―Yee majtame, juꞌuneate Liojta betana em itom majtaneꞌ betchiꞌbo aꞌabo em bittuaritukaꞌpo. Bweꞌituk kaabe machilaata a jita aꞌ joaꞌuta aꞌ jooa em aꞌ joaꞌa benasia, Liojta ka aamak tuko ―ti au jiiak.

3 Junak intok juꞌu Jesus iniau:

―Lutuꞌuriapo ne inen eu jiia, waꞌa ka juchi yeu yoemtukame, iniꞌi, Liojta cheꞌa yoꞌotaka aꞌ katekaꞌuta, ka aꞌ bitne ―ti au jiiak.

4 Juꞌu Nikoreemoꞌ teame aapoꞌiku:

―Taa jaisa tua inien juꞌu oꞌou, yoꞌotaka a juchi yeu yoemtune. Jaisa iniꞌi juchi aꞌ malabeu a notteka intok junuen juchi bemelasi yeu yoemtunee jaꞌani ―ti au nattemaek.

5 Juꞌu Jesus inen au jiiak:

―Lutuꞌuriapo ne inen jiia, waꞌa, juꞌu baꞌae taꞌeewamtae intok juꞌu Liojta tuꞌu jiapsie ka juchi bemelasi yoemtukame, iniꞌi, Liojta cheꞌa yoꞌotaka aꞌ katekaꞌu, kaachin a aman jiapsine ―ti aꞌ yoopnak―. 6 Waꞌa inim yoemem yoꞌowaka yoemtukame, iniꞌi, jiba inim yoemtaka jiapsine. Waꞌa intok, juꞌu Liojta tuꞌu jiapsi betana bemelasi yoemtukame, iniꞌi, ale benasi jiapsiwamta jipuꞌune. 7 Ka empo aet jachin eene, siꞌimem juchi bemelasi bem yeu yoemtuneeꞌuta aꞌ utteꞌa ti in eu jiaꞌ betchiꞌbo. 8 Juꞌu jeeka aꞌ weebaeꞌu luula weama, jukaꞌ aꞌ jiawaita empo aꞌ jikkaja, taa jakuꞌubo aꞌ weyeꞌut intok kia jakun bichaa aꞌ weyeꞌut juniꞌi, empo ka a juꞌuneene. Inien ketchia inia bebena, siꞌime jumeꞌe, Liojta tuꞌu jiapsita betana bemelasi yoemtulame ―ti au jiiak.

9 Junak intok juꞌu Nikoreemo:

―Jaisa tua iniꞌi inien tune ―ti juchi au nattemaek.

10 Juꞌu Jesus inikaꞌa:

―Empo juꞌu inim Ijraꞌel yoemrata nasuk tua yoꞌoriwaka yee majtakai, jaisa iniat empo ka juꞌunea jaꞌani ―ti aꞌ yoopnak―. 11 Lutuꞌuriapo ne inen eu jiia, itepote ala, jukaꞌ itom juꞌuneiyaaꞌuta aꞌ teteuwaa, intok itepo, jukaꞌ itom bitlaaꞌuta, aꞌ juꞌuneiyaaka aꞌ lutuꞌuriate. Taa emeꞌe intoko, jukaꞌ itom emou teuwaaꞌuta, emeꞌe ka aꞌ suale. 12 Emeꞌe juꞌu jitaa inim bwiapo ayukamta betana nee emou nokao juniꞌi, emeꞌe ka nee sualekai, jaisa tua emeꞌe nee sualne, teekau ayukamta betana nee emou nokao.

