Currali tkachi Ianyuux
10
ʼXandaa kuu xa jaʼan‑r.
Ɨɨn seyɨɨ,
nux kuyatni‑s currali tkachi,
ko ña kɨu ndaa‑s yeʼe currali,
ko xido‑s dɨkɨ currali,
te xini‑ro xa ñaduʼu kuu‑s,
xini‑ro xa juini‑s xa duʼu‑s tkachi jan.
2 Se kɨu ndaa yeʼe currali,
mee‑s kuu se ñunuu tkachi.
Jesús el buen pastor (Juan 10.1-21)
3 Mee‑s,
ña tnɨɨ ñaʼa ti‑ina,
te tnuʼu mee‑s ka najini tkachi‑s.
Kana‑s dɨu ɨɨn ɨɨn tkachi‑s,
te ka natuʼa ñaʼa‑tɨ,
te kineʼe‑s‑tɨ currali.
4 Kana‑s ntdaa tkachi‑s,
te xe juindodo nuu‑s nuu‑tɨ.
Xndijun ñaʼa‑tɨ,
chi naʼa‑tɨ tnuʼu xtoʼo‑tɨ.
5 Ko ma nkuitandijun‑tɨ setoʼo.
Kunu koio‑tɨ,
chi ñatu ka xini‑tɨ tnuʼu setoʼo.
6 Tnuʼu yaʼa n‑jaʼan Jesús xa dakuaʼa‑ia se fariseu ijan,
ko ña n‑ka kutnuni ini‑s nax n‑jaʼan‑ia.
N‑jaʼan Jesús: “Mee‑r kuu Se ñunuu vaʼa tkachi.”
7 Te n‑jaʼan Jesús ɨnka vuelta:
—Xandaa kuu xa jaʼan‑r.
Mee‑r kuu yeʼe currali tkachi.
8 Se n‑ka kixi antecas xa kixi mee‑r,
ntdaa‑s ka kuu ñaduʼu,
n‑ka juini‑s xa duʼu‑s tkachi.
Ko ñayo tkachi n‑ka teku tnuʼu‑s.
9 Yeʼe currali kuu mee‑r.
Nux jandixa ñaʼa ɨɨn ñayiu mee‑r,
te taxkanu ini Ianyuux kuechi‑i,
te kutuu vaʼa‑i xiʼin‑ia.
Ka kuu ñayiu jan ná kuu tkachi ndɨu yeʼe currali.
Kee‑tɨ xa kaxi‑tɨ,
te ndɨu‑tɨ xa kutuu vaʼa‑tɨ.
10 ʼKixi ñaduʼu,
xa duʼu‑s tkachi.
Kaʼni‑s‑tɨ te danaa‑s‑tɨ.
Ko vaxi mee‑r,
xa kutuu vaʼa koio‑tɨ.
Vaa‑r,
xa ñayiu ka jandixa ñaʼa mee‑r,
vaʼa xa vaʼa kutuu koio mee‑i vitna xiʼin kuia ma jɨn ndɨʼɨ.
11 Mee‑r kuu Se ñunuu vaʼa tkachi.
Juejoon‑r xa kaʼni ñaʼa koio ñayiu mee‑r,
xa kutuu vaʼa koio tkachi‑r.
12 Duʼa ma kada koio se ka juini xa niʼi ni‑s tvini.
Ña kuu‑s ɨɨn se ñunuu vaʼa tkachi,
chi tkachi,
ña ka kuu‑tɨ tkachi mee‑s.
Se ijan,
na ndeʼa‑s xa vaxi ñaña,
te dandoo‑s tkachi te kunu‑s.
Te tnɨɨ ñaña tkachi jan,
te xate niʼna ñaʼa‑tɨ.
13 Xino se ijan,
chi kidatniu‑s xaxeʼe xa niʼi‑s tvini,
te ña tuu nax viʼi‑s tkachi jan.
14-15 Mee‑r kuu Se ñunuu vaʼa tkachi.
Nani xini ñaʼa Taa‑r mee‑r,
te xini mee‑r mee‑ia,
dani xini‑r ñayiu ka jandixa ñaʼa mee‑r,
te mee‑i ka xini ñaʼa mee‑r.
Juñaʼa‑r mee‑r,
xa kaʼni ñaʼa koio seyɨɨ xaxeʼe tkachi‑r.
16 Ko io ɨnka ñayiu ta jandixa ñaʼa koio ka.
Ná kuu tkachi yɨʼɨ ɨnka currali,
ka kuu ñayiu jan.
Io xa kandeka‑r mee‑i kixi tuku.
Kunini koio ñayiu jan tnuʼu mee‑r,
te mee‑i xiʼin ñayiu ka jandixa ñaʼa mee‑r vitna,
nduu‑i,
ku kuu koio‑i tkachi yɨndiʼu kaʼnu idini currali,
te junuu vaʼa‑r‑yɨ ntdaa‑i.
17 ʼXijan kuu xa xemani ñaʼa Taa‑r,
chi juñaʼa‑r mee‑r xaxeʼe tkachi‑r.
Kuú‑r xa nandoto‑r ɨnka vuelta.
18 Ni ɨɨn ñayiu ña kida xa kuú‑r.
Kaʼni ñaʼa koio‑s,
ko duʼa koo xaxeʼe xa duʼa koo.
Xiʼin xa taxnuni mee‑r kuú‑r,
te xiʼin xa taxnuni mee‑r nandoto‑r.
Duʼa n‑taʼu tniu Taa‑r,
te duʼa koo.
—Tachi uʼu ñuʼu anu‑s,
n‑nduloko‑s.
¿Nakuenda ka chinuu‑n tnuʼu jaʼan‑s?
