8
1-2 N‑kuu ɨnuu Saulo xiʼin se n‑ka xaʼni Steba.
Dava se vaʼa,
n‑ka kuxi‑s‑sɨ te yo n‑ka ndaʼi‑s xaxeʼe‑s.
Kɨu ni ijan n‑ka nukuita se ña ka kukanu ini Jesucristu ka kida uʼu‑s ñayiu kukanu ini‑ia xndaxio Jerusalén.
Xaxeʼe xijan n‑ka xite niʼno‑i.
Juaʼan koio‑i distrito Judea xiʼin Samaria,
diko ni se n‑tundaʼa ñaʼa Jesús n‑ka ndoo Jerusalén.
3 N‑nukuita se kuu Saulo kida uʼu‑s ñayiu ka kukanu ini Jesús tuku.
N‑xo xeʼen‑s veʼe xiʼin veʼe xa kineʼe‑s ñayiu,
nani seyɨɨ,
dani ñadɨʼɨ.
Diko n‑xo ñuʼu ñaʼa‑s te n‑xo xe ndeka ñaʼa‑s vekaa.
4 N‑ka jaʼan ñayiu n‑ka xite niʼno jan nuu ñayiu ñuu n‑ka xee‑i nax kada‑i xa nanitaʼu‑i.
N‑dakuaʼa Slipe ñayiu Samaria
5 Se nani Slipe,
n‑kee‑s Jerusalén.
N‑kixee‑s ñuu Samaria,
te n‑jaʼan‑s nuu ñayiu ijan xa Jesús kuu Cristu.
6 N‑ka xo taka ñayiu nuu‑s,
te ntdaa‑i n‑ka xo nini xa n‑xo jaʼan‑s xaxeʼe xa n‑ka xini‑i ntaka milagru n‑xo kida‑s xiʼin xaxeʼe xa n‑ka tna ini‑i tnuʼu‑s.
7 Kueʼe ñayiu n‑ñuʼu ñaʼa xaloko n‑ka ndvaʼa.
Xee n‑ka xo kana xaloko hora n‑ka xo ndee‑i anu ñayiu.
Dɨuni kueʼe ñayiu n‑xiʼí xeʼe xiʼin ñayiu yakua n‑ka ndvaʼa.
8 Xaxeʼe xaʼa yo n‑ka kuvete ñayiu ñuu ijan.
9 Ijan tuu ɨɨn se n‑xo kida magia.
Simón nani‑s.
Kuaʼa‑s kada‑s milagru.
N‑xo jaʼan‑s xa dɨu‑s kuu ɨɨn se tuʼa vaʼa,
te ndandɨʼɨ‑s.
10 Kueʼe ñayiu n‑ka xo nini tnuʼu n‑xo jaʼan‑s,
nde sekuechi n‑ka xo nini xa n‑xo jaʼan‑s,
te n‑ka xo jaʼan‑i:
—Ianyuux chindee se yaʼa xa duʼa kida‑s.
11 Xaxeʼe xa vaʼa kuaʼa Simón xa kada‑s magia,
xijan kuu xa n‑ka xo xe ndeʼa ñayiu jan xa n‑xo kida‑s,
te n‑ka xo yuʼu‑i.
Naʼa n‑kida‑s xaʼa,
12 ko nu n‑ka jandixa ñayiu jan xa n‑jaʼan Slipe,
n‑ka xendute‑i;
nani seyɨɨ,
dani ñadɨʼɨ.
N‑kakuneʼe Slipe xa taxnuni Ianyuux nuu‑i.
Dɨuni n‑jaʼan‑s nax kada koio‑i xa nanitaʼu‑i.
13 Kueʼe ñayiu n‑ka kukanu ini Jesucristu,
nde Simón n‑kukanu ini‑ia,
te n‑xendute‑s.
Ijan dada n‑kunduu‑s xiʼin Slipe;
ñatu n‑dandoo‑s‑sɨ.
N‑yuʼu anu‑s xa kueʼe milagru n‑xo ndeʼa‑s.
Kueʼe xa n‑xani ini‑s.
14 Nu n‑ka teku se n‑tundaʼa ñaʼa Jesús xtuu Jerusalén xa n‑ka jandixa ñayiu distrito Samaria xa n‑jaʼan Ianyuux,
n‑ka tundaʼa‑s Spedru xiʼin Sua ijan.
15 Nu n‑ka xee‑s,
n‑ka xijan taʼu‑s xa keé Espíritu Ianyuux ñayiu Samaria jan
16 chi ta keé ñaʼa ka Espíritu Ianyuux daa.
Diko ni n‑ka xendute‑i xaxeʼe xa n‑ka kukanu ini‑i Jesús.
17 Xijan kuu xa n‑xajan ndodo Spedru xiʼin Sua ndaʼa‑s dɨkɨ‑i te n‑keé ñaʼa Espíritu‑ia.
18 Nu n‑xini Simón xa keé Espíritu Ianyuux anu ñayiu hora n‑ka xajan ndodo Spedru xiʼin Sua ndaʼa‑s dɨkɨ‑i,
xiaʼan‑s nuu‑s:
19 —Kada‑n xa na keé Espíritu Ianyuux ñayiu hora na kajan ndodo‑da ndaʼa‑da dɨkɨ‑i,
te taxi‑da tvini —kuu‑s,
xiaʼan‑s.
20 Xiaʼan Spedru:
—Na naa‑n xiʼin tvini‑n.
¿Nakuenda xani ini‑n xa jueen‑n xa kutaʼu‑ro nuu Ianyuux?
