Jesujta, yee jinneꞌunemta yeu yoemtukaꞌpo
2
Jiba junameꞌe taewaimmet, jum Romapo, juꞌu cheꞌa yoꞌo yaꞌari Aukuujtoꞌ teame nesawek, junamaꞌa yoemrata juꞌuneiyaa betchiꞌbo, kaabeta beꞌeka aꞌ jiꞌojte tebok. 2 Iniꞌi bat weyeka, yaꞌawak, jukaꞌ Sirineeoꞌ teamta bwiaraa Siiriaꞌ teaꞌpo aꞌ kobanaaotuko. 3 Utteꞌatukan, siꞌimem, tua jak juniꞌi bem jomemtukaꞌu, bem katneeꞌpo, junuen junaman emo jiꞌojte tebo betchiꞌbo. 4 Inia betchiꞌbo san, juꞌu Jose, bwiaraa Kalileaꞌ teaꞌpo, ili joꞌaraa Nasaret teaꞌa betana yeu sikaa, intok Jureaꞌ teaꞌu, ili joꞌara Beleem teaꞌu bicha yeu siika, Labiitukaꞌuta yeu tomtekaꞌu. Bweꞌituk juꞌu Jose, Labiitukaꞌuta nat tomti yoemrata betana weyen. 5 Iniꞌi ili joꞌara Beleem teaꞌu siika, Mariaꞌ teamtamake, inim au jiꞌojte tebobaekai, juꞌu chukula tua aꞌ kunanemtamake. Intok iniꞌi Maria jaibu abe yoemiakai. 6 Intok inimeꞌe ket junamaꞌa Beleem teaꞌpo am aneo su, yuumak, juꞌu taewai, jukaꞌ Mariata aet aꞌ yoemianeeꞌu betchiꞌbo. 7 Junamaꞌa aapo jukaꞌ keꞌesam oꞌouta asoak. Intok chukula, tosampo aꞌ biijtaka, jum bepaaka, jumeꞌ naikim wokekame jajaꞌabweeꞌpo, jitaꞌapo aꞌ teekak. Bweꞌituk junamaꞌa bweꞌu karipo jakun tawa betchiꞌbo, ame betchiꞌbo kaita tukan.Ankelesim, jum jumeꞌ bwalam suuareeommeu, yeu am machiakaꞌpo
8 Junama ili joꞌara Beleem teaꞌu ka mekka, waate, bwaram suareeom, juyapo, tukaapo totoꞌeen, bem bwaram suuakai. 9 Junama lautipo, Liojta betana, ankeles ameu yeu machiak, intok Liojta betana ujyoika tachiria amet konila taobiakan. Intok inimeꞌe tua majjaen. 10 Taa juꞌu ankeles:
―Ka emeꞌe majjaune ―ti ameu jiiak―. Bweꞌituk, nokta bemelaka tuꞌik ne emou weiyaa. Iniꞌi, siꞌimem betchiꞌbo tua ae alleewame tuneekai. 11 Iꞌan jum joꞌara, juꞌu Labiitukaꞌuta yoemtukaꞌpo, jukaꞌ enchim jinneꞌuneemta yeu aꞌ tomtekaꞌuta, iniꞌi, Krijto juꞌu itom yoꞌowa. 12 Intok enchim aet juꞌuneeneꞌ betchiꞌbo, emeꞌe jukaꞌ ili usita tajoꞌorimpo biijtitaka, jum bepaaka, jumeꞌ naikim wokekame jajaꞌabweꞌpo, boꞌokamta emeꞌe aꞌ teune.
13 Junama lautipo, junae ankelejtamak, juebenaka waate, teekau ankelesim yeu machiak. Inimeꞌe nanawit nokaka Liojta yoꞌoren intok inen jiian:
14 Teekau, Liojta alleaka aꞌ yoꞌorinaaꞌu au aune.
Intok inim bwiapo jiapsame nasuk, aapoꞌik tua tuꞌik yaꞌari aꞌ bichammeu, siꞌimeku, yanti, ka jain eewame aune,
ti jiian.