21 Ko dava ka‑s n‑ka jaʼan:
—Vaʼa jaʼan‑s,
ñatu ñuʼu tachi uʼu anu‑s.
Chi ña kuaʼa tachi uʼu kada‑i xa kundeʼa ñayiu n‑xo kukuaa nde na n‑kaku‑i.
Na n‑ka teku se Israel tnuʼu Jesús, n‑ka tnɨɨ‑s yuú xa kaʼni‑s‑ia
22 Te n‑xio ɨɨn viko ñayiu Israel.
Ñuu nani Jerusalén n‑ka xo najaʼan ñayiu nanda n‑ka kida ii taxaʼnu tnetnu‑ro veñuʼu ñayiu Israel.
Te yoo vixi kuu daa.
Jesús acusado de blasfemia (Juan 10.22-42)
23 N‑xikonuu Jesús xiti veñuʼu Jerusalén.
N‑xikonuu‑ia nuu nani Portal Salomón.
24 Ijan n‑ka dukunduu se Israel Jesús,
te n‑ka jaʼan‑s:
—Io xa jaʼan kaxi‑n.
Nux mee‑n kuu Cristu,
Ia n‑tundaʼa ñaʼa Ianyuux,
kachitnuñaʼa‑n.
25 N‑jaʼan Jesús:
—Xá n‑jaʼan‑r,
te ñayo‑n ka jandixa.
N‑tundaʼa ñaʼa Taa‑r,
te kida‑r tniu n‑taxi‑ia,
te tniu kida‑r jaʼan ndaa xaxeʼe‑r.
26 Ko ñayo‑n ka jandixa,
chi ña ka kuu‑n tkachi mee‑r.
Nani n‑jaʼan‑r nuu‑n,
duʼa kuu.
27 Tkachi mee‑r ka chinuu tnuʼu‑r.
Xini‑r mee‑i,
te xndijun ñaʼa‑i mee‑r.
28 Te kada‑r xa kutuu vaʼa koio‑i,
xiʼin Ianyuux kuia ma jɨn ndɨʼɨ.
Ni ɨɨn‑i,
nuncas ma kuú‑i xiʼin kuechi‑i.
Te ni ɨɨn ñayiu ma kuaʼa xa tnɨɨ‑i tkachi‑r yɨndaʼa‑r.
29 Taa‑r n‑taxi tkachi‑r,
te kunxaʼnu ka mee‑ia dada ntdaa xa io.
Mayo ñayiu kuaʼa,
te ni kuiʼna ma kuaʼa,
xa dita‑i tkachi mee‑r nevaʼa Taa‑r ndaʼa‑ia.
30 Te ɨɨn nuu kuu mee‑r xiʼin Taa‑r,
idini ka kuu‑r.
—N‑taxi Taa‑r kueʼe tniu vaʼa,
te n‑dandeʼa ñaʼa‑r tniu jan nuu mee‑n.
¿Xaxeʼe ndeda ɨɨn tniu n‑kida‑r,
ka juini‑n xa kaʼni ñaʼa‑n yuú?
33 N‑ka jaʼan‑s:
—Ñayo‑r ka janñaʼa xaxeʼe tniu vaʼa kida‑n.
Kaʼni ñaʼa koio‑r xaxeʼe xa kuiʼa jaʼan‑n Taa‑ro Ianyuux.
Seyɨɨ kuu‑n,
ko jaʼan‑n xa Ianyuux kuu‑n.
34 N‑jaʼan Jesús:
—¿Nax jaʼan tnuʼu n‑chidotnuni Moisés?
Yodotnuni xa n‑jaʼan Ianyuux:
“Mee‑n ka kuu ianyuux.”
35 N‑danani‑ia se ijan ianyuux,
chi n‑ka tnɨɨ‑s tnuʼu Ianyuux.
Tnuʼu Ianyuux n‑chidotnuni Moisés kuu,
te io xa chinuu‑ro tnuʼu jan.
36 Xijan kuu xa,
¿nax kuu xa ka jaʼan‑n xa kuiʼa jaʼan mee‑r nuu Ianyuux,
hora n‑jaʼan‑r xa kuu‑r Daʼya Yɨɨ Ianyuux?
Kuu‑r Ia n‑kaxí ñaʼa‑ia,
kuu‑r Ia n‑tundaʼa ñaʼa‑ia vaxi‑r ñuñayiu.
37 Nux ña kida‑r tniu Taa‑r,
te maxku jandixa ñaʼa koio‑n.
38 Ko nux kida‑r tniu Taa‑r,
te io xa jandixa koio‑n tniu‑r.
Juini ma jandixa ñaʼa koio‑n mee‑r,
ko io xa jandixa koio‑n tniu kida‑r.
Xijan jini koio‑n xa kunduu Taa‑r xiʼin mee‑r te kunduu mee‑r xiʼin Taa‑r.
Xijan kutnuni ini koio‑n xa Taa‑r xiʼin mee‑r,
idini xa kuu‑r nduu‑r.
39 Xijan kuu xa ɨnka vuelta n‑ka kixeʼe‑s xa tnɨɨ presu koio‑s‑ia,
ko n‑kaku‑ia ndaʼa‑s.
40 Te juaʼan Jesús ɨnka vuelta,
n‑yaʼa‑ia deʼva Jordán,
nde nuu kiʼna nuu n‑dajuendute Sua ñayiu.
Ijan n‑xo tuu Jesús.
41 Ijan n‑ka kixee kueʼe ñayiu,
te n‑ka jaʼan‑i:
—Ni ɨɨn milagru ña n‑kida Sua,
ko ndaa n‑jaʼan‑s xaxeʼe se yaʼa.
Ntdaa xa n‑jaʼan‑s kuu xandaa.
42 Te ijan n‑ka jandixa kueʼe ñayiu jan Jesús.