3 Famaꞌa, hamonei apaꞌia ba laloo ei aꞌapoo arewaa rowe nomai ei warefafeifeia ma rowe warefafeifei ma neneraa ei hafeloꞌa nunumiaa roꞌou. 4 Rowe ware ba, “Haa, nahaiga ei ba i nomai, aleꞌei inadoꞌo faꞌunainia? Aꞌa fei maꞌeaa ei amaa oꞌou nopaꞌamiaa wagieni, minaa ei manumanu na fiminaꞌei ua ana aleꞌei i mamaraimai feni malagufu nopaꞌamii eꞌeni.” 5 Maꞌuaa ana paꞌaa naraa roꞌou ba roꞌaa madiꞌinia ba aꞌa fei wareana mina, mei Haidaa na famamaraiaa fei haroo pafea ma famamaraiaa feni malagufu wagii fei ranu. 6 Feni malagufu mina, na wanoia fei ranu fei. 7 Ma ana aꞌa fei warea fei, fei haroo pafea ma feni malagufu, guapaloei mawe ei lomi rona neneraa mei Haidaa, rona oadiginaa manumanuu fei hafi nopaꞌaloo fei arewaa dududua.

8 Maꞌuaa hepalo ua manumanu ba hamoneiꞌaa madiꞌinia, ena rawaniꞌa tafiu: Aꞌa mei Fasu, heai arewaa aleꞌei hefa pufabaꞌa igisimasi ma hefa pufabaꞌa igisimasi ana aleꞌei heai arewaa. 9 Lomi i famamadinaa fei faꞌunaiana mei Fasu aleꞌei naranaraa hefiꞌa ba tani imina madii. Ina ofasisia aꞌa hamuꞌou. Lomi na nunuminia ba nemea i paꞌai, maꞌuaa, ba minaa ei, ronei filoginaa naranaraa roꞌou.

10 Maꞌuaa fei arewaa mei Fasu iwe nomai aleꞌei hemea fafanao. Iwe paꞌai fei haroo pafea fininaa memeꞌaia; fei hafi i guꞌapedugaa minaa ei manumanu ma feni malagufu mawe minaa ei manumanu wagina iwe ude arere ua.^a

11 Siꞌei ba minaa ei manumanu ropowe pedu aleꞌei, hamonei naraia ba i batanai fei mau gutanaa hamuꞌou? Fei gutanaa hamuꞌou nei fafaꞌarai ua ma nei paꞌi fei maumau mei Haidaa 12 ena hamoꞌei gutaꞌomaꞌomaꞌa ma ronaa^b fei arewaa mei Haidaa. Aꞌa fei arewaa fei, fei hafi, iwe guꞌaa fena haroo pafea ma eni manumanuu feni malagufu ana roꞌaa guꞌapaꞌai wagina. 13 Maꞌuaa wagii fei faꞌunaiana na faꞌoꞌonainaa unuu oꞌou ba i paꞌi hefaa manufau haroo pafea ma malagufu, fei gufuu ei wanewanea.

14 Ena tafiu, siꞌei ba na oꞌonai unuu hamuꞌou aꞌa fei, hamoneiminapaꞌaa fafafaꞌarai, lomi hepalo tata ma hamonei oafirawanii aꞌana. 15 Naraia ba fei ofasisiaa mei Fasuu ana fei telaꞌana ana aleꞌei i neꞌifanaa oꞌou hamuꞌou mei rawaniꞌa lofuu oꞌou Paul wagii fei apaꞌa na fania mei Haidaa. 16 Minaa ei neꞌiana na fiminaꞌei ma ei paolaa neꞌiana ana aleꞌei feni neꞌiau. Ei neꞌiana na paꞌi hefiꞌa na waiwai ba omina apaꞌia ma ei pola taba, ei rona hamamagua, rona filoginia ana aleꞌei roꞌaa filogidigaa hefiꞌadiai Buꞌu Apuna ma ropowe to lagii roꞌou wagii fei.

17 Ena tafiu, siꞌei ba hamona apaꞌidigaa fei, ofafaufau ma wagiꞌinaa ana hamuꞌou ba lomi hamoꞌaa atete aꞌa ei tataa ei barafea ma pasidiꞌininaa ei weꞌia gutanaa hamuꞌou. 18 Maꞌuaa hamonei fagipeaa fei rawaniꞌa ma fei apaꞌaa mei Fasuu oꞌou Jesus Christ, mei Fatelaꞌana. I aꞌana na ude fei hawera eꞌeni ma ranimai! Amen.