2 ―Enchim jaibu juꞌuneaꞌa benasia, wooi taewaim beꞌee, juꞌu bwara jisuꞌawaka pajkonaamta aet weeneo. Juꞌu intoko emo benasi yoeme, watem mampo suꞌu tojitunee junuen kuuset aꞌ popontuneꞌ betchiꞌbo ―ti ameu jiiak.

3 Junameꞌe taewaimmet jumeꞌ teꞌopopo tekiakammeu yoꞌowe, jumeꞌ Moiseejtukaꞌuta betana nesaurim yee majtame intok jumeꞌ juriommeu cheꞌa yoꞌowe, inimeꞌe, juꞌu teꞌopopo tekiakammeu cheꞌa yoꞌowe, Kaipaaj teamta bweꞌu karipo ama yaajiwaꞌpo emo nau tojak. 4 Junamaꞌa inimeꞌe junuen jukaꞌ Jesujta junuen aꞌ bai taꞌaaka aꞌ bwiseka intok aꞌ meꞌ betchiꞌbo aet nau etejok. 5 Taa inimeꞌe:

―Ka pajko taewaimmetchi aꞌ bwijne, junuen juꞌu yoemratau ka yanti elwamta ka ameu yaꞌa betchiꞌbo.

6 Jesus, ili joꞌara Betaaniaꞌ teaꞌpo aanen, senu Simon teamta joꞌapo. Iniꞌi, Lepraꞌ teamta koꞌokoak ti taꞌeewame. 7 Senu jamut intok, jitaꞌapo tosai tetae yaꞌaripo, ochokok baꞌata benak tua win jubaka, unnaa bejeꞌemta weiyaakai au ruktek. Junak, jukaꞌ Jesujta mesau aꞌ kateko, aapo kobat, junakaꞌa baꞌata siꞌimeta aet yaak. 8 Jumeꞌ Jesujta majtim junak, inikaꞌa bichakai, oꞌomtek intok inimeꞌe:

―Jaisa betchiꞌbo inikaꞌa kia beuti aꞌ woꞌotak ―ti jiu japtek―. 9 Iniꞌi, yuꞌin tomipo a nenkitun. Junuen jumeꞌ jiokot eame am ania betchiꞌbo ―ti jiakai.

10 Juꞌu Jesus inikaꞌa jikkajaka intok inimmeu:

―Jaisaaka emeꞌe inia jamuttau suua. Iniꞌi, aapoꞌik neu yaꞌari, tuꞌuwa jiba ―ti ameu jiiak―. 11 Bweꞌituk jumeꞌ jiokot jiapsame emeꞌe jiba inim emo mak am bitne, taa nee emeꞌe ka jiba inim emo mak bitne. 12 Juꞌu inikaꞌa jamutta yaꞌari junuen inikaꞌa baꞌata benak win jubak net aꞌ yaꞌarikai, iniae aapo, nee maꞌatuneeo jukaꞌ net yaꞌaꞌeewamta jaibu aꞌ yaꞌari. 13 Lutuꞌuriapo ne inen emou jiia, jak juniꞌi, inikaꞌa nok lutuꞌuriata aꞌ teuwaawaꞌpo siꞌime aniatchi, ket inikaꞌa jamutta juꞌu aꞌ yaꞌari teuwaatunee junuen aapoꞌiku waatinaꞌ betchiꞌbo.

14 Junak intoko jumeꞌ woj mamni ama wooika, Jesujta majtim betana, seenu, Juuras Ijkariooteꞌ teame, teꞌopopo tekiakammeu yoꞌowemmeu sikaa, amemak etejok. 15 Intok iniꞌi:

―Jaikiksa emeꞌe nee makne, junuen jukaꞌ Jesujta enchim mampo in aꞌ suꞌu tojineꞌ betchiꞌbo ―ti ameu jiiak.

Junako bempo, senu taka ama woj mamnik tosai tomim aꞌ bejeꞌetuak. 16 Junamaꞌa naateka juꞌu Juraj teame, junammeu jukaꞌ Jesujta suꞌu toji betchiꞌbo, jakwoo cheꞌa aꞌ tuꞌireakaꞌuta boꞌo bichan.

17 Bat juꞌu taewait, jumeꞌ paanim ka reberuakame bwaꞌawaka pajkota aet naateeo, jumeꞌ Jesujta majtim Jesujtau rukteka intok inen au nattemaek:

―Jakunsa empo, jukaꞌ pajkot kupteo em bwaꞌaneeꞌuta, itom aꞌ tuꞌute iꞌa ―ti jiakai.

