Sukan ni kaxtnuꞌu Juan tee skuandute ñayii ma
3
Neꞌun kivi yukan,
te ni kenda Juan tee skuandute ñayii ma ichi nuu masu nawa iyo kuiti ma,
te káxtnuꞌu de tnuꞌu Suꞌsi ma nuu ñayii ñuu Judea ma ja jan koo i nuu iyo de ma.
2 Te jiñaꞌa de:
―Jin ndakani jin ndakaꞌvi ini ni,
te jin xndoo ni ja uꞌvi ka saꞌa ni ma,
te jin ndandikin ni Suꞌsi ma,
vaa jâ ve kuyatni ja tatnuni iya iyo andivi ma ―kúu de jiñaꞌa de.
3 Vaa Juan ma kúu tee ni kaꞌan Isaías tee ni yo ndakaxtnuꞌu tnuꞌu ni yo waꞌa Suꞌsi ma,
nuu ni kaꞌan de ma:
Kayuꞌu in tee onde nuu masu nawa iyo kuiti ma,
te kaꞌan de:
“Jin satuꞌva ni ichi Iya Tátnuni ma,
jin ndakune ni in ichi ndaa.”
Saꞌa kaꞌan de.
4 Te Juan ma,
neꞌnu de saꞌma ixi kiti kúu camellu ma,
te chii de ma ni yo nuꞌni in ñií.
Te ni yo jaa de tika langosta jiꞌin nduxi ni yo niꞌi de yuku ma.
5 Te ni yo jan koo ñayii ka iyo ñuu Jerusalén ma,
jiꞌin ni‑kaꞌnu ñuu Judea ma,
jiꞌin ni‑kaꞌnu yuyute Jordán ma nuu iyo Juan ma.
6 Te ni ka yo ndakaꞌan,
ni ka yo ndakachi i kuechi i ma nuu Suꞌsi ma,
te ni yo skuandute de i yute Jordán ma.
7 Te nuu ni jini de ja kuaꞌa tee ka kuu fariseo ma jiꞌin tee ka kuu saduceo ma ni kenda koo ja skuandute de tee ma,
te jiñaꞌa de:
―¡Sukan ka kuu koo ma ka kuu ni!
¿Na in ni kaxtnuꞌu nuu ni ja jin kaku ni ja ma xndoꞌo xneni ñaꞌa Suꞌsi ma?
8 Jin saꞌa ni ja vaꞌa,
sukan‑vaꞌa konaꞌa ndija ja jâ ni ka ndakani,
ni ka ndakaꞌvi ini ni nuu Suꞌsi ma.
9 Te másu ko jin kani ini ni:
“¡Yoꞌo chi jin ndaniꞌi‑taꞌvi o,
vaa saꞌya tata Abraham ma ka kuu o!”
Kovaa ja ndaa kúu ja visi yuu ka ndaa yaꞌa chi kuu ndasaꞌa Suꞌsi ma saꞌya tata Abraham ma.
10 Te jâ iyo tuꞌva kaa ma xuu yutnu ma ja kaꞌnde i onde yoꞌo tnu ma.
Ndaka yutnu masu kúun javixi vaꞌa ma,
jin teꞌnde tnu,
te jin koo tnu nuu ñuꞌu ma,
te jin kayu jin koko tnu.
Te saꞌa saꞌa ya jiꞌin ñayii ñatuu ka saꞌa sukan játna ini ya ma.
11 Ja ndaa kúu ja saña chi skuandute ñaꞌa sa jiꞌin ndute a‑ni,
sukan‑vaꞌa na jakonaꞌa ja jâ ni ka ndakani,
ni ka ndakaꞌvi ini ni nuu Suꞌsi ma.
Kovaa kuee‑ka,
te kenda iya iyo‑ka tnuꞌu ndee tnuꞌu ndatnu‑ka ya sana saña,
te saña,
va ni a ndijan ya ma masu kaa masu iyo sa ja kindaꞌa sa.
Te maa ya chi iyo ya ja taa ya tnuꞌu ndee tnuꞌu ndatnu vaa saꞌa ya ja jin koo ni jiꞌin Xtumani Ndios ma,
te nú ma jin kandija ni ja káꞌan ya ma chi iyo ya ja chunee ñaꞌa ya nuu ñuꞌu iꞌni ma.
12 Te jâ yindaꞌa ya ja xndechi ya triu ma te nduvii i,
te saꞌa siin ya paja ma,
te ndatavaꞌa ya triu ma nuu kuꞌun vaꞌa i ma.
Te kaꞌmi ya paja ma in nuu ñuꞌu ja masu ndaꞌva kuiti i ―kúu de jiñaꞌa de.
Sukan ni jandute Jesús ma
13 Te kivi yukan Jesús ma,
ni kee ya ñuu Galilea ma,
te kuaꞌan ya nuu iyo Juan ma yuyute Jordán ma,
sukan‑vaꞌa skuandute de ya.
14 Kovaa Juan ma,
ñatuu kúni de,
te jiñaꞌa de:
―Saña,
jiniñuꞌu ja maa ni skuandute ñaꞌa,
¿te navaꞌa saa suꞌva maa ni vee ja skuandute ñaꞌa sa?
―kúu de jiñaꞌa de.
15 Kovaa Jesús ma,
ni ndakoneꞌe ya:
―Kachi ni ve,
vaa jiniñuꞌu ja saꞌa jin saꞌa o,
vaa Suꞌsi ma chi,
kúni ya ja jin saꞌa o ja vaꞌa ja ndaa nuu ya ma ―kúu ya jiñaꞌa ya.
Sani te ni kachi Juan ma,
te ni skuandute de ya.
16 Te nuu ni jinu ni jandute Jesús ma,
te ni nana ya nuu ndute ma.
Sani te ni ka ndanune andivi ma,
te ni jini ya ja ni nuu Xtumani Ndios ma sukan kaa in sata,
te ni jakoxtnee ya siki maa Jesús ma.
17 Te ni ka jinisoꞌo ñayii ma ja saꞌa káꞌan Suꞌsi ma onde andivi ma:
―Iya yaꞌa kúu Saꞌya maa sa,
te kútoo sa ya,
te játna ini xeen sa ja saꞌa ya a ―kúu ya káꞌan ya.