N‑kukanu ini Saulo Jesucristu
9
Ñatu n‑nujani Saulo xa kida uʼu‑s ñayiu ka kukanu ini Jesús,
Ia kuu Xtoʼo‑ro.
N‑xo jaʼan‑s nuu‑i xa kaʼni‑s‑yɨ nux dani na kukanu ini‑i‑ia.
N‑xeʼen‑s nuu dutu taxnuni ka
2 xa n‑xijan‑s tutu xa na kuaʼa jɨn nukueka‑s ñayiu ka kukanu ini Jesucristu ka xeʼen veñuʼu‑i katuu Damasco te kandeka ñaʼa‑s ndixi Jerusalén xa chindiʼu ñaʼa‑s vekaa,
nani seyɨɨ,
dani ñadɨʼɨ.
3 Neʼe‑s tutu jan juaʼan Damasco,
te nu n‑kuyatni‑s Damasco,
danaa ndii ɨɨn xa ndii andɨu,
te ndeʼe n‑ndii nɨkanduu nuu nujuiin‑s.
4 N‑ndua Saulo te n‑teku‑s xa n‑jaʼan.
Duʼa n‑teku‑s:
—Saulo,
Saulo,
¿nakuenda kida uʼu‑n ñayiu ndeka‑r u?
Kuenda kɨu mee‑r kida uʼu ñaʼa‑n.
5 Xiaʼan Saulo:
—¿Jundu kuu ndixi u?
Te n‑jaʼan xa n‑jaʼan jan:
—Ruʼu kuu Jesús.
Kuenda kɨu mee‑r kida uʼu ñaʼa‑n xa kida uʼu‑n ñayiu ndeka‑r.
6 Ndokoo.
Juaʼan Damasco.
Ijan teku‑n nax io xa kada‑n.
7 Yo n‑ka yuʼu se xndeka tnaʼa xiʼin Saulo xa n‑ka teku‑s xa daa n‑jaʼan‑ia,
ko ñayo‑ia n‑ka xini‑s.
Xaxeʼe xa yo n‑ka yuʼu‑s,
ña tuu nax n‑ka jaʼan‑s.
8 Ijan dada n‑ndokoo Saulo,
ko nu n‑najaan‑s nuu‑s,
ña n‑kuu ka xa kundeʼa‑s chi n‑kuaa‑s.
Xijan kuu xa n‑ka tnɨɨ se ndeka tnaʼa xiʼin‑s ndaʼa‑s te xtañuʼu ñaʼa‑s juaʼan Damasco.
9 Uni kɨu ña n‑kuu xa kundeʼa‑s,
ni ña tuu nax n‑xaxi‑s,
ni ña tuu nax n‑xiʼi‑s.
10 Damasco jan io ɨɨn se nani Ananías.
Kukanu ini‑s Jesucristu.
N‑kida Jesús,
Ia kuu Xtoʼo‑ro,
xa n‑tutuku‑s xa n‑xini‑s‑ia te n‑jaʼan‑ia nuu‑s:
—Ananías.
N‑jaʼan‑s:
—Jai.
Na‑da yaʼa.
11 Xiaʼan‑ia nuu‑s:
—Juaʼan ichi nani Ichi Ndaa nuu io veʼe Judas.
Ijan nanduku‑n ɨɨn se Tarso nani Saulo chi xijan taʼu‑s nuu‑r.
12 N‑kida‑r xa n‑xini‑s xa n‑kɨu‑n veʼe‑s te n‑xajan ndodo‑n ndaʼa‑n dɨkɨ‑s xa na nukondeʼa‑s —kuu‑ia,
xiaʼan‑ia.
13 Nu n‑teku Ananías xaʼa,
xiaʼan‑s:
—Kueʼe ñayiu ka jaʼan nuu‑da xa n‑kida uʼu se yaʼa ñayiu n‑kida‑n xa nduu‑i ñayiu ii xndaxio Jerusalén.
14 Te neʼe‑s tutu n‑ka xiaʼan dutu ka taxnuni vaxi vitna xa chindiʼu‑s ñayiu ka ndadakaʼnu ñaʼa te ka xijan taʼu‑i nuu‑n.
15 Te xiaʼan‑ia nuu Ananías:
—Juaʼan chi mee‑r n‑kaxí‑sɨ xa jaʼan‑s nuu ñayiu ñatu ka kuu ñayiu Israel xiʼin nuu se ka taxnuni nuu‑i jundu kuu‑r.
Dɨuni n‑kaxí‑r‑sɨ xa jaʼan‑s nuu ñayiu Israel jundu kuu‑r.
16 Jaʼan‑r nuu‑s xa io xa ndaʼu yaʼa‑s xaxeʼe xa jaʼan‑s jundu kuu‑r.
17 Ijan dada juaʼan Ananías veʼe nuu tuu Saulo,
te n‑kɨu‑s.
