―Jaisa, senu aꞌ jubiawata a jimmaanee jaꞌani ―tim au nattemaen.

3 Taa aapo juꞌu Jesus intok, inen am yoopnak:

―Juꞌu Moiseejtukaꞌu, jaisa emot aꞌ nesawek ―ti am temaek.

4 Bempo intok:

―Juꞌu Moiseejtukaꞌu ala ―tiian―, jubiarita toꞌo sim betchiꞌbo, yaꞌuraapo, jiꞌosiata yeu jimmaanesaeka aꞌ nookak. Junameꞌe jiꞌosiammea intok, senu, aꞌ jubiawata a toꞌo simne ―tiian.

5 Jesus intok am yoopnaka:

―Enchim namakak jiapsekaꞌ betchiꞌbo ―tiia―, junaꞌa Moiseejtukaꞌu inikaꞌa nesauta jiꞌojtetebok ―tiia―. 6 Taa aniata naatekaꞌpo naateka, juꞌu Lios ka junuen aꞌ waatan. Bweꞌituk inien jiꞌojtei, juꞌu Lios, oꞌouta juꞌunaktek, intok jamutta juꞌunaktek. 7 Inia betchiꞌbo san juꞌu oꞌou, aꞌ malawata intok aꞌ achaiwata toꞌo sikaa, aꞌ jubimak jiapsine. 8 Ka intok wooi yoemem benasia tawane. Inien san beja, woiriaka juniꞌi, nappat, wepul yoemta benasi eeyatune. 9 Inia betchiꞌbo san, wooi jiapsita nau tojirita, Liojta wepul jiapsita yaꞌarita, inim bwiapo, juꞌu yoeme, kaachin junakaꞌa a naꞌikimtene ―ti ameu jiian.

10 Chukula intok, senu joꞌarapo, junae weemta betana, jumeꞌ aꞌ majtim au nattemaek. 11 Aapo intok am yoopnaka:

―Kia jabe juniꞌi ―tiia―, aꞌ jubiawata jimmaakame, intok taꞌabwik jamuttamak jiapsaꞌateko, junaꞌa, tua aꞌ juprita aꞌ kunabeu lutuꞌuriawame, junakaꞌa, taꞌabwi jamutta ama lutuꞌuria makako, junaꞌa, tua aꞌ jamut juprita betchiꞌbo ka tuꞌisi tawane. 12 Intok ket junalensu, kia jamuttaka juniꞌi, aꞌ kuna jimmaako, intok taꞌabwi oꞌoutamak yejteko, junaꞌa, tua aꞌ kunabeu lutuꞌuriapo, junakaꞌa taꞌabwi oꞌouta au kunatuakamta, tua aꞌ kunawata betchiꞌbo ka tuꞌisi tawane.

13 Waate intok, junamaꞌa, ili usim, Jesujtau tojan, amet am mamteꞌiiꞌakai. Taa aꞌ majtiwam intok, aman yeu am tojammeu, ameu emo omtituan. 14 Jesus intok junuen am bichaka, au oꞌomtituaka, aꞌ majtimmeu inen jiiak:

―Inimeꞌe ili uusim elaꞌpo aꞌabo neu tojinaa, katem ammeu suua ―ti ameu jiiak―. Bweꞌituk, inimeꞌe ili usim benasi emo eetuame, jukaꞌ Liojta utteꞌa nesawata katekaꞌpo au lutuꞌuriane, ama jiapsineꞌ betchiꞌbo ―tiia―. 15 Lutula weeꞌpo ne inen jiia, kia jabetaka juniꞌi, Liojta utteꞌa nesawata, ili usita benasi ka au eetuakaꞌateko, junakaꞌa, Lios utteꞌa nesawata katekaꞌpo, ka a aman kibakne ―ti ameu jiiak.

16 Junameꞌe ili usim intok, weꞌepulaim am ibaꞌibaktaka, amet mamaka, ameu tuꞌuwatunemta, Liojtau bicha am nokrian.

17 Aapo intok, junamaꞌa yeu sikaa, boꞌot aꞌ weyeo, senu au tajtia buiteka, aapoꞌik bichapo, tonommea kikteka au nattemaeka:

―Tuꞌu yoeme ―tiia―. Yee mamajtame ―ti Jesujtau jiiak―. Jaisa ne auka tua, jukaꞌ yuu jiapsiwamta net aune ―ti aꞌ temaek.

