N‑ndadavaʼa Jesús ɨɨn se kuaa nde na n‑kaku‑s
9
Na juaʼan Jesús ichi,
n‑xini‑ia ɨɨn se kuaa.
Nde na n‑kaku‑s kuaa‑s.
2 N‑ka xijan tnuʼu se dakuaʼa Jesús nuu‑ia:
—Maestru,
¿jundu n‑kida kuechi?
¿Mee se yaʼa a tadɨʼɨ‑s a?
¿Nakuenda xa kuaa‑s?
Jesús cura a un ciego (Juan 9.1-41)
3 N‑jaʼan Jesús:
—Ñadu xaxeʼe xa n‑kida mee‑s kuechi,
ni taa‑s,
ni dɨʼɨ‑s.
Chi da kuaa‑s xa dandeʼa Ianyuux ñayiu xa kuaʼa‑ia xa kada‑ia xaxeʼe‑s.
Dandeʼa‑ia‑i tniu‑ia.
4 Io xa kada‑r tniu n‑taxi Ia n‑tundaʼa ñaʼa.
Nɨni dani tuu‑r xiʼin‑n,
kada‑r tniu n‑taxi‑ia.
Kuu ná kuu xa vax kunee vitna.
Te hora ijan,
mayo ka ñayiu kuaʼa xa kada‑i tniu n‑xiaʼan‑ia.
5 Nɨni tuu‑r ñuñayiu,
kuu‑r luz vaʼa ka koko ñuñayiu.
6 Te na n‑yaʼa xa n‑jaʼan‑ia tnuʼu yaʼa,
te n‑xatu dɨɨ‑ia nuu ñuʼu.
Xiʼin dɨɨ‑ia n‑kidavaʼa‑ia itaʼu ndeʼyu,
te n‑xajan‑ia ndeʼyu ñɨɨ nduchi nuu se kuaa jan.
7 N‑jaʼan‑ia:
—Juaʼan,
juan nandaʼa nuu‑n nuu tanque ndute nani Siloé.
(Te Siloé juini kachi:
se n‑tundaʼa Ianyuux.)
Se kuaa jan,
n‑xeʼen‑s,
te n‑nandaʼa‑s nduchi nuu‑s.
Nu n‑xiko‑s,
te n‑kuaʼa‑s xa ndeʼa‑s.
8 Te ñayiu xtuu yatni xiʼin‑s,
xiʼin ñayiu n‑ka xini mee‑s na n‑xo kuu‑s se kuaa,
n‑ka jaʼan‑i:
—¿Ña dɨu se xko nukoo ichi,
se xko xijan ndaʼu,
kuu‑s a?
9 Dava‑i n‑ka jaʼan:
—Joon,
dɨu‑s.
Ɨnka‑i n‑ka jaʼan:
—Ñaʼa.
Da kaa‑s ná kaa se ijan,
ko ña dɨu‑s.
Ko mee‑s n‑jaʼan:
—Joon,
se ijan kuu‑r.
10 Te n‑ka xijan tnuʼu‑i:
—¿Janda n‑kuu xa ndeʼa‑n vitna?
11 N‑jaʼan‑s:
—Se nani Jesús n‑kidavaʼa ndeʼyu,
te n‑xajan‑s ñɨɨ nduchi nuu‑r,
te n‑jaʼan‑s:
“Juaʼan nuu nani Siloé,
te ndute jan nandaʼa‑n ñɨɨ nduchi nuu‑n.”
N‑xeʼen‑r,
te n‑nandaʼa‑r nuu‑r,
te kuaʼa‑r xa kundeʼa‑r vitna.
12 Te n‑ka xijan tnuʼu‑i:
—¿Ndexu tuu se ijan?
N‑jaʼan‑s:
—Ña xini‑r.
N‑ka xijan tnuʼu se fariseu nuu se n‑xo kuu se kuaa
13 Xndeka‑i se n‑xo kuu se kuaa juaʼan nuu xtuu se fariseu.
14 Te kɨu ndetatu ñayiu Israel kuu kɨu n‑kidavaʼa Jesús ndeʼyu xa n‑kida‑ia xa ndeʼa‑s.
15 Xijan kuu xa n‑ka xijan tnuʼu se fariseu tuku nanda n‑kuu xa ndeʼa‑s.
N‑jaʼan‑s:
—Ndeʼyu n‑xajan‑s ñɨɨ nduchi nuu‑r,
te n‑nandaʼa‑r nduchi nuu‑r,
te n‑kukanda nuu‑r.
16 Xijan kuu xa n‑ka jaʼan dava se fariseu:
—Ñadu Ianyuux n‑kida xa n‑kida‑s xaʼa,
chi ña chinuu‑s kɨu ndetatu‑ro.
Ko dava‑s n‑ka jaʼan:
—¿Janda kuaʼa‑s xa kada‑s milagru,
nux kuu‑s se kida kuechi?
—¿Nax jaʼan mee‑n xaxeʼe‑s,
xa n‑kida‑s xa ndeʼa‑n?
N‑xiaʼan‑s:
—Se xian tnuʼu tnuʼu Ianyuux nuu ñayiu kuu‑s.
18 Ko ña n‑ka jandixa se Israel xa da kuaa‑s n‑kaku‑s te vitna ndeʼa‑s.
N‑ka kana‑s tadɨʼɨ se kanda nuu vitna.
19 Nu n‑xee tadɨʼɨ‑s,
te n‑ka xijan tnuʼu ñaʼa se fariseu:
—Se yaʼa,
¿kuu‑s daʼya‑n a?
¿Ka jaʼan mee‑n xa da kuaa‑s n‑kaku‑s?
¿Nux duʼa n‑xo kuu‑s,
te nax kuu xa vitna ndeʼa‑s?
