―Ka jumeꞌ taewaim weyeꞌpo te inen aune, bweꞌituk te junuen ayuek ―tiian―, jukaꞌ yoemrata, itou omtineekai, ka yanti eewame aune ―tiian.

3 Aapoꞌik intok, Jesujta, joꞌara Betaaniaꞌ teaꞌpo aneo, junamaꞌa yoeme Simoꞌ teame, bat naataka junerasi taka saꞌawakai, junamaꞌa joꞌaaka, juꞌu Jesus intok, junae joꞌaapo aanen. Aet jijiꞌibwawapo intok, aapoꞌik aman yejteko, senu jamut, ama Jesujtau yepsaka, jukaꞌ ochokok tuꞌisi win jubak, naaroꞌ teamta ausuꞌlik, intok tuꞌisi bejeꞌewakamta weeyan. Junamaꞌasan jukaꞌ ili tosai teta sotoꞌita, aet aꞌ aukaꞌuta, jamtaka, junakaꞌa ochokok aꞌ kobawapo aet aꞌ toꞌaak. 4 Waate intok ama aneme, inia weemta betchiꞌbo emo oꞌomtituak, inen emo eetuakai:

―Jaisaaka tua, beutaꞌa yaak ―tim jiakai―. 5 Bweꞌituk iniꞌi ochoko win jubak, cheꞌa tuꞌi ean, buꞌuu tomipo nenkitu ean. Bweꞌituk aꞌ bejeꞌewaꞌu, batte senu wasuktiapo tekipanoaka ama kobakaꞌu, junakaꞌa bejeꞌewaek. aꞌ nenkak intok junaꞌa tomi poobemmet naꞌikimteꞌeewan.

Inia betchiꞌbo san, junakaꞌa jamutta aꞌ bejeꞌeka, ae tana nookan.

6 Taa Jesus intok, junammeu:

―Akeꞌem aꞌ suꞌu tojaka, katem suati aꞌ bicha ―ti ameu jiiak―. Bweꞌituk iniꞌi jamut, tuꞌuwata neu yaꞌala ―tiia―. 7 Bweꞌituk jumeꞌ poloobem jiba emo mak anne, intok tuꞌuwata enchim ameu yaꞌabaeꞌpo aman, jiba emou aune. Taa nee ka jiba inim emo mak annee. 8 In mukuka, in aet maꞌanaꞌataꞌapo neu yaꞌanaaꞌuta, iniꞌi jamut, ket beꞌeeo aapo jaibu inikaꞌa ochokok win jubak aꞌ yumaꞌalaꞌpo aman, in takaat net aꞌ siꞌitala. 9 Lutula weeꞌpo inien ne emou jiia, iniꞌi Liojta tuꞌi nokta, kia jak juniꞌi, siꞌime bwiat yeu tajtia, aꞌ teuwaawaꞌpo, inikaꞌa jamutta, jukaꞌ ochokok win jubak, net aꞌ siꞌitakaꞌpo aman, ket teuwaatunee aapoꞌiku waatituneꞌ betchiꞌbo.

10 Junak intok juꞌu Juuraj Ijkariooteꞌ teame, woj mamni ama wooi aꞌ majtimpo naꞌikiatukaꞌu, junaꞌa, jumeꞌ teꞌopopo saiwame, bem yaaꞌuchimmeu sikaa, Jesujta ameu yeu bwiseka, bempoꞌim mampo aꞌ suꞌu tojineꞌ betchiꞌbo amemak au tuꞌutek. 11 Junameꞌe intok, aꞌ jikkajaka, junae weemta betana, emo alleetuaka, intok tomita aꞌ mikrokaka aꞌ tejwak. Chukula intok juꞌu Juuraj Ijkariooteꞌ teame, aꞌ bwijtuneꞌ betchiꞌbo, aet tekipanoa taitek.