18 Jesus intok:

―Jaisaakai empo nee tuꞌu jiapsek, tiia. Bweꞌituk inim kaabe aane, tuꞌu jiapsekame. Taa juꞌu Lios jiba tuꞌu jiapsekame ―tiia―. 19 Empo jaibu Liojta nesaurim taꞌaa: “Jubeka, ka taꞌabwi jamuttamak emo tuꞌuribaane. Etbwawamta juniꞌi, ka boꞌo jooriane. Intok yee suꞌanaꞌuta juniꞌi. Ka aa nokiꞌichiata nokne. Intok yetet, jukaꞌ ka lutuꞌuriata, kateꞌe amet aꞌ nokne. Intok em achaita intok em malata, tuꞌisi am yoꞌorinee” ―ti au jiiak.

20 Junaꞌa intok inen aꞌ yoopnak:

―Yee maj majtame ―ti au jiakai―. Inikaꞌa weemta, in usitukaꞌpo naateka, yumaꞌisi ne siꞌimeta yaꞌari ―tiia.

21 Junak intok juꞌu Jesus, aꞌ nokaꞌutat betana aet mammateka, aꞌ jiapsipo aꞌ naktaitek, intok inen au jiakai:

―Senu weeme jiba eu beꞌe ―ti au jiiak―. Iꞌaneꞌe sik, jukaꞌ siꞌimeta em jipueꞌuta nenkaka, intok pooberaatat aꞌ naꞌikimtene ―tiia―. Junak intok, aman teekapo ee betchiꞌbo, cheꞌa eu tuꞌuwatunemta aune ―tiia―. Chukula intok, in boꞌo jooriaꞌuta, nemak aꞌ joo simne. Intok nee betchiꞌbo em jiokot emo bitneꞌpo, ka jain emo eetuaka, kialaꞌa inneꞌaka jiapsine ―tiia.

22 Taa junaꞌa intok, Jesujta inien au aꞌ teuwaꞌ betchiꞌbo, ka au alleetuaka siika. Bweꞌituk tuꞌisi jita yuꞌin bejeꞌewakamta jipuen.

23 Junak intok juꞌu Jesus aꞌ majtim naj bitchuka, inen ameu jiiak:

―Tua tuꞌisi ameu obiachi, jumeꞌ yuꞌin totomekammewi, Liojta utteꞌa nesawata katekaꞌu bem yajineꞌpo ―tiia.

24 Junak intok, jumeꞌ aꞌ majtim, inien bem ameu nokwakaꞌuta betana aet emo suumꞌeetuak. Taa juꞌu Jesus intok, juchi ameu noktaiteka:

―In yoemiam ―ti ameu jiiak―. Tuꞌisi ameu obiachi, Liojta utteꞌa nesawata katekaꞌpo, bem yajineꞌpo, jumeꞌ yuꞌin tomeka, junaet eaka aet jiapsekammewi ―ti ameu jiiak―. 25 Kameota jiꞌikia pusimpo ama yeu aꞌ weeneꞌpo bepa, juꞌu yuꞌin tomekamtau cheꞌa obiachi, Liojta utteꞌa nesauta katekaꞌu aꞌ yebijneꞌpo ―ti ameu jiiak.

26 Bempo intok, inia weemtat aet ee majjautuan. Bem jiapsimpo inen emo eetuakai:

―Junuentukaꞌateko intok, jabesa tua a jinneꞌutune ―ti emo eetuan.

27 Jesus intok bempoꞌim naj bitchuka, inen ameu jiiak:

―Yoemtau obiachisi machiakaꞌu, Liojta betchiꞌbo, tua ka obiachi. Bweꞌituk aapoꞌik betchiꞌbo kaita obiachisi machika aayuk.

28 Peeo intok inen au jiutaitek:

―Achai ―tiia―, itepo, itom atteata siꞌimeta toꞌo sakaꞌalataka intok te em eaꞌpo aneka, emak te rejte ―ti au jiiak.