13 ’Inim tua kee jabe teekau Liojtau yepsa. Ala waꞌa junaꞌabo teeka betana yepsakame jiba. Iniꞌi, juꞌu inim emo benasi yoeme, juꞌu teekau joome. 14 Intok jiba junaen, bat naataka, jukaꞌ Moiseejtukaꞌuta, jum bweka paꞌaku, jukaꞌ sisiꞌiwook bakotta, kutat aꞌ chayakaꞌa benasia, junuen ket juꞌu inim emo benasi yoeme, utteꞌa, junuen kutat jikat aꞌ chayaꞌatuneeꞌu. 15 Junuen beja siꞌime jumeꞌ aꞌ sualeme, inimeꞌe ka jiba betchiꞌbo kokkoka, taa ala inimeꞌe, jiba yuu jiapsiwamta bem bitneꞌ betchiꞌbo.

16 ’Bweꞌituk juꞌu Lios, inim aniapo jukaꞌ yoemrata, tua aꞌ nakekai, aapo jukaꞌ wepul aꞌ yoemiata, jiokot au aꞌ bitneꞌ betchiꞌbo aꞌ suꞌu tojak. Junuen beja, siꞌime jumeꞌ aꞌ sualeme, inimeꞌe, ka jiba betchiꞌbo kokkoka, taa ala inimeꞌe, jiba yuu jiapsiwamta bem bitneꞌ betchiꞌbo. 17 Juꞌu Lios, ka jumeꞌ inim bwiapo jiapsame, ka tuꞌisi am tawaabaekai, jukaꞌ aꞌ yoemiawta aꞌabo aꞌ bittuak. Taa ala aapo, inimeꞌe jinneꞌubaekai.

18 ’Waꞌa, jukaꞌ Liojta yoemiata aꞌ sual taꞌaame, iniꞌi, ka tuꞌisi aꞌ tawaanaaꞌuta, ka aꞌ bitne. Taa waꞌa ka aꞌ sual taꞌaame, iniꞌi jaibu ka tuꞌisi tawaari, junuen jukaꞌ wepuꞌulaika Liojta yoemiata, aapoꞌik ka aꞌ sualekaꞌ betchiꞌbo. 19 Jumeꞌ ka aꞌ sualeme, jaibu ka tuꞌisi tawaarim. Bweꞌituk jukaꞌ Liojta yoemiata, juꞌu tachiriapo taꞌeewame, aꞌabo bwiau aꞌ yepsako, inimeꞌe, jukaꞌ ka tuꞌik, ka machik benak cheꞌa aꞌ tuꞌurek, juꞌu tachiriapo taꞌeewamta bepa. Bweꞌituk bempo ka tuꞌik boꞌo jooriakai. 20 Siꞌime jumeꞌ ka tuꞌik joaka jiapsame, inimeꞌe, jukaꞌ tachiriapo taꞌeewamta ka tuꞌure, intok kia ka au ruktibae juniꞌi, junuen, jukaꞌ ka tuꞌik bem boꞌo jooriaꞌut ka amet aꞌ juꞌuneiyaanaꞌ betchiꞌbo. 21 Taa jumeꞌe, lutuꞌuriapo bem boꞌo jooriaꞌeaꞌuta aꞌ joaka jiapsame, inimeꞌe juꞌu tachiriau rukte, junuen juꞌu bem joaꞌut, Liojta betana aniawaka bem aꞌ joaꞌuta aꞌ juꞌuneiyaanaꞌ betchiꞌbo.

22 Iniat chukula juꞌu Jesus aꞌ majtimmak Jurea bwiaraaꞌ teaꞌu bicha siika. Junamaꞌa intok aapo, jumeꞌ aꞌ majtimmak ili juebena taꞌapo ama taawak, bempo yee batoꞌowaakai. 23 Juꞌu Joan teame intok ketchia, ili joꞌara Enon teaꞌpo, iniꞌi, senu joꞌara Salim teaꞌpo ka mekka, aapo yee batoꞌowaan. Bweꞌituk junamaꞌa tua baꞌa buꞌuureakan. Juꞌu yoemra intok junaman Joantau yajaka batoꞌowaawan. 24 Iniꞌisan, jukaꞌ Joanta jum yeꞌeꞌetawaꞌu kee aꞌ tojiwao yeu siika.