20 N‑ka jaʼan tadɨʼɨ‑s:
—Ka xini‑da xa se yaʼa kuu daʼya‑da,
te ndaa xa da kuaa‑s n‑kaku‑s.
21 Ko nax n‑kuu xa vitna ndeʼa‑s,
ña ka xini‑da.
Jundu n‑kida xa ndeʼa‑s,
ña ka xini‑da.
Se tnu ini kuu‑s.
Kajan tnuʼu‑n nuu mee‑s.
Jaʼan mee‑s xaxeʼe mee‑s.
22 Tnuʼu yaʼa n‑ka jaʼan tadɨʼɨ‑s,
xaxeʼe xa n‑ka yuʼu‑s nuu se Israel.
Chi xa n‑ka kida ɨɨn nuu se Israel xa kada koio‑s.
Nux jaʼan ɨɨn ñayiu xa Jesús kuu Ia n‑tundaʼa Ianyuux,
te kineʼe koio‑s ñayiu jan veñuʼu ñayiu Israel,
xa ma nataka ka‑i xiʼin ñayiu Israel.
23 Xijan kuu xa n‑ka jaʼan tadɨʼɨ‑s:
“Se tnu ini kuu‑s.
Kajan tnuʼu‑n nuu mee‑s.”
24 Vuelta kuu uu n‑ka nakana‑s se n‑xo kuu se kuaa.
N‑ka xiaʼan‑s:
—Koo xañuʼu nuu Ianyuux te jaʼan ndaa.
Ka xini‑r xa se nani Jesús kuu se kida kuechi.
25 Te n‑jaʼan‑s:
—Nux kida‑s kuechi,
daña ña xini‑da.
Idini xa xini‑da kuu xa da kuaa‑da n‑kaku‑da,
te vitna ndeʼa‑da.
26 N‑ka xijan tnuʼu ntuku‑s:
—¿Nax n‑kida ñaʼa‑s?
¿Nanda n‑kida‑s xa ndeʼa‑n?
27 N‑xiaʼan‑s:
—Xá n‑jaʼan‑da,
ko ñayo‑n n‑ka jandixa tnuʼu‑da.
¿Nax kuu xa ka juini‑n xa kunini koio‑n ɨnka vuelta?
¿Ka juini mee‑n xa kunduu koio‑n xiʼin‑s tuku a?
28 Te kuiʼa n‑ka jaʼan‑s nuu‑s:
—Kunduu mee‑n xiʼin‑s.
Mee‑r ka kida xa jaʼan tnuʼu n‑chidotnuni Moisés.
29 Ka xini mee‑r xa n‑jaʼan Ianyuux nuu Moisés.
Ko se ijan,
ña ka xini‑r nde n‑kixi‑s.
30 N‑jaʼan se n‑xo kuu se kuaa:
—Ña kutnuni ini‑da nax kuu xa ñayo mee‑n ka kutnuni ini nde n‑kixi‑s.
¡N‑kida‑s xa ndeʼa‑da!
31 Naʼa‑ro xa ña nini Ianyuux se ka kida kuechi.
Nux yuʼu ɨɨn ñayiu nuu Ianyuux te kida‑i xa juini Ianyuux,
te nini Ianyuux mee‑i.
32 Nde kɨu n‑kixeʼe xa kuaʼa ntdaa xa io xiʼin nde vitna,
te ñayo‑ro n‑ka teku xa ni ɨɨn ñayiu ña n‑kida xa kundeʼa ɨɨn se kuaa nde na n‑kaku‑s.
33 Se yaʼa,
nux ña n‑tundaʼa ñaʼa Ianyuux n‑kuu,
te ma kuaʼa‑s xa kada‑s ni ɨɨn.
34 N‑ka jaʼan‑s:
—Xiʼin kuechi n‑kaku‑n,
te,
¿juini‑n xa dakuaʼa ñaʼa‑n mee‑r a?
Te n‑ka kineʼe‑s se n‑xo kuu se kuaa juaʼan‑s.
N‑jaʼan Jesús: “Ka jaʼan‑n xa xndeʼa‑n, ko ña ndaa”
35 Nu n‑teku Jesús xa n‑ka kineʼe‑s‑sɨ juaʼan‑s,
n‑nanitnaʼa‑ia xiʼin‑s,
te n‑jaʼan‑s:
—¿Jandixa‑n Daʼya Yɨɨ Ianyuux a?
36 N‑jaʼan‑s:
—Dito,
¿jundu kuu‑ia?
Jaʼan‑n,
te jandixa‑da‑ia.
37 N‑jaʼan Jesús:
—Xá ndeʼa‑n‑ia,
te ndatnuʼu‑ia xiʼin‑n.
38 N‑jaʼan‑s:
—Xtoʼo‑da,
jandixa ñaʼa‑da.
Te n‑nujuiin xiti‑s nuu‑ia.
39 Te n‑jaʼan Jesús:
—Vaa‑r ñuñayiu yaʼa xa ndadandaa‑r ñayiu.
Kada‑r xa ñayiu ña ndeʼa,
kundeʼa koio‑i.
Te kada‑r xa ñayiu ndeʼa,
ku kuu koio‑i ná kuu ñayiu kuaa.
40 Te ijan xtuu se fariseu.
Na n‑ka teku‑s tnuʼu‑ia,
n‑ka xijan tnuʼu‑s:
—¿Jaʼan‑n xa mee‑r ka kuu se kuaa tuku a?
41 N‑jaʼan Jesús:
—Nux se kuaa n‑ka kuu mee‑n n‑kuu,
te ma tekuechi ñaʼa‑r.
Ko ka jaʼan‑n xa xndeʼa‑n,
te xijan kuu xa kuú koio‑n xiʼin kuechi‑n.