Feni neꞌiau i dinaa aꞌa ei rona tonaa fei narafaweꞌia, fei namina rawani aleꞌei fei ona paꞌi wagii fei wanewaneaa mei Fatelaꞌana, Jesus Christ, mei Haidaniaa oꞌou:

2 Fei rawaniꞌa ma gutafarawania i udegipe i aꞌa hamuꞌou wagii fei apaꞌaa mei Haidaa mawe mei Fasuu oꞌou Jesus.

3 Fei faufau mei Haidaa na fanaa oꞌou minaa ei ba onei paꞌi fei maumau mei Haidaa laloo fei gutanaa oꞌou wagii fei apaꞌaa oꞌou hia, mei na lalaꞌaa oꞌou aꞌa fei hawerana ma rawaniꞌana. 4 Aꞌa eꞌei ina fanaa oꞌou ei faꞌunaia, ei napaꞌaa bauanai ma rawani uaa ba wagii ei, hamonei tonaa fei maumau mei Haidaa ma ponipaꞌai aꞌa ei loloaa feni ano, ei noranamai aꞌa ei hafeloꞌa nunumia.

5 Uaa eꞌei loloa eꞌei, fei narafaweꞌiaa hamuꞌou neimina apoidiai wagii ei rawaniꞌa ma pafoo ei rawaniꞌa, ei apaꞌa, 6 ma pafoo ei apaꞌa, utofaꞌainaa ana hamuꞌou ma pafoo fei mau utofaꞌaiaa ana hamuꞌou, fei mau ofasisifawaiwaia ma pafoo fei mau fei, fei maumau mei Haidaa, 7 ma pafoo fei maumau mei Haidaa, fei mau firawaniaa ei filofui ma pafoo fei, hagua. 8 Uaa nabaa hamoꞌaa fagipealoo eꞌei manumanu eꞌei, aꞌa ba hamona guta ua o lomi hamona bigipaꞌi aꞌa fei apaꞌaa hamuꞌou mei Fasuu oꞌou Jesus Christ. 9 Maꞌuaa hini lomi na paꞌi eꞌei, ana lomi na fanunupaꞌi ma hia hemea pudawerai ma na madiꞌinia ba na futo ei hafeloꞌana mina.

10 Siꞌei, ena lofuu, hamoneipaꞌaa refurefu ma famaꞌaia ba mei Haidaa na rafeinaa hamuꞌou ma na lalaꞌaa hamuꞌou. Uaa, nabaa hamoꞌaa bigiꞌaa ei manumanu ei, lomi hamowe pasi wagii ei hafeloꞌa 11 ma Jesus Christ, mei Fasu ma Fatelaꞌanaa oꞌou ipowemina taufagutanaa hamuꞌou aꞌa fei haparaiana.

12 Faꞌua ba hamona aidadii eni manumanu eni ma hamona u wagii fei faꞌuaia, fei hamona paꞌi eꞌeni, maꞌuaa, ranimai aminaꞌu fanonomiꞌuaiaa hamuꞌou. 13 Woro na rawani ba unei fanonomidinaa hamuꞌou nabaa a gutalao aꞌa feni hubeu, 14 uaa, una aida ba anaa a diꞌininia, ana aleꞌei i famaꞌadigau mei Fasuu oꞌou Jesus Christ. 15 Ma adii fanimaꞌaia ba nenee fei aunuau, hamoꞌaminaꞌu nonominaa eni manumanu eni.

16 Ei haiꞌouna uꞌu ba batanai fei faufau ma fei noramiaa mei Fasuu oꞌou Jesus Christ, lomi haiꞌouna nenegiꞌuaiaa ei uꞌugaa hefiꞌa, ei gutanaraꞌuaa roꞌou, maꞌuaa haiꞌouna uꞌugaa fei fanunupaꞌaa haiꞌou wagii fei haparaiana. 17 Uaa ina to honua ma hawera aꞌa mei Haidaa, mei Ama, ei i guainaa fei lao, fei i norai aꞌana, fininaa fei Hawera wagii fei Haparaiana, fei na ware ba, “Simeni, meni Naꞌuu, meni una haguia; unamina niꞌeniꞌe aꞌana.” 18 Haiꞌou ana na guainaa fei lao, fei noramiana pafea, ei haiꞌou oafipui aꞌana pafoo fei maugeni na apunai.

19 Ma ona aida ba paꞌaa faꞌua ei wareaa ei mamamaꞌa ma ina rawani ba hamoneipaꞌaa falanaa huoo hamuꞌou wagina ana aleꞌei weꞌai dupuaa fei roromaa nopaꞌaloo fei baꞌapanii fei arewaa ma fei piꞌuu arewaa na asiꞌaa i laloo naranaraa hamuꞌou. 20 Pafoo minaa ei, hamonei apaꞌifarawaninia ba lomi hepalo diwareꞌauga laloo fei Buꞌu Apuna ba i noꞌuamai pelee naranaraa hemea mamamaꞌa. 21 Uaa ei diwareꞌauga, lomi na paꞌi fafasuina aꞌa fei naranaraa ramaꞌa, maꞌuaa, ei ramaꞌa, rona umuinaa ei wareaa mei Haidaa ei i gigiaa naranaraa roꞌou fei Spiriti Apuna.