15 Junako, chukula jumeꞌ ankelesim juchi teekau bicha am notteko, jumeꞌ bwaram suuame, naas inen nau jiu japtek:
―Jantebu ma jum joꞌara Beleem teaꞌu bicha te katnee inikaꞌa yeu sikamta aꞌ bit betchiꞌbo, intok jukaꞌ achai Liojta itom juꞌuneiyaatuari ―ti jiakai.
16 Inimeꞌe, lauti tenneka intok Mariatau intok Joseetau intok juꞌu ili usitau, junamaꞌa, bepaaka, naikim wokekame jajaꞌabweeꞌpo ama boꞌokamtau yajak. 17 Junak inimeꞌe, inikaꞌa bichaka, juꞌu ili usitat nokaka, jukaꞌ ankelejta ameu teuwaakaꞌuta aꞌ etejok. 18 Intok siꞌime jumeꞌe, inimeꞌe teuwaaꞌuta jikkajakame, juꞌu bem teuwaaꞌu betana kaachin jiu machika taawak. 19 Taa juꞌu Maria, inikaꞌa siꞌimeta au teuwaawakaꞌuta, ka aꞌ koptaka, aet jiapseka jiba au waaten. 20 Jumeꞌ bwaram suuame, bempo, siꞌimeta jukaꞌ bem jikkajaka intok bem bichakaꞌu betchiꞌbo, tua Liojta yoꞌoreka intok bem alleaꞌuta au bicha teuwaaka, nottek. Bweꞌituk siꞌimeta, tua ameu aꞌ teuwaawakaꞌpo aman, yeu siika.
Nacimiento de Jesús
Juꞌu ilitchi Jesuj teame, iniꞌi teꞌopopo Liojtau suꞌu tojiwaka, nokriawa
21 Woj naiki taewaim weyeka, sirkunsiraaroawak juꞌu ili uusi. Intok iniꞌi Jesuj ti teatuawak, jiba jumeꞌ team jukaꞌ ankelejta bat naataka Mariata, chukula aꞌ yoemianeeꞌuta kee aꞌ mabetao, junak aꞌ tejwaakaꞌum.
22 Jumeꞌ taewaim, Liojta bichapo bem emo tuꞌuteneeꞌum yumako, inikaꞌa, Moiseejtukaꞌuta nesauri jiꞌojtei junuen aꞌ teuwaꞌa benasia, bempo jukaꞌ ili usita, bweꞌu joꞌara Jerusalen teaꞌu aꞌ nuk sajak, junaman inikaꞌa, wepulsi Liojta betchiꞌbo jiba aꞌ jiapsineꞌ betchiꞌbo, au bicha aꞌ nokriakai. 23 Bempo, inien aayuk, bweꞌituk jum Liojta betana jumeꞌ nesaurimpo: “Siꞌime waꞌa keꞌesam oꞌou yeu tomtekame, iniꞌi, wepulsi Liojta betchiꞌbo jiba aꞌ jiapsineꞌ betchiꞌbo, Liojtau suꞌu tojituka, au bicha nokrianaa”, ti jiꞌojtei. 24 Inimeꞌe junaman sajak junuen Liojta nesauripo aꞌ jiꞌojteitukaꞌa benasi, jumeꞌ woi kuukum oo jumeꞌ wooi ommoꞌokolim, Liojta yoꞌoreka am suꞌa betchiꞌbo.
