3 ―Tua alleenee jumeꞌ Liojta betana bem jiapsimmeu tuꞌik ameu aꞌ beꞌeeꞌuta juꞌuneame. Bweꞌituk bempo, teekau, Liojta yoꞌotaka aꞌ katekaꞌu jiapsine.

4 ’Tua alleenee jumeꞌ junuen ket ka alleame. Bweꞌituk inimeꞌe, bem jiapsi joꞌanaaꞌuta, Liojta betana amet autuanaa.

5 ’Tua alleenee jumeꞌ ka emo jabeleme, bweꞌituk bempo Liojta betana bwiata ameu naꞌikiarita mabetne.

6 ’Tua alleenee jumeꞌe, tua junen jiaka, Liojta am joo iꞌaꞌuta aꞌ joopeame. Bweꞌituk aapo junaet am anianee yumaꞌisi aet yeu kat betchiꞌbo.

7 ’Tua alleenee jumeꞌ yee nak jiokoleme. Bweꞌituk juꞌu Lios junameꞌe am jiokoine.

8 ’Tua alleenee jumeꞌe, tua junen jiaka, tuꞌikut jiapsekame. Bweꞌituk bempo Liojta bitne.

9 ’Tua alleenee jumeꞌ nau eewamta tuꞌureme. Bweꞌituk bempo Liojta betana yoemiarimpo taꞌeenaa.

10 ’Tua alleenee jumeꞌe, achai Liojta junen tuꞌisi am jiapsi iꞌaꞌpo aman jiapsaka, inim watem betana jiokot emo bichame. Bweꞌituk bempo teekau Liojta yoꞌotaka aꞌ katekaꞌu bem jiapsineeꞌuta bitne.

11 ’Tua emeꞌe alleenee enchim nee sualeꞌ betchiꞌbo watem betana jaana jiawaawaꞌateko intok jiokot bitwakai. Intok siꞌime ka lutuꞌuriata enchim bejeꞌeka am nokao. 12 Tua kaitat jain eaka alleene. Bweꞌituk emeꞌe, Liojtamak ama butti emou tuꞌik bitne. Bweꞌituk ket jiba inien su watem betana jiokot bitwak, jumeꞌ Liojta betana juꞌuneetuawaka yeteu noktuawakame, emo bepat cheꞌa bat jiapsakaꞌum.

13 ’Emeꞌe, juꞌu inim yoemrata nasuk jiapsakai, Liojta betana jukaꞌ ameu tuꞌik junameꞌe ket aꞌ mabettua, onata tuꞌika bwaꞌapo aꞌ weyeꞌe benasia. Taa juꞌu oona aꞌ kiawaita taꞌaruko kaachin juchi a sawaanaa. Jaibu kaitaꞌpo tuꞌine. Ala woꞌotanaa intok aet naj katnaa.

14 ’Emeꞌe inim juꞌu yoemrata betchiꞌbo ket, tachiriata benasi mamachi. Kawit jikat bweꞌu joꞌaratuko, kaachin a au essone. 15 Intok kia kaabe tachiriata yaꞌane, jitaa betuk wajiwa aꞌ manaꞌ betchiꞌbo. Ala junaꞌa jikat manaꞌanaa junuen siꞌimem joꞌaraapo aneme amet aꞌ machineꞌ betchiꞌbo. 16 Junuen ketchia emeꞌe, Liojta betana enchim tachiriata benaka jipueꞌuta, siꞌimem bichapo tuꞌik enchim joaꞌue aꞌ juꞌuneiyaatuane. Junuen bempo, tuꞌik enchim joaꞌuta bichakai, enchim achai Liojta, teekau katekamta aꞌ yoꞌorine.

17 ’Ka emeꞌe jukaꞌ nesaurita Moiseejtukaꞌuta jiꞌojteita intok kia jukaꞌa, Liojta betana juꞌuneetuawaka bem yee majtakaꞌuta, yeu aꞌ tawaabaeka inim ne yebijlaa ti eane. Kannee yeu aꞌ tawabaeka yebijlaa. Ala inepo junakaꞌa tua jukaꞌ aꞌ teuwaaꞌuta, in yaꞌaneeꞌue aꞌ chupaꞌabaekai. 18 Bweꞌituk lutula weeꞌpo ne inen emou jiia, inim teekata intok bwiata ketun ayuka aꞌ bitwao, juꞌu Liojta betana nesauri, jita juniꞌi tua kaita ama yeu tawaanaa, siꞌimeta jukaꞌ yeu yumaꞌanemta aꞌ chupsuꞌutajtia. 19 Junuen san juꞌu Liojta betana nesaurita jitaꞌpo juniꞌi, jukaꞌ cheꞌa kaita teuwaa machik juniꞌi, ka aꞌ nok jikkajame, intok watem jiba junakaꞌa majtakai, teekau Liojta yoꞌotaka aꞌ katekaꞌabichapo, junaꞌa cheꞌa kaita teuwaane. Taa juꞌu, siꞌimem nok jikkajame intok watem jiba junakaꞌa majtakai, junaꞌa, Liojta yoꞌotaka aꞌ katekaꞌabichapo cheꞌa eiyaanaa. 20 Bweꞌituk inen ne emou jiia, enchim ka jumeꞌ Moiseejtukaꞌuta betana nesaurim yee majtame bepa intok jumeꞌ paiseompo taꞌeewame bepa cheꞌa tuꞌisi Liojta eaꞌpo aman ka enchim jiapsao, kaachin emeꞌe, Liojta katekaꞌu lutuꞌuriane.

