―Itopat bat sajaka, joꞌarau yajaka, junamaꞌa senu buuꞌasoꞌolaata chaꞌakamta em bitne. Junakaꞌa intok, kia jabe yoeme juniꞌi, kee aꞌ kabaꞌite. Aꞌ buttaka, aꞌabo neweꞌem aꞌ tojine ―ti ameu jiiak―. 3 Intok senuk, jaisaaka emeꞌe aꞌ butta, ti enchim temaekaꞌateko, “achai chubala betchiꞌbo aꞌ waata, taa chukula juchi aꞌabo aꞌ bittuarokaka nooka”, ti ameu jiune. “Junak intok sep aꞌabo aꞌ bittuane” ―ti jiia juꞌu Jesus.

4 Junameꞌe intok, junam bicha sajaka, jukaꞌ ili buuꞌasoꞌolaata ama joꞌarau aman kimuriata naapo, paꞌakun tana, boꞌotchi chaꞌakamta aꞌ teak. Junak intok aꞌ butta japtek. 5 Junamaꞌa intok wate ama aanen, senu intok inen ameu jiiak:

―Jaisaakai emeꞌe ili buuꞌasoꞌolaata butta ―ti am temaek.

6 Junak intok junameꞌe, Jesujta, bem amet aꞌ sawekaꞌpo, intok bem ameu aꞌ nokakaꞌpo aman, junaeu aꞌ teuwaak. Junak intok sep, bem aꞌ nuk sakaꞌaneꞌ betchiꞌbo suꞌu tojiwak. 7 Junakaꞌa buuꞌasoꞌolaata aman nuꞌuka intok, Jesujtau aꞌ tojak. Junak intok bem bepa supem aet wattak. Junae buuꞌasoꞌolaatat intok, juꞌu Jesus aet jikat yej simen. 8 Junamaꞌa intok, aapat juebenaka ama aneme, jum boꞌot aet waꞌam aꞌ weeneꞌpo, bem jiniam tetekan. Waate intok nassaꞌakariam chuktaka, junamaꞌa boꞌot aawas aꞌ totoꞌan. 9 Aapat kateme, intok kia amaꞌa kateme juniꞌi, alleerimmea chaaeka inenim jiian:

―Itomeꞌe jinneꞌuꞌe ―tiian―. Tuꞌisi tawaari, achai Liojta betana lutuꞌuriaka inim weyeme ―tim jiu sakan―. 10 Rei Labiita bat naataka, inim siꞌimekut tuꞌisi aꞌ nesausukaꞌa benasia, juchi junaen benasi inim aꞌ auneꞌ betchiꞌbo, Lios aapo, teekapo betana junae betchiꞌbo enchi aniaka, emaktune ―tim jiu sakan.

11 Junak intok Jesus, Jerusaleneu yepsaka, junamaꞌa bweꞌu teꞌopota katekaꞌu kibakek. Junamaꞌa intok siꞌimeta ama aukamta naj bitchuka, siika. Betaaniaꞌ teaꞌu bicha siika. Jumeꞌ woj mamni ama wooim aꞌ majtimmake. Bweꞌituk jaibu unnaa kupten.

12 Juchi yokoriapo intok, junamaꞌa Betaaniaꞌ teaꞌpo betana yeu sajaka, tebauritaitek juꞌu Jesus. 13 Mekkaꞌekut intok, senu chunaꞌouwota, sia koja weekamta bichaka, aman au siika, takam aꞌ jipueꞌetiꞌeakai. Au yepsaka intok, kia sawa ausuꞌlitukan. Intok ka tatakan. Bweꞌituk kee taewaim yuuman aꞌ takaneꞌ betchiꞌbo. 14 Junak intok, Jesus junae chunaꞌouwotau:

―Kialeꞌe, jakwoo juniꞌi, kaibuꞌe takaneꞌe ―ti au jiiak―. Intok kia jabe juniꞌi, ka enchi taka bwaꞌane ―tiiak.

Intok junuen au aꞌ jiaꞌapo, jumeꞌ aꞌ majtim aꞌ jikkajak.

15 Intok juchiꞌintok, Jerusaleneu yajaka, juꞌu Jesus juchi aman bweꞌu teꞌopou kibakeka, jumeꞌ ama jita nenkame paꞌakun yeu beeptaitek. Intok jumeꞌ ama jita jinume. Intok jumeꞌ watem, bem tomita ama bem nanakuliaꞌpo, intok bem aet aꞌ jipueꞌuta, junakaꞌa juniꞌi, mekka am biaktariak. Intok jumeꞌ ama wokkoim nenenkame, intok bem aet jokaꞌum junakaꞌa juniꞌi, mekka am biaktariak. 16 Intok junamaꞌa paꞌariatchi teꞌopopo nape konila boꞌokame, kia jabeta juniꞌi junamaꞌawaꞌam kaita weeyaꞌiiꞌan. 17 Intok inen am majtaka, inen am tejwa:

―Jaisa emeꞌe ka juꞌunea ―tiian―, inien aꞌ jiꞌojteitukaꞌpo: “Iniꞌi in teꞌopo, siꞌime yoemrata betana, ama Liojtau bicha nok betchiꞌbo teꞌopopo taꞌeenaa.” Taa emeꞌe, tesompo, jumeꞌ jita eꞌetbwamta boꞌo jooriame, ama emo euseꞌpo benasi, inien aꞌ kari yaꞌariꞌem ―ti ameu jiiak.