12 Intok, juꞌu bem pajko, jumeꞌ paanim ka reberuakame bwaꞌe taewaita yumako, intok jumeꞌ bwaraꞌasoꞌolam aet suꞌanaaꞌu. (Junaꞌa intok pajkuaꞌatea tiia.) Junak san beja, jumeꞌ aꞌ majtim:

―Jakunsa ―tiian―, jumeꞌ paanim ka reberuakame, intok jukaꞌ bwala jisuꞌari jissobata itom bwaa iꞌa ―tim aꞌ temaek.

13 Junak intok, aapo, wooi aꞌ majtim, bweꞌu joꞌarata katekaꞌu am bittuak, intok:

―Senu oꞌouta, sotoꞌpo baꞌam weeyamta enchim nankika weene ―tiia―. Junaet chaꞌaka em katne ―ti ameu jiiak―. 14 Intok senu joꞌarapo aꞌ kibakeko, junaman, junakaꞌa karita atteakamtau emeꞌe yajaka, inen au jiunee: “Juꞌu yee majtame inen jiia: Inim em joꞌapo, jumeꞌ paanim ka reberuakame, intok jukaꞌ bwara jisuꞌari jissobata, aet aꞌ bwaꞌa taewaita yumakaꞌpo aman, inim em joꞌapo aꞌ jiꞌibwarokaka nokla. Kialiꞌikun te aꞌ juꞌuneyyabae, jakuni itom jiꞌibwaneꞌpo.” 15 Junak intok junaꞌa, junamaꞌa, junae karita bepa, intok senu bweꞌu kari katek. Junakaꞌa intok enchim tejwane. Junamaꞌa intok siꞌime aayuk, itom ae jiꞌibwaneeꞌu. Emeꞌe junen intok, junamaꞌa, ito beasi siꞌimeta ama tuꞌutene.

16 Jumeꞌ majtim intok, aman bweꞌu joꞌarau bicha sajaka, junuen ameu jiuwakaꞌpo aman, junuen ameu yeu siika. Intok paanim, ka reberuakame, intok bwara jisuꞌari jissobata, bwaꞌanaꞌpo, junamaꞌa siꞌimeta tuꞌulisi tuꞌutekamme.

17 Kupteo yumak intok, juꞌu Jesus, jumeꞌ woj mamni ama wooi ama aꞌ majtimmak, junaman, paanim ka reberuakame, intok jukaꞌ bwara jisuꞌari jissobata, bem bwaꞌaneꞌpo yepsak. 18 Junamaꞌa intok, ama aet jijiꞌibwawaꞌpo, jiꞌibwa betchiꞌbo, ama jootekai, Jesus inen jiiak:

―Lutula weeꞌpo ―tiia―, emo tana senu aane, iꞌan nemak inim jiꞌibwame, nee yeu bwiseka nee nenkineeme ―tiia.

19 Junak san beja, bempo, ka emo alleetua japtek, intok weꞌepulaka inen au jiu japtek:

―Jumak juniꞌi inepo jaꞌani ―ti jiakai.

20 Junak intok aapo am yoopnaka:

―Jumeꞌ woj mamni ama wooim betana ―tiia―, wepuꞌulaka junaꞌatune ―tiia―. Puꞌatopo in jiꞌibwaꞌpo, paanim komoniaka, am bwaꞌakame ―tiia―. 21 Taa lutula weeꞌpo, juꞌu emo benasi yoemta betana junuen aꞌ jiꞌojteitukaꞌpo aman, au chupne. Taa tuꞌisi ae betchiꞌbo jiokot machine, junae oꞌoutawi, juꞌu, yeu aꞌ bwiseka aꞌ nenkakamtau ―tiia―. Cheꞌa tuꞌi ean ―tiia―, junaꞌa oꞌou, jakwoo juniꞌi ka inim yeu tomtekaꞌateko ―tiia.

22 Junak intok juꞌu Jesus, ketuni am jiꞌibwaosu, junameꞌe paanim, ka reberuakame, nuꞌuka, Liojtau bicha noksuka intok, am rebekta taiteka aꞌ majtimmet naas am naꞌikimte taitek:

―Jibabu ―tiakai―, iniꞌi junaꞌa, juꞌu in taka benasi machik, enchim bwaꞌaneeꞌu.