18 Aapo inen ameu jiiak:

―Bweꞌu joꞌarau emeꞌe katnee, aman inia senu yoemta aꞌ joꞌawi. Junamaꞌa intok iniau emeꞌe: “Nee betana siꞌimeta aet chupneeꞌu, juꞌu taewai yumaꞌasek. Intok jum em joꞌapo ne, jumeꞌ in yeu puꞌarimmak, jukaꞌ pajkot joowamta aꞌ chupaꞌabae”, ti jiia ―ti emeꞌe au jiune.

19 Jumeꞌ aꞌ majtim, Jesujta am sawekaꞌpo aman aayuk. Intok pajkot kupteo bwaꞌaneemta yaakai.

20 Junak tukaariau yumaꞌaseka, juꞌu Jesus, jumeꞌ woj mamni ama woika yeu aꞌ puꞌarimmak mesau ruktek. 21 Bempoꞌim intok ketuni jiꞌibwaao, aapo:

―Lutuꞌuriapo ne inen emou jiia, emo betana senu nee yeu bwijne ―ti ameu jiiak.

22 Junak intok bempo tua emo sioktuak. Intok inimeꞌe weꞌepulaka:

―Achai, jaisa inepo junaꞌatunee jaꞌani ―ti au nattemai japtek.

23 Jesus intok inimeꞌe:

―Waꞌa in puꞌatopo nemak jiꞌibwakame, iniꞌi junaꞌatunee waꞌa nee yeu bwijneeme ―ti am yoopnak―. 24 Juꞌu emo benasi yoemtau, Liojta nok lutuꞌuriapo aapoꞌik betana junuen aꞌ jiꞌojteitukaꞌpo aman au chuppe. Taa tua jiokot au machine, juꞌu yeu aꞌ bwijneemtawi. Inia oꞌoutau cheꞌa juniꞌi tuꞌi ean, juꞌu ka yeu aꞌ yoemtuꞌeaꞌu ―ti jiiak.

25 Junak intok nookak juꞌu Juuras, juꞌu aapoꞌik yeu bwijneeme intok:

―Yee majtame, jaisa tua inepo junaꞌatunee jaꞌani ―ti au jiiak.

Jesus:

―Jeewi, empo junaꞌa ―ti aꞌ yoopnak.

26 Bempoꞌim ketuni jiꞌibwao su, juꞌu Jesus, paanim nuꞌuka, ame betchiꞌbo Liojta baisaek. Intok junameꞌe rebektasukai, jumeꞌ aꞌ majtimmeu am bwisek:

―Akeꞌem am bwaꞌee, iniꞌi in taka oꞌoben ―ti ameu jiakai.

27 Chukula ket jukaꞌ paꞌasi baꞌawata ama ayukaꞌu nuꞌuka, ae betchiꞌbo Liojta baisaeka intok inikaꞌa bempoꞌimmeu bicha aꞌ bwisek:

―Siꞌime emeꞌe inikaꞌa jiꞌine ―ti jiiak―. 28 Bweꞌituk iniꞌi in ojbo oꞌoben, Liojta mak bemelasi emo tuꞌutewamta aꞌ lutuꞌuriatukaꞌuta aꞌ teuwaame. Intok iniꞌi, juebenammeu tuꞌineeka, bem ka tuꞌuwa yaꞌarim betana am jiokoi betchiꞌbo woꞌotituneeme ―ti jiiak―. 29 Taa inepo ne inen emou jiia, inikaꞌa paꞌasi betana baꞌata, kannee intok emomak aꞌ jiꞌine, juꞌu taewait, chukula in achai cheꞌa yoꞌotaka aꞌ katekaꞌu, paꞌasi baꞌawata bemelaka ka inile benak, itom nau aꞌ jiꞌineeo tajtia.

30 Intok chukula, jumeꞌ bwiikim bwiksuka, Oliiboꞌokawiꞌ teaꞌu bicha yeu sajak. 31 Junak intok juꞌu Jesus inimmeu:

―Siꞌime emeꞌe inia tukaariat nemak enchim eaꞌuta aꞌ koptane ―ti ameu jiiak―. Bweꞌituk jum Liojta nok lutuꞌuriapo: “Jukaꞌ bwaram suuamta ne aꞌ meꞌene, jumeꞌ bwalam intok naꞌikimtune”, ti jiꞌojtei. 32 Taa chukula, inepo kokkoarim nasuk jiabijtesuko, jum bwiaraa Kalileaꞌ teaꞌu ne emo pat anne ―ti ameu jiiak.

