Jesus, ka au takaa yekamta, au aꞌ ineꞌetetuak
2
Ka jaiki taewaita simsuko, intok aet chukula, bweꞌu joꞌara Kapernaoꞌ teaꞌu yeu yepsak juꞌu Jesus. Junamaꞌa intok, senu joꞌarapo, ama aꞌ aneꞌepo juꞌuneyyatuk. 2 Junamaꞌa intok, tuꞌisi juebenaka ama yajak. Joꞌarapo wajiwa ka ama jak kiaka juniꞌi, paꞌakun yeu tajti tapunisi ama aanen. Jesus intok, jukaꞌ Liojta nok lutuꞌuriata ameu teuwaaka ama aanen. 3 Junak intok, senu yoeme, loꞌitaka, aꞌ takaawata ka a yekamta, naikika nau, aapoꞌik Jesujtau bicha, chikti aꞌ jipetekwamak, aꞌ puꞌateka kaaten. 4 Junak intok, juebena yoemrata ama tapunisi aneꞌ betchiꞌbo, intok ka a aman kimukai, jukaꞌ koꞌokoemta, kari jikat aꞌ nuk jaꞌamukamme. Junak intok, junamaꞌa bepa, jukaꞌ karita wojoktaka, jukaꞌ koꞌokoemta, chikti aꞌ jipetekwamak, Jesujtau koꞌom teekak. 5 Junak intok juꞌu Jesus, junuen aneme bichaka, intok bem jiapsimpo, tua aꞌ sualeme juꞌuneyyaka, koꞌokoemtau inen jiiak:―Jeewi, in yoemia ―tiia―, siꞌimeta wakaꞌa ka tuꞌik em yaꞌariꞌut, aeteꞌe jiokoiriꞌe ―ti au jiiak.
6 Junamaꞌa intok, bem maejtomtaka, waate ama jookan. Intok Jesujta junuen jiamta jikkajaka, bem jiapsipo inen emo eetuan: 7 “Jaisaaka tua iniꞌi inen jiia Liojta bepa au yoꞌo jooa,” inien jiakai. “Bweꞌituk ka kia jabe juniꞌi, jukaꞌ ka tuꞌuwa yaꞌarita a yetet aꞌ jiokoe. Taa juꞌu Lios jiba a yetet aꞌ jiokoe”, tiian. 8 Jesus intok sep inien bem eaꞌuta bem jiapsipo amet aꞌ juꞌuneyyaka inen ameu jiu taitek:
―Jaisa betchiꞌbo emeꞌe, enchim jiapsipo inien emo eetua 9 Juꞌu koꞌokoemtau, jaisa ne au jiaꞌatek beja, ne tuꞌisi au jiu ean: “Em ka tuꞌuwa yaꞌarita betanaꞌe jiokoriꞌe”, ti ne au jiaꞌateko, oo: “Yejteka, jukaꞌ em jipetekta nau lopoktaka, bamsea, em weebaeꞌu bicha weye”, ti ne au jiaꞌateko Intok inie wooi weemta betchiꞌbo, jitasa cheꞌa ka neu obiachi ean 10 Taa iꞌan ne enchim aꞌ juꞌuneyyaꞌiiꞌa, Lios utteꞌawata net aꞌ ayuꞌupo amani, intok, aapoꞌik Liojta betana in usiwaitukaꞌpo aman, neu lutuꞌuria, ka tuꞌuwata yaꞌalame in a am jiokoineꞌ betchiꞌbo.
Junak intok, loꞌitaka intok aꞌ takaawata ka a yekamtau inen jiiak:
11 ―Inepone eu nooka, kikteka, jukaꞌ em jipetekta nau ropoktaka, em joꞌau bicha weyeꞌe, ti ne eu jiia.
12 Junaꞌa intok, ama aneme, siꞌimem bichapo, sep kikteka, aꞌ jipetekwata nau ropoktaka, bempoꞌim nasuk aman yeu siika. Junameꞌe intok, tuꞌisi aꞌ suum eiyaaka taawak. Intok Liojta, tuꞌuwa noktae teuwaa japteka, inen jiian:
―Jakwoo juniꞌi, inien yeu simlamta te kee bichan ―tim jiian.
Jesus, jukaꞌ Lebiꞌ teamta, aamak aꞌ wee iiꞌa
13 Jesus, junamaꞌa yeu sika intok, bawe mayoau bicha siika. Intok juebena yoemra aman au nau yajak. Junak intok, aapo, Liojta nok lutuꞌluriata am majtan. 14 Junamaꞌa intok, cheꞌa bichau jeela weyekasu, senu yoemta, Lebiꞌ teamta ama bichak. Junakaꞌa intok, juꞌu Alpeoꞌ teame aꞌ uꞌusekan. Iniꞌi Lebiꞌ teame intok, yaꞌuraapo betana ama saiwaka, jukaꞌ tomita, yaꞌuraata ae bejeꞌetuanaamtae, junakaꞌa, aapo juꞌu Lebiꞌ teame, nau aꞌ totojituawan. Jesus intok, aapoꞌiku inen jiiak:
―Nemak weyeꞌe ―ti au jiiak.
Junaꞌa intok, aꞌ katekaꞌpo, kikteka, sep Jesujtamak siika.
