Bebejeꞌerita, jukaꞌ Jesujta aꞌ jiꞌoptuabaekaꞌpo
4
Chukula sepia juꞌu Jesus, Liojta tuꞌu jiapsie juꞌuneetuawakai, mekka, kaabeta aneꞌu bicha siika. Junuen, jukaꞌ bebejeꞌerita, ka tuꞌikut aꞌ jiꞌobilaaneꞌ betchiꞌbo.2 Woi taka taewaim intok woi taka tukaariammeu tajtia, ka jiꞌibwaka ama aanek. Chukula intoko tebaurek. 3 Junak intoko, juꞌu bebejeꞌeri, Jesujtau yepsak. Intok junuen, ka tuꞌik aꞌ yaꞌa iꞌaka:
―Lutuꞌuriapo, empo Liojta betana yoemiarituko, inimeꞌe tetam, paan auneꞌ betchiꞌbo nesaune ―ti au jiiak.
4 Taa juꞌu Jesus:
―Jum Liojta nok lutuꞌuriapo inen jiꞌojtei: “Ka bwaꞌaawamtae jiba senu jiapsine, ala ketchia, siꞌime Liojta betana noki weyemtae” ―ti jiaka aꞌ yoopnak.
5 Junak intoko juꞌu bebejeꞌeri, aapoꞌik, bweꞌu joꞌara Jerusalen teaka, Liojta betana attearipo ti taꞌeewaꞌu bicha aꞌ nuk sikaa, intok junamaꞌa, bweꞌu teꞌopopo jikau bepa aꞌ jaꞌamutuak. 6 Intok iniꞌi:
―Lutuꞌuriapo empo Liojta betana yoemiarituko, emo koꞌom jimaa. Bweꞌituk Liojta nok lutuꞌuriapo inen jiꞌojtei:
Juꞌu achai Lios, jumeꞌ ankelesimmet nesaune,
junameꞌe enchi suuaneꞌ betchiꞌbo,
bempo bem maammea enchi nuꞌune,
junuen jita tetat juniꞌi,
ka koꞌokosi em auneꞌ betchiꞌbo
―ti au jiiak.
7 Juꞌu Jesus ket inikaꞌa aꞌ yoopnak:
―Ketchia Liojta nok lutuꞌuriapo inen jiꞌojtei: “Ka empo jukaꞌ em Lios achaita jiꞌobilaabaane” ―ti jiakai.
8 Juchi weeꞌpo juꞌu bebejeꞌeri, aapoꞌik mekka jikat, bweꞌu kawiu jikau yeu aꞌ nuk siika. Intok aniat siꞌimekut, ka nanau machi yoemrata, intok jukaꞌ bem ujyoriawata intok eiyaawatchik ama ayukamta aꞌ bittuak. 9 Intok:
―Ineponee siꞌimeta inikaꞌa ne enchi aꞌ makne, empo tonommea weeka, enchi nee yoꞌorineeo ―ti au jiiak.
10 Junak intoko juꞌu Jesus:
―Mekkaꞌe bebejeꞌeri. Bweꞌituk jum Liojta nok lutuꞌuriapo inen jiꞌojtei: “Em achai Liojta yoꞌorinee intok aapoꞌik jiba nok jikkajine” ―ti au jiiak.
11 Junako juꞌu bebejeꞌeri, jukaꞌ Jesujta aꞌ toꞌo siika. Ankelesim intok au yajaka, au beꞌeemtat aꞌ anian.
Juꞌu Jesus jum Kalileaꞌ teaꞌpo aꞌ tekileu naate
12 Juꞌu Jesus, jukaꞌ Joan yee babatoowamta, aꞌ etaꞌitukaꞌpo juꞌuneakai, junak bwiaraa Kalileaꞌ teaꞌu bicha siika. 13 Taa ka jum ili joꞌaraa Nasaret teaꞌpo taawak. Ala, joꞌaraa Kapernaum teaꞌu joꞌaabaeka aman bicha siika, bweꞌu joꞌara, bweꞌu bau baꞌa mayoat, bwiaraa Sabuloon intok Naptaliꞌiti teakaꞌpo. 14 Iniꞌi yeu siika junuen, Isaꞌiajtukaꞌuta, Liojta betana juꞌuneetuawaka, jukaꞌ aꞌ teuwaakaꞌuta aꞌ chupneꞌ betchiꞌbo:
15 Bwiaraa Sabuloon intok Naptaliꞌ teame, boꞌota baweu bicha aet boꞌokaꞌu, batwee Joran teaꞌpo beasi, taꞌata ama yeu weꞌe betana.
