―Jaisa empo junaꞌa, juꞌu juriommeu juꞌu rei ―ti au jiakai.

Jesus intok:

―Lutuꞌuria, em nokaꞌu ―ti aꞌ yoopnak.

3 Jumeꞌ teꞌopopo saiwame, bempoꞌim bepa cheꞌa yoꞌo yaꞌarime, juebenakut betana aꞌ naꞌatejoka ama aanen. 4 Pilaato intok juchi au nattemaek:

―Juebena weemtat betana em naꞌatejowaꞌpo, jaisa empo kaꞌam yoopnabae ―ti aꞌ temaek―. Jaisa empo kaita am yoopna machi.

5 Taa juꞌu Jesus, kia junuentak juniꞌi, kaꞌam yoopnak. Pilaato intok, tuꞌisi au aꞌ suum eeyatuan.

6 Taa junameꞌe taewaimmet intok, pajko taewaituko, junuen aꞌ boꞌo jooriawaꞌpo aman, yaꞌuraapo etaꞌita, kia jabeta juniꞌi, bem aꞌawakaꞌuta, jiokoiritaka, suꞌu tottojiwan. 7 Junamaꞌa intok yeꞌeꞌetaꞌawaꞌpo, watemmak, senu etaꞌitukan, Barabaj teame. Bweꞌituk junaꞌa, watemmak nau eaka, yaꞌuraata bejeꞌeka aulammake, yee suꞌawamta weetuan. 8 Juꞌu buꞌuura ama yajaka intok, junuen aꞌ boꞌo jooriawaꞌpo aman, pajko taewaitukaꞌ betchiꞌbo, senuk ama suꞌu tojinaꞌpo betana aꞌ teuwaan. 9 Pilaato intok:

―Jaisa emeꞌe, jukaꞌ juriommeu yoꞌo yaꞌariꞌ teamta nee suꞌu tojiꞌiiꞌa ―ti am temaek.

10 Bweꞌituk aapo juꞌu Pilaato tuꞌisi juꞌunean, yoꞌo yaꞌuraata, Jesujtat kopteka, aman au tojiwakaꞌpo. Bweꞌituk juꞌu teꞌopopo yoꞌo yaꞌuraa, kaꞌa bibitpean, jukaꞌ yoemrata cheꞌa am eeya iꞌakai. 11 Taa jumeꞌ teꞌopopo cheꞌa ama yoꞌoora, jukaꞌ buꞌuurata amemak eeneꞌ betchiꞌbo, ameu nookan, Barabajta suꞌu tojituneꞌpo betana. 12 Junak san beja juꞌu Pilaato:

―Jaisa emeꞌe nee aet nesauꞌiiꞌa, inikaꞌa juriommeu yoꞌo yaꞌariꞌ teamtat ―ti am temaek.

13 Bempo intok chai nokpo inen jiian:

―Kuuset popontaka, meꞌetune ―ti chaaen.

14 Taa juꞌu Pilaato intok, inen ameu jiia:

―Jitasa ka tuꞌika yaꞌalataka, emeꞌe kuuset aꞌ muk iꞌa ―ti am temaek.

Taa bempo intok, cheꞌa kusisi chaaeka, inen jiia:

―Jiba kuuset popontaka, meꞌetune ―ti jiakai.

15 Juꞌu Pilaato intok, siꞌime jukaꞌ yoemrata ama anemtamak, tuꞌisi tawaabaekai, Barabaaj teamta jiokoi tebok. Jukaꞌ Jesujta intok, bat aꞌ bemmuchaꞌateboka, chukula, kuuset aꞌ popontuneꞌ betchiꞌbo aet nesawek.

16 Junak intok jumeꞌ sontaom, jum yoꞌo yaꞌuraa karita korapo wajiwa aꞌ kibachak. Junaꞌa intok Pretoorioꞌ tea. Junamaꞌa intok, siꞌime juꞌu sontaoraa, emo nau tojak. 17 Junamaꞌa intok, unnaa sik saalaim teebem wokimmeu tajtia supetuawak. Intok jukaꞌ juyata tuꞌisi wichakamta jijjoꞌaaka, aꞌ koona yaaka, aꞌ kobawapo aet aꞌ yechak. 18 Junamaꞌa intok, sep au tebote pat:

―Jaisa empo jiia, juriommeu yoꞌo yaꞌari ―ti au jiu japtek―, emo aꞌ yoꞌorituamcha aneka.