21 ’Emeꞌe aꞌ juꞌuneiyaa, cheꞌa bat naatakai enchim yoꞌowasukaꞌummeu inien: “Ka jissuꞌabaane, bweꞌituk jabe juniꞌi yee suꞌari, yaꞌuraa bittuanaa”, i ameu aꞌ jiuwakaꞌpo. 22 Taa inepo nee inen emou jiia, jabeta juniꞌi, ale benasi yoemtamak aꞌ oꞌomteko, iniꞌi, Liojta betana yaꞌuraa bittuanaa. Juꞌu intok, jukaꞌ ale benasi yoemta tua jaana, ka tuꞌisi au aꞌ nokao, inim yaꞌuraa bittuanaa. Juꞌu intok, ale benasi yoemta, ka suawaꞌara, ti au jiakame, jiba yuu taji beeteu aꞌ yebijneeꞌu au chupiatune.

23 ’Junuen san beja, empo Liojtau bicha em naꞌikiarita teꞌopou aꞌ tojiꞌisekai intok junamaꞌa empo, senuk ele benasi yoemta jitaꞌapo juniꞌi ka emak aꞌ tuꞌiriakaꞌu waateꞌeteko, 24 jukaꞌ Liojtau bicha em naꞌikiari, jiba junamaꞌa teꞌopopo aꞌ suꞌu tojinee intok junae ele benasi yoemtamak bat emo tuꞌutene. Junak empo a teꞌopou nottinee intok jukaꞌ Liojtau bicha em naꞌikiarita ama aꞌ mabet tebone.

25 ’Senuk enchi aꞌ bejeꞌeeo intok enchi aꞌ yaꞌuraa bittuaseko, ketun aamak weyeka aamak emo tuꞌutene. Junuen ka yaꞌuttau bicha enchi aꞌ suꞌu tojineꞌ betchiꞌbo. Bweꞌituk junako juꞌu yaꞌut, yeꞌeꞌetammeu enchi suꞌu tojine, intok junameꞌe enchi etaꞌine. 26 Tua ne lutuꞌuriapo inen eu jiia, jukaꞌ em wikiriaꞌuta ka tua siꞌimeta enchi aꞌ bejeꞌetuasuko, junamaꞌa ka a em yeu weeneꞌpo.

27 ’Emeꞌe aꞌ juꞌuneiyaa, cheꞌa bat naataka inen: “Ka taꞌabwi jamuttamak emo tuꞌurine”, ti aꞌ jiuwakaꞌpo. 28 Taa inepo ne inen emou jiia, jabetaka juniꞌi jamuttamak au tuꞌuribaeka aꞌ bichakame, junaꞌa junaemak aꞌ jiapsipo jaibu ka tuꞌisi aulatune.

29 ’Inien san beja, empo, batatana em pusimmea, Liojta bichapo jita ka tuꞌik yaꞌaneꞌeteko, yeu am wikeka, mekka am suꞌu tojine. Bweꞌituk cheꞌa tuꞌine, takaapo wepulaik ama beꞌeeka, intok ka junuen siꞌime juꞌu em takaa, tajita ka tutukeꞌu jimmaatune. 30 Intok batatana em mamam junuen enchi am tawaaneeo, am chuktane, intok mekka am suꞌu tojine. Bweꞌituk cheꞌa juni tuꞌine, takaapo, wepulaik ama beꞌeeka, intok ka junuen siꞌime juꞌu em takaa, tajita ka tutukeꞌu jimmaatune.

31 ’Ketchia, bat naataka inen teuwaawak: “Jabetaka juniꞌi aꞌ jubiawata suꞌu tojibaeme, iniꞌi, junae betana yaꞌuraapo jiꞌosia yaꞌarita aꞌ makneeꞌu aꞌ utteꞌa”, ti teuwaawak. 32 Taa inepo ne inen ne emou jiia, waꞌa aꞌ jubiawata suꞌu tojame, taa junakaꞌa ka taꞌabwiku mak ka tuꞌisi aꞌ aulatuko, junaꞌa, aꞌ jubiawata taꞌabwiku mak au aꞌ tuꞌurituane. Intok juꞌu, jukaꞌ jamutta suꞌu tojirita jubekame, iniꞌi ketchia, Liojta bichapo ka tuꞌisi aune.