33 Junak intok juꞌu Peeo:

―Siꞌimem junuen emak bem eaꞌuta am koptak juniꞌi, inepo ne kaibu junuen aune ―ti au jiiak.

34 Juꞌu Jesus junak:

―Lutuꞌuriapo ne eu inen jiia, inia tukaariat, totoi oꞌowiata kee aꞌ kuseo, empo, temaiwaka, bajisi ka nee emo taꞌaꞌati jiune ―ti au jiiak.

35 Juꞌu Peeo:

―Kia nee emak meꞌetuneeka juniꞌi, kannee ee betana tiune ―ti au jiiak.

Intok siꞌime jumeꞌ aꞌ majtim ket jiba junaen jiian.

36 Junak intok juꞌu Jesus, jumeꞌ aꞌ majtimmak, aman jum Jetsemaniꞌ teaꞌu yepsak. Junammeu intok:

―Inim jooye, ket imin, Liojtau bicha ne nokaꞌu tajtia ―ti ameu jiiak.

37 Intok Peota intok wooi jumeꞌ Sebereeoꞌ teamta uꞌusim nunuka, junamaꞌa tua siokaka intok ka allee taitek. 38 Junak intok aapo inimmeu:

―Tua nee ama butti ka ineꞌemaisi sioka. Inim emeꞌe tawane, intok nemak emeꞌe eaka ka kokotne.

39 Junako juꞌu Jesus, juchi ili bichau bicha sikaa, intok tonommea weeka, bwiau koꞌom chaꞌaka, Liojtau bicha nookak:

―In yoꞌowa, a junuen yeu aꞌ weyeo juniꞌi, inikaꞌa bettesi jiokot machika neu weyemta, ka junuen yeu aꞌ weetuane. Taa iniꞌi, ka in eaꞌpo amantune, taa tua em junen eaꞌpo amantukai ―ti jiakai.

40 Junak intok, jumeꞌ yeu aꞌ puꞌarim tawalaꞌu notteka intok kokochemmeu yepsak. Peotau intok:

―Jaisa emeꞌe kia senu orapo juniꞌi, ka kokocheka a in taawak jaꞌani ―ti ameu nattemaek―. 41 Kateꞌem kokkoche. Intok Liojtau bicha em emo nokria junuen ka tuꞌikut ka enchim jiꞌopneꞌ betchiꞌbo. Lutuꞌuriapo emeꞌe tuꞌikut jiapsek, taa juꞌu inim enchim takaa, tua ka au yuuma ―ti ameu jiiak.

42 Inia mak, woosa aman sikaa:

―In yoꞌowa, inikaꞌa jiokot neu weenemta, jiba junuen aꞌ utteꞌatuneo, junako, tua em eaꞌpo amantune ―ti jiaka Liojtau bicha nookak.

43 Sep notteka intok juchi jumeꞌ yeu aꞌ puꞌarim kokochemmeu yepsak. Bweꞌituk inimeꞌe yetem ka yuꞌeen. 44 Inimeꞌe kia am toꞌo sikaa, intok iniamak bajisi, juchi Liojtau bicha nokbaeka siika, jiba jukaꞌ bat aꞌ teuwaakaꞌuta au teuwaakai. 45 Junak intok jumeꞌ aꞌ majtim tawalaꞌu nottek intok:

―Jaisa emeꞌe ketun yum joꞌeka kokkoche jaꞌani. Yumaꞌasuk juꞌu oora jukaꞌ emo benasi yoemta aet ka tuꞌi yoememmeu aꞌ suꞌu tojinaaꞌu ―ti jiiak―. 46 Joteꞌem, jante bu. Aꞌabo weye juꞌu nee yeu bwijneeme.

47 Jesujta ketun aꞌ nokao su, junak juꞌu Juuraj teame ama yepsak. Iniꞌi, jumeꞌ woj mamni ama woika, Jesujta yeu puꞌarimmak naꞌikiatukaꞌu. Intok wate juebenaka aamak kaaten, tettebe kuchiꞌim intok kutam weiyaakai. Inimeꞌe, teꞌopopo tekiakammeu yoꞌowem intok jumeꞌ junamaꞌa juriommeu cheꞌa yoꞌowem betana katekai. 48 Iniꞌi Juuras, juꞌu yeu aꞌ bwisekame, senu machilaata am tejwaalatukan:

―Juꞌu, in aet tenteneeꞌu junaꞌatune. Aꞌ bwiseka aꞌ weiyaane ―ti jiakai.

