Liojta tuꞌu jiapsi yepsakaꞌpo
2
Junak chukula, Jesukrijtota muksuka intok aapoꞌik kokkoarim nasuk aꞌ jiabijtesuka, woo busan semaanam simsuko, taewai, bem nokpo Pentekojtej ti taꞌeewame yumaka, siꞌime wameꞌe Krijtota nau sualeme, inimeꞌe wepulsi karipo siꞌime nau aanen. 2 Junamaꞌa seej chuktia, teeka betana weyeka, jiawai, suum watchika jikkajituk. Inikaꞌa, bweꞌu jekata yepsakaꞌabenakai. Intok junuen, jum kari bem jokaꞌapo siꞌimekut yumakai. 3 Junak intok, bempoꞌim aneꞌepo taji buaktiam benaka ama bittuk. Inimeꞌe bempoꞌim weꞌepulaim bepa chaꞌatukai. 4 Intok junak inimeꞌe siꞌime, Liojta betana aꞌ tuꞌu jiapsiwata yumaꞌisi aꞌ mabetak. Intok inimeꞌe siꞌime, tattaꞌabwi, ka bem nokpo, nok japtek. Junuen jiba jukaꞌ Liojta tuꞌu jiapsita am noktuaꞌa benasia.5 Jiba junameꞌe taewaimmet junamaꞌa bweꞌu joꞌara Jerusalen ti teakaꞌpo, jurio yoemra, inimeꞌe Liojta yoꞌori betchiꞌbo, bem sualeꞌut tua yumaꞌisi aꞌ joame, inime san, mekka omot tattaꞌabwi bwiaraam betana jomemtaka ama anekai. 6 Junak junama bem aneꞌepo, junakaꞌa jiawaita aꞌ jikkajituko, junama juꞌu buꞌuuraa ama nau yajak. Intok inimeꞌe betana kaachin ee machika kialam bitchuka taawak. Bweꞌituk inimeꞌe, junameꞌe siꞌime, weꞌepulaka bem nokpo nokame jikkajan. 7 Inime san junen tua suum eaka am bichaka intok bempo:
―Siꞌime inimeꞌe nokame itom jikkajaꞌum, bwiaraa Kalileaꞌ teaꞌpo joomem oꞌoben ―ti nau jiian―. 8 Taa itepo iꞌan inimeꞌe, bempoꞌim weꞌepulaka, itom aamak yoꞌotuka itom nokpo nokame jikkaja. 9 Inim ito nasuk yoemra aane, bwiaaram inen teakaꞌpo betana joome. Jum Paartiaꞌ teaꞌpo, jum Meeriaꞌ teaꞌa betana, jum Elamiitaꞌ teaꞌa betana, jum Mesopotaamiaꞌ teaꞌpo joome. Ket jum Jureaꞌa betana, jum Kapparoosiaꞌ teaꞌa betana, jum Pontoꞌ teaꞌa betana, Aasiaꞌ teaꞌa betana. 10 Jum Riijiaꞌ teaꞌa betana, jum Pampiiliaꞌ teaꞌa betana, jum Ejiiptoꞌ teaꞌa betana. Jum Aprikaꞌ teaꞌpo senu bweꞌu joꞌaraa Sireeneꞌ teaꞌa betana jumeꞌ cheꞌa waꞌam bicha joꞌaakame. Inim ketchia, yoemra Romaꞌ teaꞌa betana inim jooka. Inimeꞌe betana waate juriom yeu yoemtulamtakai, wate intok ka juriomtaka, taa juriom junuen Liojta yoꞌoreka bem boꞌo jooriaꞌuta ame benasi aꞌ sualeme. 11 Ketchia waate jum bwiaraa bawepo kateka, Kreetaꞌ teaꞌa betana, intok ket bwiaraa Araabiaꞌ teaꞌa betana inim aane. Taa junuen taka juniꞌi, siꞌime itepo inim, bempoꞌim, Liojta betana jukaꞌ cheꞌa bepa eiyaawatchika kaitau a tamachiatuka aꞌ yaꞌarita, itepo, weꞌepulaka, tua itom tattaꞌabwi nokpo aꞌ teuwaame jikkaja.
12 Siꞌime jumeꞌ am bichame suum eaka intok kaachin ee machiakan. Intok inimeꞌe:
―Jitasa tua siꞌime iniꞌi itom bichaꞌu ―ti nau nattemaen.
13 Taa waate kia am junn jiaawaka intok:
―Inimeꞌe cheꞌa, paꞌasi baꞌawata yee nanaakomta jiꞌilamtaka juneꞌela ―ti jiian.
