2 Inikaꞌa Krijtota betana nok lutuꞌuriata, juꞌu Lios, cheꞌa bat naataka naatekai, jaibu jum aꞌ nok lutuꞌuriapo, watem, jumeꞌ chukula yeu weenemta teuwaaneeme juꞌuneetuakai, inien aꞌ lutuꞌuriatek. 3 Iniꞌi Liojta betana lutuꞌuria, itom yoꞌowe Jesukrijto, juꞌu Liojta uꞌusi betana junen weye. Aapo, juꞌu Jesukrijto, jukaꞌ cheꞌa yoꞌo yaꞌarita Labiitukaꞌuta yoemiam betana inim yeu yoemtuk. 4 Taa aapoꞌik Liojta betana aꞌ yoemiatukaꞌpo, utteꞌata aet ayukaꞌue, Liojta tuꞌu jiapsie aniawaka junuen juꞌuneiyaawak, kokkoarim nasuk aꞌ jiabijtekaꞌ betchiꞌbo. Tua junaꞌa juꞌu itom yoꞌowe Jesukrijto. 5 Aapoꞌik Jesukrijtota betchiꞌbo, juꞌu Lios inikaꞌa tuꞌik itom yaꞌariak, ka itou aꞌ lutuꞌuriatuk juniꞌi, aapoꞌik betana lutuꞌuriaka, yee itom majtaneꞌ betchiꞌbo itom yeu puꞌak, yeteu itom bittuakai. Intok junuen, siꞌime yoemrata belleꞌekatana, aꞌ sualeka intok aꞌ nok jikkajame auneꞌ betchiꞌbo. 6 Inimeꞌe betana emeꞌe aane, ket Liojta betana, Jesukrijtota yoemiamtuneꞌ betchiꞌbo.

7 Inien nee emou jiꞌojte, siꞌime emeꞌe, jum bweꞌu joꞌaraa Romaꞌateaꞌpo joꞌaakame. Jumeꞌ Liojta tuꞌisi nakeꞌum. Intok wepulsi aapoꞌik betchiꞌbo jiba jiapsi iꞌawaka emeꞌe yeu puꞌarim. Itom Lios achaita betana intok yoꞌowe Jesukrijtota betana, emou tuꞌik enchim alleeneeꞌuta intok yanti elwamta em bitne.

8 Cheꞌa bat naatakai, Jesukrijtota betchiꞌbo, siꞌimem emo betchiꞌbo, ne in Liojta aet baisae. Bweꞌituk enchim aꞌ sualeꞌpo junuen siꞌime aniat yeu tajtia juꞌuneiyaawa. 9 Bweꞌituk Lios aapo, juꞌu tua junen jiaka, aapoꞌik betana tekilta in aꞌ jooriaꞌu, aapoꞌik uꞌusiwa betana, jukaꞌ nok lutuꞌuriata yee majtakai, aapo net juꞌunea, jiba in emou waateka, au bicha in enchim nokriaꞌpo. 10 Jiba nee Liojtau bicha in nokaꞌabeleki, ne au ujbwana, aapoꞌik junen eaꞌpo aman, iꞌan jumakuꞌu ti eaka, jachinpo juniꞌi a in aman enchim bitneꞌ betchiꞌbo, aapo tuꞌi boꞌota nee makne. 11 Bweꞌituk enchim ne bitpea, tuꞌisia. Intok junuen, Liojta tuꞌu jiapsita betana weyeka a enchim jooneeꞌut enchim au yumaꞌaneeꞌut enchim aniabaekai. Junuen, ka taꞌabwisi intok eaka, cheꞌa tuꞌisi Krijtota enchim sual sakaꞌaneꞌ betchiꞌbo. 12 Inen ne jiubae oꞌoben, Jesukrijtota, itepo junuen nau aꞌ sualeka, siꞌimem itom naas ito anianeeꞌu betana.