Bwiaraa Kalileaꞌ teame, jumeꞌ ka juriom jiapsaꞌpo.
16 Juꞌu yoemra, Liojta betana weyemtat ka juꞌuneaka, ka machiku aneme benaekaꞌum, bweꞌu tachiriata benasi, Liojta betana lutuꞌuriata juꞌuneiyaatuawak.
Jumeꞌ intoko bem ka juꞌuneakaꞌ betchiꞌbo, jiba yuu ka machiku bem kokkoneꞌpo jiapsaꞌum, juꞌu Liojta nok lutuꞌuria, taji tachiriata benasi, machiku taawak, ti aꞌ jiakaꞌpo.
17 Junako juꞌu Jesus yee majta taitek, inen jiakai:
―Ka tuꞌik betana emo temaine. Bweꞌituk achai Liojta betana inim aꞌ nesauneeꞌu, abe yuuma.
Juꞌu Jesus naikika jumeꞌ kuchureom aamak am nunuk
18 Juꞌu Jesus, bawe Kalileaꞌ teaꞌpo bwikolakut weyekai, wooim nau wewerim bichak. Senu Simooꞌ tean, ket Peeommea taꞌeewame. Juꞌu intoko senu Antej tean. Junameꞌe kuchureomtukan. Intok inimeꞌe bem jiteꞌim baꞌau aꞌ jimmaan. 19 Junak intok juꞌu Jesus:
―Emeꞌe nemak katne. Inepo intok, ne taꞌabwi tekilta enchim makne, juꞌu inim yoemrata jiapsammeu, bem jinneꞌuimtuneꞌ betchiꞌbo ne enchim ameu noktuane ―ti ameu jiiak.
20 Bempo intoko sep su, bem jiteꞌim suꞌu tojaka aamak sajak.
21 Cheꞌa ili bichau bicha weyekai, juchi woika nau wewerim bichak juꞌu Jesus. Jakooboꞌ teamta intok Joan teamta, Sebereoꞌ teamta uꞌusim. Junameꞌe, bweꞌu kuta kanoapo aanen bem achaiwatamake, bem jiteꞌim tuꞌutekai. Junammeu ket chaaek juꞌu Jesus. 22 Junama lautipo intok, bempo, bweꞌu kuta kanoata intok bem achai ama suꞌu tojaka, aamak sajak.
Jesus yoemrata juebenak majta
23 Juꞌu Jesus siꞌime Kalilea bwiaraat weyen, aꞌ yepsaꞌapo juriom nau yaajaꞌpo yee majtakai. Jukaꞌ bemela nok lutuꞌuriata betana, achai Liojta inim aꞌ nesauneeꞌu betana yeteu nookan. Intok siꞌimem jumeꞌ ka nanau machik koꞌokoakame emo am inneꞌetetuakai. 24 Bwiaraa Siiriaꞌ teaꞌpo siꞌimeku juꞌuneiyaawak juꞌu Jesus. Intok siꞌime jumeꞌ ka nanau maisi jiokot emo bichame au tojiwak. Koꞌokoeme intok jak wanteme. Intok jumeꞌ bebejeꞌerita betana jiokot emo bichame, intok jumeꞌ kobapo koꞌokoeka wat watteme. Intok jumeꞌ ka emo taka yekame. Jesus intok, inimeꞌe emo ineꞌetetuak. 25 Bwiaara Kalileaꞌ teaꞌpo betana tua juebenaka aamak sajak. Intok ili joꞌaram Lekapolij teaꞌa betana intok bweꞌu joꞌara Jerusalen teaꞌa betana, intok jurea bwiaara betana, intok batwee Joran teaꞌawaetana joꞌaakame aamak sajak.