Peota yoemratau teuwaakaꞌu
14 Junako juꞌu Peeo, watem jumeꞌ woj mamni ama weepulaika, Jesukrijtota yeu puꞌarimmak, ama kikteka intok kusisi nokaka:
―Emeꞌe, Jurea bwiaarapo joomem intok emeꞌe inim bweꞌu joꞌara Jerusalen teaꞌpo jiapsame, inikaꞌa juꞌuneiyaanee intok inikaꞌa in emou teuwaabaeꞌuta aꞌ mammatene. 15 Inimeꞌe enchim bichaꞌum, katim naako enchim am eiyaꞌa benasia. Bweꞌituk ketuni ketwoo, juꞌubwasu batanim jiakai. 16 Ala iniꞌi enchim bichaꞌu, junaꞌa juꞌu chukula yeu weenemta tetteuwaame, Joel tukaꞌuta, cheꞌa bat naataka aapoꞌik teuwaari junaꞌa. Junak inen jiakai:
17 Cheꞌa chukula taewaimmetchi ti jiia juꞌu Lios, nee betana inepo jukaꞌ in tuꞌu jiapsita ne siꞌime im bwiapo jiapsame nee aꞌ juꞌuneiyaatuane.
Jumeꞌ enchim yoemiarim, oꞌowimtaka, jaamuchimtakai, jukaꞌ nee betana weyemta aꞌ teuwaane.
Jumeꞌ juꞌubwa yoꞌotume, ka siꞌimem a bichaꞌuta bibittuanaa.
Jumeꞌ intoko yoꞌotuim, inimeꞌe jita tettenku tuanaa,
ti jiiak juꞌu Joeltukaꞌu.
18 Jiba junameꞌe taewaimmet, inepo jukaꞌ nee betana tuꞌu jiapsita nee jumeꞌ in yeu puꞌarimmet, oꞌowimtaka intok jaamuchimtaka, nee aꞌ juꞌuneiyaatuane.
Inimeꞌe intok, jukaꞌ nee betana weyemta aꞌ teuwaane.
19 Jikat teekau inepo, jita ka jiba bitwaka, junerak aꞌ bit tebone.
Intok inim bwiapo inepo machilaata ne yaꞌane.
Ojbota benak, tajita intok bwichiata benak, jaawata benasi weyemta.
20 Juꞌu intoko taꞌa, tua ka machisi tawane.
Juꞌu intok meecha, ojbota benasi sikii chukuisi bittune.
Iniꞌi, waꞌa yoꞌowe Jesukrijtota aapoꞌik yeu puꞌarita taewaita kee aꞌ yumao.
Junak junaꞌa taewai, cheꞌa bepa kaita intok ale benasi taewai cheꞌa machika bittuneekai.
21 Intok junak, jabetaka juniꞌi, waꞌa tua junen jiaka juꞌu itom yoꞌowabeu bicha aapoꞌik aꞌ jiokolineeꞌuta aꞌawame, junaꞌa jinneꞌui tune,
ti jiiak juꞌu Joeltukaꞌu.
22 ’Junuen san emeꞌe, Ijraꞌel tukaꞌuta betana aꞌ yoemiammet yeu katriam, inikaꞌa in teuwaabaeꞌuta aꞌ jikkajine. Jesus, juꞌu Nasaret teaꞌpo joome, aapo, achai Liojta betana inim emo bichapo, aapoꞌik cheꞌa bepa kaitau a tamachiatuka a jita aꞌ joaꞌue aꞌ yaakaꞌue, intok siꞌimeta machilaata, jiba aapoꞌik achai Liojta emo bichapo aapoꞌik Jesujta aꞌ yaꞌatuakai, junae aꞌ Krijtotukaꞌuta aꞌ teuwaak, enchim jaibu aꞌ juꞌuneiyaꞌa benasia. 23 Taa junuentaka juniꞌi, inikaꞌa cheꞌa bat naataka naateka, jukaꞌ Liojta tua junuen aꞌ chup iꞌaꞌpo aman, aapoꞌik emou aꞌ suꞌu tojiwako, junak emeꞌe aꞌ bwiseka intok junuen wameꞌe ka Liojta yoꞌori taꞌaame betana aniawaka, emeꞌe, kuuset aꞌ popon tebokai aꞌ meꞌaak. 24 Taa juꞌu Lios, aapoꞌik mukiataka, juchi aꞌ jiapsituak, kokkowamta betana ama aꞌ yoꞌeetuakai. Bweꞌituk aapo kaachin mukiataka junuen tawa ean. 25 Bweꞌituk juꞌu cheꞌa yoꞌo yaꞌari, Labiitukaꞌu, jiba aapoꞌik Jesujtat nokaka:
Ineponee jukaꞌ achai Liojta jiba nemak aneka intok jiba nee aniamta nee aꞌ yoem eiyaak.
