Ni jan koo tee inundichi ma ni ka ndachiñuꞌu de Jesús ma
2
Nuu ni kâku Jesús ma ñuu nani Belén ma ja iyo i ñuu Judea ma,
neꞌun kivi yukan tátnuni rey Herodes ma.
Te ini ñuu Jerusalén ma,
ni ka kenda koo jaku tee inundichi ve koo ñuu ka iyo ichi nuu kána kandii ma.
Visita de los magos (Mateo 2.1-23)
2 Te ka jikan‑tnuꞌu de:
―¿Ndenu iyo suchi ko kuu rey ñayii judío ma ja jâ ni kâku i ma?
Vaa nuu ka iyo sa ñuu sa ma ichi nuu kána kandii ma,
te ni ka jini sa tiuxini káxtnuꞌu ja jâ ni kâku i ma,
te ve koo sa ja jin ndachiñuꞌu sa i ―ka kuu de ka jiñaꞌa de.
3 Te nuu ni jinisoꞌo rey Herodes ma ja sukan ka kaꞌan de ma,
te ni ndi ini xeen de,
te sukan ni ka ndi ini ndaka ñayii ñuu Jerusalén ma.
4 Te ni ndaxtutu Herodes ma ndaka tee ka tatnuni nuu sutu ma,
jiꞌin ndaka tee ka skuaꞌa tnuꞌu Moisés ma ja ka iyo de ñuu yukan ma,
te ni jikan‑tnuꞌu de ndenu iyo ja kâku Cristo iya tetniñu Suꞌsi ma.
5 Te ni ka ndakoneꞌe tee ma:
―Ñuu nani Belén ma ja iyo i ñuu Judea ma,
vaa sukan ni kaxtnuꞌu tee ni yo ndakaxtnuꞌu tnuꞌu ni yo waꞌa Suꞌsi ma,
te saꞌa nde a ni kaꞌan de ma:
6 Te roꞌo ñuu Belén ja iyo ro ñuu Judá ma,
masu in ñuu luluu‑ni kúu ro ja iyo ro neꞌun tee ka tatnuni ñuu Judá ma,
vaa neꞌun roꞌo kee iya kaxtnuꞌu sukan jin saꞌa ñayii ma,
te suu ya ko koto ñuu ri a ja kuu Israel ya.
―Saꞌa ni ka ndakoneꞌe de.
7 Sani te yuyuꞌu‑ni ni kana Herodes ma tee inundichi ma,
te ni jikan‑tnuꞌu vavaꞌa de na nde kivi ni kenda tiuxini ma.
8 Te ni tetniñu de tee ma ñuu Belén ma,
te jiñaꞌa de:
―Kuán koo ni,
te jin keꞌen tnuꞌu vavaꞌa ni siki ja suchi luluu ni kâku ma te ndenu iyo i,
te nú ni ka ndaniꞌi ni i,
te jin kaxtnuꞌu ni,
sukan‑vaꞌa kiꞌin tna sa jin ndachiñuꞌu sa i ―kúu de jiñaꞌa de.
9 Te nuu ni jinu ni ka jinisoꞌo de ja jiñaꞌa rey ma,
te kuan koo de,
te tiuxini ni ka jini de nuu ka iyo de ñuu de ma kúu seña ja ka ndikin de kuan koo de onde nuu ni ka kenda koo de veꞌe nuu iyo lulu ma,
vaa yukan ni jinkuiñi tiuxini ma.
10 Te nuu ni ka jini de ja ni jinkuiñi tiuxini ma,
te ni ka kutachi xen‑xeen de.
11 Te ni ka kivi koo de ini veꞌe ma,
te ni ka jini de lulu ma jiꞌin siꞌi ya María ma,
te ni ka jinkoo jiti de,
te ni ka ndachiñuꞌu de Jesús ma,
vaa ka jini de ja iya kanuu kúu ya.
Sani te ni ka ndakune de ja ka yindaꞌa de kuan koo de ma,
te ni ka skutaꞌvi de lulu ma mirra jiꞌin ja jáxiko asi jiꞌin oro.
12 Te nuu ni kunee ma te ni ka kixi de ma,
te ni xsjani ñaꞌa Suꞌsi ma ja máko jin ndakokuiñi‑ka de nuu iyo Herodes ma,
te chukan kúu ja in‑ka ichi kuan nu koo de ñuu de ma.
