N‑najani Spedru nuu ñayiu ka kukanu ini Jesucristu nakuenda n‑xeʼen‑s veʼe Cornelio
11
N‑ka teku tnuʼu se n‑tundaʼa ñaʼa Jesús xiʼin ntaka dava ñayiu kukanu ini Jesucristu xndaxio ntaka ñuu xndatuu distrito Judea xa dɨuni n‑ka teku ñayiu ñatu kuu daʼya dana Israel tnuʼu Ianyuux,
te n‑ka kuvete‑i,
2 ko nu n‑naxee Spedru Jerusalén,
n‑kanandee ñaʼa dava se ka kukanu ini Jesucristu.
Se n‑ka taʼnde ndodo ñɨɨ nuu ii‑s ka kuu‑s.
3 Ka xiaʼan‑s nuu‑s:
—¿Nakuenda n‑xe kotoniʼni‑n se ñatu n‑taʼnde ndodo ñɨɨ nuu ii‑s ná ka kida roo,
ñayiu ka kuu daʼya dana Israel te nakuenda n‑xaxi‑n xiʼin‑s u?
4 N‑najani Spedru ná n‑kuu ná n‑xino.
Xiaʼan‑s:
5 —Nɨni xijan taʼu‑da nuu Ianyuux na n‑xo tuu‑da Jope,
n‑kida‑ia xa n‑xini‑da ɨɨn xa kaa ná kaa daʼma.
Ndɨka te kaʼnu xijan,
te duku ndetnaʼa nkoon punda‑i.
N‑xini‑da xa vax juun xijan andɨu,
te n‑xino nuu nujuiin‑da.
6 N‑xo ndeʼa vaʼa‑da xa jini‑da nax ñuʼu xiti‑i te n‑xini‑da xa ñuʼu kɨtɨ uu ndaʼa uu xeʼe,
kɨtɨ ndava xiʼin koo.
7 Te n‑teku‑da xa n‑jaʼan nuu‑da:
“Ndojuiin,
Pedru.
Kaʼni kɨtɨ de te kaxi‑tɨ.”
8 Xiaʼan‑da:
“Ñaʼa,
Taa‑ro Ianyuux,
Ia kuu Xtoʼo‑da,
ma kaxi‑da chi ta uun ka kaxi‑da ɨɨn xa ña vaʼa xa kaxi‑da a ɨɨn xa kuiʼa kaa.”
9 Ijan n‑jaʼan ntuku nde andɨu ɨnka vuelta:
“Ruʼu n‑kida xa n‑ndunini‑tɨ,
maxku ku jaʼan ndoʼo xa ñatu vaʼa xa kaxi‑n.”
10 Duʼa n‑kuu uni vuelta.
Ijan dada juan ndaa ntdaa xijan andɨu.
11 Hora ijan,
n‑ka xee uni se Cesarea veʼe nuu tuu‑da.
Ɨɨn se ñuu‑s n‑tundaʼa ñaʼa xa na nanduku ñaʼa koio‑s.
12 N‑jaʼan Espíritu Ianyuux xa maxku ñaʼa kani ini‑da xa jɨʼɨn‑da xiʼin se n‑ka xee jan.
Te n‑xeʼen‑da xiʼin iñu ñani‑ro yaʼa.
Ntdaa‑da n‑ka kɨu veʼe se n‑kana ñaʼa jan.
13 N‑najani‑s xa veʼe‑s n‑xini‑s xa nujuiin ɨɨn ángel,
ia xinokuechi nuu Ianyuux,
te n‑jaʼan‑ia nuu‑s:
“Tundaʼa se jɨʼɨn ñuu Jope na nkueka‑s ɨɨn se nani Simón.
Dɨuni nani‑s Spedru.
14 Se ijan kachitnuʼu ñaʼa nax kada koio‑n xa nanitaʼu‑n xiʼin ntdaa familia xtuu nukee nuveʼe‑n”,
kuu ángel,
n‑xiaʼan‑ia nuu‑s.
15 Nu n‑kixeʼe‑da xa jaʼan‑da nuu ñayiu ijan,
n‑keé Espíritu Ianyuux ñayiu jan nani n‑keé ñaʼa‑ia roo.
16 Ijan dada n‑najaʼan‑da xa daa n‑jaʼan Jesús:
“Sua n‑dajuendute ñaʼa xiʼin ndute,
te Ianyuux kada xa juʼun ñaʼa Espíritu‑ia.”
17 Dɨuni n‑dakeé Ianyuux Espíritu‑ia se ijan nani n‑dakeé ñaʼa‑ia roo xaxeʼe xa kukanu ini‑ro Jesucristu.
¿Nuda daña ka ku dadaʼan‑da u?
—kuu Spedru,
n‑xiaʼan‑s.