Intok junuen, kaita in majjauneꞌ betchiꞌbo, aapo siꞌimeku yumaka nemak tukai.
26 Jiba inia betchiꞌbo inepo in alleaꞌu tuꞌisi net ayukan,
Intok inepo tua alleaka, aapoꞌik in bai saeꞌuta ne aꞌ teuwaak.
Ket jiba inia betchiꞌbo san, kaitat jain eaka nee boꞌotene.
27 Bweꞌituk empo kaachin, jumeꞌ kokkoarim jiba betchiꞌbo aneꞌu nee tawaane.
Intok kia empo, inikaꞌa em yeu puꞌarita, aapoꞌik takaawata nasonteneꞌ betchiꞌbo, ka ama aꞌ suꞌu tojine.
28 Ketchia empo, jum jiba yuu jiapsiwaꞌu jachin aman yaajiwaꞌuta, nee aꞌ juꞌuneiyaatuak.
Intok empo nemak aneka, tua alleewamta nee aꞌ bittuane, ti jiiak.
29 ’Emeꞌe, nele benasi inim yoemem, a itepo aꞌ juꞌuneiyaa, jukaꞌ cheꞌa bat weyeka itom yoꞌowasukaꞌuta, Labiitukaꞌuta aꞌ mukukaꞌpo intok ket aꞌ maꞌatukaꞌpo. Bweꞌituk tetapo wojoꞌoria aꞌ maꞌawakaꞌpo, iniꞌi ketun tee im aꞌ bicha. 30 Taa juꞌu Labii tukaꞌu aapo, Liojta betana juꞌuneetuawaka, chukula yeu weemta teuwaan. Intok aapo juꞌunean, jukaꞌ Liojta jita teuwaaka tua aꞌ lutuꞌuriatunee ti jiakai, aapoꞌik yeu katriam betana jukaꞌ seenuk, Liojta yeu puꞌarita aꞌ yebijneꞌpo. Intok aapoꞌik yoꞌotaka aꞌ yej sukaꞌpo, inikaꞌa ama yoꞌotaka aꞌ yejteneeꞌuta. 31 Junuen san juꞌu Labii tukaꞌu, tua juꞌuneamta benasi, Jesukrijtota, kokkoarim nasuk aꞌ jiabijteneeꞌuta aꞌ teuwaak. Intok ketchia aapoꞌik, jumeꞌ kokkoarim jiba yuu betchiꞌbo bem aneꞌu, aapoꞌik ka ama aꞌ tawaneeꞌuta. Intok kia aapoꞌik taka juniꞌi, ka ama aꞌ nasontuneeꞌuta aꞌ teuwaak. 32 Intok iniꞌi, juꞌu Lios, jiba inikaꞌa Jesujta, kokkoarim nasuk aꞌ jiabijtetuak. Intok jiba inien yeu sikamta betana jiba itepo tee aꞌ juꞌuneiyaaka aꞌ teuwaa. 33 Junuen san jiba aapo, achai Liojta aꞌ katekaꞌu sikaa, aꞌ batatana yejtek. Intok aꞌ yoꞌowa betana jukaꞌ aꞌ tuꞌu jiapsiwata au aꞌ naꞌikiarita, aapo aꞌ mabetak. Intok siꞌime iniꞌi enchim bichakaꞌu intok enchim jikkajakaꞌu, jiba aapoꞌik betana weye. 34 Bweꞌituk ka juꞌu Labiitukaꞌu junaꞌatuk juꞌu teekau sikame. Bweꞌituk jiba aapo juꞌu Labii tukaꞌu:
Juꞌu in yoꞌowa Lios, juꞌu yeu puꞌari in yoꞌowabeu:
“Inim in katekaꞌpo, batatana yesaꞌe”, ti au jiiak.
35 “Chukula, siꞌime wameꞌe enchi bejeꞌeka aneme, yumaꞌisi bem eu emo suꞌu tojaꞌpo tajti,
Junaet in enchi aniasuꞌpo tajtia”, ti jiiak juꞌu Labii tukaꞌu.