23 Jukaꞌ paꞌasi baꞌawata aet aukaꞌuta intok, nuꞌuka, Liojtau bicha nookak. Liojtau bicha au nokriasuka intok, junakaꞌa paꞌasi baꞌawata, bem aꞌ jiꞌineꞌ betchiꞌbo, naas am maktaitek. 24 Intok:

―Iniꞌi junaꞌa ―tiakai―, juꞌu in ojbota benasi maachi. Liojta betana bemelasi lutuꞌuria yaꞌari, juebenam betchiꞌbo woꞌotineeme. 25 Lutula weeꞌpo ―tiia―, inikaꞌa paꞌasi baꞌawata ne kaaꞌintok ne inim emo mak aꞌ jiꞌine ―tiia―. Taa taewai yumaꞌane, junaman Lios yoꞌo nesaweka katekaꞌu, taꞌabwi, bemelak paꞌasi baꞌawata in emo mak jiꞌineeꞌuta yumaꞌane ―tiia.

26 Junamaꞌa intok, Liojtau bicha weyemta jukaꞌ bwikta bwiikak. Junamaꞌa intok, junuen ausuka, senu kawiu, tuꞌisi oliiboꞌouwota aukaꞌu bicha sajak. 27 Junamaꞌa Jesus intok, inen ameu jiiak:

―Inie tukaariat, siꞌime emeꞌe, neu aunemta betana emo womtaka, nee toꞌo tennineꞌem ―tiia―. Bweꞌituk chupiꞌiseka weye juꞌu Jiꞌojtei inen jiame: “Bwaram womteka, naꞌikim bem tennineꞌ betchiꞌbo, jukaꞌ am suuamta ne meꞌenee”, ti jiia juꞌu jiꞌojtei. 28 Taa chukula intok, ne jiabijtesuko, bwia Kalileaꞌ teaꞌu bicha ne emo pat weene ―tiia.

29 Junak intok, juꞌu Peeo inen au jiiak:

―Eu aunemta betana, siꞌimem emo womtakaꞌateko juniꞌi, inepone kaachin ino majjaituaka enchi toꞌo simbaekaꞌeene ―ti au jiiak.

30 Taa juꞌu Jesus intok, aapoꞌik inen yoopnak:

―Lutula weeꞌpo ―ti au jiiak―, ne inen ne eu jiia, inie tukaariat, totoiꞌoꞌowiata kee wosa aꞌ kukuseosu, empo, bajisi temaiwako, junalensu ket, bajisi, ka nee emo taꞌaa tiune.

31 Taa juꞌu Peeo, cheꞌa juni san au ousi eetuaka:

―Kia nee a eemak mukeꞌetek juniꞌi ―tiia―, nee eemak mukne ―tiia―, intok jiba ino enchi taꞌaa tiakai.

Jumeꞌ waate juniꞌi, ket jiba junaensu jiian.

32 Junak intok, sajaka, Jetsemaniꞌ teaꞌu yajak. Jesus intok, junamaꞌa am joosaeka am tejwaak. Bweꞌituk bempoꞌimmeu, ameu ili mekka, aapola, Liojtau bicha nokbaeka ean.

33 Taa jukaꞌ Peoꞌ teamta nuk siika, intok jukaꞌ Jakooboꞌ teamta intok jukaꞌ Joan teamta. Intok tuꞌisi au jachin eetuataitek. Intok ka au alleetuataitek. 34 Junameꞌe bajika intok, aamak sajakammeu:

―In jiapsi abe siok muke ―ti ameu jiaka―, emoꞌem suuaka, im em taawa ―ti ameu jiiak.

35,36 Junak intok juꞌu Jesus, jum aꞌ aneꞌepo, mekka jeela sikaa, bwiapo, tonommea kikteka, Liojtau bicha nokbaekai, jumak juniꞌi, junamaꞌa lautipo, ka ineꞌe maisi machik au weyemta, ka utteꞌatune, ti eakai. Intok Liojtau bicha nokaka, inen jiiak:

―In achai ―tiia―, empo cheꞌa, siꞌimeta a jooa. Inikaꞌa neu weyemta, empo a omot bicha, taꞌabwisi aꞌ kuaktakaꞌateko, junuen aune. Taa ka in junen eaꞌpo, taa em eaꞌpo amantune.

