Bebejeꞌerita, Jesujta aꞌ jiꞌoptuabaekaꞌpo
4
Juꞌu Jesus, yumaꞌisi Liojta tuꞌu jiapsi aet anekai, jum batwee Joran teaꞌa betana nottek. Intok juꞌu Liojta tuꞌu jiapsie juꞌuneetuawaka, mekka paꞌariau, kaabeta aneꞌebeꞌemu bichaa siika. 2 Junaman, woi taka taewaimmeu tajtia ama aanek. Juꞌu intok bebejeꞌeri jitat aꞌ jiꞌoptuabaek. Siꞌime juname taewaimmet aapo ka jiꞌibwaka, intok chukula tebaurek. 3 Junak intok juꞌu bebejeꞌeri:―Empo lutuꞌuriapo Liojta yoemiatuko, inikaꞌa tetata paan yaꞌane ―ti au jiiak.
4 Jesus inikaꞌa inen yoopnak:
―Jum Liojta nok lutuꞌuriapo: “Juꞌu inim yoeme, ka bwaꞌamtae jiba jiapsine. Ala ketchia iniꞌi, siꞌime juꞌu Liojta betana nok lutuꞌuriae”, ti jiꞌojtei ―ti jiakai.
5 Chukula ket juꞌu bebejeꞌeri, mekka jikau kawiu aꞌ nuk siika. Intok chubalapo su iniꞌi, siꞌime aniat jukaꞌ ka nanau machi yoemrata jokame aꞌ tejwaak. 6 Intok iniꞌi bebejeꞌeri:
―Inepo siꞌimeta inia aniat yoemrata betana nesawamta intok ujyoriata enchinee aꞌ makne. Bweꞌituk siꞌimeta inikaꞌa ineponee aꞌ mabetri. Intok inepo jukaꞌ in aꞌ makbaeꞌuta nee aꞌ maknee ―ti au jiiak―. 7 Enchi tonommea weeka, nee enchi yoꞌoreo, siꞌime iniꞌi eu lutuꞌuriatune ―ti au jiiak.
8 Taa Jesus:
―Kat neu suua, mekka bicha weene. Bweꞌituk Liojta nok lutuꞌuriapo: “Em yoꞌowa Liojta jiba aꞌ yoꞌorine, intok aapoꞌik jiba aꞌ joo iꞌaꞌuta joone”, ti jiꞌojtei.
9 Chukula intok juꞌu bebejeꞌeri, bweꞌu joꞌara Jerusalen teaꞌu aꞌ nuꞌupak. Intok junamaꞌa bweꞌu teꞌopopo jikat aꞌ tojaka intok inen au jiiak:
―Lutuꞌuriapo empo Liojta yoemiatuko, inim koꞌom bicha emo jimmaa, 10 bweꞌituk Liojta nok lutuꞌuriapo inen jiꞌojtei:
Juꞌu Lios, jumeꞌ aꞌ ankelesim, enchi am suuaneꞌ betchiꞌbo, amet nesaune.
11 Inimeꞌe bem mampo enchi toboktane, junuen jita tetat juniꞌi, ka em wokim koꞌokosi auneꞌ betchiꞌbo
―ti au jiiak.
12 Juꞌu Jesus iniau:
―Ketchia, Liojta nok lutuꞌuriapo inen jiꞌojtei: “Jukaꞌ Liojta em yoꞌowata empo ka aꞌ jiꞌobilabaane” ―ti jiaka aꞌ yoopnak.
13 Intok junuen juꞌu bebejeꞌeri, Jesujta jiꞌoptua betchiꞌbo kaita intok teakai, junak aapoꞌik ili binwa aꞌ suꞌu tojak.
El Diablo Tienta a Jesús
Jesus, jum bwiaraa Kalileaꞌ teaꞌpo aꞌ tekileu naate
14 Juꞌu Jesus, bwiaraa Kalileaꞌ teaꞌu juchi nottek, tua yumaꞌisi Liojta tuꞌu jiapsi aet aneka, siꞌimeta a joakai. Intok junamaꞌa siꞌime bwiaraat yeu tajti aapo etejowan. 15 Junamaꞌa siꞌimekut, jum juriom emo nau totojaꞌpo, yee majtan. Intok siꞌime, aꞌ teuwaaꞌut aꞌ tuꞌureka aꞌ uttian.
Jesus, jum ili joꞌara Nasaret teaꞌpo aane
16 Junak intok juꞌu Jesus, ili joꞌara Nasareet teaꞌu bicha jum aapoꞌik yoꞌotukaꞌpo siika. Sabalat, aet yum joꞌe taꞌapo aapo jum juriom nau emo totojaꞌpo yepsak, aapoꞌik jiba aꞌ boꞌo jooriaꞌpo amani. Intok junamaꞌa, Liojta nok lutuꞌuriata nokbaeka kiktek. 17 Juꞌu Isaꞌiaj tukaꞌuta, Liojta betana juꞌuneetuawakamta jiꞌojtekaꞌuta aapoꞌiku bwijwak. Junameꞌe intok etapokai, inen jiꞌojteita ama teak:
18 Achai Liojta betana juꞌu tuꞌu jiapsi, nemaktuka nee ania.
Bweꞌituk aapo, wepulsi iniau nee yeu puꞌari junuen, jumeꞌ kaitae emo ania machimmeu, bemelaka, tuꞌik betana in ameu nokneꞌ betchiꞌbo.
