―Achai ―ti au jiiak―. Yuu, inimeꞌe bwere karim, bwere tetammea yaꞌarim bichaꞌe ―ti au jiiak.

2 Jesus intok aꞌ yoopnaka:

―Inimeꞌe bwere karim enchim bichakaꞌum ―ti au jiiak―, taewai aapo yumaꞌane, inimeꞌe karim siꞌime bem tataptuneꞌpo. Intok inimeꞌe bwere tetam intok, kia wepuꞌulaik juniꞌi, ka nat joka tawane. Taa siꞌime jeto chibela tataptune.

3 Senu ili kawiu intok, oliiboꞌouwota buꞌuuka, junaꞌa intok teꞌopota bichapo ka au mekka au machiata katek. Jesus intok, junaman bicha sikaa, junamaꞌa aanen. Junamaꞌa intok aapolaik, juꞌu Peoꞌ teame, intok Jakooboꞌ teame, intok juꞌu Joan teame, intok juꞌu Antej teame, inen aꞌ tetemae japtek:

4 ―Inien auneeme ―tiian―, jakwoosa yeu weeneekai ―ti aꞌ temaek―. Intok jitaa machilaasa aune, inikaꞌa taewata abe yumaꞌasuseo ―tim aꞌ temaek.

5 Jesus intok am yoopnaka:

―Kaabeta enchim bai taꞌaaneꞌpo betana emoꞌem suuaꞌem ―ti ameu jiiak―. 6 Bweꞌituk in team teuwaaka, juebenaka yeu machine. Intok: “Inepo juꞌu Krijto”, tim jiune. Intok buꞌuum bai taꞌaane.

7 ’Taa nassuawamta em jikkajaꞌateko, intok kia nassuabaawa tiuwamta juniꞌi, katem jachin emo eetua. Bweꞌituk utteꞌa junuen yeu aꞌ weeneꞌpo. Taa junaꞌa, kee juꞌu subimwatuneeme. 8 Bweꞌituk juꞌu waate yoemratau yoꞌoraa, taꞌabwi yoemratau yoꞌoraatamak nassuane. Intok kia oꞌomotchuu, juꞌu bwia au yoowame aune. Intok tebaetune. Taa iniꞌi siꞌime weeme, kia juꞌubwa naatewame, jiokot eenaaꞌu.

9 ’Taa emeꞌe, emo naas em suuaꞌem ―tiia―. Bweꞌituk juriom yaꞌuraata bichapo yeu tojitune. Intok jum juriom nau emo totojaꞌpo bemmuchaꞌatuneꞌem. Intok kia cheꞌa yoꞌo yaꞌarim bichapo, intok yoꞌo yaaꞌuchim bichapo nee betchiꞌbo, junamaꞌa yeu totojinaaꞌem. Jukaꞌ Liojta tuꞌu nok lutuꞌuriata bem jikkajineꞌ betchiꞌbo. 10 Intok in tuꞌi nok lutuꞌuriata inim bwiapo jiapsammeu, siꞌimem yeu tajtia, ameu teuwaatuneꞌpo aman, utteꞌa, junuen bat ameu aꞌ teuwaanaꞌpo, kee jukaꞌ chukula yeu weenemta yeu aꞌ weyeo. 11 Intok emeꞌe, aman yaaꞌuchim bichapo nuꞌupawako, aman tojiwako, juꞌu enchim nokneꞌepo betana, ka jain eene. Intok kaachin emo eetuakai. Taa junamaꞌa lautipo, enchim nokneeꞌuta nokne. Bweꞌituk Liojta tuꞌu jiapsi, aapoꞌik enchim noktuabaeꞌpo aman enchim noktuane. 12 Intok kia aꞌ sairaka juniꞌi, kialaꞌa meꞌetuneo juniꞌi, yeu aꞌ bwijne. Intok kia achaiwaitaka juniꞌi, aꞌ yoemiata junuen yaꞌa tebone. Jumeꞌ yoemiamtaka juniꞌi, bem achaim bejeꞌeka japtene. Intok am suꞌane. 13 Intok emeꞌe siꞌime, nee betchiꞌbo omtanaaꞌem. Taa waꞌa aꞌ mukeꞌepo tajtia nee yoemꞌeeyaakame, intok nee sualeme, junaꞌa jiapsi jinneꞌuritune.