25 Junak intok waate jumeꞌ Joanta majtim, junama wate juriommak emo nok bwisek, jachin emo baꞌatuawaka, junuen Liojta bichapo emo tuꞌutewamta betana. 26 Junuen san, inimeꞌe, jukaꞌ Joanta aꞌ tejwaaboka au sajak:

―Yee majtame, aꞌ juꞌuneiyaane, waꞌa batwee Joran teaꞌabeas, taꞌata yeu weꞌe betana emak aneꞌu, juꞌu em aapoꞌik betana itou nokakaꞌu, iꞌan ket junaꞌa yee batoꞌowaa intok siꞌime jeela aamak eaka au yajja ―ti au jiakai.

27 Junak intok juꞌu Joan:

―Kaabe aane, iniꞌi, jukaꞌ au yumaka aꞌ jooneeꞌuta aet ayukame, ka Liojta betana aꞌ mabetlatkai ―ti ameu jiiak―. 28 Jiba emeꞌesu nee jikkajak, machisi, ineponee ka junaꞌa juꞌu Krijto ti nee jiako. Ala inepo nee, senu yeu puꞌaritaka nee aapat bittuari ti nee jiako. 29 Jum pajko jujupwaꞌpo, juꞌu, jukaꞌ jubiwaituneemta mabetneeme, junaꞌa juꞌu kunawaitune. Juꞌu intoko, jukaꞌ jupbaemta binwatuk naateka aꞌ taꞌaame, iniꞌi ama aneka intok nokamta aꞌ jikkajaka, tua alleene. Ket jiba junaeni, inepo junae betchiꞌbo ne tua allea. 30 Junaꞌa, aapo cheꞌewa su bichau bicha, yoꞌorisi aꞌ eiyaanaaꞌu au lutuꞌuriatune. Nee intoko, cheꞌa juniꞌi ka eiyaawatchisi in machineeꞌu, utteꞌa.

31 Juꞌu jikat teeka betana aꞌabo yebijlame, utteꞌa, iniꞌi inim siꞌimem bepa aꞌ yoꞌotuneeꞌu. Juꞌu intoko inim bwiapo yeu yoemtulame, iniꞌi bwiae yaꞌari intok inim bwiapo ayukamtat jiba juꞌuneaka aꞌ teuwaane. Taa juꞌu jikat teeka betana yebijlame, utteꞌa, iniꞌi inim siꞌimem bepa aꞌ yoꞌotuneeꞌu. 32 Intok aapo aꞌ bitlaꞌuta intok aꞌ jikkajilaꞌuta aꞌ teuwaa. Taa inikaꞌa aapoꞌik teuwaaꞌuta, tua kaabe aꞌ suale. 33 Taa seenu, waꞌa aꞌ sualeka aꞌ mabetakame, iniꞌi junuen, achai Liojta betana nokita tua aꞌ lutuꞌuriatukaꞌuta aꞌ juꞌuneiyaa tebone. 34 Bweꞌituk juꞌu, Liojta betana yeteu bittuari, iniꞌi, Liojta betana jukaꞌ nokta weyemta aꞌ teuwaa. Bweꞌituk juꞌu achai Lios, jukaꞌ aꞌ yoemiawata jukaꞌ aꞌ tuꞌu jiapsiwata, kaita beꞌeeka aet autua. 35 Juꞌu achaiwai Lios, jukaꞌ aapoꞌik yoemiata aꞌ nak taꞌaa. Intok aapo, aapoꞌik mampo siꞌimeta suꞌu tojilaa. 36 Waꞌa, jukaꞌ Liojta yoemiata sualeme, iniꞌi, jukaꞌ jiba yuu jiapsiwamta bitne. Taa waꞌa, Liojta yoemiata ka aꞌ sualbaeme, ka aꞌ bitnee junakaꞌa yuu jiapsiwamta. Ala junaꞌa, Liojta betana tua jiokot au aꞌ chupneeꞌu au aune.