Jumeꞌ tua siok kokkome, am jiapsi joꞌa betchiꞌbo nee ameu bittuari.
Jumeꞌe, bebejeꞌerita betana etaꞌim benasi emo bichame, bem suꞌu tojituneeꞌuta ameu teuwaa betchiꞌbo.
Intok jumeꞌ ka bibichame benasi tawalame, bittua betchiꞌbo.
Intok wameꞌe, watem betana ka tuꞌik bittuawame, juname betana bem anianaaꞌuta.
19 Junuen, iꞌan, tuꞌisi weyeka achai Liojta yee aet aꞌ jiokoineeꞌuta jukaꞌ taewaita aꞌ teuwaa betchiꞌbo, ti aꞌ jiꞌojteitukaꞌpo.
20 Junak juꞌu Jesus, junameꞌe jiꞌojteim etaka, juꞌu junamaꞌa tekiakamtau am bwiseka, yejtek. Taa siꞌime jumeꞌ ama aneme jiba aꞌ bitchuka tawako, 21 aapo nok taiteka intok:
―Iꞌan inimiꞌi lautipo emo bichapo yeu yumaꞌalaa juꞌu inim, Liojta nok lutuꞌuriapo jiꞌojtei ―ti jiiak.
22 Siꞌime, Jesujta betana tuꞌik teuwaan. Intok inimeꞌe, aapoꞌik tua ujyoisi ameu aꞌ nokaꞌu betchiꞌbo aꞌ uttiaka suum eiyaan. Intok inimeꞌe:
―Jaisa ka iniꞌi junaꞌa jaꞌani, juꞌu Joseeꞌ teamta uꞌusi ―ti nau nattemaen.
23 Juꞌu Jesus inimmeu:
―Witti jiba tua emeꞌe, a inen yetet nokwaꞌa benasi, inen neu jiubaanee: “Empo emo jittone, jitebitakai.” Iniae: “Bweꞌu joꞌara Kapernaom teaꞌpo em yaaka itom jikkajakaꞌuta, ket inim tua em bwiaraapo aꞌ yaꞌane”, ti jiubaekai.
24 Junak aapo naa buusti ameu nokaka intok:
―Lutuꞌuriapo inen ne emou jiia, Liojta betana juꞌuneetuawaka nokame, kaabe juꞌu tua aꞌ bwiaraapo tuꞌisi mabettuneeme ―ti ameu jiiak―. 25 Inikaꞌa nee aꞌ lutuꞌuriatukan ti jiia. Junako Ijraꞌel yoemrata nasuk, juꞌu Liojta betana yeteu noktuawakamta Eliaj tukaꞌuta aꞌ jiapsao, jaamut jokoptuim am buꞌuusukaꞌu junak, baji wasuktia ama busan metpo ka yukuka intok siꞌime junamaꞌa bwiaarat tua tebaatuko. 26 Taa juꞌu Eliaj teame, kaabe jumeꞌ Ijraꞌel yoemrata nasuk jokoptuim joꞌaakammeu bittuawak. Ala senu jokoptui, joꞌara Sareptaꞌ teaꞌpo, bweꞌu joꞌara Siroon teaꞌu ka mekka joꞌaakamtau bittuawakai. 27 Ketchia, jum Ijraꞌel yoemrata nasuk, juꞌu Liojta betana yeteu noktuawame, Eliseoꞌ teamta aꞌ jiapsao, jumeꞌ takaapo saꞌawaka, lepraꞌ teamtae koꞌokoeme juebenaekan. Taa juname nasuk kaabe au ineꞌetetuawak. Ala seenu, omot bwiaraa Siiriaꞌ teaꞌpo jometaka, Naaman teakai jiba ―ti ameu jiiak.
28 Inikaꞌa teuwaawakamta jikkajakai, siꞌime jumeꞌ junamaꞌa juriom nau emo totojaꞌpo aneꞌum, inimeꞌe tua oꞌomtek. 29 Inimeꞌe intok, Jesujta junamaꞌa ili bweꞌu joꞌarapo paꞌakun yeu aꞌ tojaka intok junamaꞌa kaupo, junakaꞌa joꞌaraata aet katekaꞌut tua bepa jikau aꞌ tojak. Junaꞌabo bepa, koꞌom aꞌ jimmaabaekai. 30 Taa Jesus, inimmet yeu sika intok junama yeu siika.