N‑xajan ndodo‑s ndaʼa‑s dɨkɨ Saulo,
te n‑jaʼan‑s:
—Vaʼa nga taʼu kuu‑n,
Ñani.
Jesús,
Ia n‑xini‑n ichi vaxi‑n,
n‑tundaʼa ñaʼa.
Kuu‑ia Xtoʼo‑ro.
Vaxi‑da na nukondeʼa‑n te juʼun ñaʼa Espíritu Ianyuux.
18 Hora ijan ni junkoio xa ná kaa chichi n‑xo ndeyuku nuu Saulo te n‑nukondeʼa‑s.
N‑ndokoo‑s te n‑xendute‑s.
19 Ijan dada n‑xaxi‑s te n‑naniʼi ndee‑s.
N‑dakuaʼa Saulo ñayiu ñuu Damasco
Tɨtnɨɨ kɨu n‑ndoo‑s xiʼin ñayiu ka kukanu ini Jesucristu Damasco.
20 Ijan dada juaʼan‑s veñuʼu ñayiu ka kuu daʼya dana Israel xndaxio ñuu ijan.
N‑jaʼan‑s nuu ñayiu jan xa Jesús kuu Daʼya Yɨɨ Ianyuux.
21 N‑ka yuʼu anu ntdaa ñayiu n‑ka xo nini tnuʼu‑s.
N‑ka xiaʼan tnaʼa‑i:
—¿Ñadu se yaʼa kuu se kida uʼu ñayiu Jerusalén ka kakuneʼe Jesús a?
¿Ñadu vax ndi kueka ñaʼa‑s xa kandeka ñaʼa‑s nuʼu nuu dutu ka taxnuni a?
22 Kuaʼa ka Saulo xa dakuaʼa‑s ñayiu juaʼan.
N‑jaʼan‑s nuu ñayiu Israel xtuu Damasco xa Jesús kuu Cristu,
te n‑kunuu tnuʼu‑s.
Xaxeʼe xa daa n‑jaʼan‑s,
kueʼe xa n‑ka xani ini‑i.
23 Nu n‑kunaʼa tuu Saulo ijan,
te n‑ka kida ɨnuu dava ñayiu ka kuu daʼya dana Israel xa kaʼni ñaʼa‑i.
24 Nduu,
xakuaa n‑ka xo ndetu‑i‑sɨ yeʼe nama ndiʼu yuʼu ñuu xa kaʼni ñaʼa koio‑i,
ko n‑teku‑s xa n‑ka kida ɨnuu‑i xa kaʼni ñaʼa‑i.
25 Xaxeʼe xijan n‑ka dakeé se ka kukanu ini Jesucristu Saulo xiti yɨka kaʼnu ɨɨn xakuaa,
te n‑ka dayaʼa ñaʼa‑s ɨɨn yau nama ndiʼu yuʼu ñuu jan,
te n‑ka juneʼe‑s‑sɨ yata nama jan.
N‑naxee Saulo Jerusalén
26 N‑naxee Saulo Jerusalén,
te n‑juini‑s xa kɨu tnaʼa‑s nuu ñayiu ka jandixa Jesucristu,
ko ñayo ñayiu jan n‑juini xaxeʼe xa n‑ka yuʼu‑i nuu‑s chi ña n‑ka jandixa‑i xa kukanu ini‑s Jesucristu.
27 Ijan dada ndeka se nani Bernabé Saulo juaʼan nuu se n‑tundaʼa ñaʼa Jesús.
N‑najani‑s nuu se ijan xa n‑xini Saulo Jesucristu ichi juaʼan‑s te n‑jaʼan‑ia nuu‑s.
Dɨuni n‑jaʼan Bernabé xa ña n‑yuʼu Saulo xa n‑kakuneʼe‑s Jesús nuu ñayiu Damasco.
28 N‑kunduu Saulo xiʼin se n‑tundaʼa ñaʼa Jesús nuu n‑ka xikonuu‑s,
te n‑kakuneʼe‑s Jesús nuu ñayiu;
ñatu n‑yuʼu‑s xa kakuneʼe‑s‑ia.
29 N‑jantnaʼa tnuʼu Saulo xiʼin se ka kuu daʼya dana Israel xneʼe tnɨɨ mudu ñayiu Grecia xa n‑ka kuneʼe‑s Jesús,
te tuku n‑kakuneʼe Saulo‑ia,
te n‑ka nduku ini‑s xa kaʼni koio‑s‑sɨ.
30 Nu n‑ka teku se ka kukanu ini Jesucristu xijan,
n‑ka ki ndi ndeka‑s‑sɨ nde ñuu nani Cesarea.
Ijan n‑ka najanu ichi‑s‑sɨ xa juan ndixi‑s ñuteyu‑s Tarso.
