―Juꞌu paꞌasi baꞌawa luꞌutek ―ti au jiiak.

4 Taa juꞌu Jesus:

―Jaisaaka empo iniet nee tetejwaa. Ketun kee yuuma juꞌu taewai inien weyemta in aꞌ yaꞌaneeꞌu ―ti au jiiak.

5 Taa juꞌu Maria, jumeꞌ junamaꞌa nesauta joammeu:

―Siꞌimeta jukaꞌ aapoꞌik enchim aet tejwaaꞌuta, junakaꞌa emeꞌe aꞌ joone ―ti ameu jiiak.

6 Junamaꞌa busan bwere teta sotoꞌim manekan. Inimeꞌe, jumeꞌ juriom, Liojta bichapo emo tuꞌute betchiꞌbo emo komoniaka, bem sawaꞌum. Junamaꞌa weꞌepulaimpo, jumak naiki taka oo mamni taka liitro baꞌam ama kiareakan. 7 Juꞌu Jesus, jumeꞌ ama nesauta joammeu:

―Inimeꞌe sotoꞌim baꞌammea am tapuniane ―ti ameu jiiak.

Junameꞌe intok junuen, tua am tappuniak. 8 Junak intok juꞌu Jesus inimmeu:

―Iꞌan ala, watem ama yeu toꞌaaka, intok emeꞌe juꞌu inim pajko jujupwaꞌpo junama yoꞌo yaꞌariu am tojine ―ti ameu jiiak.

Bempo intok junuen aman au am tojak. 9 Juꞌu intok junamaꞌa pajko jujupwaꞌpo yoꞌo yaꞌari, jumeꞌ baꞌam jaibu paꞌasi baꞌawa tulame am jiiwek, ka juꞌuneakai jakun bem nuꞌuwakaꞌu. Ala jumeꞌ nesauta ama joame jiba junammet juꞌunean. Bweꞌituk bempo jumeꞌ baꞌam ama yeu toꞌalatukan. Junuen san juꞌu ama pajko jujupwaꞌpo yoꞌo yaꞌari, juꞌu ama jubemtau chaaek, 10 intok inen au jiiak:

―Inim siꞌime, jukaꞌ paꞌasi baꞌawata jiꞌinaamta, jukaꞌ cheꞌa tuꞌik bat yeteu totoja. Chukula intok jumeꞌ nunurim jaibu junakaꞌa yuꞌin am jiꞌilatuko, junak jukaꞌ cheꞌa ka tuꞌik ameu totoja. Taa empo jukaꞌ cheꞌa tuꞌik iꞌan juꞌubwa itou aꞌ tojilaa ―ti au jiiak.

11 Iniꞌi jum ili joꞌara bwiaraa Kalileaꞌ teaꞌpo kateka, Kanaaꞌ teaꞌpo Jesujta yaakaꞌu, inim tua ujyoisi eiyaawatchika aꞌ joaꞌuta, aapo aꞌ bit tebobaekai, juꞌu machilaa a jita aꞌ joaka aꞌ yaakaꞌuta, tua keꞌesamria tukan. Jumeꞌ aꞌ majtim intok junamaꞌa aapoꞌik sualek.

12 Iniat chukula aapo, bweꞌu joꞌara Kapernauꞌ teaꞌu bicha siika. Aꞌ aewa intok jumeꞌ aꞌ sailawam intok jumeꞌ aapoꞌik majtim ket aamak katekai. Junamaꞌa bempo ka jaiki taꞌapo aanek.

13 Junama san jaibu juriom pajko, bwalam aet jissuꞌa taewaita ka mekka aꞌ beꞌeeo, juꞌu Jesus, bweꞌu joꞌara Jerusalen teaꞌu siika. 14 Junama Liojta bweꞌu teꞌopopo, aapo, jumeꞌ boesim intok jumeꞌ bwaaram intok wokkoim nenenkame ama bichak. Intok ket jumeꞌ tomita nanakuliariame jum bem tekipanoaꞌpo jokammeu yepsak. 15 Inikaꞌa aapo bichakai, juꞌu Jesus, tettebe wikiam nat jijjoꞌaaka am jibebia yaak. Intok junamaꞌa teꞌopopo siꞌimem, chikti bem bwarammak intok bem boesimmak, paꞌakun yeu am beebak. Jumeꞌ tomita nanakuliaꞌum, jukaꞌ bem tomita koꞌom am woꞌotariak. Jumeꞌ intoko meesam naꞌikim am woꞌotariak. 16 Wameꞌe wokkoim ama nenenkammeu intok:

―Inikaꞌa em paꞌakun yeu tojine. In achaita teꞌopo, emeꞌe, ka jitaa ama nenki betchiꞌbo karita benasi aꞌ tatawaane ―ti ameu jiiak.

17 Junak intok jumeꞌ aꞌ majtim, Liojta nok lutuꞌuriapo inen jiꞌojteitau wawaatek: “Jukaꞌ in yoꞌowata teꞌopota, aet jiapseka tua in aꞌ eiyaꞌ betchiꞌbo, iniꞌi nee luꞌuta”, ti aꞌ jiaꞌapo.

18 Junak intok jumeꞌ juriom:

―Inikaꞌa em jooneꞌpo, lutuꞌuriata em jipueꞌut a itom juꞌuneeneꞌ betchiꞌbo, jitaa machilaatasa empo a itom bittua ―ti au nattemaek.

19 Juꞌu Jesus intok inen am yoopnak:

―Emeꞌe inikaꞌa teꞌopota mojaktane, ineponee intok baji taewaim weyeo, juchi bemelasi nee aꞌ yechaꞌane ―ti ameu jiakai.

20 Junak jumeꞌ juriom inen jiiak:

―Woi taka ama busan wasuktiapo iniꞌi teꞌopo yaꞌawak. Empo intok kaachin junuen baji taꞌapo aꞌ yechaꞌane ―ti au jiiak.

21 Taa juꞌu teꞌopo Jesujta teuwaaꞌu, jiba aapo aꞌ taka teuwaan oꞌoben. 22 Inia betchiꞌbo san, chukula, Jesujta kokkoarim nasuk juchi jiabijteko, jumeꞌ aꞌ majtim inikaꞌa aapoꞌik teuwaakaꞌubeu wawaatek. Intok bempo Liojta nok lutuꞌuria jiꞌojteita sualek intok wakaꞌa nokita aapoꞌik ameu teuwaari.

23 Junak Jesujta jum bweꞌu joꞌara Jerusalen teaꞌpo, junamaꞌa juriom bwalam jissuꞌaka pajkota weyeꞌpo aꞌ aneo, junamaꞌa juebenaka aapoꞌik machilaata a jita aꞌ joaꞌuta aꞌ bichaka, aapoꞌik sualek. 24 Taa aapo juꞌu Jesus, inimeꞌe ka am yoemꞌeiyaak. Bweꞌituk junameꞌe siꞌimemmet juꞌuneiyaakai. 25 Aapo tua kaabeta betana aꞌ boꞌo bichan, aapoꞌik inim watem betana aꞌ etejorianeeꞌuta, bweꞌituk aapo, jumeꞌ inim yoeme, bem eerimmet juꞌuneakai.