Joan, juꞌu yee babatoowame, bweka paꞌaku jinabaka
3
Junakriapo taewaimmet juꞌu Joan yee babatoowame, paꞌakun bweka paꞌariau siika, bwiaraa Jureaꞌ teaꞌpo yee majtakai. 2 Intok:―Ka tuꞌik boꞌo joowamta betana emo temaine. Bweꞌituk achai Liojta betana, inim aꞌ nesauneeꞌu abe yuuma ―ti jiakan.
3 Iniꞌi Joan jiba junaꞌatukan, waꞌa, jukaꞌ Isaꞌiajtukaꞌuta, Liojta betana juꞌuneetuawaka, inia betana inen aꞌ jiꞌojtekaꞌu:
Mekka bweka paꞌariapo senuk jiawai, chaae nokpo nokaꞌu jikkajiwa, inen jiakai:
“Jukaꞌ achai Liojta, aꞌabo bittuanemta mabet betchiꞌbo,
Aawas enchim jiapsim tuꞌutene.
Jukaꞌ inim ka tuꞌik suꞌu tojine”, ti jiakai.
4 Juꞌu tajoꞌori juꞌu Joan teamta atteakaꞌu, kameeyo boae yaꞌaritukan. Juꞌu wikosa intok, bea tukan intok waka woꞌochim benam intok ket juyapo mumu baꞌawam bwaꞌeen. 5 Bweꞌu joꞌaraa Jerusalen teaꞌpo joꞌaakame intok siꞌime jumeꞌe, jum bwiaa jureaꞌ teaꞌpo intok jumeꞌe, batwee Joran teaꞌu ka mekka jiapsame, au nau yaajan aꞌ jikkaji betchiꞌbo. 6 Junameꞌe intok, bem ka tuꞌuwa yaꞌarim Liojtau bicha am teuwaasuko, aapo juꞌu Joan, batwee Jooraan teaꞌpo am batoꞌowaa simen.
7 Taa juꞌu Joan, inimeꞌe nasuk jumeꞌ paiseompo taꞌeewame intok jumeꞌ saruseompo taꞌeewame, juebenam, batoꞌowaa betchiꞌbo aman kateme bichakai:
―Ka tuꞌi yoemra, bakochim benasi a yee bai taꞌaame, jabesa enchim tejwaak, junuen, Liojta betana, unnaa jiokot machika aꞌabo weyemta betana enchim ama yoꞌeebaaneꞌ betchiꞌbo. 8 Ala emeꞌe ka tuꞌik betana enchim emo temaeꞌuta, tuꞌisi enchim jiapsaꞌue aꞌ juꞌuneiyaa tebonee aꞌ lutuꞌuriatukaꞌpo. 9 Intok emeꞌe, ka emo nasuk emo cheꞌewareka: “Itepo Apraꞌamtukaꞌuta betana te yeu katriam”, ti jiubaekaꞌeene. Bweꞌituk juꞌu achai Lios, kia inimeꞌe tetammea juniꞌi, jukaꞌ Apraꞌamtukaꞌuta betana, yoemrata yeu katriam tuneeme a jooa. 10 Jumeꞌ tepwam jaibu im jipuꞌuwa, jumeꞌ juyam chukta betchiꞌbo. Intok siꞌime juya, ka tuꞌik tatakame, chuktawaka intok tayaꞌatune. 11 Inepo ala, nee juꞌu ka tuꞌikut enchim emo temaeꞌuta aꞌ teuwaakai, baꞌapo ne enchim batoꞌowaa. Taa juꞌu, net chaꞌaka, chukula yebijneeme, aapo, Liojta betana tuꞌu jiapsi emot jiapsituaka, wepulsi tuꞌik jiba emot tawaaka, junuen aꞌ chupaꞌane. Junaꞌa, aapo cheꞌa nee bepa yoꞌotaka nesawe. Junuen inepo, kia aꞌ bochawam in aꞌ weiyaarianeeꞌu juniꞌi, ka neu lutuꞌuria. 12 Tiikom ae wij wijtawaꞌuta jaibu mampo jipuemta benasi machika. Intoko jumeꞌ tiikom tuꞌutene. Otata intok, omola aꞌ tawaane. Jumeꞌ aapoꞌik tiikom, bachiata aukaꞌu am tojine. Taa jukaꞌ otata, aꞌ tayaꞌane, tajita jiba yuu beeteꞌpo ―ti ameu jiiak.
Jesukrijtota, aꞌ batoꞌowaawakaꞌpo
13 Junak intoko juꞌu Jesukrijto, bwiaraa Kalileaꞌ teaꞌa betana, batwee Joran teaꞌu yepsak, jumun Joanta aneꞌewi. Junuen jukaꞌ Joanta aꞌ batoꞌowaaneꞌ betchiꞌbo. 14 Cheꞌa bat ka junen ean juꞌu Joan. Intok Jesujtau inen jiiak:
―Ineponee ala junaꞌa, juꞌu em batoꞌowaaꞌeaꞌu. Empo intoko nee su enchi batoꞌowa iꞌa ―ti au jiiak.
15 Taa juꞌu Jesus:
―Taa inien aune. Bweꞌituk utteꞌa, siꞌimeta jukaꞌ achai Liojta tuꞌureeꞌuta, itom aꞌ chupaꞌaneꞌpo ―ti au jiiak.
Junak san juꞌu Joan aamak eak. 16 Aapo juꞌu Jesus, batoꞌowaasuakai, baꞌapo yeu siika. Junamaꞌa sep juꞌu teeka au etapokamta benasi aayuk. Aapo juꞌu Jesus intok, Liojta betana tuꞌu jiapsita, wokkoita benasi koꞌom weyemta, bichak, aet koꞌom yejtesusekamta. 17 Junak intoko, teeka betana senu jiawai inen jiaka jikkajiwak:
―Iniꞌi junaꞌa in yoemia, in nakeꞌu. Ae betchiꞌbo ne tua allea ―ti jiakai.