―Senu yoeme ―tiia―, yuꞌin paꞌasi ouwota eechak. Intok korate betchiꞌbo, juyata ama jijjoꞌak. Intok paꞌasi taka baꞌawata nuꞌu betchiꞌbo aꞌ babaꞌawaꞌumta ama yaꞌatebok. Intok mekka aniau bicha bitchuu betchiꞌbo, yuꞌin tetata jikau bicha nat chaꞌabwak.

’Junuen auka intok, taꞌabwim mampo aꞌ suꞌu tojak. Intok paꞌasiꞌouwo takata, ama toboktitunemta, bempoꞌimmak watek aman nuꞌu betchiꞌbo, lutuꞌuriata yaak. Junak intok, omot, mekka bwiarau bicha siika juꞌu. 2 Paꞌasim bwaseo intok, senuk, aꞌ nesaureowata, aman, paꞌasi wajta tekipanoammeu bittuak. Paꞌasim bwaseme ama chuktawame au lutuꞌuriamta aman nuꞌutuawakai. 3 Taa junameꞌe intok, kaita aꞌ makaka, kia juneꞌelaka simtuaka, intok koꞌokosi aꞌ yaakai. 4 Intok juchi intok, senuk aꞌ nesaureowata aman ameu juchi bittuak. Taa junakaꞌa intok, tiusi maisi aꞌ yaaka, koba jamti aꞌ mamaasuka aꞌ simtuak. 5 Intok juchi intok, senu nesaureowata aman bittuak. Junakaꞌa intok im meꞌak. Intok juchi intok, buꞌuuka aman bittuak. Junameꞌe juniꞌi ket junalensu, watem koꞌokosi yaak, watem intok suꞌak.

6 ’Junak san beja, wepul puꞌilaik useka, intok tuꞌisi aꞌ nakeka juniꞌi, junakaꞌa junaman bittuak: “Jumak juniꞌi”, tiꞌeaka, “in aꞌ usekaꞌpo aman, emo aꞌ yoꞌorituanee”, ti au eetuakai. 7 Taa junameꞌe paꞌasi etta tekipanoame, intok junakaꞌa usiwaita aman weyeo aꞌ bichaka, inenim jiiak: “Inikaꞌa paꞌasi etta atteaneeme, aꞌabo weye”, tiian. “Taa inikaꞌa paꞌasi etrita itou aꞌ tawaneꞌ betchiꞌbo, ite aꞌ meꞌene. Junak intok itou tawanee”, tim nau jiiak. 8 Junak intok, junakaꞌa bwiseka, aꞌ meꞌaaka, junamaꞌa paꞌasi etripo, paꞌakun bicha, mekka jakunim aꞌ tojak.

9 ’Tua juꞌu tekowaita intok inikaꞌa paꞌasi etrita atteakame junaman yepsako, jumeꞌ ama tekipanoame, jaisa tua yaꞌaneekai. Junameꞌe bat aꞌ tekipanoasukaꞌum junuen bem aukaꞌ betchiꞌbo, tokti am suꞌaka kaitaꞌpo am tawane ―tiia―. Intok jukaꞌ paꞌasi wajta taꞌabwim mampo aꞌ suꞌu tojitebone ―tiia.

10 ’Jaisa, Liojta nok lutuꞌuriapo inen aꞌ jiꞌojteipo aman, emeꞌe kee aꞌ noklaa jaꞌani. Junaꞌa jiꞌojtei intok, net nokaka, tetapo nee teuwaaka, inen jiia:

12 Junak intok, junakaꞌa weemta, taꞌabwi weemtau aꞌ tammachiaka, aapoꞌik ameu nokaꞌuta, bempoꞌimmet junuen aꞌ nokaꞌati juꞌuneaka, aꞌ bwiseka aꞌ meꞌebaeka ean. Taa jukaꞌ buꞌuuraata ama anemta majjaeꞌ betchiꞌbo, kaachin aꞌ yaaka, kia beja ama aꞌ toꞌo sajak jukaꞌ Jesujta.

