Juꞌu Joan, yee babatoowame, bweka paꞌaku jinabaka Liojta betana jukaꞌ nok lutuꞌuriata aꞌ teuwaa sime
3
Junakriapo jukaꞌ Tibeerioꞌ teamta junama cheꞌa siꞌimem bepa yoꞌo nesawekai, woj mamni ama mamni wasuktiam aꞌ weiyaao, juꞌu Ponsio Pilaatoꞌ teame bwiaraa Jureaꞌ teaꞌpo kobanaao tukan. Juꞌu Eroorej teame intok bwiaraa Kalileaꞌ teaꞌpo kobanaao tukan. Juꞌu aꞌ sailaawa Jeriipeꞌ teame intok, bwiaraa Itureaꞌ teaꞌpo intok Trakooniitij teaꞌpo kobanaao tukan. Juꞌu Lisaniaj teame, bwiaraa Abileeniaꞌ teaꞌpo kobanao tukan. 2 Juꞌu Anaas intok juꞌu Kaipaaj teame, inimeꞌe, jumeꞌ teꞌopopo tekiakammeu cheꞌa yoꞌotukan. Junameꞌe taewaimmet juꞌu Lios, juꞌu Joantau, Sakariiaj teamta uꞌusibeu, aman mekka paꞌakun aꞌ jiapsaꞌu, au nookak. 3 Intok iniꞌi Joan, juꞌu batwee Joran teaꞌu jeela, siꞌime ili joꞌarammet siika. Junama yoemratau aꞌ utteꞌati jiian, ka tuꞌik betana taꞌabwisi eaka intok bem batoꞌowaatuneꞌpo junuen juꞌu ka tuꞌik bem yaꞌari betana amet am jiokoituneꞌ betchiꞌbo. 4 Iniꞌi junuen yeu siika, jiba jukaꞌ Liojta betana juꞌuneetuawaka, chukula yeu weenemta teuwaakame, Isaꞌiajtukaꞌuta aꞌ teuwaari benasia:Mekka bweka paꞌaku, senuk chaaemta aꞌ jiawai jikkajiwa:
“Itom yoꞌowata aꞌ mabet betchiꞌbo, emeꞌe, ka tuꞌik betana emo tuꞌutene”, ti jiakai.
“Intok inikaꞌa, tuꞌisi emou yepsaka, enchim aꞌ mabetneꞌ betchiꞌbo, tuꞌik emeꞌe yaꞌarine.
5 Siꞌime jumeꞌ ka emo jabeleme, tuꞌik ameu beꞌeemta aꞌ juꞌuneiyaame, bempo yumaꞌisi aꞌ mabetne.
Siꞌime jumeꞌ emo cheꞌewareka intok emo eiyaame, inimeꞌe koꞌom tojinaa.
Jumeꞌe, jukaꞌ ka tuꞌika, ka ammaꞌali weyemta tekipanoame, inimeꞌe chukula tuꞌik lutuꞌuriata boꞌo jooriane.
Jumeꞌ intoko, jukaꞌ Liojta betana nok lutuꞌuriata ka tuꞌisi yee aꞌ majtame, inimeꞌe ka nappat junuen aꞌ boꞌo jooriane”, ti aꞌ jiakaꞌpo.
6 “Intok junuen, siꞌime waꞌa inim yoemra, Liojta jachin yee aꞌ jinneꞌuneeꞌuta aꞌ bitne”, ti jiakai.
Joantau nookak
7 Junak jukaꞌ yoemrata junuen Joanta am batoꞌowaneꞌ betchiꞌbo aman au bicha yeu am kateo, aapo:
―Ka tuꞌi yoemra, bakotchim bebena ―ti ameu jiiak―. Emeꞌe ka juꞌu enchim batoꞌowaimtuneeꞌue, tua ka tuꞌika jiokot emo bitnaamta abe aꞌabo yumaꞌu betana, junae enchim ama yoꞌeeneꞌeti eene. 8 Eꞌe, ala emeꞌe ka tuꞌik betana taꞌabwisi enchim eaꞌuta juꞌunakkiachisi emot aꞌ bitnaꞌ betchiꞌbo, tuꞌisi jiapsine. Intok ka emeꞌe, juꞌu Apraꞌamtukaꞌuta nat tomti yoemrata betana emo kateꞌeti jiubaane. Bweꞌituk juꞌu achai Lios, kia inimeꞌe tetammea juniꞌi, Apraꞌamta betchiꞌbo jumeꞌ ae betana emo yeu katriam ti jiame a am juꞌunakte. 9 Liojta betana tua jiokot machika enchim bitneeꞌuta kaita beꞌee. Jukaꞌ juya, takaꞌeaka, ka tuꞌik tatakamta tepwammea chuktawaka, tajipo aꞌ tayaꞌatuneꞌe benasia ―ti ameu jiiak.
10 Junako jumeꞌ ama aneme:
―Junak su, jaisa tua itepo auneekai ―ti au nattemaek.