19 Intok bweꞌu bakae, kobat aꞌ bebaka, koꞌokosi aꞌ jooan. Intok aetꞌim chit wat watten. Intok aꞌ yoꞌoremcha aneka, kia jak waꞌam aꞌ eeyaka, au tonommea jajapten. 20 Junuen jaanam aet noksuka intok, jumeꞌ sik saalaim supem, bem aꞌ supetuakaꞌum, junameꞌe aꞌ yechaꞌariaka, jiba aꞌ supewampo aꞌ kobatuak. Intok kuuset aꞌ popontuneꞌ betchiꞌbo, yeu nuk sakaꞌawak.

21 Senu oꞌou intok, Sireeneꞌ bwiaraꞌ teaꞌa betana joome, junaꞌa intok Simoꞌ teaka, intok Rupoꞌ teamta intok Alejanroꞌ teamta achai, waj betana yebijsusekan. Junamaꞌa waꞌam aꞌ weyeo intok, Jesujta aniasaiwakai, jukaꞌ kuujta puꞌaktatuawak.

22 Intok senu ili bwia kawiu, kolkotaꞌ teaꞌpo tojiwak. Junaꞌa intok, kuaktituko, Mukia koba, ti jiubae. 23 Junamaꞌa intok, jukaꞌ paꞌasi baꞌawata, wantiriata chaꞌatuamta miiraꞌ teamtamak nau kuutita, aꞌ jiꞌiiꞌaka, au jiꞌobek. Taa aapo intok, kaꞌa jeꞌeka. 24 Intok kuuset aꞌ poponsuako, aet chukula, aꞌ supewam, naikisi reebeik am naꞌikimtek. Jumeꞌ reebeim intok, weꞌepulaim amemak tawaneꞌ betchiꞌbo, jaꞌatepo nau yeuwak.

25 Intok kuuset aꞌ poponwaꞌpo, tua batan jiao junen yaꞌawak. 26 Intok aꞌ naꞌatejoka junuen aꞌ yaꞌawakaꞌpo, juꞌu jiꞌojtei inen jiꞌojteitukan: “Juriommeu yoꞌo yaꞌaritukaꞌ betchiꞌbo”, ti jiꞌojteitukan. 27 Aamak intok, naa buusti, wooi etbwareom aamak lopola bem kuusimmet poponwak. Senu aꞌ batatana, senu intok aꞌ mikoꞌotana. 28 “Ka tuꞌi yoememmak junuen yaꞌatuk”, ti jiakame, junamaꞌa chupuk juꞌu senu jiꞌojteipo, jakwoo naateka junuen teuwaritukaꞌu.

29 Ama amet waꞌam kateme intok, kialim jaana aet jiaka, au koba wiu wiuten, intok inenim au jiian:

―Empo cheꞌa, jukaꞌ Liojta teꞌopota tatabekaꞌateko juniꞌi, intok baji taꞌapo juchi emo aꞌ yaꞌane, ti bat naataka junuen jiusukame, 30 empo, emo jinneꞌuka, kuuset koꞌom weyeꞌe ―tim au jiian.

31 Intok ket jiba junaensu jumeꞌ teꞌopopo saiwame betana, ama yaꞌuram, bem maejtommak nau, jaanam aet nookan, inenim jiakai:

―Watem jinneꞌuk. Iꞌan intok, aapo ka a au jinneꞌu ―tim nau jiian―. 32 Empo ―tiian―, ijraꞌeliitammeu Krijto yoꞌo yaꞌariꞌi teame, junum kuuset em poponikut betana koꞌom weyeꞌe intok junuen enchi ayuko, ite aꞌ bichaka, te enchi sualne ―tim au jiakai.

Jumeꞌ intok, aawit ama ket kuuset poponwakame, ka tuꞌisi aetana nookan.

33 Intok tua luula kateko naateka, siꞌime bwiat, bajim jiaꞌapo tajtia, ka machisi tawakan. 34 Intok junamaꞌa, bajim jiaꞌapo, juꞌu Jesus kusisi chaaeka, inen jiian:

―Eloi, Eloi, lama sabaktani. ―Iniꞌi noki intok, inen jiubae: “Lios in achai, jaisa betchiꞌbo empo kia nee jimaalataka, neaj koptilata benasi aulaa”, ti jiubae.

