―Aꞌabo neu sikaa, in bichapo kikteꞌe ―ti au jiiak.

4 Junak intok juꞌu Jesus, siꞌimemmeu inen nattemaek:

―Sabala taꞌapo, jitasa cheꞌa tuꞌi ean, tuꞌuwata yeteu joowame, oo ka tuꞌuwata Oo senuk meꞌetuneꞌpo, oo senuk jinneꞌutuneꞌpo.

Taa junuen aꞌ jiao intok, ka wotti tawawak. 5 Jesus intok, siꞌimem, ka alleaka naj bitchun. Intok bem namakak jiapsekaꞌ betchiꞌbo, au sioktuak. Junae yoemtau intok, wakiak mamakamtau inen jiiak:

―Em mamam rutuktaꞌe ―ti au jiiak.

Junaꞌa intok, aꞌ mamawam rutuktak. Intok sep tuꞌureak. 6 Taa jumeꞌ waate juriom, bem junuen aꞌ sualeꞌ betchiꞌbo, paiseompo taꞌeewame, inimeꞌe junen, junamaꞌa yeu sajaka, jumeꞌ eroorianom teammak nau eaka, emo nau tojaka, nau wepul lutuꞌuriata yaꞌabaekai, Jesujta jachin juniꞌi aꞌ bwiseka, bem aꞌ meꞌeneꞌ betchiꞌbo.

7 Taa juꞌu Jesus intok, aꞌ majtaꞌummak nau, baweu bicha siika. Intok Kalileaꞌ bwiaraapo joꞌaakame aamak sajak. Intok ket junalensu, Jurea bwiaraapo joꞌaakame ketchia. 8 Intok ket jiba junalensu, bweꞌu joꞌarapo Jerusalenpo joꞌaakame. Intok Tiiroꞌ teaꞌpo joꞌaakame. Intok Siron teaꞌpo joꞌaakame. Intok Irumea bwiaraapo joꞌaakame. Intok waate, batwe Joranta beaj joꞌaakame. Inimeꞌe junen, siꞌime, suum watchisi machik aꞌ joaꞌapo aman aꞌ juꞌuneyyaka, junaꞌabo, siꞌimekut betana, juebenaka ama au nau yajak, Jesujtawi. 9 Junamaꞌasan, juebena yoemrata ama au nau yajaꞌ betchiꞌbo, intok ka ama nau aꞌ pitta iꞌaka, aꞌ majtaꞌummeu inen jiiak:

―Jukaꞌ kuta kanoata, junamaꞌa baꞌapo boꞌokamta, mayoau jeela ruktaꞌem ―ti ameu jiiak, ama jaꞌamubaekai.

10 Bweꞌituk aapo juꞌu Jesus, junamaꞌa jaibu juebenam emo inneꞌetetualatukan. Intok jumeꞌ waate, koꞌokoeka, ama aneka, kia aet mamte betchiꞌbo, nat emo yuuꞌan, intok aapoꞌik bat batte baꞌau koꞌom aꞌ taben. 11 Intok inen ket ama yeu siika, jumeꞌ bebejeꞌeri eerita, bem jiapsimpo amet aneme, junameꞌe junen, jukaꞌ Jesujta bichaka, aapoꞌik bichapo tonommea jajapten. Jumeꞌ bebejeꞌeri jiapsim intok, inien am chaituak:

―Empo junaꞌa, Liojta usiwai ―tim jiian.

12 Taa juꞌu Jesus intok, aꞌ jabetukaꞌpo kaꞌa juꞌuneyyatuneꞌ betchiꞌbo, kuttipo ameu nookak.

13 Aet chukula intok, senu kawiu, jika paꞌariau bicha siika. Intok junaman kateka, ameu chaitebok, jumeꞌ aꞌ majtaꞌum, yeu aꞌ puꞌalaꞌummewi. Junameꞌe intok aman au yajak. 14 Junamaꞌa aapoꞌik mak nau an betchiꞌbo, intok aet chukula jukaꞌ Liojta nok lutuꞌuriata bem aꞌ nok sakaneꞌ betchiꞌbo, aet aꞌ tekil makneeꞌum, woj mamni ama wooim yeu puꞌak, juꞌu Jesus. 15 Junak intoko, utteꞌawata amet autuak, bebejeꞌeri jiapsi eerita, bem jiapsipo amet aneme, paꞌakun yeu am beprianeꞌ betchiꞌbo. 16 Junameꞌe intok inen teakan. Seenu, Simoꞌ tea. Junakaꞌa intok, Peeom aꞌ teatuak. 17 Jumeꞌ watem team intok, iiyime junameꞌem. Jakooboꞌ teame, Sebereoꞌ teamta uꞌusi. Intok aꞌ sailuawa, juꞌu Joan teame. Junameꞌe ket taꞌabwim teatuak. Ebreo nokpo nokwame. Junameꞌe intok, Boꞌaneerjim tea. Jiak nokiu juchi aꞌ kuaktituk intok teekapo yuku ruꞌuti jiame, ti jiubae. 18 Intok juꞌu Antej teame. Intok juꞌu Jeriipeꞌ teame. Intok Battomeꞌ teame. Intok juꞌu Mateoꞌ teame. Intok juꞌu Tomaj teame. Intok ket Alpeoꞌ teamta uꞌusi, Jakooboꞌ teame. Intok juꞌu Tareoꞌ teame. Intok senu Simoꞌ teame, kananiitaꞌ teammak nau eame. 19 Intok juꞌu Juuras Ijkariooteꞌ teame, juꞌu chukula aꞌ nenkineeme.