21 Ma taxi Ianyuux xijan chi xini‑ia xa ñatu kuu‑n ñayiu vaʼa.
22 Natu ini xa n‑kida‑n kuechi,
te kajan taʼu nuu Ianyuux nuu ma taxkanu ini‑ia xa daa n‑xani ini‑n
23 chi yo kajan ini‑n,
te mee ni xaloko xaduʼa xani ini‑n.
24 Te xiaʼan Simón nuu Spedru:
—Kajan taʼu koio‑n nuu Ianyuux xa maxku yaʼa‑da na n‑jaʼan‑n xa yaʼa‑da.
25 N‑jaʼan Spedru xiʼin Sua nuu ñayiu ijan xa n‑kida Jesús xiʼin xa n‑jaʼan‑ia.
Ijan dada n‑ka xiko‑s;
ka nuʼu‑s Jerusalén.
N‑ka jaʼan‑s nuu ñayiu nax kada‑i xa nanitaʼu‑i ñuu xiʼin ñuu ichi ka nuʼu‑s.
N‑dakuaʼa Slipe ɨɨn se Etiopía
26 Nu n‑yaʼa xaʼa,
n‑jaʼan ɨɨn ángel,
ia xinokuechi nuu Ianyuux,
nuu Slipe.
Xiaʼan‑ia:
—Juaʼan do sur te tnɨɨ‑n ichi n‑kee nde Jerusalén xa n‑xee nde Gaza.
Ichi yaʼa yaʼa nuu ñayo ñayiu io te ñatu nga juun dau.
27 N‑tnɨɨ ichi‑s.
Juaʼan‑s,
te n‑xe juntnaʼa‑s xiʼin ɨɨn se país Etiopía nuu taxnuni ɨɨn ñadɨʼɨ nani Candace.
Kuu‑s se yɨndaʼa tvini país ijan.
N‑xeʼen‑s Jerusalén xa n‑nakuetu‑s nuu Ianyuux.
28 N‑xiko‑s,
juan nuʼu‑s xiʼin carreta‑s.
Nɨni ñutuu‑s xiti carreta jan,
kaʼu‑s libru yodotnuni tnuʼu Isaías,
se n‑jaʼan tnuʼu Ianyuux nuu ñayiu.
29 Xiaʼan Espíritu Ianyuux nuu Slipe:
—Juan tuʼa carreta jan.
30 N‑kendava Slipe;
n‑xe tuʼa‑s carreta jan,
te n‑teku‑s xa kaʼu se Etiopía jan libru yodotnuni tnuʼu Isaías jan.
Nu n‑teku‑sɨ xijan,
n‑xijan tnuʼu‑s‑sɨ:
—¿Kutnuni ini‑n tnuʼu kaʼu‑n de a?
31 N‑jaʼan se Etiopía nuu‑s:
—Ña kutnuni ini‑da chi ñayo kachitnuʼu ñaʼa.
Xiaʼan‑s nuu Slipe xa na nkaa‑s carreta jan te na nkoo‑s diñi‑s.
32 Xaʼa kuu xa yodotnuni nuu kaʼu se Etiopía jan:
Ná kuu tkachi xiʼin tkolelu kuu‑s.
Chi ñatu ndaʼi tkachi hora xndeka‑s‑tɨ juaʼan xa kaʼni‑s‑tɨ.
Ni tkolelu,
ñatu ndaʼi‑t hora ka dete‑s‑tɨ.
33 Ñatu n‑dakaku ñaʼa juxtixia nuu se ñuu‑s xa n‑ka tekuechi neñu ñaʼa‑s,
te n‑ka xaʼni‑s‑sɨ.
Ndaʼu n‑yaʼa‑s xaxeʼe xa ñatu n‑ka xe ini ñaʼa‑s.
Ñayo daʼya dana‑s n‑xio,
chi n‑ka xaʼni‑s‑sɨ.
34 N‑xiaʼan se netniu país Etiopía Slipe:
—Xijan taʼu‑da nuu‑n xa kachitnuʼu ñaʼa‑n,
¿Jundu kakuneʼe se n‑jaʼan tnuʼu Ianyuux nuu ñayiu xa duʼa jaʼan‑s u?
¿Kakuneʼe‑s mee‑s a kakuneʼe‑s ɨnka‑s a?
35 Nɨni xika carreta jan n‑nukuita Slipe dakuaʼa‑s se Etiopía jan.
Kiʼna nuu n‑xian tnuʼu‑s‑sɨ xa tnuʼu yodotnuni kaʼu‑s kakuneʼe Jesús.
Ijan dada n‑kakuneʼe ka‑s‑ia.
N‑xian tnuʼu‑s‑sɨ nax n‑kida Jesús xa nanitaʼu ñayiu.
36-37 Te n‑ka xee‑s ɨɨn nuu kaa ndute.
Xiaʼan se netniu Etiopía nuu Slipe:
—¿Vatuka juendute‑da u?,
chi na ndute kaa yaʼa.
38 N‑taʼu tniu‑s xa na nujuiin kɨtɨ ñuʼu carreta jan te nduu‑s n‑ka nuu te n‑dajuendute Slipe‑sɨ.
39 Nu n‑ka nane‑s nuu ndute,
dana ini n‑ndoneʼe Espíritu Ianyuux Slipe.
Te ña n‑xini ñaʼa ka se netniu jan.
Vichi n‑kudɨ ini‑s ichi juan nuʼu‑s.
40 N‑xeʼen Slipe ñuu nani Azoto.
Te juan ndixi‑s Cesarea.
N‑jaʼan‑s nuu ñayiu nax kada‑i xa nanitaʼu‑i ñuu xiʼin ñuu ichi juan ndixi‑s.