N‑kana Cornelio Spedru
10
Cesarea io ɨɨn centurión nani Cornelio.
Italiano nani ɨɨn cientu soldado ndeka‑s.
2 Jandixa‑s Ianyuux,
te ntdaa‑s xiʼin familia‑s xndaxio xañuʼu nuu‑ia.
Dɨuni xko xiaʼan nga‑s xa ka ndoñuʼu ñayiu ka kundaʼu,
te xko xijan taʼu‑s nuu Ianyuux.
3 Nɨni xijan taʼu‑s nuu‑ia ɨɨn vuelta,
n‑kida Ianyuux xa n‑xini‑s ɨɨn ángel,
ia xinokuechi nuu‑ia,
xa juan kɨu‑ia nuu tuu‑s.
Naxa kaa uni xañini kuu hora ijan.
N‑jaʼan‑ia:
—Cornelio.
4 N‑ndakoto ndee‑s‑ia.
Vichi n‑yuʼu‑s te n‑xijan tnuʼu‑s‑ia:
—¿Nax juini‑n u?
Xiaʼan ángel:
—N‑chinuu Ianyuux xa xijan taʼu‑n nuu‑ia xiʼin xa xiaʼan nga‑n xa ka ndoñuʼu ñayiu ka kundaʼu.
5 Tundaʼa‑n se na jɨʼɨn ñuu Jope xa na nkueka‑s ɨɨn se nani Simón.
Dɨuni nani‑s Spedru.
6 Tuu‑s veʼe ɨnka ntuku se nani Simón.
Kidavita se ijan ñɨɨ kɨtɨ.
Yatni yuʼu mar io‑s —kuu‑ia,
xiaʼan‑ia.
7 Nu juan nuʼu ángel n‑ndatnuʼu xiʼin Cornelio,
n‑kana‑s uu se ka xinokuechi nuu‑s xa ka kidatniu‑s veʼe‑s xiʼin ɨɨn soldado.
Vaʼa jandixa soldado jan Ianyuux.
8 N‑najani Cornelio ntdaa xa n‑yaʼa.
Ijan dada n‑tundaʼa‑s ndruni se ijan.
Juaʼan koio‑s Jope.
N‑tutuku Spedru xa n‑xini‑s ɨɨn xa n‑xini‑s
9 Naxa kaa x‑uu,
kɨu kuu uu,
n‑ka kuyatni‑s ñuu Jope.
Hora ijan n‑xe xee Spedru dɨkɨ veʼe xa kajan taʼu‑s nuu Ianyuux.
10 N‑kojon‑s,
te n‑kuu anu‑s xa kaxdeʼñu‑s.
Nɨni kidatuʼa ɨɨn ñá kida tuʼa xa kaxi‑s,
n‑kida Ianyuux xa n‑xini‑s ɨɨn xa n‑xini‑s.
11 N‑xini‑s xa n‑najaan andɨu te vax juun ɨɨn xa kaa ná kaa daʼma.
Ndɨka te kaʼnu xijan,
te duku ndetnaʼa nkoon punda‑i.
12 Xiti daʼma jan ñuʼu tɨtnɨ kɨtɨ.
Ñuʼu kɨtɨ uu ndaʼa uu xeʼe,
kɨtɨ ndava xiʼin koo.
13 Te n‑teku‑s xa n‑jaʼan:
—Ndojuiin,
Pedru.
Kaʼni kɨtɨ de te kaxi‑tɨ.
14 N‑jaʼan Spedru:
—Ñaʼa,
Taa‑ro Ianyuux,
ta uun ka kaxi‑da ɨɨn xa ña vaʼa xa kaxi‑ro.
15 N‑teku ntuku‑s ɨnka vuelta xa n‑jaʼan:
—Ruʼu n‑kida xa n‑ndunini‑tɨ,
maxku jaʼan ndoʼo xa ñatu vaʼa xa kaxi‑n‑tɨ.
16 Duʼa n‑yaʼa uni vuelta.
Ijan dada juan ndaa ntdaa xijan andɨu.
17 Nu n‑ka xee se n‑tundaʼa ñaʼa Cornelio Jope,
n‑ka xijan tnuʼu‑s ndexu katuu veʼe tuu Spedru.
Nɨni xani ini Spedru nuu nakuenda xa n‑xini‑sɨ xijan,
n‑ka xee se n‑tundaʼa Cornelio nuu tuu‑s.
18 N‑ka xijan tnuʼu‑s nuu ijan tuu ɨɨn se nani Simón.
N‑ka jaʼan‑s xa dɨuni nani‑sɨ Spedru.