35 Junamaꞌa intok, senu ama aneme, junuen aꞌ jiaꞌapo aman aꞌ jikkajaka:

―Eliaj teamtau aꞌ chaae ―tiia.

36 Junamaꞌa lautipo intok, juꞌu seenu, senu weemta, ejponjaꞌ teamta, junaꞌa intok komoniawak, baꞌata nunuꞌee, binaakretae aꞌ komoniaka, tebe bakapo aꞌ sumaka, aman jikau au aꞌ noitak, intok inen jiakai:

―Chubala em boꞌo bicha ―tiia―. Jumak juniꞌi juꞌu Eliaj teame au aꞌ chaaeꞌu, au yepsaka, koꞌom aꞌ yechaꞌane ―ti jiiak.

37 Taa juꞌu Jesus, junamaꞌa lautipo, kusisi chaipat, muukuk. 38 Junak intok, jum bweꞌu teꞌopopo, unnaa bweꞌu tajoꞌorim, ama wajiwa chaꞌakaꞌum, nasukꞌaman, jikat naateka, koꞌom tajti, siutek. 39 Juꞌu intok, sontao yaꞌut, aapoꞌik bichapo aneꞌu, junuen aꞌ jiaka aꞌ mukukaꞌpo aman aꞌ mammateka, aapoꞌik betana inien aꞌ teuwaak:

―Lutula weeꞌpo, iniꞌi oꞌou, kuuset poponiakame, Liojta usiwai ―tiia.

40 Intok mekkaꞌekut, waate jaamuchim aman jaꞌabweka, aꞌ bitchun. Junameꞌ nasuk intok, juꞌu Maria, bweꞌu joꞌara Maareenaꞌ teaꞌa betana jometaka ama aanen. Intok juꞌu senu juꞌubwa yoꞌotume, Jakooboꞌ teamta intok aꞌ saira, Joseꞌ teamta, junameꞌe ae, ket ama aanen, Mariaꞌ teame, intok juꞌu Salomeꞌ teame. 41 Junameꞌe jaamuchim intok, jum bwiara Kalileaꞌ teaꞌpo intok, tuꞌisi aꞌ suuaka, aet emo tekil makritukan. Intok wate juebena jaamuchim ket junalensu aet emo tekil makritukan, Jerusalen teaꞌpo, jum yee aꞌ majtaꞌapo, aamak naj kuaktisukame.

42 Junae taewait, kupteo, ket jeo jomteo, juchi yokoriapo intok sabalatubaeꞌ betchiꞌbo, intok aet yum joꞌetuneeo, junakaꞌa sabalata, kee yumao, siꞌimeta baa yaꞌasubaeka ean. 43 Junue betchiꞌbo senu yoeme, Joseꞌ teame, Arima teaꞌ teaꞌpo joꞌaakame, junaꞌa intok yaꞌutuka, yoꞌoriwan. Intok ket jiba junalensu, junaꞌa, Liojta utteꞌa nesawata inim aniau koꞌom aꞌ yumaꞌaneꞌpo aet boꞌo bichakan. Junaꞌasan, au ou bujtaka, Pilaatoꞌ teamtau kibakek. Intok jukaꞌ Jesujta takaata aꞌawak. 44 Juꞌu Pilaato intok, lauti aꞌ mukukaꞌ betchiꞌbo, aꞌ suumꞌeeyak. Jukaꞌ yaꞌuttau intok chaitebok, jukaꞌ Jesujta muksukaꞌpo, oo kee aꞌ mukeꞌepo aetana juꞌuneebaekai. 45 Intok yaꞌutta betana, Jesujta muksukaꞌpo junuen lutuꞌuriata makwaka, jukaꞌ Jesujta takaa, Joseꞌ teamtau suꞌu tojiwak. 46 Junaꞌa Joseꞌ teame intok, bweꞌu tosai tajoꞌorim jinuka, chukula intok koꞌom aꞌ yechaka, bweꞌu tosai tajoꞌorimpo aꞌ biijtaka, kau sibapo, wojoꞌoriata yaꞌariꞌpo, junamaꞌa aꞌ tekaka, intok jukaꞌ pattiriata, tetae yaꞌarita, junae aꞌ pattak. 47 Juꞌu Maria, bweꞌu joꞌara Maarenaꞌ teaꞌpo jometaka, intok senu yoeme, Joseꞌ teamta ae Mariaꞌ teame, junameꞌe aꞌ bichak junum aꞌ tekriꞌpo.