29 Jesus intok aꞌ yoopnaka:

―Lutula weeꞌpo ―ti au jiiak―. Kia jabetaka juniꞌi, tuꞌisi nee au naktuakai, intok in nok lutuꞌuriata aꞌ boꞌo jooriaka, yee aꞌ majtabaekai, intok junue betchiꞌbo aꞌ joꞌawata toꞌo sikaꞌateko, oo jumeꞌ aamak werim toꞌo sikaꞌateko, intok kia aꞌ jubiawata intok aꞌ yoemiawaim juniꞌi toꞌo sikaꞌateko, intok waj bwiawata toꞌo sikaꞌateko, 30 juꞌu inien aukame, cheꞌa juni san, siꞌimeta jukaꞌ aꞌ suꞌu tojakaꞌuta bepa, iꞌan, inimeꞌe taewaimmetchi, cheꞌa buꞌuuk atteane, jumeꞌ Liojpo betana aamak werimtuneeme, intok yoemiamtuneeme, intok yuꞌin joꞌaraata jipuꞌunee aꞌ mabettuneꞌpo, intok waj bwiawam juniꞌi. Taa junuentaka juniꞌi, watem betana omtanaa. Intok jukaꞌ jiokot au aꞌ bichaꞌu, jiba aet aune. Taa chukula, Liojtau bicha jukaꞌ yuu jiapsiwame aet aune. 31 Taa juebenaka jumeꞌ cheꞌa emo eeyame, junameꞌe junen, aman cheꞌa koꞌomꞌeeyarimtune. Intok juebenaka jumeꞌ ka emo cheꞌa eeyame, junameꞌe junen, aman cheꞌa eeyarimtune.

32 Intok boꞌot, Jerusaleneu bicha jikau boꞌokamtat kateka, Jesus bat weyen, aꞌ majtim intok aet chaꞌaka kateka, aman Jerusaleneu bem yajineꞌewi aman, emo majjaituaka juniꞌi, aet chaꞌaka kaaten. Bweꞌituk aman, bempoꞌim betchiꞌbo, ka tuꞌik au machian. Junak intok juꞌu Jesus, jumeꞌ woj mamni ama wooim aꞌ majtimmeu, junamaꞌa boꞌot omot bicha bempolaim yeu wikeka, junamaꞌa bempolaimmeu, siꞌimeta wakaꞌa au yaꞌanaaꞌuta ameu teuwaak:

33 ―Iꞌan te Jerusaleneu yajako ―tiia―, junamaꞌa, juꞌu emo benasi yoeme, teꞌopopo yoꞌo yaaꞌuchim mampo intok jumeꞌ maejtom mampo suꞌu tojitune. Intok aꞌ meꞌenaꞌ betchiꞌbo, taꞌabwi yoemrata mampo suꞌu tojitune, junuen nau aꞌ wepul lutuꞌuria yaakai. 34 Junamaꞌa intok, junameꞌe aꞌ beebaka, jaana aꞌ jiawaane. Intok aet im chit wat wattine. Intok im aꞌ meꞌene. Taa junaꞌa, baji taewaita weyeo, jiabijtene ―ti ameu jiiak.

35 Junakꞌintok, juꞌu Jakooboꞌ teame, intok juꞌu Joan teame, Sebereoꞌ teamta uꞌusim, Jesujtau rukteka, inienim au jiia:

―Achai ―tim au jiiak―. Itom eu aꞌawaꞌuta, itom aꞌ yaꞌariane ―tim au jiiak.

36 Aapo intok:

―Jitasa emeꞌe waataka ―tiia―, enchim nee aꞌ yaꞌariaꞌiiꞌa ―ti am temaek.

37 Bempo intok:

―Ito tana ―tiian―, senuk em batatana yej betchiꞌbo, senuk intok, em mikkoꞌotana yej betchiꞌbo, itom junen autuaꞌe ―ti au jiiak―, emak ama an betchiꞌbo, enchi yoꞌotaka yejteko.

38 Jesus intok am yoopnaka:

―Tua em ka juꞌunea ―ti ameu jiiak―, juꞌu enchim aꞌawaꞌut. Jaisa emeꞌe siꞌimeta jukaꞌ koꞌokosi machik neu weyemta, intok wakaꞌa in jiapsipo, koꞌokosi in inneꞌeneeꞌuta, jaisa emeꞌe nele benasi aꞌ inneꞌene ―ti am temaek.

