Ei Aree ei Sifisifi Feroia
2
Maꞌuaa ana na paꞌi sifisifi mamamaꞌa dupuaa ei ramaꞌa mina, ana aleꞌei ba iwe paꞌi sifisifi feroia i dupuaa hamuꞌou. Roꞌaa faꞌasiꞌapaꞌainaa ei sifisifi feroia, ei imina fafeloaa ramaꞌa, ana roꞌaa fadugeaa mei Fasu, mei na ponoꞌaa roꞌou—ma wagii fei, rowe fabatafainamii fei aree ana roꞌou. 2 Watauda, rowe neneraa ei mau mamafaa ana roꞌou ma warefafeloaa fei talaa faꞌuaia. 3 Aꞌa fei bagitoo roꞌou, ei feroia ei, rowe to mugoo poꞌi wagii ei uꞌugaa roꞌou aꞌa hamuꞌou. Fei aree roꞌou, udefamadianamai aꞌa roꞌou ma lomi i madii ma roꞌawe to fagianaa wagii ei hafeloꞌaa roꞌou.4 Uaa mei Haidaa na dududuaa ei aloꞌalo, ei rona bigifatata, ei ina alonaa roꞌou waduheroa ma aunaa roꞌou aꞌa ei hafeloꞌa boboꞌaiab nopaꞌaloo fei au dududua; 5 ana ina dududuaa ei gufu mina mina ei i aloamii fei mamaua suwela aꞌa ei lomi rona neneraa mei Haidaa, maꞌuaa ina opaꞌainaa oloromea ramaꞌa fipui aꞌa Noah, mei na uꞌugaa tamanu na wanewane; 6 ana ina fani aree ei gufu yei Sodom ma Gomorrah ba ronei guꞌamatala ba roꞌou aleꞌei famaꞌamaꞌa aꞌa tamanu ba i nomai aꞌa ei lomi rona neneraa mei Haidaa; 7 ana ina fatelaꞌanaa Lot, hemea wanewanea, mei na fiꞌi naranarana aꞌa ei loloaa ei barafea 8 (uaa mei wanewanea mei, namina fiꞌi fei wanewanea naranarana laloo minaa ei arewaa aꞌa ei fanunuana ma guaiana ei hafeloꞌa bigiꞌa)— 9 nabaa aleꞌei, ana na aida mei Fasu ba batanai i fatelaꞌanaa ei rona nenegia wagii ei manimania maꞌuaa, i urofaa ei abaa wanewanea, ei ana roifi to aree roꞌou eꞌeni nopaꞌaloo fei arewaa dududua.c 10 Inapaꞌaa nofaꞌuaimai aꞌa ei rona neneraa ei nunumiaa fei loloaa naranaraa roꞌoud ma barafeaa ei forafora.
Rona lauguꞌai ma mamagugui ma lomi rona mamaꞌau nabaa roꞌaa warefafeloaa ei aloꞌalo; 11 ma fei faufau roꞌou, lomi na muainaa faufau ei aloꞌalo, maꞌuaa ei rawaniꞌa aloꞌalo, lomi ba rowe uniꞌuniaa ei hafeloꞌa aloꞌalo i aꞌa mei Fasu. 12 Maꞌuaa ei ramaꞌa ei, rona warefafeloaa tamanu lomi rona apaꞌia. Roꞌou aleꞌei ponotoo podu, nenegiꞌuaiaa nugee roꞌou, rona waniniꞌuamai ba hefiꞌa ramaꞌa roꞌaa peainaa roꞌou ma foꞌafamaꞌeaa roꞌou.
13 Rowe to aree roꞌou wagii ei hafeloꞌa rona bigiꞌia. Rona niꞌeniꞌe nabaa roꞌaa bigiꞌaa ei hafeloꞌa i pudaa ramaꞌa. Roꞌou aleꞌei nanaa figifigi. Rona wiwiwidi ua fininaa ei niꞌeniꞌeaa roꞌou ena rona hananafipui aꞌa hamuꞌou maꞌuaa rona fawawarororaa ei hanaa hamuꞌou.e 14 Pudaa roꞌou, pudaa fiharoharoipaꞌaia ma lomi fafaa roꞌou bigiꞌaa ei hafeloꞌa; rona foraa pinee ei lomi na maꞌua naranaraa roꞌou; fei mau wawaꞌai poa, paꞌaa rafee roꞌou—na pasidigaa roꞌou umua! 15 Rona farapadiꞌininaa fei wanewanea ma neneraa ei maumau Balaam, mei naꞌuu Beor, mei na haguaa fei ponoꞌaa ei hafeloꞌa. 16 Maꞌuaa na warefawanewaneia hepalo donkey—hepalo manulelele lomi i warepaꞌi—maꞌuaa ina ware aleꞌei ramaꞌa ma paunainaa fei poapoaa mei mamamaꞌa.
17 Ei ramaꞌa ei, aleꞌei ranuu agiꞌagi lomi ranu wagina, o aleꞌei ei papalei na agisiminia fei baua lalarena. Fei paꞌaa roromaa na udeꞌomaꞌaa roꞌou. 18 Uaa na baꞌabaꞌa ua umuu roꞌou ma lomi hanuu ei wareaa roꞌou. Rona faꞌereꞌereaa hefiꞌadiai, ei na lara huwii roꞌou wagii ei nunumiaa unu, ei ba roꞌaa faraua aꞌa ei hafeloꞌa. 19 Rona ware ba ro alaraa ei ba roꞌaa faraua, maꞌuaa ana roꞌou, humuwa aꞌa ei hafeloꞌa—uaa hemea ramaꞌa, hia humuwa aꞌa tamanu na fasuinia. 20 Ronadoꞌo diꞌininaa fei maumau hafeloꞌaa feni ano, uaa rona apaꞌaa mei Fasuu oꞌou Jesus Christ, mei Fatelaꞌana, maꞌuaa rona pasidiai ma na muainaa roꞌou ei hafeloꞌa ma rona hafelodiai laraa famaꞌa. 21 Na rawani nabaa lomi rona aida fei maumau wanewanea laraa fei ba rona aida ma momoꞌai aꞌa fei apunaia warea rona tonia aꞌa hefiꞌa. 22 Aꞌa roꞌou, na faꞌuai ei warea ba, “Hepalo ponoto i hadiweꞌinaa aꞌa fei mumuꞌana,” ma, “Hepalo moimoi na nunudii na faheduheduadiai aꞌa fei hedu.”