19 Nɨni xani ini ka Spedru nuu nax kuu xa n‑xini‑s,
n‑jaʼan Espíritu Ianyuux nuu‑s:
—Uni se ka nanduku ñaʼa,
Pedru.
20 Ndojuiin,
te ta nuu.
Juaʼan xiʼin‑s,
te maxku ñaʼa kani ini‑n chi mee‑r n‑tundaʼa‑s.
21 N‑nuu Spedru te n‑jaʼan‑s nuu ndruni se ijan:
—Ruʼu kuu se ka nanduku‑n.
¿Nax ka juini anu‑n xa vaxi koio‑n u?
—kuu‑s,
xiaʼan‑s.
22 Ka xiaʼan se ijan:
—Ɨɨn se kuu centurión n‑tundaʼa ñaʼa xa vaxi koio‑da.
Cornelio nani‑s.
Jandixa‑s Ianyuux,
te io‑s xañuʼu nuu‑ia.
Ntdaa ñayiu Israel ka jaʼan xa vaʼa‑s.
Ɨɨn ángel,
ia xinokuechi nuu Ianyuux,
n‑jaʼan nuu‑s.
N‑xiaʼan‑ia xa na kana ñaʼa‑s ndixi xa jɨʼɨn‑n veʼe‑s te kunini‑s ntdaa xa na jaʼan‑n nuu‑s.
23 N‑jaʼan Spedru nuu‑s xa kɨu koio‑s veʼe nuu tuu‑s,
te n‑ka ndoo‑s xakuaa ijan.
Ijan dada xndeka se Cesarea jan Spedru xiʼin dava se ka kukanu ini Jesucristu xndaxio ñuu Jope vaxi Cesarea.
N‑xe dakuaʼa Spedru Cornelio veʼe‑s
24 Kɨu kuu uu n‑ka kixee‑s xiʼin‑s Cesarea.
Nu n‑ka xee‑s veʼe Cornelio,
xa xndetu ñaʼa‑s xiʼin familia‑s xiʼin ñayiu kumani xiʼin‑s n‑nadataka‑s veʼe‑s.
25 Juaʼan Spedru xa kɨu‑s veʼe‑sɨ,
te n‑xe tuʼa ñaʼa‑s.
N‑xe juiin xiti‑s xa nakuetu‑s nuu‑s,
26 ko n‑ndojani ñaʼa Spedru.
Xiaʼan‑s nuu Cornelio:
—Ndojuiin‑n,
chi dɨuni ñayiu kuu‑da ná kuu‑n de.
27 Nɨni ndatnuʼu Spedru xiʼi‑s,
n‑kɨu‑s veʼe‑s te n‑xini‑s xa kueʼe ñayiu xyuku.
28 Xiaʼan Spedru nuu ñayiu jan:
—Xá xnaʼa‑n xa ka jaʼan ñayiu ka kuu daʼya dana Israel xa kuechi kuu nux kandeka tnaʼa‑i xiʼin ñayiu ña ka kuu daʼya dana Israel a xa kotoniʼni‑i‑yɨ.
Daa ka jaʼan‑i,
ko n‑jaʼan Ianyuux nuu‑da xa maxku ku jaʼan ka‑da xa ñatu xe ini‑ia dava ñayiu a ña tuu nax juun‑ia‑i.
29 Xijan kuu xa nu n‑ka kachitnuʼu ñaʼa se yaʼa xa kana ñaʼa‑n,
ñatu n‑kidachɨɨn‑da chi vaxi ni‑da.
Juini‑da xa kutnuni ini‑da nakuenda n‑kana ñaʼa‑n —kuu Spedru,
xiaʼan‑s.
30 Xiaʼan Cornelio nuu‑s:
—Vitna n‑kuu koon kɨu,
te naxee hora yaʼa xa n‑xijan taʼu‑da nuu Ianyuux veʼe‑da ya,
te io ndite‑da.
Danaa n‑xini‑da ɨɨn ángel niʼno daʼma diñu nujuiin nuu‑da.
31 N‑jaʼan‑ia nuu‑da:
“Cornelio,
xko nini Ianyuux xa xko xijan taʼu‑n te xini‑ia xa xiaʼan nga‑n xa ka ndoñuʼu ñayiu ka kundaʼu.
32 Tundaʼa‑n se tundaʼa‑n xa na jɨʼɨn‑s Jope xa na nkueka‑s Simón.
Dɨuni nani‑s Spedru.
Tuu‑s veʼe ɨnka se nani Simón.
Se kidavita ñɨɨ kɨtɨ kuu‑s.
Io‑s yatni yuʼu mar.”