36 ’Siꞌime juꞌu im Ijraꞌel yoemra tua witti aꞌ lutuꞌuriatukaꞌpo aꞌ juꞌuneiyaaꞌem, inikaꞌa Jesujta enchim kuuset poponakaꞌuta, jukaꞌ achai Liojta, siꞌimemmeu aꞌ Krijtotaka intok siꞌimeku aapoꞌik aꞌ yoꞌo yaꞌariakaꞌuta.
37 Inikaꞌa bempo jikkajisukai, inimeꞌe, bem sioksi eaꞌu amet ayukan, intok juꞌu Peoꞌ teamtau intok jumeꞌ waate Krijtota yeu puꞌarimmeu nattemaek:
―Ito mak werim, itom tejwaanee inia betana, jaisa te annee ―ti ameu jiakai.
38 Junako juꞌu Peeo:
―Liojta bichapo emeꞌe, ka tuꞌikut betana emo temaeka aꞌ koptane. Intok weꞌepulaka, emeꞌe Jesujtau bicha nokaka, ae betchiꞌbo emo batoꞌowaa tebonee junuen enchim ka tuꞌuwa yaꞌarimmet enchim jiokoinaꞌ betchiꞌbo. Intok junuen aapo juꞌu Lios, jukaꞌ aapoꞌik betana aꞌ tuꞌu jiapsita emot aꞌ autuane ―ti jiiak―. 39 Bweꞌituk iniꞌi yetet autuannaꞌateaka juꞌu chupneeka, bat naataka teuwaari, jiba emo betchiꞌbo intok kia jumeꞌ enchim yoemiam betchiꞌbo juniꞌi weye. Intok kia siꞌime wameꞌe, cheꞌa mekka tajti jiapsame betchiꞌbo ketchia, iniꞌi, wameꞌe jukaꞌ achai Liojta aapoꞌiku bicha yeu aꞌ puꞌabaeꞌum betchiꞌbo weyekai ―ti jiiak.
40 Inia betana ameu nokakai intok, ket watek ameu teuwaakai, juꞌu Peeo inimmeu nookak intok tuꞌik betana am sua tejwaakai, intok:
―Inim ka tuꞌik joaka jiapsammak ka amemak eene ―ti jiakai.
41 Junuen san junameꞌe inime betana jukaꞌ Liojta betana nok lutuꞌuriata sualeka aꞌ mabetakame batoꞌowaaimtuk. Intok jiba junae taewait, jumak baji miiltaka junamaꞌa jumeꞌ Krijtota sualemmak ee japtek. 42 Intok siꞌime, jumeꞌ Krijtota yeu puꞌarim betana bem majtawaꞌut jiapseka aꞌ boꞌo joorian. Intok siꞌime, siꞌimeku nanancha eaka jiapsan. Intok Liojtau bicha yee nokriakai. Intok paanim rebekta betchiꞌbo emo nau totojan, junuen Jesukrijtota aꞌ mukukaꞌu waati betchiꞌbo.
Jumeꞌ bat Krijtota sualekaꞌum, jaisa jiapsakaꞌu
43 Intok siꞌime jumeꞌ ama aneme, siꞌimeku Liojtat ee majjaen. Intok Liojta a jita joaꞌ betchiꞌbo, ka a joo tu machik intok machilaata, jumeꞌ Krijtota yeu puꞌarim aꞌ jootuawan. 44 Intok siꞌime wameꞌe Krijtota sualekame, junameꞌe jiba weeꞌpo nau aanen. Intok bempo, jukaꞌ bem attea, siꞌime nau a nau aꞌ jipuen. 45 Inimeꞌe, jukaꞌ bem atteata, intok siꞌimeta wakaꞌa bem jipueꞌuta aꞌ nenenkan intok junuen bempo, junakaꞌa tomita, junamaꞌa bempoꞌimmeu aꞌ beꞌeeꞌpo aman nat aꞌ naꞌikimtekai. 46 Intok chikti taꞌapo bempo jum Liojta bweꞌu teꞌopopo emo nau totojan. Intok ketchia, chukula, watem joꞌaa beꞌekatana sajaka, paanim rebekta betchiꞌbo, Jesukrijtota aꞌ mukukaꞌu waatekai. Intok bempo tua alleaka intok kaabe emo cheꞌewareka nau aneka jijiꞌibwan. 47 Intok Liojta yoꞌoreka, au bicha bem alleaꞌuta aꞌ teuwaan. Intok junamaꞌa bem bweꞌu joꞌarapo, siꞌime juꞌu yoemra am eiyaaka am bichan. Intok junuen juꞌu yoꞌowe Jesukrijto, chikti taꞌapo, ama aapoꞌik sualeme jumeꞌ jinneꞌuim tume, cheꞌa juniꞌi am buꞌuurian.