37 Junak intok, jumeꞌ baji aꞌ majtim, aꞌ toꞌo sikaꞌapo aman, ameu yepsaka, kokocheme teaka, Simotau:

―Jaisa empo koche Simo ―ti aꞌ temaek―. Jaisa empo kia chubala juniꞌi, ka kocheka a aane ―tiia―. 38 Ka tuꞌuwata ka enchim yaꞌaneꞌ betchiꞌbo, aet emo suuaka Liotau bicha nokaꞌem ―ti ameu jiiak―. Bweꞌituk juꞌu jiapsi ala, tuꞌuwau bicha jiba ea, taa juꞌu enchim takaa, ka ama aawe ―tiia.

39 Intok juchiꞌintok, bat naataka, Liojtau bicha nok betchiꞌbo, tonommea aꞌ kiktekaꞌu bicha sikaa, junaman, jiba junakaꞌa, bat naataka junaman aꞌ teuwaaꞌuta nookak. 40 Junak intok, jumeꞌ baji aꞌ majtim aꞌ toꞌo sikaꞌapo aman ameu yepsaka, juchi kokocheme teak. Bweꞌituk junameꞌe intok bem yete kokkolamtukaꞌ betchiꞌbo, kia kaita nok machiakan, juchi bem kokocheka teuwaakaꞌ betchiꞌbo. 41 Bajisi junuen auka beja, juchi junameꞌe bajimmeu notteka:

―Jaisa emeꞌe ketuni kokoche ―tiia―, intok ketuni yum joꞌewamta weetua ―ti am temaek―. Joteꞌembu ―tiia―. Emeꞌe jaibu kaachin an machi. Bweꞌituk yumaꞌasuk juꞌu in teuwaakaꞌu, emo benasi inim yoemtukame, ka tuꞌi jiapsi yoemem mampo aꞌ suꞌu tojinaaꞌu. 42 Japteꞌem. Bweꞌituk aꞌabo weye juꞌu nee yeu bwiseka, nee nenkineeme.

43 Ket aꞌ nokaosu intok, juꞌu Juuras Ijkariooteꞌ teame bat naataka woj mamni ama wooi aꞌ majtimpo naꞌikiaritukaꞌu, juebena yoememmak ama Jesujtau yepsak. Teꞌopopo saiwame, bem yoꞌo yaꞌuram betana intok junamaꞌa yoemrapo cheꞌa ama yoꞌo yaꞌarim betana, intok junamaꞌa bem maejtom betana, aman bittuarimtakai. Waate tettebem kukucheꞌeka kaaten. Wate intok bwere kutam mampo machuꞌutisakan. 44 Juꞌu yeu aꞌ bwijneeme intok aꞌ nenkineeme, jaibu senu machilaata am maklatakai, inen ameu jiulatukan:

―Te aman yajako ―tiaka―, wakaꞌa aꞌ pujbawapo, in aet tenteneeꞌu, junakaꞌa, emeꞌe, tuꞌisi aꞌ suuaka aꞌ bwiseka aꞌ weeyane ―ti ameu jiulatukan.

45 Intok ama yajaka, juꞌu Juraj Ijkariooteꞌ teame, Jesujtau rukteka, aꞌ pujbawapo aet tenteka:

―Yee mamajtame ―ti au jiiak.

46 Junak intok junameꞌe, junuen bem tejwarimtukaꞌpo aman, Jesujta bwisekamme. 47 Jesujta majtim betana intok, seenu, aꞌ bainapo jumeꞌ tebe kuchiꞌim yeu wikeka, teꞌopopo nesawemta aꞌ nesaureowata aman bittuarita, naka chuktaꞌa beebak. 48 Jesus intok, ameu nokaka:

―Jaisa nee etbwareotukaꞌa benasia emeꞌe, mampo kucheꞌeka, intok kutam machuꞌuteka aꞌabo nee bwij betchiꞌbo, aꞌabo neu yajak ―ti am temaek―. 49 Katiꞌikun nee chikti taꞌapo, emomak jum teꞌopopo aneka intok yee majtan. Junamaꞌa intok jaisaakai emeꞌe ka nee bwisek ―ti am temaek―. Taa jukaꞌ jiꞌojteita junuen aꞌ chupneꞌ betchiꞌbo, utteꞌa inien aꞌ yaꞌatuneꞌpo ―tiia.