49 Junak intok aapo, juꞌu Jesujtau rukteka intok:

―Ketchi allea, yee majtame ―ti au jiiak.

Intok aet tentek.

50 Juꞌu Jesus:

―Jallaꞌi, jitasa empo aꞌabo nuꞌusek ―ti au jiiak.

Junak inimeꞌe au rukteka intok aapoꞌik Jesujta bwiseka intok aꞌ nuk sajakai.

51 Ketun ama am aneosu, seenu, Jesujtamak eame, jumeꞌ tebe aꞌ kuchiꞌim yeu wikeka intok jukaꞌ teꞌopopo tekiakammeu yoꞌota saweeꞌu nakammet aꞌ chuktak. 52 Junak intok juꞌu Jesus iniau:

―Jumeꞌ em tebe kuchiꞌim bem weekaꞌpo am kecha ―ti au jiiak―. Bweꞌituk siꞌime wameꞌe bem tebe kuchiꞌimmea nassuame, inimeꞌe ket tettebe kuchiꞌimmea suꞌatune. 53 Empo tuꞌisi juꞌunea, inia betchiꞌbo in yoꞌowabeu bicha in a ino nokriaꞌpo, intok iꞌan lautipo, woj mamni ama wooika batayoonim bepa, ankelesim aapoꞌik neu bittuaꞌeaꞌpo. 54 Taa junuentuko, kaachin yeu yumaa ean, jum Liojta nok lutuꞌuriapo junuen nee betana utteꞌa aꞌ chupneꞌpo juꞌu jiꞌojtei.

55 Junak intok juꞌu Jesus jumeꞌ aꞌ bwijbokammeu:

―Emeꞌe, tettebem kukucheꞌekai intok kukutakai aꞌabo yeu sajak nee jita etbwareotukaꞌa benasi nee bwijbaekai. Chikti taꞌapo jum teꞌopopo nee emo nasuk aneka yee majtan intok junak emeꞌe ka nee nuk sajak. 56 Taa siꞌime iniꞌi inien weye, jukaꞌa, jumeꞌ bat naataka Liojta betana juꞌuneetuawaka, jum Liojta nok lutuꞌuriapo bem teuwaakaꞌuta aꞌ chupneꞌ betchiꞌbo.

Junak intok siꞌime jumeꞌ Jesujta majtim, aapolaik suꞌu tojaka, tennek.

57 Jumeꞌe, jukaꞌ Jesujta bwisekame, Kaipaaj teamtau, juꞌu jumeꞌ teꞌopopo tekiakammeu cheꞌa siꞌimemmeu yoꞌotau aꞌ tojak. Junamaꞌa jumeꞌ Moiseejta betana nesaurim yee majtame intok jumeꞌ juriommeu cheꞌa yoꞌowem emo nau tojilamtukaꞌawi. 58 Taa juꞌu Peeo, mekka aet chaꞌaka weyen, jum junamaꞌa cheꞌa yoꞌo yaꞌarita bweꞌu kariu kimuwaꞌu tajtia. Junamaꞌa iniꞌi kibakekai. Intok jumeꞌ waate junamaꞌa yaꞌuraata betana yee suuatuawammak yejtek. Junuen junakaꞌa weyemta, jachin yeu aꞌ weeneꞌpo aꞌ juꞌuneiyaabaekai.

59 Jumeꞌe, jum teꞌopopo tekiakammeu yoꞌowe, ket jumeꞌ ama juriommeu yoꞌowe intok siꞌime juꞌu ama nau yoꞌoraa, inimeꞌe, senuk Jesujta bejeꞌeka, ka lutuꞌuriata teuwaanemta jaiwan. Junuen nesaubaekai aꞌ meꞌetuneꞌ betchiꞌbo. 60 Taa inimeꞌe, kaita aꞌ bejeꞌeka ayukamta juꞌuneiyaak. Juebenaekan oꞌoben, jumeꞌ aman yajaka intok aa nokiꞌichiata teuwaakame. Taa inimmet chukula, woika, ka lutuꞌuriata teuwaaka ama yajak. 61 Inimeꞌe:

―Iniꞌi oꞌou, sejtul inen jiiak: “Jukaꞌ Liojta teꞌopota inepo aꞌ tatabe, intok baji taꞌapo ne juchi aꞌ yechaꞌaneekai”, ti jiakai.