33 ’Intok ketchia emeꞌe aꞌ juꞌuneiyaa, jumeꞌ bat katriammeu inen aꞌ teuwaawakaꞌpo: “Ka aꞌ koptaka yeu aꞌ yumaꞌariane, jukaꞌa, achai Liojta bichapo aneka aꞌ chupneꞌeti jiaka em teuwaakaꞌuta”, ti teuwaawak. 34 Taa inepo inen ne emou aꞌ teuwaa, lutuꞌuriatuneꞌeti jiaka enchim nokaꞌuta, ka jita betchiꞌbo enchim aꞌ nokneeꞌu. Kia teekata juniꞌi emeꞌe ka teuwaane, bweꞌituk iniꞌi junaꞌa, Liojta yoꞌotaka ama aꞌ katekaꞌu. 35 Intok kia jukaꞌ bwiata juniꞌi, bweꞌituk iniꞌi junaꞌa, aapoꞌik Liojta aet wokeka katekaꞌu. Intok kia jukaꞌ bweꞌu joꞌaraa Jerusalen teamta juniꞌi, bweꞌituk iniꞌi bweꞌu joꞌara junaꞌa, jukaꞌ cheꞌa siꞌimem bepa yoꞌo yaꞌari yeu aꞌ puꞌalaꞌu. 36 Kia em koba juniꞌi ka teuwaaka jita lutuꞌuriatebaane. Bweꞌituk empo, chonim wepuꞌulaik juniꞌi, tosaisia oo chukuisia ka aꞌ yaꞌane. 37 Wepulsi emeꞌe, enchim teuwaaneeꞌu, jeewi, oo eꞌe, ti jiune. Bweꞌituk juꞌu inia mak naa buusti nokwame, bebejeꞌerita betana weye.

38 ’Emeꞌe aꞌ juꞌuneiyaa, cheꞌa bat naatakai inen jiuwakaꞌpo: “Waꞌa seenu, juukaꞌa senuk, pusim aꞌ taꞌarutuakame, iniꞌi ket, pusim taꞌarune. Intok juꞌu, jukaꞌ senuk tamim aꞌ taꞌarutuakame, junaꞌa ket tamim taꞌarune.” 39 Taa inepo inen ne emou jiia, jukaꞌ ka tuꞌik joamta, empo ka aꞌ bejeꞌene. Ala empo, jukaꞌ batatana jopemmet enchi chochonakamta, ket sekkaꞌatana empo au kuaktene. 40 Senuk enchi aꞌ yaꞌuraa bittuaka intok inikaꞌa, junamaꞌa yaꞌuraapo, supem enchi aꞌ uꞌaabao, jumeꞌ em bepa supem intok ket aꞌ makne. 41 Seenuk, puꞌaktita senu kiloometrota enchi aꞌ weiyaasao, empo naa buustia juchi junae beekisi aꞌ weiyaane. 42 Jukaꞌ jita eu netanemta, aꞌ mikne. Intok jukaꞌa, jita eu reewemta, junuen aꞌ reuwaane.

43 ’Ketchia emeꞌe aꞌ juꞌuneiyaa, cheꞌa bat naatakai inen jiuwaakaꞌpo: “Jukaꞌ ee naapo joꞌaakamta aꞌ nakne. Jukaꞌ intoko enchi bejeꞌemta aꞌ omtane.” 44 Taa inepo inen ne emou jiia, jumeꞌ enchim bejeꞌeme, am nakne. Jumeꞌ intoko ka tuꞌisi emou nokame, tuꞌik ame tana aꞌaune. Jumeꞌ enchim omtame, tuꞌuwata am jooriane. Jumeꞌ ka tuꞌisi jaana emou nokaka intok jiokot enchim joame, Liojtau bicha am nokriane. 45 Junuen emeꞌe, enchim yoꞌowa Lios, teekapo katekamta betana yoemiarimtune. Bweꞌituk aapo, jumeꞌ tuꞌi yoemem intok kia jumeꞌ ka tuꞌi yoemem betchiꞌbo juniꞌi, jukaꞌ taꞌata yeu weamtua. Intok tuꞌisi jiapsame intok kia ka tuꞌisi jiapsame betchiꞌbo juniꞌi, yuyuktua. 46 Bweꞌituk emeꞌe, jumeꞌ enchim eiyaame jiba nakeꞌeteko, kaita chukula emou tuꞌik ama bitne. Kia jumeꞌ yoꞌoraata betana tomita bem nau tojineꞌ betchiꞌbo tekilta joame juniꞌisu ket inikaꞌa jooa. 47 Intok emeꞌe, jumeꞌ emo mak werim jiba tetebotuaꞌateko, kaita tuꞌik emeꞌe jooa. Bweꞌituk inikaꞌa jumeꞌ ka Liojta sual taꞌaame juniꞌisu aꞌ jooa. 48 Emeꞌe, yumaꞌisi yee eiyaane, juꞌu, jukaꞌ enchim yoꞌowa Lios, teekau katekamta siꞌimem yumaꞌisia am eiyaꞌa benasia.