50 Junama san, jumeꞌ aꞌ majtim, siꞌime aꞌ toꞌo tennek.

51 Taa seenu, juꞌubwa yoꞌotume, ka tajoꞌoreka taa kia bweꞌu tosai tajoꞌorimmea au ropti jintuarika, junamaꞌa Jesujtaimmak ama aanen. Junak intok, jumeꞌe, Jesujta junuen bwisekame, ket junakaꞌa juꞌubwa yoꞌotumta aamak weeyabaeka, ammea au aꞌ jintuarim bwisek. 52 Taa junaꞌa intok, am mamajuka, jumeꞌ aꞌ jinekaꞌum, bem mampo aꞌ toꞌo buiteka, ama yoꞌeeka, juneꞌelaka siika.

53 Jesujta intok, teꞌopopo cheꞌa yoꞌo yaꞌataka, nesawemta joꞌau tojiwak. Junamaꞌa intok, siꞌime jumeꞌ ama teꞌopopo juꞌu yoꞌoora intok junamaꞌa yoemrapo ama yoꞌo yaꞌarime ama aanen. Intok siꞌime jumeꞌ junamaꞌa bem maejtom. 54 Taa juꞌu Peoꞌ teame, aꞌ weeyawao, ili mekka, aet chaꞌaka weyen. Intok aꞌ junamaꞌa joꞌara mayoau tajtia aamak yepsak. Teꞌopopo yoꞌo yaꞌataka nesawemtau aꞌ tojiwako. Intok ama saiwammak, tajimmeu kateka sukawen juꞌu Peeo.

55 Intok junamaꞌa, juꞌu yoꞌoora, jum teꞌopopo nesaweme, intok siꞌime juꞌu yaꞌuraa, Jesujta meꞌ betchiꞌbo, watem, jitat, ka tuꞌikut betana, aꞌ meꞌetuneꞌ betchiꞌbo, aꞌ naꞌatejonemta waatan. Taam kaabeta teak. 56 Bweꞌituk juebenaka, aa nokiꞌichiata, ka tuꞌik ae tana nookan. Taa bem aet nokaꞌu, intok aetana aꞌ waatiawaꞌpo aman, ka ama yeu weaman. Bweꞌituk utteꞌatukan, wooi oo baji yoemem, nanancha bem aꞌ teuwaaneꞌ betchiꞌbo, jukaꞌ bem aꞌ naꞌatejoneeꞌuta. 57 Junak intok, waate, aꞌ bejeꞌeka, aa nokiꞌichiata nok japtek inenim jiakai:

58 ―Itepote cheꞌa, inikaꞌa inen ti jiamta te jikkajila. Aapo, ikaꞌa teꞌopota, maamea yaꞌarita au tatapne, tiia. Baji taꞌapo intok, taꞌabwi teꞌopota, ka maamea yaꞌatunemta au yaꞌaneꞌetiia.

59 Taa junuentak juniꞌi, aꞌ bejeꞌeka bem teuwaaꞌu, ka nanancha aꞌ teuwaak. Aꞌ waatiawaꞌpo aman ka yeu weaman.

60 Junak intok juꞌu teꞌopopo cheꞌa yoꞌotaka, ama nesaweme, nasuk kikteka, Jesujtau:

―Jaisa empo kaita am yoopna machi ―ti aꞌ temaek―. Inikaꞌa weemta enchi bejeꞌeka nokammewi. Jaisa lutuꞌuria jaꞌani, bem et nokaꞌuta ―ti aꞌ temaek.

