Juꞌu Jesus jiabijte
16
Intok sabala taewata simsukaꞌpo aet chukula, juꞌu Maria, Maareenaꞌ teaꞌpo joome, intok juꞌu senu juꞌubwa yoꞌotume, Jakooboꞌ teamta maala, Mariaꞌ teame, intok Salomeꞌ teame, senu weemta, tuꞌisi win jubak jinuk, aman au toji betchiꞌbo, aꞌ takaawabet aꞌ toꞌo betchiꞌbo. 2 Yokoriapo intok, lominko taꞌapo, tuꞌisi ketwootana yeu sajaka, aman aꞌ tekriꞌu bicha sajak, juꞌubwa taꞌata yeu weyeo. 3 Intok boꞌot kateka inen nau jiusakan:―Jabesa tua, jukaꞌ bweꞌu tetata, ae pattita, mekka itom biaktariane ―tim nau jiu sakan.
4 Aman yajaka intok, jukaꞌ bweꞌu tetata aꞌ tekriꞌipo, aet aꞌ pattitukaꞌuta, mekka biaktita teak. Bweꞌituk tuꞌisi bweꞌuuriakan. 5 Junamaꞌa aꞌ tekriꞌipo intok, ama kimuka, senu juꞌubwa yoꞌotumta, tossaalaim, koꞌom tajti supekamta, junamaꞌa batatana katekamta am bichak. Intok emo womtekamme. 6 Taa aapo juꞌu juꞌubwa yoꞌotume intok:
―Kateꞌem emo wom womta ―ti ameu jiiak―. Ne juꞌunea ―tiia―, jukaꞌ Jesus nasareenota, kuuset poponwakamta enchim aꞌ jaiwaꞌpo. Junaꞌa ala, inim aꞌ tektukaꞌpo ka aane. Bweꞌituk jiabijtesuk. Intok inim ka aane. Intok junum aꞌ boꞌosukaꞌpo aꞌ bichaꞌem, aꞌ kaabeꞌpo. 7 Taa aapoꞌik aꞌ teuwalaꞌa benasia, iꞌan emeꞌe sajaka, aꞌ majtim aman lutuꞌuriata makne. Intok jukaꞌ Peoꞌ teamta, bwiara Kalileaꞌ teaꞌpo, ameas aꞌ aneꞌepo aman. Junaman bem aꞌ bitneꞌ betchiꞌbo. Intok junuen bem aꞌ juꞌuneyyaneꞌ betchiꞌbo, am lutuꞌuria makne.
8 Junameꞌe intok, junamaꞌa, aꞌ boꞌosukaꞌpo, yeu sajaka, womtilamtaka, emo yoaka, intok tuꞌisi emo majjautuaka tennek. Intok kia bem womtilamtukaꞌ betchiꞌbo, junakaꞌa junuen bem juꞌuneyyaaꞌuta, kaabetau aꞌ etejon.
Juꞌu Jesus, Maria Maareenaꞌ teamtau au yeu machia
9 Taa juꞌu Jesus, lominko taꞌapo, tua ketwootana, jiabijteka, Maria Maareenaꞌ teamtau bat au yeu machiak. Bat naataka intok junakaꞌa, jumeꞌ woo busan bebejeꞌeri ka tuꞌi jiapsi eerita aꞌ jiapsipo aꞌ jipuꞌusukaꞌum, paꞌakun yeu beeprialatukan. 10 Aapo juꞌu Maria intok, bat naataka aamak rejtisukaꞌum, aapoꞌik betana, emo jiapsi sioktuaka anemmeu, aman ameu yepsaka, am lutuꞌuria makak. 11 Junameꞌe intok, aꞌ juchi jiapsaꞌpo aman junuen aꞌ jikkajaka, intok aapoꞌik junuen aꞌ bichak, tiaꞌapo, katim aꞌ suale.
Juꞌu Jesus, jumeꞌ wooi aꞌ majtimmeu au yeu machia
12 Taa chukula, wasau bicha, woika katemmeu, taꞌabwisi au yaꞌalataka, ameu au yeu machiak. 13 Junameꞌe intok, notteka, jumeꞌ wate aman lutuꞌuria makbaekai. Junuentak juniꞌi, junameꞌe ka sualwan.
Juꞌu Jesus, aꞌ majtim am tekil maka, aꞌ nok lutuꞌuriata bem aꞌ jinabakaneꞌ betchiꞌbo
14 Intok juchiꞌintok, aet chukula, jumeꞌ woj mamni ama wepuꞌulaimmeu, jijiꞌibwawaꞌpo nau anemmeu, ameu au yeu machiak, juꞌu Jesus. Intok kaita bem a sualeꞌpo betana, intok namakak bem jiapsekaꞌa betana, junamaꞌa witti ameu aꞌ teuwan, jumeꞌe, bat naataka junuen aꞌ jiabijtekaꞌpo aman aꞌ bichaka, intok bempoꞌimmeu aꞌ etejowakaꞌpo, intok junuen ka bem aꞌ sualekaꞌpo betana, junamaꞌa junuen ameu nookan. 15 Intok inen ameu jiiak:
―Siꞌime bwiat naꞌikim sajaka, inim bwiapo jiapsammeu, inikaꞌa tuꞌi nokta, Liojta betana weyemta, ameu teuwane ―tiia―. 16 Waꞌa intok, enchim jikkajaka intok aꞌ sualeka, au batoowatebokame, junaꞌa aꞌ jiapsi jinneꞌutune. Taa waꞌa kaꞌa sualekame, junaꞌa, jiba betchiꞌbo ka tuꞌuwata betuk tawane. 17 Intok inikaꞌa machilaata amet juꞌuneyyane, wameꞌe aꞌ sualneeme. Bweꞌituk junameꞌe, bemelak, ka bem nokta nokaka, taꞌabwik nokne. Intok neas lutuꞌuriaka, jumeꞌe, bem jiapsimpo bebejeꞌeri ka tuꞌi jiapsi eeriakame, paꞌakun yeu am bepriane. 18 Intok, senuk, kia aakamta aꞌ kiꞌilatuk juniꞌi, junakaꞌa kaachin autuane. Intok jita, junae aꞌ mukneeꞌue, joyokamta jeꞌekaꞌatek juniꞌi, kaachin aune. Intok koꞌokoemtat mamaka, Liojtau bicha aꞌ nokriaꞌateko, au aꞌ inneꞌetetuane.
Juꞌu Jesus, teekau jikau chaꞌatu
19 Juꞌu yoꞌowe Jesus intok, inikaꞌa siꞌime weemta ameu aꞌ noksuko, teeka betana, jikau nuk chaꞌatuwak. Junaman mabetwaka, intok Liojta batatana yejtetuawak. 20 Junameꞌe intok, yeu sajaka, siꞌimekut, Liojta tuꞌi noki teuwa sasakan. Juꞌu achai Lios intok jiba amemaktukan. Intok machilaata bem joaꞌutae, junakaꞌa, Liojta nok lutuꞌuriata tua aꞌ lutuꞌuriaten. Tua junuentune.