62 Junak juꞌu, jum teꞌopopo tekiakammeu cheꞌa yoꞌowe, kikteka intok Jesujtau:

―Jaisa empo ka montibae jaꞌani. Jitasa iniꞌi, inimeꞌe enchi bejeꞌeka teuwaaꞌu ―ti au jiiak.

63 Taa juꞌu Jesus, kaita aꞌ yoopnak. Junak intok juꞌu jumeꞌ teꞌopopo tekiakammeu cheꞌa yoꞌowe:

―Juꞌu Lios, jiba yuu jiapsamta betana lutuꞌuriaka ne, inepo lutuꞌuriata enchi teuwaa iꞌa. Empo juꞌu Krijto, juꞌu Liojta yoemiatuko, itom tejwaane ―ti au jiiak.

64 Juꞌu Jesus iniau:

―Inepo ne junaꞌa em aꞌ teuwaari benasi ―ti au jiiak―. Intok ket ne inen emou jiia, jukaꞌ emo benasi yoemta, Lios, siꞌime utteꞌakamta, aꞌ batatana betana kateka intok inikaꞌa, teeka betana namupo koꞌom weyemta, emeꞌe aꞌ bitne ―ti au jiiak.

65 Junak intok juꞌu teꞌopopo tekiakammeu cheꞌa yoꞌowe, tua ka aꞌ tuꞌureeꞌuta teuwaakai, aꞌ supewam siutak, intok:

―Iniꞌi oꞌou juꞌu aꞌ nokaꞌue, Liojta bejeꞌeka ka tuꞌik teuwaala ―ti jiiak―. Iniae, juꞌu aꞌ bejeꞌeka nokneeme ka utteꞌatune. Emeꞌe aꞌ jikkajila, Liojta bejeꞌeka jukaꞌ ka tuꞌik aꞌ teuwaakaꞌuta. 66 Jaisa emou maachi.

Bempo:

―Ka tuꞌika aet aayuk intok iniꞌi meꞌetunee jiba ―ti jiiak.

67 Junak intok pujbat aet chit wattiwak. Intok koꞌokosi joowan. Wate intok pujbat aꞌ chonan. 68 Intok inimeꞌe:

―Empo juꞌu Krijtotakai, ka juꞌuneakai jabesa junuen enchi chochonak ―ti au jiian.

69 Junuen aꞌ weyeo su, ket juꞌu Peeo junamaꞌa tebatpo wajiwa tana ketun katekan. Intok senu jamut ama sawame, au rukteka:

―Empo ket, Jesus juꞌu Kalileaꞌ teaꞌu jometamak weaman ―ti au jiiak.

70 Taa juꞌu Peeo, siꞌimem bichapo:

―Kannee juꞌunea jitat em nokaꞌapo ―ti jiaka, ka au aꞌ taꞌaꞌati jiiak.

71 Jukaꞌ Peota jaibu yeu aꞌ simbaeo su, junak juchi senu jamut aꞌ bichaka intok jumeꞌ ama anemmeu:

―Iniꞌi ket, Jesus, joꞌara Nasaret teaꞌu joꞌaakamtamak weaman ―ti jiiak.

72 Intok juchi weeꞌpo juꞌu Peeo, tua lutuꞌuriata au nokaꞌati jiaka:

―Kannee aꞌ taꞌaa junakaꞌa oꞌouta ―ti jiiak.

73 Cheꞌa chuubatuka jumeꞌ junamaꞌa aneꞌum, Peotau rukteka:

―Lutuꞌuria, empo ketchia junamemak weye. Bweꞌituk junuen em nokaꞌut juniꞌi, empo juꞌunakkiachi ―ti au jiiak.

74 Junak intok iniꞌi, jita ka tuꞌik au chupne, ka aꞌ junuentuko, tua lutuꞌuriata au nokaꞌati jiaka:

―Kannee aꞌ taꞌaa inikaꞌa oꞌouta ―ti jiakai.

Junamaꞌa lautipo senu totoi oꞌowia kukusuk. 75 Junak juꞌu Peeo, Jesujta au teuwaaribeu wawaatek: “Jukaꞌ totoi oꞌowiata kee aꞌ kukuseo, temaiwaka, bajisi empo ka emo nee taꞌaꞌati jiulatune”, ti aꞌ jiakaꞌu. Juꞌu Peeo intok junamaꞌa yeu sika intok aꞌ juiwaka tua bwaanak.