15 Chukula intok, juꞌu Lebiꞌ teamta joꞌaapo, juꞌu Jesus, aꞌ majtaꞌummak nau, junae joꞌaapo ama jiꞌibwan. Waate intok, junaꞌa Lebiꞌ teamta benasi, yaꞌuraapo saiwaka, jiba junakaꞌa tekilta joame, ket aman au yajak. Intok jumeꞌ ka tuꞌuwata boꞌo jooriame, juebenaka ket ama aanen. Intok siꞌime nau, junamaꞌa Jesujta jiꞌibwaꞌpo ama aamak nau jookan. Bweꞌituk juebenaka Jesujtamak rejten. 16 Jumeꞌ intok, bem maejtom, inimeꞌe junen, jumeꞌ wate juriom, paiseom teammak nau eame, inimeꞌesan, Jesujta, yaꞌuraapo tekiakamtamak, intok ka tuꞌisi anemmak aꞌ jiꞌibwamta bichaka, Jesujta majtimmeu inenim jiiak:
―Jaisaaka tua, juꞌu enchim majtame, jumeꞌ ka tuꞌisi anemmak jiꞌibwa, intok jumeꞌ yaꞌuraapo saiwaka aꞌ tekiakammak jiꞌibwa ―ti am temaek.
17 Jesus intok, inien am jiao am jikkajaka, inen ameu jiu taitek:
―Jumeꞌ tuꞌik takaaka, ka koꞌokoeme, kaachin jukaꞌ yee jijittomta waatane. Taa juꞌu koꞌokoeme ala aꞌ waatane, jukaꞌ yee jijittomta. Inienpo aman san, nejpone aꞌabo ne yebijla, jumeꞌ ka tuꞌisi aulammeu nok betchiꞌbo, bem jinneꞌumtuneꞌ betchiꞌbo. Bweꞌituk jumeꞌ jaibu tuꞌisi jiapsame, junameꞌe, lutuꞌuriata boꞌo jooria.
Jesus, Liojta yoꞌori betchiꞌbo, ka jiꞌibwawamta betana temaiwa
18 Jumeꞌ Joan yee babatoowamta majtalaꞌum, intok jumeꞌ waate juriom, bem junuen aꞌ sualeꞌ betchiꞌbo, paiseompo taꞌeewame, junameꞌe taewaimmet, ka jijiꞌibwan. Junuen aneka, Liojta emo yoꞌorituan. Junak intok, waate, Jesujtau sajak intok aꞌ temaek:
―Jaisaakai ―tiian―, jumeꞌ paiseom teame, intok Joan yee babatoowamta majtaꞌum, inimeꞌe taewaimmetchi, Liojta yoꞌori betchiꞌbo, ka jijiꞌibwa ―tim aꞌ temaek―. Taa jumeꞌ em majtim, ka inien aꞌ boꞌo jooria ―ti jiakai.
19 Jesus intok, inen ameu jiiak:
―Jaisa jujupwaaꞌu, intok jijiꞌibwaꞌpo, jumeꞌ junaman nunuritaka, ama aneme, jaisa ka alleaka, ka aman jiꞌibwanee jaꞌani Ka junuen weye. Bweꞌituk junako, juꞌu jubeme, au sioktuane. Cheꞌa juni san, jukaꞌ jubemta ketuni ama aneo, alleaka aamak eaka, jiꞌibwane ―tiia―. 20 Taa chukula ket ―tiia juꞌu Jesus―, taewaim yumaꞌane ―tiia―, jukaꞌ jubemta kaabetuko, junak intok, siokrimmea ka jiꞌibwane.
21 ’Inien aꞌ weeꞌpo san ―tiia juꞌu Jesus―, kaabe juꞌu bemela tajoꞌorim, moera tajoꞌorimmet jitchaꞌabwabaane. Bweꞌituk baksiapat, juꞌu bemela tajoꞌorim, siꞌimeta nau wikeka, jumeꞌ tajoꞌo moeram nau wikeka, am siutane. 22 Inien aꞌ weeꞌpo san ketchia, intok kia jabe juniꞌi, jukaꞌ paꞌasi baꞌawata, bemelasi yaꞌata, bea boosa yaꞌaripo, juꞌu moerapo, kaachin ama aꞌ toꞌobaekaꞌeene. Bweꞌituk amaꞌa toꞌaakaꞌateko, juꞌu bea, aꞌ moeratukaꞌ betchiꞌbo, lauti siutane. Junak intok juꞌu paꞌasi baꞌawa woꞌotine, intok kia juꞌu bea juniꞌi, nasontune.
Jumeꞌ Jesujta majtaꞌum, yum joꞌe taewaet, tiikom kauta
23 Jesus intok, sabala taꞌapo, yum joꞌe taewaet, tiikom, jaibu wakeꞌepo aman weyen. Jumeꞌ aꞌ majtaꞌum intok, aamak kateme, jukaꞌ tiikom kautakai, am biitakai, am bwaꞌeen. 24 Waate juriom, paiseompo emo teuwaame, intok junuen aneme bichaka, Jesujtau inen jiian:
―Jumeꞌ em majtaꞌum bichaꞌe ―ti au jiian―. Sabala taꞌapo, kaitat mammawaka, Lioj waatiawaꞌa taewaituko juniꞌi, inimeꞌe inien aane ―tiian.
25,26 Jesus intok inen am yoopnak:
―Jaisa emeꞌe, jum Liojta jiꞌosia jiꞌojteimpo kaꞌa nokla jaꞌani, jukaꞌ Labiitukaꞌuta aꞌ yaakaꞌuta Bweꞌituk, aapo juꞌu Labiiꞌ teame, tebaurekai, intok jumeꞌ aamak rejteme juniꞌi. Junak intok juꞌu Abiatar teame junaman tekiakamtau ama yoꞌotukan. Juꞌu Labiiꞌ teame, aman karipo, Liojta aman yoꞌoriwaꞌpo kibakek. Kariu kibakeka, intok jumeꞌ paanim, ama tekiakame bwaaꞌeaꞌum, juꞌu Labiit am bwaꞌaka, intok ka aapola jiba am bwaꞌaka, taa ket jumeꞌ aamak rejteme am miikak.