌ Jesujta, kokkoarim nasuk aꞌ jiabijtesuko, inimeꞌe junamaꞌa bem maꞌarimpo yeu sajak. Intok juꞌu bweꞌu joꞌara, Liojta yeu puꞌariu, Jerusalen teaꞌu kiimuk. Junaman inimeꞌe, juebenaka am bichakai.

54 Junako juꞌu sontao yaꞌut intok jumeꞌ aamak jukaꞌ Jesujta suuame, jukaꞌ bwiata au yoakamta intok jukaꞌ watek yeu sikamta bichaka, inimeꞌe tua majaek, intok:

―Lutuꞌuriapo, iniꞌi yoeme, Liojta betana yoemiaritukan ―ti jiiak.

55 Junamaꞌa juebena jaamuchim, mekka jaꞌabweka aꞌ bitchun. Inimeꞌe intok, bwiaraa Kalileaꞌ teaꞌa betana naateka, Jesujtamak rejteka intok aꞌ anialamtukan. 56 Ame nasuk juꞌu Maria Maareenaꞌ teame, ket juꞌu senu Maria, juꞌu Jakooboꞌ teamta intok Joseꞌ teamta ae. Inimeꞌe intok juꞌu Sebereeoꞌ teamta yoemiam ae ama aanen.

57 Junak, tukaariau yumaꞌasekai, yoeme, tua tomeka, Jose ti teaka, iniꞌi, ili bweꞌu joꞌara Arima teaꞌ teaꞌpo joꞌaakai, aman yepsak. Intok iniꞌi ket, bat naataka Jesujta mak eaka jiapsakaꞌu. 58 Junak iniꞌi, Pilaatoꞌ teamtau sika intok jukaꞌ Jesujta takaawata au aꞌawak. Pilaato junak nesawek, aꞌ maknaꞌ betchiꞌbo. 59 Juꞌu Josee, jukaꞌ takaata nuꞌuka, bweꞌu tajoꞌorim tossaalaimpo aꞌ biijtaka, 60 intok iniꞌi, bemelaka, jum tetapo yaꞌari, aꞌ attea, aapoꞌik betchiꞌbo aꞌ yaꞌatebokaꞌpo, junamaꞌa aꞌ teekak. Chukula junakaꞌa, jum ama kimaꞌawaꞌpo, bweꞌu tetae aꞌ pattasuka, siika. 61 Intok junamaꞌa ket, Maria Maareenaꞌ teame intok juꞌu senu Maria, aꞌ tekwakaꞌpo bichapo jookan.

62 Juchi yokoriapo, aet yum joꞌewamta taewaita betchiꞌbo, siꞌimeta tuꞌutesuako, aet chukula jumeꞌ teꞌopopo tekiakammeu yoꞌowe intok jumeꞌ paiseeom teame, inimeꞌe juꞌu Pilaatotau yajaka 63 intok inimeꞌe:

―Achai, wae yee bai tattaꞌasukamtau itepo waatek, ketun jiapsakai, junakaꞌa inen: “Baji taewata weyeka, kokkolam nasuk au jiabijteneꞌeti”, jiaka aꞌ teuwaakaꞌubewi ―ti au jiiak―. 64 Inia betchiꞌbo jum aꞌ boꞌokaꞌu, empo baji taewata simsuꞌutajtia aꞌ bitneeme aman bittuane. Junuen jumeꞌ aꞌ majtim ka aman sajaka tukaapo jukaꞌ takaata bem aꞌ nuk sajaka, intok chukula, yoemratau: “Kokolam nasuk jiabijtek”, ti bem jiuneꞌ betchiꞌbo. Bweꞌituk junuen yeu aꞌ siiko, iniꞌi, bat naataka bepa, cheꞌa bweꞌu aa nokiꞌichia tu ean ―ti au jiiak.

65 Juꞌu Pilaato inimmeu:

―Junum emeꞌe am jipue jumeꞌ sontaaom. Emeꞌe, aman sajaka, jum aꞌ boꞌokaꞌpo, tuꞌisi enchim aꞌ waataꞌpo aman, aꞌ suua tebone ―ti ameu jiiak.

66 Junak intok inimeꞌe sajaka intok jum aꞌ boꞌokaꞌu aꞌ bitneeme aman tojak. Bweꞌu teta, junakaꞌa ae pattita, yaꞌuraata betana machilaata ama chayak. Intok jumeꞌ sontaom ama toꞌo sajakai.