18 Intok jumeꞌ teꞌopopo yaaꞌuchim intok jumeꞌ bem maejtom, inien aꞌ jiaꞌapo aꞌ jikkajak. Intok kialim aꞌ meꞌebaeka juniꞌim ean. Taa katim aꞌ meꞌan, bweꞌituk junuen auneekai, juniꞌim majjaen, jukaꞌ yoemrata aet yee aꞌ majtaꞌapo betana bem aꞌ suum eeyaꞌ betchiꞌbo. 19 Intok kupteꞌ betchiꞌbo, junamaꞌa bweꞌu joꞌara Jerusalen teaꞌpo, juꞌu Jesus ama yeu siika.

20 Yokoriapo intok, ketwootana, chunaꞌouwota weekaꞌpo aman sajak. Junaꞌa chunaꞌouwo intok, nawau tajtia wakiataka yeu matchulatukan. 21 Junak intok juꞌu Peeo, tukariapo, Jesujta au aꞌ teuwaakaꞌutau wawaateka:

―Itom majtame ―tiia―, juꞌu chunaꞌouwo, tuuka, junuen em au bette nokie jiakaꞌu, waakek ―ti au jiiak.

22 Jesus intok junak:

―Liojta, em jiapsipo yoemꞌeaꞌe ―ti au jiiak―. 23 Bweꞌituk em jiapsipo tuꞌisi a jita sualeꞌeteko, kia senu kawibeu, aꞌ katekaꞌpo aꞌ sookteka, baweu au aꞌ jimmaasaeꞌeteko juniꞌi, junuen au ean ―ti ameu jiiak―. 24 Junuen san beja, inien ne emou jiia, Liojtau bicha nokaka, siꞌimeta wakaꞌa enchim au netaneeꞌu, junaꞌa weeme, enchim aꞌ mabetneꞌpo betana aet eaka, aꞌ sualeꞌem ―tiia―. Intok junuen aet sualeꞌeteko, enchim netaneeꞌu, emou aune ―tiia―. 25 Intok Liojtau bicha nokaꞌateko, senuk bejeꞌeka aulatuko, junuen em Liojtau nokaꞌapo aꞌ jiokoine. Lios achaita teekapo katekamta betana senuku, enchim ka tuꞌuwa yaꞌariꞌut, enchim aet jiokoineꞌ betchiꞌbo. 26 Bweꞌituk emeꞌe, kaabeta a jiokoeꞌeteko, juꞌu Lios achai juniꞌi, teekapo katekame, senuku enchim ka tuꞌuwa yaꞌariꞌut, ket junalensu ka enchim a aet jiokoine ―tiia.

27 Jesus intok, aꞌ woj mamni ama wooi majtimmak, juchi Jerusaleneu yepsak. Aapo intok junamaꞌa teꞌopopo naj weyen. Junak intok junamaꞌa teꞌopopo saiwame, bem yoꞌo yaꞌurammak, intok jumeꞌ bem maejtom, intok jumeꞌ ama siꞌime yoemratau aꞌ yoꞌoraa, aman au sajaka, ama au yajaka Jesujtawi, aꞌ temaek. 28 Junak intok:

―Inien em auneꞌ betchiꞌbo ―tiian―, jabesa enchi aet tekil makri ―ti aꞌ temaek―. Intok jabesa junaꞌa, inien enchi antuame ―tiian.

29 Junak intok juꞌu Jesus am yoopnak:

―Nee ket senu weemta emou nattemaibae ―tiia―, intok enchim nee aet yoopnako, nee ket enchim tejwane, aꞌ jabetukaꞌpo, inikaꞌa nee tekil makrime. 30 Joan yee babatoowamta baꞌapo yee aꞌ batoowaꞌu, jakuꞌubosa aet sauritaka junuen yee batoowan, Liojta betana, oo inim bwiapo yoem nesautukan jaꞌani, netcheꞌem aet yoopna ―ti ameu jiakai.

31 Junak intok junameꞌe, bempoꞌim nasuk, ka kusisi inien jiu japtek:

―Liojta betana, ti te jiakaꞌateko: “Jaisaaka intok, emeꞌe kaꞌa sualek”, ti itou nattemaine. 32 Taa inim bwiapo, yoem nesauta betana aꞌ mabetlataka junuen yee batoowan juꞌu Joan yee babatoowame, ti te jiaꞌateko, ito betchiꞌbo ka tuꞌine ―ti jiian.

Bweꞌituk bempo, jukaꞌ yoemrata emo majjaituan juꞌu ameu am yaꞌaneꞌpo betana. Bweꞌituk juꞌu yoemra, junakaꞌa Joan yee babatoowame tukaꞌuta, tua lutuꞌuriapo, Liojta betana yeteu aꞌ noktuawakaꞌpo aman aꞌ eeyaka, tuꞌisi emo aꞌ yoꞌorituan. 33 Inia betchiꞌbo san, Jesujta, kaachin a yoopna machika:

―Katte juꞌunea ―tim jiiak.

Jesus juniꞌi, ket junuen am yoopnak:

―Nee juniꞌi, ne kaachin enchim a tejwaane, jabeta eaꞌpo junuen in aneꞌepo ―ti ameu jiiak.