11 Juꞌu Joan inimeꞌe inen yoopnak:
―Waꞌa, wooim supekame, iniꞌi, jukaꞌ wepulaim juniꞌi ka supekamta, wepulaim aꞌ mikpo yumaꞌi. Juꞌu intoko bwaꞌawamta jipueme, iniꞌi jiba junaen, juꞌu kaita jipuemtau bicha watek naꞌikiane ―ti jiakai.
12 Ketchia jumeꞌ yaꞌuraatau bichaa tomita weyemta nau totojame, waate, Joantau emo batoꞌowaabaeka aman yajaka intok Joantau:
―Yee majtame, itepo su jaisa te auneekai ―ti au nattemaek.
13 Juꞌu Joan intok inimmeu:
―Yaꞌuraata betana nesau jiꞌojteipo, tomita enchim yeteu aꞌ aꞌauꞌeaꞌuta jiba, ka junae bepa aꞌ aꞌaune ―ti ameu jiiak.
14 Ketchia sontaaom waate:
―Itepo su, jaisa tua te auneekai ―ti au nattemaek.
Aapo inimeꞌe inen yoopnak:
―Kaabeta emeꞌe jita uꞌaanee jita betchiꞌbo am majau tetejwaakai. Intok kia juꞌu ka bem yaꞌarit juniꞌi, ka am nanaꞌatejokai. Intok emeꞌe, enchim bejeꞌetuawaꞌue, yanti elne.
15 Juꞌu yoemra baa juꞌuneepeaka boꞌo bichan. Jumak juniꞌi juꞌu Joan junaꞌa juꞌu Krijtoꞌ teame ti eakai. 16 Taa juꞌu Joan siꞌimemmeu inen jiiak:
―Inepo ala, lutuꞌuriapo nee baꞌammea enchim batoꞌowaa. Taa senu yebijne, junaꞌa, aapo siꞌimeku Lios eerie aꞌ tuꞌu jiapsita emot jiapsituaka, ae enchim batoꞌowaane. Aapo nee bepa yoꞌoꞌutteꞌaka jikkajiwa. Junuen san, kanne ino jabele, kia aꞌ bochawam in aꞌ woitarianeꞌpo. 17 Aapo jaibu inim, senuk tiikota tuꞌute betchiꞌbo, ae am wij wijtawamta mampo aꞌ jipueꞌe benasi maachi, junuen jumeꞌ aꞌ yoemiam omola aꞌ jipuꞌubaeꞌpo am tawaane. Intok jumeꞌ ka aꞌ yoemiam, omot, taji beeteu jiokot bem emo bitneeꞌu bicha am tawaane. Jukaꞌ bachiata toboktaka intok jukaꞌ otata tokti aꞌ tayakaꞌabenakai ―ti ameu jiiak.
18 Inile benakue intok watek juebenak tuꞌikue am nok tejwaaka juꞌu Joan junuen jukaꞌ bemela nok lutuꞌuriata juꞌu yoemratau aꞌ teuwaan. 19 Ketchia iniꞌi, jukaꞌ kobanaaota, Eroorej teamta aꞌ sua tejwaak, inikaꞌa aꞌ sailawaa, Jeriipeꞌ teamta juubi, Erooriaj teamta jubiꞌulatukan. Intok ket jukaꞌ watek ka tuꞌik aꞌ yaakaꞌu betchiꞌbo. 20 Taa juꞌu Eroorej teame, inikaꞌa nok jikkajiꞌeaka su, ketuni juchi ka tuꞌik yaak, jukaꞌ Joanta aꞌ etaꞌatebokai.
Jesukrijtota aꞌ batoꞌowaawakaꞌpo
21 Inikaꞌa kee yeu weyeo, junak jukaꞌ Joanta siꞌime junama yoemrata aꞌ batoꞌowaao, juꞌu Jesus ket batoꞌowaatuk. Aapoꞌik intok ketuni Liojtau bicha aꞌ nokao su, teekau machilaa bittuk. 22 Intok junaꞌabo juꞌu Liojta tuꞌu jiapsi, juꞌunakkiachisi, wokkoita benasi Jesujtat koꞌom siika. Teeka betana intok jiawai:
―Empo junaꞌa juꞌu in yoemia tua in nakeꞌu, ee betchiꞌbo nee tua allea ―ti jiaka jikkajituk.