33 Xijan kuu xa nuniʼno ni n‑tundaʼa‑da se n‑ka xe nunduku ñaʼa,
te n‑kida‑n xamani xa vaxi‑n.
Ntdaa‑da xyuku yaʼa vitna xa kunini koio‑da ntdaa xa n‑jaʼan‑ia xa jaʼan‑n nuu‑da.
34 N‑kixeʼe Spedru xa jaʼan‑s.
Xiaʼan‑s:
—Vitna kuu xa n‑xini ndaa n‑xini kuiti‑da xa ɨnuu ka kuu nandɨkaa ñayiu ñuñayiu nuu Ianyuux.
35 Ntdaa ñayiu xndaxio davaʼa nga ñuu,
nux io‑i xañuʼu nuu‑ia,
te kida‑i xavaʼa,
tna ini ñaʼa‑ia.
36 N‑kachitnuʼu ñaʼa Ianyuux daña xa ka kuu‑da ñayiu Israel nax n‑kida Jesucristu xa ndumani Ianyuux xiʼin ñayiu.
Taxnuni Jesucristu nuu‑ro ntdaa‑ro.
37 Xá ka xini ndixi nax n‑yaʼa Israel na n‑yaʼa xa n‑jaʼan Sua Bautista nuu ñayiu xa io xa natu ini koio‑i xa n‑ka kida‑i kuechi,
te n‑dajuendute‑s‑yɨ.
38 Xá ka xini‑n xa n‑kida Ianyuux Jesús Nazaret xiʼin xa n‑kida Jesús.
N‑dakeé Ianyuux Espíritu‑ia Jesús,
xa n‑kida Jesús xa n‑kida‑ia.
Xavaʼa n‑kida‑ia.
N‑ndadavaʼa‑ia ntdaa ñayiu n‑xo kida uʼu ñaʼa Kuiʼna.
N‑kida‑ia xijan chi n‑kunduu‑ia xiʼin Ianyuux.
Distritu Galilea kuu nuu n‑kixeʼe xaʼa.
39 N‑xo ndeʼa‑da xiʼin dava ka se n‑dakuaʼa Jesús ntdaa xa n‑kida‑ia Jerusalén xiʼin dava ñuu xndatuu distrito Judea.
N‑ka xatakaa dika‑s‑ia nuu ɨɨn curuxi xa n‑ka xaʼni‑s‑ia.
40 N‑nadandoto Ianyuux‑ia kɨu kuu uni,
te n‑kida Ianyuux xa n‑ka xo ndeʼa‑da‑ia.
41 Ñadu ntdaa ñayiu n‑xini‑ia na n‑nandoto‑ia,
chi ntdaa ni daña,
se n‑kaxí dɨɨn ñaʼa Ianyuux,
n‑ka xini‑ia.
N‑ka xaxi‑da te n‑ka xiʼi‑da xiʼin‑ia na n‑nandoto‑ia.
42 Te n‑taʼu tniu ñaʼa‑ia xa jaʼan koio‑da nuu ñayiu xa Ianyuux n‑tetutniu‑ia xa kuu‑ia juexi nuu ñayiu xndito xiʼin nuu ñayiu n‑ka xiʼí.
43 Ntdaa se n‑ka jaʼan tnuʼu Ianyuux nuu ñayiu xá n‑kakuneʼe Jesús.
N‑ka jaʼan‑s xa ñayiu kukanu ini‑ia,
taxkanu ini Ianyuux kuechi n‑ka kida‑i —kuu Spedru,
xiaʼan‑s.
44 Nɨni jaʼan Spedru,
n‑keé Espíritu Ianyuux ntdantuʼu ñayiu xnini tnuʼu jaʼan‑s.
45 N‑ka yuʼu se Israel ka kukanu ini Jesucristu ka kunduu xiʼin Spedru xa dɨuni n‑keé Espíritu Ianyuux se ñatu kuu daʼya dana Israel.
46 N‑ka xo nini‑s xa ka jaʼan ñayiu ijan ɨnka yuʼu,
te ka najuen tnuʼu‑i Ianyuux.
47 Xiaʼan Spedru nuu se kunduu xiʼin‑s:
—Mayo‑n dadaʼan xa juendute koio ñayiu yaʼa chi n‑keé ñaʼa Espíritu Ianyuux ná ñuʼu ñaʼa‑ia mee‑ro.
48 Te n‑taʼu tniu Spedru xa na juendute koio ñayiu jan xaxeʼe xa n‑xiʼí Jesucristu na kuaʼa nanitaʼu‑i.
Ijan dada n‑ka jaʼan ñayiu jan nuu Spedru xa na ndoo‑s xiʼin‑i uni koon kɨu.