18 Nu n‑ka teku se xtuu Jerusalén xaʼa,
ni ɨɨn xa ñatuka n‑ka jaʼan‑s,
te n‑ka ndadakaʼnu‑s Ianyuux.
N‑ka jaʼan‑s:
—Ate n‑kida Ianyuux xa n‑ka natu ini ñayiu ñatu kuu daʼya dana Israel xa n‑ka kida‑i kuechi te kutuu‑i xiʼin‑ia nɨkava nɨkuita nuda —ka kuu‑s.
N‑ka dakuaʼa Spalu xiʼin Bernabé ñayiu xndaxio Antioquía
19 Ñayiu ka kukanu ini Jesucristu n‑ka kixee distrito Fenicia,
distrito Chipre xiʼin ñuu Antioquía xa n‑ka kee‑i Jerusalén,
n‑ka kakuneʼe‑i xa n‑jaʼan Jesús,
ko ña n‑ka dakuaʼa‑i ñayiu ña ka kuu daʼya dana Israel chi diko ni ñayiu kuu daʼya dana Israel xndaxio ijan n‑ka dakuaʼa‑i.
N‑ka xe kotuu‑i ijan xaxeʼe xa n‑ka kida uʼu ñaʼa ñayiu ña ka kukanu ini Jesucristu ñuu‑i chi n‑ka kuu ɨnuu‑i xiʼin Steba,
se n‑ka xaʼni‑s.
20 Xijan kuu xa dava se ka kukanu ini Jesucristu,
xndaxio Chipre xiʼin Cirene n‑ka xee‑s ñuu Antioquía,
te n‑ka jaʼan‑s nuu se ñatu ka kuu daʼya dana Israel nax n‑kida Jesús,
Ia kuu Xtoʼo‑ro,
xa na nanitaʼu‑i.
21 N‑chindee ñaʼa Ianyuux,
te kueʼe ñayiu n‑ka kukanu ini Jesús,
Ia kuu Xtoʼo‑ro,
te n‑ka natu ini‑i xa n‑ka kida‑i kuechi.
22 Nu n‑ka teku ñayiu ka kukanu ini Jesucristu xtuu Jerusalén xaʼa,
n‑ka tundaʼa‑i Bernabé ñuu Antioquía.
23 Nu n‑xee Bernabé ijan,
n‑xini‑s xa vaʼa ka kutnuni ini ñayiu ijan tnuʼu Ianyuux chi n‑kidatniu‑ia anu‑i,
te n‑kuvete‑s.
N‑jaʼan‑s nuu‑i xa idii vuelta na kajan‑i anu‑i xa kukanu ini‑i Jesucristu.
24 Bernabé kuu ɨɨn se vaʼa.
Ñuʼu ñaʼa Espíritu Ianyuux te vaʼa kukanu ini‑s Jesucristu.
Xijan kuu xa kueʼe ñayiu n‑ka kukanu ini‑ia.
25 Nu n‑yaʼa xaʼa,
n‑kee Bernabé Antioquía xa n‑kixee‑s ñuu nani Tarso xa n‑nanduku‑s Saulo.
26 Nu n‑naniʼi ñaʼa‑s,
ndeka ñaʼa‑s juaʼan Antioquía.
Ijan n‑ka xo tuu‑s xiʼin ñayiu ka kukanu ini Jesucristu ɨɨn kuia tɨtɨɨ,
te kueʼe ñayiu n‑ka dakuaʼa‑s.
Antioquía kuu nuu kiʼna nuu n‑ka xe konani ñayiu ka kukanu ini Jesucristu cristianu.
27 Ijan dada n‑ka xee se ka jaʼan tnuʼu Ianyuux nuu ñayiu Antioquía xa n‑ka kee‑s Jerusalén.
28 Ɨɨn‑s nani Agabo.
Nu n‑ka xee‑s ijan,
n‑ka taka ñayiu nuu‑s,
te n‑jaʼan Agabo nuu‑i.
N‑kida Espíritu Ianyuux xa n‑jaʼan‑s xa koo tnama nituʼu nación ijan,
te daa n‑yaʼa tiempo n‑xo kuu Claudio emperador.
29 Daa n‑ka kida ɨnuu ñayiu ka kukanu ini Jesucristu xndaxio Antioquía jan xa chindee‑i ñayiu kukanu ini Jesucristu xndaxio Judea según janda n‑ka kundee ini mee‑i xa chindee‑i.
30 Daa n‑ka kida‑i te n‑ka tundaʼa‑i Bernabé xiʼin Saulo xa kaneʼe‑s xa n‑ka doko‑i jɨʼɨn Judea nuu se ka taxnuni nuu ñayiu ka kukanu ini Jesucristu.