Bautizo de Jesús por Juan
Jesukrijtota, jumeꞌ aapoꞌik amet yeu simriam
23 Juꞌu Jesus inim jumak senu taka ama woj mamni wasukten junak jukaꞌ yoemrata mak aꞌ tekilwata naatekai. Iniꞌi, watem junuen aꞌ sualeꞌpo aman, juꞌu Joseꞌ teaka aꞌ uꞌusek tean. Juꞌu Josee intok, senuk Eliꞌiti teaka aꞌ uꞌusekan. 24 Iniꞌi intok ket, Matat teaka aꞌ yoemiakan. Iniꞌi intok ket, Lebiꞌ teaka aꞌ yoemiakan. Iniꞌi ket, Melkiꞌ teamta betana yoemiaritukan. Iniꞌi ket Janaꞌ teaka aꞌ yoemiakan. Iniꞌi ket, Joseꞌ teaka aꞌ yoemiakan. 25 Iniꞌi ket Matatiaj teamta betana yoemiaritukan. Iniꞌi ket Amoj teaka aꞌ yoemiakan. Iniꞌi ket Naꞌum teamta betana yoemiaritukan, iniꞌi ket Esliꞌ teamta betana yoemiaritukan, iniꞌi ket Nakkaiꞌ teaka aꞌ yoemiakan. 26 Iniꞌi ket Maꞌat teamta betana yoemiaritukan, iniꞌi ket Matatiaj teaka aꞌ yoemiakan. Iniꞌi ket Semeiꞌ teaka aꞌ yoemiakan, iniꞌi ket Joseꞌ teamta betana yoemiaritukan. Iniꞌi ket Juraꞌ teaka aꞌ yoemiakan. 27 Iniꞌi ket Joanaꞌ teamta betana yoemiaritukan. Iniꞌi ket Resaꞌ teaka aꞌ yoemiakan, iniꞌi ket Sorobabel teaka aꞌ yoemiakan. Iniꞌi ket Salatiꞌel teaka aꞌ yoemiakan, iniꞌi ket Neriꞌ teaka aꞌ yoemiakan. 28 Iniꞌi ket Melkiꞌi teamta betana yoemiaritukan. Iniꞌi ket Ariꞌiteaka aꞌ yoemiakan, iniꞌi ket Koosam teaka aꞌ yoemiakan, iniꞌi ket Elmoram teaka aꞌ yoemiakan, iniꞌi ket Er teaka aꞌ yoemiakan. 29 Iniꞌi ket Josueꞌ teamta betana yoemiaritukan. Iniꞌi ket Elieser teaka aꞌ yoemiakan, iniꞌi ket Jorim teaka aꞌ yoemiakan, iniꞌi ket Matat teaka aꞌ yoemiakan. 30 Iniꞌi ket Lebiꞌ teamta betana yoemiaritukan, iniꞌi ket Simeon teaka aꞌ yoemiakan, iniꞌi ket Juraꞌ teaka aꞌ yoemiakan, iniꞌi ket Joseꞌ teaka aꞌ yoemiakan, iniꞌi ket Jonan teaka aꞌ yoemiakan, iniꞌi ket Eliakim teaka aꞌ yoemiakan. 31 Iniꞌi ket Meleaꞌ teamta betana yoemiaritukan. Iniꞌi ket Mainan teaka aꞌ yoemiakan, iniꞌi ket Matataꞌ teaka aꞌ yoemiakan, iniꞌi ket Natan teaka aꞌ yoemiakan. 32 Iniꞌi ket Labiiꞌ teaka aꞌ yoemiakan. Iniꞌi ket Issaiꞌ teamta betana yoemiaritukan. Iniꞌi ket Obel teaka aꞌ yoemiakan, iniꞌi ket Booj teaka aꞌ yoemiakan, iniꞌi ket Salmon teaka aꞌ yoemiakan, iniꞌi ket Naꞌason teaka aꞌ yoemiakan. 33 Iniꞌi ket Aminarap teamta betana yoemiaritukan. Iniꞌi ket Aram teaka aꞌ yoemiakan, iniꞌi ket Ejrom teaka aꞌ yoemiakan, iniꞌi ket Paarej teaka aꞌ yoemiakan, iniꞌi ket Juraꞌ teaka aꞌ yoemiakan. 34 Iniꞌi ket Jakoop teamta betana yoemiaritukan, iniꞌi ket Isaak teaka aꞌ yoemiakan, iniꞌi ket Apraꞌam teaka aꞌ yoemiakan, iniꞌi ket Tareꞌ teaka aꞌ yoemiakan, iniꞌi ket Nakor teaka aꞌ yoemiakan. 35 Iniꞌi ket Seruk teaka aꞌ yoemiakan, iniꞌi ket Rakauꞌ teaka aꞌ yoemiakan, iniꞌi ket Pelek teaka aꞌ yoemiakan, iniꞌi ket Eber teaka aꞌ yoemiakan, iniꞌi ket Salaꞌ teaka aꞌ yoemiakan. 36 Iniꞌi ket Kainan teamta betana yoemiaritukan, iniꞌi ket Arpaksat teaka aꞌ yoemiakan. Iniꞌi ket Sem teaka aꞌ yoemiakan, iniꞌi ket Noeꞌ teaka aꞌ yoemiakan, iniꞌi ket Lamek teaka aꞌ yoemiakan. 37 Iniꞌi ket Matusalem teamta betana yoemiaritukan, iniꞌi ket Enok teaka aꞌ yoemiakan, iniꞌi ket Jaret teaka aꞌ yoemiakan, iniꞌi ket Majalaleꞌel teaka aꞌ yoemiakan, iniꞌi ket Kainan teaka aꞌ yoemiakan. 38 Iniꞌi ket Enoj teamta betana yoemiaritukan, iniꞌi ket Set teaka aꞌ yoemiakan, iniꞌi ket Adam tukaꞌuta betana yoemiaritukan. Iniꞌi ket, Liojta betana yoemiaritukan.