13 Chukula intok, Jesujtau watem paiseom betana intok eroorianom teame betana aman au bittuawak, jita juniꞌi, aꞌ nonoktuaka, aꞌ naꞌatejo betchiꞌbo. 14 Junameꞌe intok, junamaꞌa au yajaka:

―Yee majtame ―tim au jiiak―. Juꞌuneate, lutuꞌuriata jiba em nokaꞌapo. Intok kaabeta betana em emo suuaꞌpo. Bweꞌituk ee betchiꞌbo kaabe bwere yaaꞌuchim ―tiian―. Cheꞌa juni san, empo siꞌimem nanancha eeyaka am bicha ―tiian―. Cheꞌa juni san lutuꞌuriakamta ausuꞌlitae Lioj tuꞌu lutuꞌuriata eꞌe yee majtaꞌe ―tiian―. Inia betchiꞌbo san, senu weemta te eu nattemaibae ―tim au jiian―. Jaisa tuꞌinee jaꞌani, oo ka tuꞌinee jaꞌani, juꞌuyoꞌo yaꞌari Sesar teamtau tomita aman au tojipo ―tiian―. Junae tomie, yaꞌuraapo saiwame ae bejeꞌetuanaꞌ betchiꞌbo. Inien san beja, itom tejwaane, jaisa te aꞌ bejeꞌetuane, oo te kaꞌa bejeꞌetuane ―tim aꞌ temaek.

15 Junak intok juꞌu Jesus, aapoꞌik, bem aꞌ bai taꞌaabaeꞌpo aman amet juꞌuneaka, inen ameu jiiak:

―Jaisa betchiꞌbo emeꞌe nee aet jiꞌobilaabae ―ti am temaek―. Jukaꞌ tomita neu toja ―tiia―, naꞌa bitbae ―ti ameu jiiak.

16 Junak intok, bempo junakaꞌa tomita au tojak, aapo intok:

―Iniꞌi pujba ―tiia―, intok inimeꞌe team, tomit katekame, jabesa junaꞌa ―ti am temaek.

Bempo intok:

―Iniꞌi junaꞌa, juꞌu yoꞌo yaꞌari Sesar teamta pujbawa, intok aꞌ teawam ―tim aꞌ yoopnak.

17 Junak intok juꞌu Jesus inen ameu jiiak:

―Siꞌimeta wakaꞌa Sesar teamtau bicha au aꞌ lutuꞌuriakaꞌuta, akeꞌem aꞌ makaꞌem ―tiia―. Intok siꞌimeta wakaꞌa Liojtau bicha au aꞌ lutuꞌuriakaꞌuta, akeꞌem aꞌ makaꞌem ―tiia.

Intok junuen ameu aꞌ jiakaꞌ betchiꞌbo, tuꞌisim aꞌ suumꞌeeyak.

18 Junak intok jumeꞌ saruseom teame, kokkolam jiabijteneꞌpo, junakaꞌa taewaita jakwoo juniꞌi, ka yumaꞌaneꞌetiame, aman au yajak Jesujtawi, intok inen au nattemaek:

19 ―Yee majtame ―tiian―, juꞌu Moiseejtukaꞌu, jiꞌojteita inien toꞌo siika, aꞌ saiwata, kaabeta useka intok aꞌ jubi toꞌo mukuko, aꞌ sairawata aꞌ jubiꞌuneꞌpo aman au utteꞌaꞌatiia, aꞌ saiwata betchiꞌbo yoemianeꞌeteakai. 20 Inien aꞌ weeꞌpo san, woo busan oꞌowim nau weweriakan. Juꞌu bat weyeme, jubeka, intok ka yoemiaka muukuk. 21 Aet chukula weyeme intok, juchi aꞌ jubiꞌuka juniꞌi, ka yoemiaka muukuk. Junaet chukula weeme juniꞌi, aꞌ jubiꞌuka juniꞌi, ka yoemiaka muukuk. 22 Junuen nat chaꞌaka jumeꞌ woo busan oꞌowim nau weweriakaꞌum, junuen emo aꞌ jubi makaka juniꞌi, kia jabe juniꞌi, junae jamuttau kia wepul yoemiata juniꞌi ka au toꞌo kokkok. Chukula kia aapo juniꞌi juꞌu jamut muukuk ―tim au jiiak―. 23 Kokkolam jiabijteneꞌpo taewaita yumako, junameꞌe jiabijteko, jumeꞌ woo busan nau wewerim betana, jabesa tua aamak tawane. Bweꞌituk siꞌime emo aꞌ jubi maklatukan ―tiian.