Ni ka xsiyo de Jesús ma ñuu Egipto ma
13 Sani te nuu ni ka yaꞌa de kuan nu koo de ma,
te nuu ni kixi José ma,
te ni kenda in ángel ni tetniñu Iya Tátnuni ma,
te jiñaꞌa i:
―Ndakoo ni,
te kueka ni lulu a jiꞌin siꞌi ya a,
te kuán koo ni ñuu Egipto ma,
te jin koo ni yukan‑ni onde kaxtnuꞌu maa sa kivi ndi koo ni ma,
vaa saꞌa ko kuu ja Herodes ma chi nduku de lulu a ja kaꞌni de ya ―kúu i jiñaꞌa i.
14 Te ni ndoto José ma,
te ni jeka de lulu ma jiꞌin siꞌi ya ma,
te kuan koo jakuaa de ñuu Egipto ma.
15 Te yukan ni ka iyo de onde ni jiꞌi Herodes ma,
sukan‑vaꞌa ko kuu sukan ni kaꞌan Iya Tátnuni ma nuu tee ni yo ndakaxtnuꞌu tnuꞌu Suꞌsi ma ja ni kaꞌan de ma:
“Onde ñuu Egipto ma ni ndakana sa Saꞌya sa ma.”
Saꞌa ni kaꞌan de ma.
16 Sani te nuu ni jinitnuni Herodes ma ja ni ka xndaꞌvi ñaꞌa tee inundichi ma,
te ni ndakiti xeen ini de,
te ni tatnuni de ja jin kaꞌni soldado ma ndaka suchi yika ni ka kâku ma te onde suchi uu kuiya ma,
ja ka iyo i ñuu Belén ma jiꞌin ndaka yuꞌu ñuu ma.
17 Sukan,
te ni kuu sukan ni kaꞌan Jeremías tee ni yo ndakaxtnuꞌu tnuꞌu ni yo waꞌa Suꞌsi ma nuu saꞌa ni kaꞌan de ma:
18 Ni ka jinisoꞌo i ja kúu yuꞌu in ñaꞌa ñuu Ramá ma,
ndaꞌyu ña te tnána ña ja kúxii xeen ini ña.
Raquel ma kúu ña,
te ndaꞌyu ña ja jin kuu saꞌya ña ma,
te masu na in kúndee ja ndakaꞌan mani i ña,
vaa kuechi ja ni ka jiꞌi saꞌya ña ma.
Saꞌa ni kaꞌan de ma.
Kuan nu koo de jiꞌin Jesús ma ñuu Nazaret ma
19 Kovaa nuu ni jiꞌi Herodes ma,
sani te ni kenda in ángel ni tetniñu Iya Tátnuni ma nuu kixi José ma ñuu Egipto ma,
20 te jiñaꞌa i:
―Ndakoo ni,
te ndakueka ni Jesús a jiꞌin siꞌi ya a,
te kuán nu koo ni ñuu Israel ma,
vaa jâ ni ka jiꞌi ñayii ka nduku ja jin kaꞌni i ya ma ―kúu i jiñaꞌa i.
21 Sani te ni ndakoo de,
te ni ndakueka de ya jiꞌin siꞌi ya ma,
te kuan nu koo de ñuu Israel ma.
22 Kovaa ni niꞌi tnuꞌu de ja tee kúu Arquelao ma,
tátnuni de ñuu Judea ma nuu tniñu yuva de Herodes ma,
te chukan kúu ja ni yuꞌu José ma ja noꞌo de yukan.
Kovaa Suꞌsi ma,
ni kaxtnuꞌu ya nuu de ora kixi de ma nawa saꞌa de.
Sani te kuan nu koo de jiꞌin ya ñuu Galilea ma.
23 Te ni ka kenda koo de jiꞌin ya yukan,
te ni ka iyo de jiꞌin ya ñuu nani Nazaret ma ja iyo i ñuu Galilea ma,
sukan‑vaꞌa ko kuu sukan ni kaꞌan tee ni yo ndakaxtnuꞌu tnuꞌu ni yo waꞌa Suꞌsi ma nuu ni kaꞌan de ja konani ya nazareno ma.