Mateoꞌ teamta jiꞌojtekaꞌu
Yoꞌowe Jesukrijtota, jumeꞌ aapoꞌik amet yeu simriam
1
Inim jiꞌojtei, Jesukrijtota betana jumeꞌ bat aꞌ yoꞌowawam team. Aapo, iniꞌi Labiitukaꞌuta betana intok Apraꞌamtukaꞌuta betana yeu simriatukan.2 Juꞌu Apraꞌamtukaꞌu, Isaak teamta yoemiakan. Iniꞌi intok jukaꞌ Jakooboꞌ teamta yoemiakan, juꞌu ket Juraaꞌ teamta yoemiakaꞌu intok jumeꞌ iniamak werim. 3 Juꞌu Juraatukaꞌu, Paarej teamta yoemiakan intok jukaꞌ Saaraꞌ teamta. Juꞌu inimeꞌe ae, Tamar tean. Juꞌu Paarejtukaꞌu, Ejrom teamta yoemiakan, ket juꞌu Aram teamta yoemiakaꞌu. 4 Juꞌu Aram tukaꞌu, Aminarap teamta yoemiakan. Iniꞌi intok, jukaꞌ Naꞌason teamta yoemiakan, ket juꞌu Salmon teamta yoemiakaꞌu. 5 Juꞌu Salmontukaꞌu, Booj teamta yoemiakan. Juꞌu inia ae intok, Raꞌab tean. Juꞌu Booj teame intok, Oobel teamta yoemiakan. Juꞌu inia ae intok, Rut tean. Juꞌu Oobel teame, Issaiꞌ teamta yoemiakan. 6 Juꞌu Issaiꞌ teame intok, jukaꞌ cheꞌa yoꞌo yaꞌari, Labiiꞌ teamta yoemiakan. Iniꞌi cheꞌa yoꞌo yaꞌari, Labiiꞌ teame intok, juꞌu Uriaj teamta jubiasukaꞌu, jukaꞌ Salomon teamta yoemiakan.
7 Juꞌu Salomon teame intok, Roboam teamta yoemiakan. Iniꞌi ket, Abiaj teamta yoemiakan, ket juꞌu Asaꞌap teamta yoemiakaꞌu. 8 Juꞌu Asaꞌap teame intok, Josapat teamta yoemiakan. Iniꞌi ket, Jooram teamta yoemiakan, ket juꞌu Osiaj teamta yoemiakaꞌu. 9 Juꞌu Osias intok, Joatam teamta yoemiakan. Iniꞌi ket, Akaaj teamta yoemiakan, ket juꞌu Esekiaj teamta yoemiakaꞌu. 10 Juꞌu Esekiaj teame intok, Manaseej teamta yoemiakan. Iniꞌi ket, Amoos teamta yoemiakan, ket juꞌu, Josiaj teamta yoemiakaꞌu. 11 Juꞌu Josiaj teame intok, Jekoniaj teamta yoemiakan, intok jumeꞌ aamak werim. Iniꞌi, taewaim, jukaꞌ ijraꞌeliita yoemrata, bwiaraa Babilooniaꞌ teaꞌu, utteꞌapo am tojiwako.
12 Iniat chukula juꞌu Jekoniaj teame, Salaltiꞌel teamta yoemiakan. Iniꞌi ket, Sorobabel teamta yoemiakan. 13 Juꞌu Sorobabel teame intok Abiul teamta yoemiak. Iniꞌi ket, Eliakim teamta yoemiakan, ket juꞌu Asoor teamta yoemiakaꞌu. 14 Juꞌu Asoor teame intok, Sarook teamta yoemiakan. Iniꞌi intok, Akiim teamta yoemiak, ket juꞌu Eliul teamta yoemiakaꞌu. 15 Juꞌu Eliul teame intok, Eleasar teamta yoemiak. Iniꞌi ket, Mattan teamta yoemiak, ket juꞌu Jakooboꞌ teamta yoemiakaꞌu. 16 Juꞌu Jakooboꞌ teame intok, Joseꞌ teamta yoemiak, jukaꞌ Mariaꞌ teamta kuuna. Iniꞌi, Mariaꞌ teame aapo juꞌu Jesuj teame juꞌu Krijtopo taꞌeewame, aꞌ aekan.
17 Junuen san Apraꞌamtukaꞌuta jiapsao naatekai, Labiitukaꞌuta taewaimmeu tajtia, woj mamni ama naiki, juꞌu yoemra nat tomti kateka, jumeꞌ yoꞌotu sakakame. Intok ket, Labiitukaꞌuta jiapsao naatekai, jukaꞌ ijraꞌeliita yoemrata, bwiaraa Babilooniaꞌ teaꞌu, utteꞌapo am tojiwakaꞌpo tajtia, ket woj mamni ama naiki juꞌu yoemra nat tomti kateka, jumeꞌ yoꞌotu sakakame. Intok ket, junak naatekai, Jesukrijtota yeu tomtekaꞌpo tajtia, intok juchi, woj mamni ama naikiak.
Jesukrijtota yeu aꞌ yoemtukaꞌpo
18 Jesukrijtota yeu aꞌ yoemtukaꞌuta inen yeu siika. Juꞌu aꞌ aewa Maria, Joseꞌ teamta aꞌ kunabaeka junuen aamak ean. Intok bat naataka, kee nau am jiapsao, aapo juꞌu Maria, Liojta tuꞌu jiapsita betana, a jita aꞌ joaꞌapo aman, jukaꞌ yeu aꞌ yoemianeeꞌuta jaibu aꞌ mabetlatukan. 19 Juꞌu Josee, Mariata kunawa, iniꞌi, Liojta bichapo tuꞌu yoemtukan. Taa inia betana, aapo, Mariata, ka siꞌime bichapo yeu aꞌ bwiseka, aꞌ juꞌuneiyaa iꞌan. Ala aapo, kaabeta aꞌ juꞌuneiyaaꞌpo, aꞌ suꞌu tojibaen.
20 Intok aapoꞌik iniat kee tuꞌisi juꞌuneao, achai Liojta betana ankeles, tenkupo benasia au yeu machiak, intok:
―Josee, Labiitukaꞌuta betana yeu simria ―ti au jiiak―, kaachin eenee jukaꞌ Mariaꞌ teamta em aꞌ jupneeꞌu betana. Bweꞌituk juꞌu aꞌ yoemianeeꞌu, Liojta tuꞌu jiapsi betana weye. 21 Aapo oꞌouta asoane. Junakaꞌa intok, empo, Jesuj ti jiame aꞌ teatuane. Junuen teanee bweꞌituk jukaꞌ aꞌ yoemrawata, ka tuꞌik bem yaꞌari betana, am jinneꞌune.
22 Siꞌime iniꞌi yeu siika junuen yeu aꞌ chupneꞌ betchiꞌbo, jukaꞌ achai Liojta, senuk aet juꞌuneetuaka, inen jiaka aꞌ teuwaakaꞌuta:
23 Juꞌu beeme, aꞌ yoemianeeꞌuta mabetne.
Intok oꞌouta yoemiane.
Junaꞌa san Emanuel ti teane.
Lios itomake ti jiubaeme.