20 Junak intok aꞌ joꞌawawi yeu yepsak. Taa junamaꞌa aꞌ aneo intok, tuꞌisi juebenaka ama au nau yajak. Aapo intok, kia ammea ka jiꞌibwan. 21 Taa jumeꞌ Jesujta wawaekame, intok, inien aꞌ jikkajaka, aman aꞌ aneo au sajaka, ama yeu aꞌ wikbaen, “kaꞌa suatula”, ti jiakai.

22 Waate ket ama aanen, maejtompo taꞌeewame, Jerusalen teaꞌa betana. Junameꞌe ket inen jiian:

―Jukaꞌ yoꞌo bebejeꞌeri jiapsi eꞌeri aet aneꞌe ―tiian. Junaꞌa eeri intok, bem nokpo, Beꞌelsebuupo taꞌeewan.

Intok ket inen jiian:

―Yoꞌo bebejeꞌeritamak aꞌ lutuꞌuriak ―tiian―. Kialiꞌikun junae utteꞌawatae, jumeꞌ bem jiapsimpo jumeꞌ waate bebejeꞌeri eꞌeerim yetet aneꞌum, yeu am bepria ―tiian.

23 Jesus intok, junameꞌe maejtommeu chaiteboka:

―Jaisa iꞌan ―tiia―, aapo juꞌu yoo bebejeꞌeri, Satanaj teame, aapo au yeu bepbaanee jaꞌani ―ti am temaek―. Ka junuentune ―tiia.

Junak intok, taꞌabwi weemtau aꞌ tammachiaka inen ameu jiiak:

24 ―Kia waꞌa senu bwiaraapo, siꞌime ama nau joꞌaakame, nasuk aman emo naꞌikimteko, intok nau nassuabaeꞌeteko, junameꞌe, ka binwatukasu, kaitaꞌpo tawane ―tiia―. 25 Intok ket jiba junalensu, jumeꞌ wepul joꞌarapo nau joꞌaaka, intok emo ee bejeꞌeteko, junameꞌe ka a nau jiapsine ―tiia―. 26 Inien san beja, juꞌu yoo bebejeꞌeri, Satanaj teame, jaisa iꞌan aapo jumeꞌ ka tuꞌi jiapsi eerim, aapoꞌik attearim, jaisa am bejeꞌeka anne. Bweꞌituk aapo juꞌu Satanaj teame junuen anneꞌeteko, kaachin am saune ―tiia.

Junak intok:

27 ―Kia jabe juniꞌi ―tiia―, joꞌarapo wajiwa aman jita etbwabaeka ama kibakeꞌeteko, taa juꞌu intok, ama joꞌaakame, utteꞌakaꞌateko, intok ama aneꞌeteko, juꞌu ama jita etbwabaeme, kaita aꞌ uꞌuraane. Taa kia jukaꞌ ama joꞌaakamta aꞌ sumakaꞌateko, junak ala, a jita ama etbwane ―tiia―. Inepone, juꞌu oꞌouta, utteꞌakamta sumakamta benasi ne maachi.

28 ’Inepo intok, lutula weꞌepo ne inien ne emou jiia, batte siꞌime waꞌa ka tuꞌuwa yaꞌarime, a jiokoitu. Intok jukaꞌ bat naataka, Liojtat jaana jiuwamta juniꞌi, a amet jiokoitu. 29 Taa jukaꞌ ka tuꞌuwa yaꞌarita, senu weemta jiba ka a aet yee jiokoitu, wakaꞌa Liojta tuꞌu jiapsiwata jaana aꞌ jiawaanaaꞌu. Bweꞌituk inien waꞌa jaana aꞌ jiawaakame, jiba yuu betchiꞌbo ka a aet jiokoitune.

30 Jesus inien ameu nookak, bweꞌituk bempo jukaꞌ bebejeꞌeri jiapsi eerita, jaiti machik aet aneꞌetiakai, tiian.

31 Aꞌ aewa, intok aꞌ sailawam ama yajaka, paꞌaku japteka, aman au chaitebok. 32 Intok jumeꞌ cheꞌa Jesujtau jeela jokame, inen au jiiak:

―Juꞌu em maala, intok jumeꞌ em sailam, paꞌakun jaꞌabweka, eu chaitebo ―tim au jiian.

33 Taa juꞌu Jesus intok inen am yoopnak:

―Jabesa juꞌu in maala intok, jabesa jumeꞌ in sailam ―ti am temaek.

34 Junak intok, siꞌimem, ae nape konila jokame naj bitchuka inen jiiak:

―Inimeꞌe junameꞌe, jumeꞌ in aem, intok jumeꞌ nemak werim. 35 Bweꞌituk siꞌime jukaꞌa, in achaita eaꞌapo aman aneme, junameꞌe nemak werimtune. Oo ne ket aꞌ ae rokne.