14 ’Taa emeꞌe, jukaꞌ senu oꞌouta, Liojta teꞌopopo, ka ama an machika juniꞌi, ama anemta bichakaꞌateko (inikaꞌasan junen jiꞌojtek juꞌu Lanieltukaꞌu, Liojta betana noktuawakame), Liojta teꞌopota jaana aꞌ eeyaka, intok junamaꞌa Jerusalen teaꞌpo ayukamta buꞌuuk nasonteneeme (inikaꞌa inien jiamta nokame, tua aet juꞌunee betchiꞌbo, aet mammateka aꞌ noknee). Junak intok, junakaꞌa junen ama anemta bichaꞌateko, jumeꞌe, bwiara Jureaꞌ teaꞌpo aneme, kawiu bicha sakaꞌane. 15 Juꞌu intok, karita bepa aneme, koꞌom sikaa, ka wajiwa kibakeka aꞌ weeyaꞌ betchiꞌbo jita nuꞌubaekaꞌeene. 16 Waꞌa intok, wajpo aneme juniꞌi, ka juchi amau bicha nottibaekaꞌeene, aꞌ jijineꞌum aman nuꞌubaekai. 17 Taa junameꞌe taewaimmet intok, tuꞌisi jiokot machine. Jaamuchimmeu abe asoammeu, intok jumeꞌ bem ili asoam jaibu chiꞌituammewi. 18 Inia betchiꞌbo san, Liojtau bicha emo nokria, ka seberia mechammet, junam bicha enchim katneꞌ betchiꞌbo. 19 Bweꞌituk junameꞌe taewaimmet, tuꞌisi jiokot machine. Bweꞌituk, Liojta keꞌesamriapo aniata juꞌunaktekaꞌpo naateka inien jiokot machineeꞌu, kaitatuk. Taa iꞌan, junameꞌe taewaimmet, jiokot machineeꞌu junuen aune. Intok aet chukula junale benasi jiokot machineeꞌu, jakwoo juniꞌi, ka intok junuentune. 20 Taa juꞌu achai Lios, ka binwa junuen aꞌ anꞌiiꞌaꞌ betchiꞌbo, kaita intok taewaita naa buusti am makak. Bweꞌituk, ka junuen aukaꞌateko, kaabe jiapsi ean. Taa aapo juꞌu Lios, junameꞌe ama yeu aꞌ puꞌarim betchiꞌbo, junakaꞌa junuen anemta junamaꞌa nukisi jiba junuen aꞌ anneꞌ betchiꞌbo, ka intok naa buusti junuen aꞌ antuak.

21 ’Inien aꞌ weeꞌpo san: “Krijto waꞌam aane”, ti senuk jiaꞌateko, kaꞌa sualbaekaꞌeene. Oo: “Waꞌam jak aꞌ yebijlaa”, ti aꞌ jiao juniꞌi, kaꞌa sualbaekaꞌeene. 22 Bweꞌituk juebenaka emo Krijtom tiaka, yeu machine. Waate intok, emo, Liojta betana noktuawaka bittuarim, tiaka yeu machine, intok yee bai taꞌaꞌ betchiꞌbo, sualwatchisi machik, machilaata am joone. Intok kia suum watchisi machik juniꞌi joone. Intok Liojta yeu puꞌarim a am bai taꞌaꞌateko juniꞌi, am bai taꞌaabaekai. 23 Taa emeꞌe, aet emo suuaꞌem. Bweꞌituk inikaꞌa weemta, kee yeu weyeo, jaibu ne siꞌimeta enchim tejwasula.

