Waate, jumeꞌ suawaka, maakom teame, aꞌ bitbaeka aman au yajakame
2
Juꞌu Jesus, ili joꞌaraa Beleem ti teakaꞌpo yeu tomtek, bwiaraa Jureaꞌ teaꞌpo. Jukaꞌ cheꞌa yoꞌo yaꞌari, Eroorej teamta, siꞌime junamaꞌa bwiaraapo aꞌ yoꞌotuko. Junak intok waate oꞌowim jitat juꞌuneame, Maakom teaka, inimeꞌe, taꞌata yeu weꞌe betana kateka, bweꞌu joꞌara Jerusalen teaꞌu yajak. 2 Intok junameꞌe nattemaek:―Jaksa aane juꞌu, juriommeu cheꞌa yoꞌowe yeu tomtekame. Bweꞌituk taꞌata yeu weamaꞌa betana, aapoꞌik betana chokita te bichak. Itepo inim yajilam aꞌ yoꞌoribaekai.
3 Juꞌu yoꞌo yaꞌari Eroorej teame, inikaꞌa juꞌuneiyaakai, tuꞌisi ka aet yanti elaka taawak. Intok ket siꞌime jumeꞌ junamaꞌa Jerusalen teaꞌpo jiapsame. 4 Junak intoko juꞌu yoꞌo yaꞌari, Eroorej teame, siꞌime jumeꞌ teꞌopopo tekiakammeu yoꞌowemmeu, intok jumeꞌe, Moiseejta nesauta, yoemrata am majtammeu nau chaaeka, ameu nattemaek jakun yeu aꞌ tomtineꞌpo jukaꞌ Krijtoꞌo teamta. 5 Bempo intok inen au jiiak:
―Jurea bwiaraa, joꞌaraa Beleem teaꞌpo. Bweꞌituk seenu, juꞌu Liojta betana juꞌuneetuawakame inen aꞌ jiꞌojtek:
6 Empo intoko, bwiaraa Juraaꞌ teaꞌpo joꞌara Beleem teame, eiyaa watchisi empo maachi junamaꞌa bwiaraapo, jumeꞌ yoꞌowem bichapo.
Bweꞌituk senu, yoꞌotaka tawaneeme, ee betana yeu machine, nee betana Ijraꞌeliita yoemrata aꞌ suuaneeme.
7 Junak intoko juꞌu Eroorej teame, etbwa junameꞌe suawakammeu chaaek, intok ameu nattemaek tua jak weyeo jukaꞌ chokita yeu aꞌ machiakaꞌpo. 8 Junak intoko, joꞌaraa Beleem teaꞌu am bittuak intok:
―Aman emeꞌe sajaka, junae ili usita betana tuꞌisi nattemaine. Intok emeꞌe aꞌ teako, aꞌabo nee tejwaane. Junuen ne ket aman sikaa, aꞌ yoꞌorineꞌ betchiꞌbo ―ti jiakai.
9 Inikaꞌa yoꞌo yaꞌarita ameu teuwaakaꞌuta jikkajaka, jumeꞌ suawakame sajak. Junak intoko juꞌu choki, taꞌata yeu weamaꞌa betana aneka, bem bichakaꞌu, ame pat weyen. Junuen su, chukula, juꞌu ili usita aneꞌepo bepa kiktek. 10 Jumeꞌ Maakom teaka, jitat juꞌuneame intok, junak, jukaꞌ chokita aꞌ bichakai, tua alleak. 11 Inimeꞌe intok, jum kariu kimukai, ili usi oꞌouta, aꞌ malawa Mariaꞌ teamtamak ama bichak. Junak intoko, tonommea japteka, intok aꞌ yoꞌorek jukaꞌ ili usi oꞌouta. Sep intok jukaꞌ bejeꞌewaekamta bem weiyaaꞌuta, etapoka intok sawai tomita, intok kopaalim benaka tattaawamta insiensoꞌ teamta, intok jita, win jubak, miiraꞌ teamta aꞌ miikak. 12 Chukula, tenkupo benasi juꞌuneetuawakai, ka intok Eroorej teamtau luula bem nottineꞌpo betana, bempo taꞌabwi boꞌot bem bwiaarau bicha nottek.