13 Krijtopo nemak werim, enchim ne juꞌunee iꞌa, jue benasi in aman enchim bitpeaka juniꞌi, taa iꞌan tajtia, ka a in emou weyeꞌpo. Emou ne noitibaekaꞌea, junuen emo nasuk, Krijtota nok lutuꞌriata sualeka, cheꞌa juniꞌi yuꞌin aꞌ mabetame bitbaekai. Inim aniapo omot jue benasi jaibu inien in aꞌ bichaꞌa benasia. 14 Bweꞌituk neu utteꞌa in yee majtaneꞌpo, kia am riekomtuko juniꞌi, intok kia am taꞌabwi yoemratuko juniꞌi. Intok jumeꞌ koba suawakame, oo kia jumeꞌ ka koba susuawakametuko juniꞌi. 15 Junuen san inen ne ea, inikaꞌa Krijtota betana nok lutuꞌuriata, enchim, jumeꞌ bweꞌu joꞌaraa Romaꞌateaꞌpo jomemmeu ket in emou aꞌ teuwaaneꞌpo, kaita neas aayuk.

16 Inepone, jukaꞌ bemelaka, Krijtota nok lutuꞌuriata betana jakwoo juniꞌi nee ka ae tana ino tiutua. Bweꞌituk jiba iniꞌi junaꞌa, Liojta betana utteꞌaka aꞌ bitnaꞌ betchiꞌbo weyeme. Junuen, siꞌimem wameꞌe, inikaꞌa sualeme am jinneꞌuneekai. Junuen iniꞌi, cheꞌa bat naataka jumeꞌ juriom betchiꞌbo weyekai. Taa ketchia siꞌime wameꞌe ka jurio yoemram betchiꞌbo juniꞌi. 17 Bweꞌituk inia nok lutuꞌuriae, itepo aꞌ juꞌuneiyaa, Liojta junuen wepulsi Krijtota itom sualeka jiba junuen a itom mabetaꞌpo. Intok ka taꞌabwisi intoko. Jum Liojta nok lutuꞌuriapo aꞌ jiꞌojteiꞌi benasia: “Juꞌu junuen, Liojta betana tuꞌisi mabetwakame, junuen aapoꞌik sualeka jiba yuu jiapsine”, ti jiakai.

18 Bweꞌituk ite aꞌ juꞌuneiyaa, aapoꞌik Liojta teekapo aꞌ katekaꞌa betana, siꞌime jumeꞌ ka aꞌ yoꞌoreka, ka tuꞌik jiapseka intok ka tuꞌik joame, ama butti jiokot machika ameu aꞌ chupneꞌpo. Inimeꞌe junaen ka tuꞌik boꞌo jooriaka, Liojta betana jukaꞌ lutuꞌuriata, ka aꞌ juꞌuneiyaatebo. 19 Bempo, jukaꞌ Liojta betana weyeka, a juꞌuneiyaatumta juꞌuneiyaa. Bweꞌituk Lios, aapo ameu yeu aꞌ machiak. 20 Bweꞌituk Liojta, ka bittaka, jiba yuu aꞌ jiapsaꞌuta, juꞌu aapoꞌik juꞌunaktekaꞌue a juꞌuneiyaatu. Aniata juꞌunaktewakaꞌpo naateka machisi juꞌuneiyaawa aapoꞌik aꞌ Liojtukaꞌpo intok utteꞌata jiba yuu betchiꞌbo aet ayukaꞌpo. Junuen san, bempo kaitat jiawitene. 21 Jumeꞌ bat naataka katriam junuen Liojta taꞌaasuka juniꞌi, ka aꞌ yoꞌorek intok ka aꞌ baisaek juniꞌi, ka aꞌ Liojtukaꞌa benasia. Taa alam kaita tuꞌikut emo temai japtek. Junuen san, tuꞌikut bem a mammateneeꞌuta, aꞌ taꞌaruk. 22 Intok emo sussuawak ti jiaka juniꞌi, kaita suawata amet ayukan. 23 Intok jukaꞌ Liojta, jiba yuu jiapsamta, yoꞌori eiyaaꞌeewaꞌuta koptak. Intok, senuk, inim yoemta, ka jiba jiapsinemta bebenakutchi maammea yaꞌarika am yoꞌori betchiꞌbo. Intok kia wikitchim bebenam yaꞌarita juniꞌi, intok bakotchim bebenam intok ketunia, juyapo jumeꞌ jiapsame bebenam yaꞌarikai.