24 ’Taa intok, junameꞌe taewaimmetchi, jiokot machisi maisi yeu simsukaꞌpo, juꞌu taꞌa ka machisi tawane. Intok kia juꞌu mala meecha juniꞌi ka machiriane. 25 Jumeꞌ chokim intok, teeka betana koꞌom yojtine. Intok siꞌime juꞌu teekapo ayukame, au yoyoone. 26 Junak intok, seenu, namupo aꞌabo weeka bitnaa. Emo benasi inim yeu yoemtakai, yoꞌorisi machisia, intok tuꞌisi utteꞌawakai. 27 Junak intok, aꞌ nesaureoꞌankelwam, siꞌimekut naas am bittuaka, aapoꞌik yeu puꞌalaꞌum nau am toji betchiꞌbo, siꞌime bwiat yeu tajtia, naꞌikim aneme nau am toji betchiꞌbo ―tiia―.

28 ’Senu weemta ne enchim majtabae ―tiia―. Emeꞌe ―tiia―, jukaꞌ chunaꞌouwota, basiu taitemta bichaꞌateko, emeꞌe jaibu juꞌuneene, jukaꞌ tatariata aꞌabo weyeꞌpo. Junakaꞌa mammateka juꞌuneene. 29 Ket junalensu, bat naataka in emou teuwaakaꞌuta junuen yeu aꞌ machi taiteko, ket emeꞌe a aet juꞌuneene, jukaꞌ Liojta usiwai, cheꞌewasu ka mekka aꞌ beꞌeeꞌpo, inim wain koꞌom aꞌ yebijneꞌpo ―tiia―. 30 Lutula weeꞌpo ―tiia―, in emou teuwaakaꞌu, iꞌan inimeꞌe taewaimmet, inim bwiapo jiapsame, jukaꞌ in teuwaakaꞌu, kee am kokkousu, yumaꞌisi siꞌime yeu machine ―ti ameu jiiak―. 31 Juꞌu teeka juniꞌi, luꞌutine, intok kia bwia juniꞌi luꞌutine. Taa in noki, ka luꞌuteka, jiba betchiꞌbo aune ―tiia―.

32 ’Taa kaabe aꞌ juꞌuneyya junakaꞌa taewata, jak weyeosu aꞌ yumaꞌaneꞌpo. Kia ankeltaka juniꞌi, kaꞌa juꞌuneyya, teekapo aneme. Intok kia Liojta usiwai juniꞌi kaꞌa juꞌuneyya, taa aapo jiba juꞌu achai Lios juꞌunea ―tiia―.

33 ’Taa emeꞌe ―tiia―, junakaꞌa taewata, jak weyeo aꞌ yumaꞌaneꞌpo ka enchim aet juꞌuneaꞌ betchiꞌbo, jukaꞌ bejak in emou teuwaakaꞌuta yeu aꞌ wee taiteko, tuꞌisi aet mammateka, Liojtau bicha emo nokria, intok kulupti jukaꞌ emo benasi yoemta aꞌ yebijneeꞌuta boꞌo bitne. 34 Bweꞌituk iniꞌi weeme, iiyilen maachi, senu yoeme, mekka bicha simbaeka, aꞌ joꞌawapo aꞌ nesaureowam, weꞌepulaim jitat am tekil makaka, sikaꞌa benasi maachi, intok jukaꞌ senuk, jum aꞌ joꞌawapo jum ama yeu rejtiwaꞌpo siꞌimeta aꞌ suuasaeka, junamaꞌa aꞌ toꞌo siika ―tiia―. 35 Junuen san beja, junakaꞌa, jak weyeo aꞌ nottineꞌpo ka juꞌuneaka, oo kupteo tana yebijne, oo nasuk tukaata weyeo, oo matchuu bicha, totoim kukuseo, oo tua matchusuk, aꞌ yebijneꞌpo ka juꞌuneewaꞌ betchiꞌbo, jiba aꞌ boꞌo bichaka ama anne. Emeꞌe juni san, netchem boꞌo bichaka tawane. 36 Bweꞌituk enchim ka emo suuao, inepo seej chukti emou yepsako, enchim kokocheme teune ―tiia―. 37 Intok siꞌimeta wakaꞌa in emou teuwaaꞌuta, siꞌimemmeu ne yeu tajti aꞌ teuwaaka ne junen jiia, bem nee boꞌo bichaꞌpo amani.