N‑ndvaʼa Eneas
31 Ña n‑ka kida uʼu ka ñayiu ña ka kukanu ini Jesucristu ñayiu ka kukanu ini‑ia tiempo ijan.
Ndaa vatuu n‑ka xo tuu ñayiu ka kukanu ini Jesucristu ñuu xndatuu distrito Judea xiʼin ñuu xndatuu distrito Galilea,
ñuu xndatuu distrito Samaria du.
Vaʼa ka n‑ka kutnuni ini‑i tnuʼu Ianyuux.
N‑xe koo ka‑i xañuʼu nuu‑ia,
te n‑kida Espíritu Ianyuux xa ñatuka n‑ka kukoʼyo ini‑i.
32 Xikonuu Spedru ñuu xiʼin ñuu,
te n‑xee‑s ñuu Lida xa kotoniʼni‑s ñayiu n‑kida Ianyuux xa n‑ka nduu‑i ñayiu ii.
33 Ijan n‑nitnaʼa‑s xiʼin ɨɨn se nani Eneas.
Xá n‑kuu una kuia kaa‑s xa kuʼu‑s xa n‑xiʼí xeʼe‑s.
34 Xiaʼan Spedru nuu‑s:
—Dito Ta Eneas,
ndadavaʼa ñaʼa Jesucristu.
Ndokoo‑n,
te ndoneʼe‑n yuu‑n xiʼin doo‑n.
Danaa n‑ndokoo‑s.
35 Ntdaa ñayiu io Lida xiʼin ñuu Sarón n‑ka xini xa ndvaʼa Eneas te ntdaa‑i n‑ka kukanu ini Jesucristu.
N‑nandoto Dorcas
36 Tiempu ijan n‑xio ɨɨn ñadɨʼɨ kukanu ini Jesucristu nani Tabita ñuu Jope.
(Griegu nani‑ña Dorcas.)
Yo n‑xo kidatniu‑ña xa n‑xo chindee‑ña ñayiu ka kundaʼu,
te yo n‑chindee‑ña‑i.
37 N‑kane kueʼe‑ña te n‑xiʼí‑ña.
N‑ka dakuchi ñɨɨ ñaʼa ñá n‑ka xo xini tnaʼa xiʼin‑ña,
te n‑ka xajan ñaʼa‑ña ɨɨn cuartu pisu kuu uu.
38 Yatni Jope katuu ñuu nani Lida nuu tuu Spedru.
N‑ka teku ñayiu ka kukanu ini Jesucristu io Jope xa tuu Spedru Lida.
N‑ka tundaʼa‑i uu se n‑ka tundaʼa‑i nuu‑s xa na kajan taʼu‑s nuu‑s xa na jɨʼɨn‑s Jope.
Nu n‑ka xee nduu se yaʼa Lida,
ka xiaʼan‑s nuu Spedru:
—Vax ki kueka ñaʼa‑da xa jɨʼɨn‑ro ñuu‑da,
te maxku kukuee‑n.
39 Hora ijan ni juaʼan Spedru xiʼin‑s Jope.
Nu n‑xee Spedru xiʼin‑s veʼe nuu kaa Dorcas,
te xndeka ñaʼa‑s n‑xe xee cuartu pisu kuu uu.
Xtuu ñadɨʼɨ n‑ka xiʼí yɨɨ cuartu jan,
te ka ndaʼi‑ña xa ka ndaʼi‑ña.
N‑ka dandeʼa‑ña Spedru dijun xiʼin dava ka daʼma n‑kiku Tabita xa juñaʼa nga‑ña ñayiu.
40 N‑taʼu tniu‑s xa na kee‑ña ntdaa‑ña cuartu ijan.
N‑xe juiin xiti‑s xa n‑xijan taʼu‑s nuu Ianyuux.
N‑nukondeʼa‑s‑ña,
te n‑jaʼan‑s:
—Didi,
Di Tabita,
ndokoo‑n.
N‑najaan‑ña nduchi nuu‑ña,
te nu n‑nukondeʼa‑ña Spedru,
n‑ndandita‑ña.
41 N‑tnɨɨ Spedru ndaʼa‑ña,
te n‑ndojani‑s‑ña.
N‑kana‑s ñayiu ka kukanu ini Jesucristu xiʼin ñadɨʼɨ n‑ka xiʼí yɨɨ xtuu ijan xa na kundeʼa koio‑s‑ña.
42 Nu n‑ka teku ntdaa ñayiu Jope xaʼa,
kueʼe ka‑i n‑ka kukanu ini Jesucristu,
Ia kuu Xtoʼo‑ro.
43 Jeen kɨu n‑ndoo Spedru veʼe ɨɨn se kida vita ñɨɨ ñuu ijan.
Simón nani‑s.