24 Junak intok juꞌu Jesus am yoopnaka:

―Tuꞌisi em jiꞌoplaꞌem ―tiia―. Bweꞌituk Liojta nok lutuꞌuriat em ka juꞌunea. Intok kia Liojta utteꞌawat juniꞌi em ka juꞌunea. 25 Bweꞌituk junakaꞌa taewaita yumako, kokkolam aet jijiabijteneeꞌu, emo jujupnaame kaitane. Bweꞌituk junaman teekapo, ankelesim benasia inimeꞌe, junameꞌe benasi machine ―tiia―. 26 Intok kokkolam jiabijteneꞌpo betana emeꞌe, jum Moiseejtukaꞌuta jiꞌosia jiꞌojteimpo kaꞌa nokla jaꞌani, junamaꞌa ili juya beeteꞌutchi jiꞌojtek, intok Liojta inien au aꞌ nokakaꞌpo inen au jiakai: “Inepone Apraꞌamta Liojraa”, tiia. “Intok Isaak teamta Liojraa, intok Jakooboꞌ teamta Liojraa, inim nemak jiapsamme”, ti jiia juꞌu Lios. 27 Iniꞌi Lios intok, ka kokkoarimmeu Lios, taa jiapsammeu Lios ―tiia―. Inien san beja, emeꞌe tuꞌisi jiꞌoplaꞌem, kokkoarim ka jijiabijteꞌetiakai ―ti ameu jiiak juꞌu Jesus.

28 Intok senu maejto, junuen emo nau nok bwijlaame jikkajaka, intok Jesujta tuꞌisi am yoopnakaꞌpo aman, aꞌ jikkajaka, aman Jesujtau yepsaka, au nattemaek:

―Liojta nesauta betana ―tiaka―, jitaa nesaurisa, cheꞌa utteꞌa itom aꞌ yaꞌaneeꞌu ―ti aꞌ temaek.

29 Jesus intok aꞌ yoopnaka:

―Siꞌime nesaurita betana, iniꞌi junaꞌa, juꞌu cheꞌa utteꞌa itom yaꞌaneꞌu: “Ijraꞌeliitam teame, akeꞌem aꞌ jikkajaka aꞌ mammateꞌem, tiia. Juꞌu itom Lios achai, wepul Lios jiba junaꞌa” ―ti ameu jiakai―. 30 “Intok em Lios achaita, tuꞌisi chikti em jiapsi utteꞌawatae, intok em jiapsi tuꞌiꞌeeritae, em achai Liojta yoꞌoreka aꞌ nakneꞌem”, tiia. “Intok tuꞌisi aet jiapseka, aꞌ nesaweꞌpo aman weene.” Iniꞌi junaꞌa, juꞌu cheꞌa tuꞌi nesauri. 31 Aet chukula weyeme intok, batte ale benasi maachi: “Em emo nakeꞌe benasi”, ti jiame, “ket junalensu yoemrata a naknee”, ti jiame. Intok iniꞌi wooi nesauri, jumeꞌ waate siꞌime nesaurita bepa, cheꞌa eeyawatchi, ti ne eu jiia.

32 Junak intok juꞌu maejto inen aꞌ yoopnak:

―Tua su tuꞌi, yee majtame ―tiia―. Lutuꞌuriateꞌe nooka, kaabeta intok Liojtukaꞌpo, tiaka, taa wepul jiba junaꞌa juꞌu Lios, ti em jiaꞌapo. 33 Intok chikti itom jiapsie, intok itom tuꞌiꞌeewamtae intok siꞌime itom jiapsiꞌutteꞌawatae, junuen itou chaꞌaka, junuen itom aꞌ nakneꞌepo. Intok tuꞌisi aet jiapseka aꞌ nesaweꞌpo aman weeneꞌpo ket junuen itou chaꞌaka, junuen itom aꞌ boꞌo joorianeꞌpo. Intok jukaꞌ yoemrata junuen itom am nakneꞌepo ket junuen itou chaꞌaka ―tiia―. Intok te inien aꞌ boꞌo jooriaꞌateko, inim siꞌime tekiata intok Liojta yoꞌori betchiꞌbo, wakasim suꞌaaka am tattaawaꞌabepa, ite cheꞌa tuꞌisi aunee inien aneꞌeteko ―ti au jiiak.