39 Bempo intok:

―Jeewi ―tim aꞌ yoopnak.

Jesus intok inen ameu jiiak:

―Lutula weeꞌpo ―tiia―, inien neu aunemtat betana, wate weeme emou aune ―tiia―. Intok a emeꞌe aꞌ inneꞌe sakane. 40 Taa batatana senuk neu yejtenemta, intok mikkoꞌotana senuk neu yejtenemta, junakaꞌa weemta, inepone ka a yeu am puꞌa. Taa wameꞌe Liojꞌachaita betana yeu puꞌawame, junameꞌe junuen ama joteꞌetuanaa ―ti ameu jiiak.

41 Jumeꞌ waate, woj mamni aꞌ majtim intok, inien jiame jikkajaka, Jakooboꞌ teamta intok Joan teamta emo ameu omtituan. 42 Taa juꞌu Jesus, siꞌimemmeu chaaeka, inen ameu jiiak:

―Emeꞌe tuꞌisi juꞌunea ―tiia―, inim bwiapo, jumeꞌ tekiataka yaꞌuttuko, yoemratau au yoꞌo joaka, nesawamta weetua. Taa junameꞌebepa ket aane, ame bepa nesaweka, bempoꞌim juniꞌi saweme ―tiia―. 43 Taa emo nasuk ka inien weye. Bweꞌituk kia jabetaka juniꞌi, emo nasuk au yoꞌo joobaeꞌeteko, junaꞌa, cheꞌa, enchim siꞌimem nesauta jooriane ―tiia―. 44 Intok kia jabe juniꞌi, emotana, bat au yoꞌo joobaeme, junaꞌa, emou siꞌimemmeu, nesaureopo tawane ―tiia―. 45 Bweꞌituk juꞌu emo benasi yoeme, kaabeta, nesauta aꞌ yaꞌarianeꞌ betchiꞌbo aꞌabo yepsak. Taa cheꞌa juni san, aapo, siꞌimem nesauta yaꞌariabaekai aꞌabo ameu yepsak. Intok kia aꞌ jiapsiwata juniꞌi, juebenam betchiꞌbo nenkine ―tiia.

46 Junak intok, bweꞌu joꞌara, Jerikoꞌ teaꞌu bicha sajak. Junamaꞌa intok, Jerikoꞌ teaꞌpo, aꞌ majtimmak yeu siika. Intok juebena yoemem ket aamak sajak. Senu yoeme, liptitaka, Bartimeoꞌ teame, Timoteoꞌ teamta uꞌusi, junaꞌa boꞌo mayoat kateka netanen. 47 Intok aman weyemta, aꞌ Jesus nasareenoꞌotukaꞌpo aman, aꞌ jikkajaka, inen jiaka chaitaitek:

―Jesus ―tiia―, Labiiꞌ teamta uꞌusi, nee jiokoleꞌe ―ti au jiakai.

48 Intok juebenaka, ka jaiti aꞌ jiusaeka, au omten. Taa junaꞌa cheꞌa juni san kusisi chaaeka inen jiian:

―Labiitukaꞌutat yeu simria, nee jiokoleꞌe ―ti jiian.

49 Junak intok, Jesus, kikteka, junae yoem liptitau chaitebok. Junau intok inen jiuwan:

―Aet yoemꞌeaꞌe, kikteꞌe. Bweꞌituk aapo eu chaae ―tim au jiiak.

50 Junak intok junaꞌa, aꞌ jijineꞌum, kia ama toꞌo kikteka, Jesujtau bicha sikaa, aman au yepsak. 51 Jesus intok inen au noktaitek:

―Jitasa empo nee enchi yaꞌaria iꞌa ―ti aꞌ temaek.

Junaꞌa yoem lipti intok:

―Achai ―tiia―. Juchi in bitneꞌ betchiꞌbo, in pusim tuꞌuteꞌe ―ti au jiiak.

52 Jesus intok inen au jiiak:

―Em jiapsipo em aꞌ sualeꞌ betchiꞌbo, ka jain eaka weene. Jucheꞌe bitneꞌe ―ti au jiakai.

Junak intok sep bittaitek. Intok Jesujtat chaꞌaka katemmak, amemak siika.