Jum bwiaraa Ejiptoꞌ teaꞌu bichaa bem yeu sajakaꞌpo
13 Chukula, jumeꞌ oꞌowim suawakame am sakaꞌasuko, achai Liojta betana ankeles, tenkupo benasi Joseeꞌ teamtau au yeu machiak. Intok inen jiiak:
―Yejteꞌe, usita intok aꞌ malawata weiyaaka, intok bwiaraa Ejiptoꞌ teaꞌu bicha yeu weene. Junaman intok empo tawane, in enchi tejwaaꞌpo tajtia. Bweꞌituk juꞌu Eroorej teame, jukaꞌ ili usita jariunee aꞌ meꞌe betchiꞌbo.
14 Junak intok juꞌu Josee, yejteka, wakaꞌa ili usita intok aꞌ malawata weiyaaka intok tukaapo, bwiaraa Ejiptoꞌ teaꞌu bicha amemak yeu siika. 15 Junamaꞌa bempo taawak, Eroorej teamta aꞌ mukeꞌu tajtia. Iniꞌi inien yeu siika junuen yeu aꞌ yumaꞌaneꞌ betchiꞌbo jukaꞌa, achai Liojta, senuk aet juꞌuneetuaka inen jiaka aꞌ teuwaakaꞌuta: “Ejiptoꞌ teaꞌa betana nee, in yoemiabeu chaaek”, ti jiakai.
Jukaꞌ Eroorej teamta, jum, jumeꞌ ili usim aꞌ suꞌa tebokaꞌpo
16 Juꞌu Eroorej teame junak, jumeꞌ susuawakame betana, jak waꞌam aꞌ eiyaawakaꞌuta juꞌuneiyaakai, tua oꞌomtek. Intok siꞌime jumeꞌ ili uusim, illitchim, wooi wasuktiammeu tajtia, jum joꞌaraa Beleem teaꞌpo intok wate au jeela ili joꞌarammetchi jiapsame, am suꞌa tebok. Jumeꞌ susuawakame betana, chokita jak weyeo tua bem aꞌ bichakaꞌu, junae betana tejwaawakaꞌu, taewaita juꞌuneiyaakai, am suꞌa tebok. 17 Junuen chupuk juꞌu Jeremiaj tukaꞌuta, Liojta betana aet juꞌuneetuawaka, inen aꞌ teuwaakaꞌuta:
18 Ili joꞌara Ramaaꞌ teaꞌpo, jiokot jiuwaka intok bwanwame ama jikkajituk.
Juꞌu jamut, Rakel teame, aꞌ yoemiam betchiꞌbo bwaanan.
Intok kaabeta aꞌ jiapsi yechaꞌa iꞌan.
Bweꞌituk junameꞌe jaibu kokkolamtukan, ti aꞌ jiakaꞌpo.
19 Taa chukula, jukaꞌ Eroorej teamta muksuko, Liojta betana ankeles, Ejiptoꞌ bwiaraaꞌ teaꞌpo, tenkupo benasi, Joseeꞌ teamtau au yeu machiaka, intok:
20 ―Yejteka, ili usita aꞌ weiyaaka intok aꞌ malawata, bwiaraa Ijraꞌeel teaꞌu nottine. Bweꞌituk jaibu kokkosuk jumeꞌe, jukaꞌ usita aꞌ meꞌebaeme ―ti au jiiak.
21 Junak intoko, juꞌu Josee yejtek intok aapo, jukaꞌ usita intok aꞌ aewata, bwiaraa Ijraꞌel teaꞌu bicha am nuk siika. 22 Taa juꞌu Josee, Arkelaoꞌ teamta, jum Jurea bwiaraapo aꞌ achaiwa Eroorejtukaꞌuta betchiꞌbo aꞌ yoꞌo yaꞌaritukaꞌpo juꞌuneakai, aman aꞌ weeneeꞌuta majjaek. Intok tenkupo benasi juꞌuneetuawakai, bwiara Kalileaꞌ teaꞌu bicha siika. 23 Junaman yepsakai joꞌara Nasaret teaꞌu joꞌatek. Iniꞌi yeu siika junuen, Liojta betana jumeꞌ juꞌuneetuawakame bem teuwaakaꞌuta, aꞌ chupneꞌ betchiꞌbo, Jesukrijtota, nasaareenopo aꞌ taꞌeenaꞌati bem jiakaꞌuta.