61 Taa aapo intok, juꞌu Jesus, tua kaita am yoopnariak. Juchi intok juꞌu teꞌopopo cheꞌa yoꞌotaka ama nesaweme, juchi au nattemaeka:

―Jaisa empo junaꞌa jaꞌani, juꞌu Krijto ―ti aꞌ temaek―. Intok juꞌu, tua yoꞌoriwamta Liojta betana, empo usiwai ―ti aꞌ temaek.

62 Junak san beja, juꞌu Jesus:

―Inepo junaꞌa ―ti au jiiak―. Intok jukaꞌ Liojta usiwaita empo bitne, Liojta, siꞌime utteꞌawata betana, intok aꞌ batatana katekamta bitne. Intok ket, namupo aꞌabo koꞌom weyemtaꞌeꞌe bitne ―ti au jiiak.

63 Junak intok juꞌu teꞌopopo, cheꞌa ama yoꞌo yaꞌarime, kujteerimmea, au supe siuti wikeka, ama anemmeu inen jiiak:

―Iꞌan, junuen aꞌ nokakaꞌ betchiꞌbo ―tiia―, junuet aꞌ nok bwijlataka, intok aꞌ bejeꞌeka aet nokneeme, kaabe intok waatiatune ―tiia―. 64 Emeꞌe aꞌ jikkajila, junuen juꞌenasi aꞌ jiakaꞌpo. Jaisa emou maachi ―ti am temaek.

Junameꞌe intok, siꞌime, aꞌ meꞌe iꞌaka nookan.

65 Waate intok, aet chit watti japtek. Intok aꞌ puj sumaꞌika, aꞌ beebaka, inen au jiian:

―Noolia ―tiian―, itom tejwaa jabeta juꞌu enchi choname ―tim au jiakai.

Jumeꞌ waate intok, ama saiwame, aꞌ chonaka, koꞌokosi aꞌ jooan.

66 Teꞌopopo cheꞌa yoꞌo yaꞌarita, jamut nesaureowa aman koꞌom siika. Peota intok junamaꞌa betuk aꞌ aneꞌepo, 67 tajimmeu sukawemta bichaka, tuꞌisi aꞌ bitchuka, inen au jiiak:

―Jaisa empo ket, Jesuj nasareenoꞌ teamtamak empo weaman ketchia ―ti au nattemaek.

68 Taa aapo juꞌu Peeo intok:

―Tua ne kaꞌa taꞌaa junakaꞌa ―ti au jiiak―. Intok ne kia ka juꞌunea jachin em neu jiaꞌapo ―tiia.

Intok junamaꞌa, ama yeu rejtiwaꞌpo, paꞌakun bicha yeu siika. Intok juꞌu totoiꞌoꞌowia kukusek. 69 Juꞌu jamut nesaureo intok, juchi aꞌ bichaka, ama anemmeu inen jiiak:

―Iniꞌi ket junaꞌa, Jesujtaim betana weyeme ―tiia.

70 Taa juꞌu Peeo intok, juchi, kaꞌa lutuꞌuriaꞌatiaka nookan. Intok juchi intok, chukula, jumeꞌ ama aneme:

―Lutula weeꞌpo ―tiian―, empo amemak weaman ―tim Peotau jiian―, intokꞌe Kalileotakai. Bweꞌituk bempoꞌim benak nooka.

71 Taa juꞌu Peeo, tua aꞌ sualnaꞌ betchiꞌbo inien au noktaitek:

―Tua ne kaꞌa taꞌaa junakaꞌa oꞌouta ―tiia―, enchim nee aamak weama tiaꞌu. Intok ka tuꞌuwa neu aꞌauneꞌuta net auneꞌetiia, in noki ka lutuꞌuriatuko ―tiia.

72 Junak intok juꞌu totoiꞌoꞌowia, iniamak nau, jaibu wosa kukujlatukan. Junak intok juꞌu Peeo, Jesujta au nokakaꞌutau wawaateka, inen au aꞌ jiakaꞌpo: “Jukaꞌ totoiꞌoꞌowia kee wosa kukuseo, empo bajisi netana temaiwakaꞌateko, junamaꞌa empo ket junalensu, ket bajisi, ka emo nee taꞌaa tiune.” Peeo intok, junuen au nokwakamtau wawaateka, bwan taitek.