25 Junameꞌe taewaimmet intok, senu Simeeon teaka, Jerusalen teaꞌpo jiapsan. Iniꞌi tua tuꞌi yoemtukan, Liojta yoꞌori taꞌaakai intok jukaꞌ Ijraꞌel yoemrata aniaka aꞌ jinneꞌuneemta, aꞌ yebijneeꞌuta boꞌo bichan. Juꞌu Liojta tuꞌu jiapsi inikaꞌa Simeeon teamta aniaka aamaktukan. 26 Intok aꞌ juꞌuneetualatukan, jukaꞌ Krijtota, achai Liojta aꞌabo bittuaneeꞌut, kee aꞌ bichaka, ka aꞌ mukneeꞌuta. 27 Iniꞌi yoeme, teꞌopou siika, Liojta tuꞌu jiapsie aman aꞌ weeneꞌpo juꞌuneetuawakai. Intok junak jumeꞌ ili uusi Jesujta yoꞌowam, inikaꞌa, teꞌopou aꞌ nuꞌupako, junuen jukaꞌ nesauri jiꞌojteita aꞌ teuwaaꞌpo aman au aꞌ chup iꞌakai, 28 juꞌu Simeeon, inikaꞌa, mampo nuꞌuka intok aꞌ alleaꞌuta, achai Liojtau bicha aꞌ teuwaak:
29 Achai Lios, iꞌan ala empo jaibu tua kaachin eaka, in mukneeꞌuta a neu chupa.
Bweꞌituk, inia ee betchiꞌbo jiapsamtau, em chupneꞌeti jiaka teuwaarita, empo aꞌ chupaꞌi.
30 In pusimmea nee aꞌ bitlaa jukaꞌ yee jinneꞌunemta.
31 Iꞌan, siꞌime yoemratau em yeu machiari.
32 Iniꞌi, aapo junaꞌa, juꞌu siꞌime jumeꞌe, ka Ijraꞌelta yoemratau, tachiriata benasi machika, jukaꞌ ee betana lutuꞌuriata ameu aꞌ teuwaaneeme.
Intok juꞌu, ee betana, jukaꞌ Ijraꞌel yoemrata aꞌ yoꞌori teboneeme,
ti jiakai.
33 Josee intok juꞌu Jesujta ae, ili usita betana jukaꞌ Simeeon teamta teuwaakaꞌuta jikkajakai, alleaka, aet suum eaka taawak. 34 Junak juꞌu Simeeon teame, Liojtau bicha, tuꞌik am aꞌauriak. Intok juꞌu Maria, Jesujta aebeu inen jiiak:
―Aꞌ juꞌuneiyaane, iniꞌi ili uusi, Ijraꞌel yoemrata nasuk juebenam, Liojta bichapo tuꞌisi oo ka tuꞌisi bem tawaneeꞌuta, am bittua betchiꞌbo au naꞌikiari. Aapoꞌikut Liojta betana weyeme yeu machine, iniat juebenam ka aꞌ mabetneeꞌut, 35 intok junuen juꞌuneiyaanaa, weꞌepulaim, juꞌu jachin bem eaꞌu. Taa siꞌime iniꞌi ee betchiꞌbo jiokot emo bitwame tune, kia jumeꞌ tebe kuchiꞌim naa buusti et am kiktekaꞌa benasi ―ti au jiiak.
36 Senu jamut Liojta betana juꞌuneetuawaka nokame ket ama aanen. Iniꞌi Aanaꞌati teakai. Aseer tukaꞌuta nat tomti yoemratat yeu simriataka. Senu Panuꞌel teamta aꞌ marakan. Iniꞌi jaibu tua yoꞌotui tukan. Aapo tua bemetaka kunalatukan, intok woo busan wasuktiapo aꞌ kunamak jiapsilatukan. 37 Intok iꞌan iniꞌi jokoptuitukan, naiki taka ama naiki wasuktekai. Iniꞌi, jiba jum teꞌopopo aꞌ anneeꞌut ka koptan. Ala, achai Liojta aꞌ joo iꞌaꞌuta joakai, jamak ka jiꞌibwaka, Liojta yoꞌorekai intok au bicha nokakai tukaariat naa buustia. 38 Iniꞌi Aana, jiba junama lautipo ama ameu ruktek. Intok chukula, Liojta aꞌ baisaeꞌuta au aꞌ teuwaasukai, junamaꞌa, siꞌime jumeꞌ Jerusalen teaꞌpo joꞌaaka am jinneꞌutuneeꞌuta aꞌ bitbaemmeu, ili usi Jesujta betana ameu nok taitek.