Jesús Proclama el Cumplimiento de las Escrituras
Seenu, bebejeꞌeri ka tuꞌi jiapsita jipuꞌusukame
31 Junak intok Jesus, bweꞌu joꞌara Kapernaom teaꞌu, bwiaraa Kalileaꞌ teaꞌu bicha siika. Junamaꞌa intok sabalat, aet yum joꞌe taꞌapo yoemrata aꞌ majta taitek. 32 Inimeꞌe intok, aapoꞌik am majtaꞌu betana tua aꞌ suum eiyaan. Bweꞌituk aapo, aꞌ teuwaaꞌu, bat weyeka tua lutuꞌuriata ameu nookan.
33 Junamaꞌa juriom nau emo totojaꞌpo, seenu, bebejeꞌeri ka tuꞌu jiapsi aet aneka ama aanen. Iniꞌi intok kusisi inen chachaekai:
34 ―Kat itou suua. Jaisaaka empo aꞌabo itou yepsak Jesus, joꞌara Nasaret teaꞌpo joome. Jaisa empo aꞌabo itom jiokot tawaasek jaꞌani. Enchi ne taꞌaa intok ne juꞌunea, Liojta betana yoemiaritaka ae betchiꞌbo jiba em jiapsaꞌu ―ti jiakai.
35 Jesus, sep juꞌu bebejeꞌeri ka tuꞌu jiapsitau kuttipo nonokak:
―Ka monteka, inikaꞌa yoemta aꞌ suꞌu tojine ―ti jiakai.
Junako juꞌu bebejeꞌeri ka tuꞌu jiapsi, junakaꞌa, juname bichapo, bwiau aꞌ tatabek. Taa inikaꞌa tua kaachin aꞌ yaaka, aꞌ suꞌu tojak.
36 Siꞌime aꞌ uttiaka aꞌ suum eaka taawak. Inimeꞌe intok:
―Iniꞌi, aꞌ teuwaaꞌu ka kia beja nooki. Ala iniꞌi tua nesaweka intok tua utteꞌakamta, jumeꞌ bebejeꞌeri ka tuꞌu jiapsimmeu nooka. Intok inimeꞌe yeu rejte ―ti naas nau jiian.
37 Intok junamaꞌa bwiaraapo siꞌimekut, iniꞌi junuen ae betana etejowan.
Jesus, juꞌu Simo Peeoꞌ teamta jamut aseꞌebwa au ineꞌetetua
38 Junak juꞌu Jesus junamaꞌa juriom nau emo totojaꞌpo yeu sika intok Simoꞌ teamta joꞌau kibakek. Juꞌu, Simoꞌ teamta jamut aseꞌebwa tua taji wecheka koꞌokoen. Iniꞌi intok Jesujtau nokriawak. 39 Inikaꞌa boꞌokaꞌu juꞌu Jesus rukteka intok au koꞌom poꞌokteka, taji wechiata aꞌ suꞌu tojineꞌ betchiꞌbo nesawek. Iniꞌi intok sep aꞌ suꞌu tojak. Junamaꞌa sep aapo yejteka intok jita am jooria taitek.
Jesus, koꞌokoeme, tua juebenam emo ineꞌetetua
40 Junamaꞌa taꞌata aman wetsuko, sep siꞌime jumeꞌe, ka nanau machik koꞌokoaka, koꞌokoiriawame, inimeꞌe juꞌu Jesujtau am tojak. Intok aapo inimeꞌe, weꞌepulaimmet mamteka intok emo am ineꞌetetuak. 41 Juebena koꞌokoeme betana ket jumeꞌ bebejeꞌeri ka tuꞌu jiapsim yeu sajak. Inimeꞌe intok chaaeka:
―Empo junaꞌa juꞌu Liojta yoemia ―ti jiian.
Taa juꞌu Jesus, jumeꞌ bebejeꞌeri ka tuꞌu jiapsimmeu kuttipo ameu nonokaka intok kaita am noktuak. Bweꞌituk inimeꞌe, aapoꞌik junen Krijtotukaꞌpo juꞌunean.
Juꞌu Jesus, bwiaraa Kalileaꞌ teaꞌpo aneka, Liojta betana jukaꞌ nok lutuꞌuriata yee majta
42 Yokoriapo matchuu, juꞌu Jesus junamaꞌa bweꞌu joꞌarapo paꞌakun bicha, kaabeta aneꞌu yeu siika. Taa juꞌu yoemra aꞌ jaiwaka intok junama aapoꞌik aneꞌu au yajak. Bempo aapoꞌik ama aꞌ tawaa iꞌaka ka aꞌ simneꞌ betchiꞌbo au nookan. 43 Taa juꞌu Jesus inimmeu inen jiiak:
―Utteꞌa, bemelaka, Liojta cheꞌa yoꞌotaka aꞌ katekaꞌu betana jukaꞌ tuꞌi nok lutuꞌuriata, waate jumeꞌ ili joꞌarammeu ket in aꞌ teuwaaneꞌpo. Bweꞌituk jiba inia betchiꞌbo inepo aꞌabo bittuari.
44 Intok junuen juꞌu Jesus, junamaꞌa bwiaraa Kalileaꞌ teaꞌpo, jum juriom emo nau totojaꞌpo teꞌopommet yee majtan.