34 Jesus intok junak, tua junuentukaꞌpo aman, jukaꞌ maejtota junuen aꞌ yoopnakaꞌ betchiꞌbo, aꞌ mammateka, inen aꞌ yoopnak:

―Empo iꞌan, jukaꞌ Liojta tuꞌi nok lutuꞌuriatat abe tuꞌisi aet juꞌunea ―ti au jiiak.

Junak intok, Jesujta junuen aꞌ jiakaꞌ betchiꞌbo, kaabe intok taꞌabwi weemta aꞌ temaebaeka ean.

35 Jesus intok, junamaꞌa bem teꞌopopo am majtaka, inen ameu jiiak:

―Jaisa betchiꞌbo ―tiia―, jumeꞌ maejtom, jukaꞌ Krijtota Labiiꞌ teamta aꞌ yoemiak, ti jiamme. 36 Bweꞌituk jukaꞌ Labiitukaꞌuta, Liojta tuꞌu jiapsi inien aꞌ jiutuak:

Intok juebenaka ama aneme, alleaka Jesujta jikkajan.

38 Intok jiba am majtasimeka:

―Jumeꞌ maejtom betana emoꞌem suuaꞌem ―tiia―. Bweꞌituk junameꞌe, emo Lioj waatituamcha aneme benasi, emo tebe aꞌaabiꞌitotua. Intok jum kaayepo, jukaꞌ tuꞌisi yoꞌorisi maisi ameu tebotewamta eeyamme. 39 Intok jum Lioj waati betchiꞌbo, emo nau totojiwaꞌpo, inimeꞌe maejtom junamaꞌa, ka amapo joobaekaꞌeene. Cheꞌa juni san, bat bem joteꞌeneꞌuta cheꞌa waata. Intok emo aꞌabojwaꞌpo, jiba bat joteꞌebaekaꞌeene. 40 Taa ka ammaꞌali aane. Bweꞌituk inimeꞌe junen, jamut jokoptuim, bem atteata, kia tomituk juniꞌi, intok kia waj bwiatuk juniꞌi, intok kia karimtuk juniꞌi, am uꞌuraa. Chukula intok, bem bitnaꞌ betchiꞌbo, tuꞌisi a Lioj waate tiunaꞌ betchiꞌbo, binwa jukaꞌ Liojtau bicha nokwamta weetua jumeꞌ maejtom. Inimmeu san junen, cheꞌa bettesi amet aune, jiokot bem anneeꞌu.

41 Junamaꞌa bweꞌu teꞌopopo intok, Jesus katekan, tomita ama jojjoꞌawa bichapo. Intok jukaꞌ yoemrata bitchun, tomita aman tojamta. Yuꞌin totomekame intok, cheꞌa buꞌuuk ama jojoꞌan. 42 Senu jamut intok, poloobetaka intok jokoptuitaka, ama yepsak. Junaꞌa intok, wooi kopre tomim ama joak, tuꞌisi ka bejeꞌewaekamta. 43 Junak intok juꞌu Jesus, aꞌ majtaꞌummeu chaaeka:

―Lutula weeꞌpo ―ti ameu jiiak―, iniꞌi poloobe jamut jokoptui, Liojta bichapo, siꞌime jumeꞌ cheꞌa buꞌuuk ama joakame bepa cheꞌa buꞌuuk ama joak. 44 Bweꞌituk siꞌime jumeꞌ waate, bem ameu yeu biꞌilaꞌuta ama joak. Taa iniꞌi jamut, aꞌ poloobeꞌaꞌpo aman, jukaꞌ ili aꞌ jipueꞌuta, tokti siꞌimeta ama joak, bwaꞌamta ae aꞌ jinuꞌeaꞌuta juniꞌi.