Jum ili joꞌara, Nasaret teaꞌu am nottewakaꞌpo
39 Junak chukula, siꞌimeta jukaꞌ achai Liojta nesauri jiꞌojteita yaꞌasukai, bempo jum bwiaraa Kalileaꞌ teaꞌpo, tua bem joꞌaakaꞌu, Nasaret teaꞌu bicha nottek. 40 Juꞌu ili uusi intok, yoꞌotu simeka, cheꞌa juniꞌi taka utteꞌitun. Intok cheꞌa juniꞌi koba suawakan. Juꞌu Lios intok, siꞌimeku tuꞌik yuꞌin aꞌ bittuan.
Juꞌu Jesus, woj mamni ama wooi wasukteka, jum teꞌopopo aane
41 Jumeꞌ aꞌ yoꞌowaawam, chikti wasuktiapo, bweꞌu joꞌara Jerusalen teaꞌu yaajan. Junuen junaman, Liojta yoꞌori betchiꞌbo, bwalam suꞌawaka pajkoaꞌ teamta aꞌ bit betchiꞌbo. 42 Jesujta woj mamni ama wooi wasuktiam aꞌ yumaꞌariako, junak siꞌime, jum bweꞌu joꞌara Jerusalen teaꞌu bicha sajak, jaibu junuen aman pajkotuko aꞌ joowaꞌa benasia. 43 Junak, jukaꞌ pajkota aꞌ chupsuka intok bempoꞌim notteo, juꞌu uusi Jesus, iniꞌi junamaꞌa bweꞌu joꞌara Jerusalen teaꞌpo taawak, aꞌ aewa intok kia juꞌu Josee juniꞌi, bempo ka juꞌuneakai. 44 Inimeꞌe, Jesujta, siꞌime jumeꞌ am bicha boꞌo joammak aꞌ weyeꞌeti eaka intok junuen siꞌime taewata boꞌo joaka kuptek. Taa junak, jumeꞌ bem wawaim nasuku intok bem taꞌaaꞌum nasuku aꞌ jaiwaka 45 ka aꞌ teak. Junak bempo, Jerusalen teaꞌu bicha nottek, junaman aꞌ jariubaekai.
46 Baji taewaita sikaa, teꞌopopo aꞌ teak. Jumeꞌ Moiseejta nesaurim yee majtame nasuk kateka am jikkajaka intok ameu nattemaemta aꞌ teak. 47 Intok siꞌime inimeꞌe aꞌ jikkajakame, tua aꞌ suawakaꞌu betana intok aapoꞌik jachin am yoopnaka aꞌ teuwaakaꞌu betana aꞌ uttiaka aꞌ suum eiyaak. 48 Jumeꞌ aꞌ yoꞌowawam junamaꞌa aꞌ bichakai, kaachin ee machika, kia aꞌ bitchuka taawak. Aꞌ aewa intok inen au jiiak:
―Uusi, jaisaaka empo inien itom yaak. Juꞌu em yoꞌowa intok inepo, tua te jachin eaka tee enchi jariusuk ―ti au jiiak.
49 Junak juꞌu Jesus:
―Jaisaaka intok emeꞌe nee jaiwan. Jaisa emeꞌe ka juꞌunea jaꞌani, inim in yoꞌowata nee aꞌ joo iꞌaꞌuta, in jooꞌeaꞌu ―ti ameu jiiak.
50 Taa bempo, aapoꞌik ameu aꞌ teuwaakaꞌut, tua ka aet juꞌuneak.
51 Intok junak aapo joꞌara Nasaret teaꞌu bicha amemak nottek. Intok juchi jiba junaen, bempoꞌim nok jikkajakai. Juꞌu aꞌ aewa siꞌimeta inikaꞌa, aapo ka aꞌ koptaka, jiba au waaten. 52 Intok Jesujta junuen su, cheꞌewasu koba suawaka intok aꞌ yoꞌotu simeo intok Lios, intok kia juꞌu yoemra juniꞌi, siꞌimeku ae allean.
La Niñez de Jesús.