24 Inia betchiꞌbo san, juꞌu Lios, junuen ka tuꞌik bem boꞌo jooriapeaꞌu betana ka ameu suuaka, au am suꞌu tojak. Intok junuen bempo naas nau tiusi machik yaak. 25 Bweꞌituk bempo, Liojta betana jukaꞌ lutuꞌuriata, bem taꞌaakaꞌuta, ka aꞌ mabetaka, jukaꞌ aa nokiꞌichiata sualek. Intok Liojta betana jukaꞌ juꞌunakteita yoꞌorek. Intok am nake. Intok tua jukaꞌ Liojta am juꞌunaktekamta, junakaꞌa ka yoꞌorek, jukaꞌa, jiba betchiꞌbo aꞌ yoꞌorinaaꞌu au aꞌ lutuꞌuriakaꞌuta. Tua junuentune.

26 Inia betchiꞌbo san, tua tiusi maachik bem boꞌo joorianeꞌ betchiꞌbo ka ameu suuak juꞌu Lios. Junak san, jumeꞌ jaamuchim juniꞌi, oꞌowim bem waataꞌaꞌeaꞌpo, bempo su, cheꞌa emo waatan. 27 Intok jiba benasia, jumeꞌ oꞌowim, jaamuchim waataꞌeaka su, bempo su emo waatan. Intok chikti bem nau eaka, nanancha oꞌowimtaka tiusi machik nau boꞌo joorian. Intok junae betana, bempo junaen, siꞌimeta jukaꞌ ka ammaꞌali weyeka, bem yaꞌari betana, bempo bem takaampo aꞌ inneꞌak.

28 Bempo, Liojta kaabetukaꞌa benasia, ka sualbaekai, aapo juꞌu Lios, ka intok amemaktuka, siꞌimeta jukaꞌ ka ammaꞌali weyeka bem eiyaaꞌu am suꞌu tojak. Junuen, jukaꞌ ka jooꞌeewamta bem jooneꞌ betchiꞌbo. 29 Intok siꞌime ka tuꞌisi weyeka amet aayuk. Ka am jubeka, taꞌabwi jaamuchimmak emo tuꞌuren. Ka ammaꞌali weyemta, jain juniꞌi, ka weelaꞌpo jita waatiawamta. Tokti betchiꞌbo ka tuꞌik, jita nau nae. Yeem sussuꞌa. Nok nanassua. Yeem bai tattaꞌaa. Ka tuꞌi yoemem. Aa nokiꞌichiata teuwaaka yetet nooka. 30 Ka tuꞌisi yetet nonoka. Liojtam ka tuꞌureka, omola aꞌ tatawa. Kaabeta yoyoꞌore. Tuꞌisi emo jabele intok emo cheꞌeware. Taꞌabwika, ka tuꞌik tua bem aꞌ yaꞌaneeꞌu betana susuawak. Bem yoyoꞌowam ka nok jikkaja. 31 Kaita mammate. Bem teuwaaꞌuta ka chuchupa. Bem a yee nakneeꞌuta, ka taꞌaa. Kaitat yee jijiokoe. Yee jiokoliwamta ka taꞌaa. 32 Bempo tuꞌisi juꞌunea, jukaꞌ Liojta tua inikaꞌa bejeꞌeka aꞌ nesawekaꞌut. Juꞌuneamme, inile benaka ka tuꞌik boꞌo jooriame, bem kokkoneeꞌuta ameu aꞌ chupneꞌpo. Taa junuentaka juniꞌi, jiba bichau bicha ka tuꞌik boꞌo jooria. Intok bempo, watem ame benasi aneme, alleaka am bicha.