Fafefefanaa mei Haidaa
4
Tamanu fei na faꞌasiꞌanaa fei fisibaififoꞌaia ma fihareia aꞌa hamuꞌou? Noramiana aꞌa ei nunumiaa hamuꞌou, ei na faꞌawataiaa naranaraa hamuꞌou. 2 Hamona nunuminaa hepalo manumanu, maꞌuaa lomi ba hamowe tonia. Hamona foꞌafamaꞌe ma nanamai, maꞌuaa lomi hamona topaꞌaa tamanu hamona nunuminia. Hamona fiharei ma fifoꞌai. Lomi hamoꞌaa paꞌi, uaa lomi hamona iꞌiginaa mei Haidaa. 3 Ena hamona iꞌigainaa hepalo manumanu, lomi hamona tonia, uaa fei paꞌafii fei iꞌigaiaa hamuꞌou na tata, hamatee na neneraa ei hafeloꞌa nunumiaa hamuꞌou. 4 Hamuꞌou ena lomi hamona oafagugu aꞌa mei Haidaa, lomi hamona aida ba fei tafiaa hamuꞌou feni ano aleꞌei hamoꞌei falalasiaa mei Haidaa? Hini i fitafii aꞌa feni ano, i oanaa bidibidii unuu mei Haidaa. 5 Naraa hamuꞌou ba lomi paꞌafii ei neꞌia wagii fei Buꞌu Apuna ei i ware ba na punepune fei spiriti, fei na faꞌoania laloo iaa oꞌou?a 6 Maꞌuaa ina fanidimai aꞌa oꞌou fei rawaniꞌana. Siꞌei i ware aleꞌei fei Buꞌu Apuna ba:
“Mei Haidaa na fadugeaa ei rona mamagugu,
maꞌuaa na fanaa fei rawaniꞌana aꞌa ei rona fafefefani.”
7 Siꞌei, hamonei fafefenaa mei Haidaa. Ofadugaa mei haniꞌu ma i faraua aꞌa hamuꞌou. 8 Nofarafiꞌilao aꞌa mei Haidaa ma ana i nofarafiꞌimai aꞌa hamuꞌou. Ena hafeloꞌa, huwenaa panii hamuꞌou, fesufafaꞌarainaa ei naranaraa hamuꞌou, hamuꞌou ena ramaꞌa fahelalagui. 9 Faloloaꞌi, aiwawasusu ma aiꞌai. Filoginaa ei fafadia dinaa aiwawasusua ma fei niꞌeniꞌeaa hamuꞌou nei dinaa fawawadua. 10 Fafefefanaa mei Haidaa ma iwe taufaꞌugaa hamuꞌou.
11 Ena lofuu, apuna fiwiwitoia. Hini i warefafeloaa mei lofuna o narafafelo aꞌana, hanuna aleꞌei ba na warefafeloaa fei law ma narafafelo wagina. Nabaa hamona narafafelo aꞌa fei law, abaa hamona nenegia, maꞌuaa aleꞌei ba hamona nara ba fei law na tata. 12 Ina paꞌi hemea ua Fanaa Law ma Fadududua, mei na hawia ba i fatelapaꞌi ma fanimaꞌaa ramaꞌa. Maꞌuaa yoi hini ba o nara ba na tata mei gufumu?
Apuna Mamagugua aꞌa Tamanu ba i Nomai
13 Hamonei guai, hamuꞌou ena hamona ware ba, “Wagieni o narani oꞌaa dinaa aꞌa fei gufu fei, o fena gufu fena ma guta yena aleꞌei heai igisimasi ma bigitoo mugoo poꞌi.” 14 Uaa lomi hamona aida ba tamanu iwe nomai narani. Batanai fei gutanaa hamuꞌou? Hamuꞌou aleꞌei pasiaa hau, fei i nomai ma lareꞌapaꞌai ua. 15 Agia, hamonei ware ba, “Nabaa nunumiaa mei Fasu oꞌaa gutabigiꞌaa feni, o fei.” 16 Maꞌuaa eꞌeni hamona famamagugui ma faꞌaguꞌagui. Minaa ei mau mamagugua aleꞌei, na hafelo. 17 Siꞌei, hini na apaꞌaa hefaa rawaniꞌa bigiꞌa ba nei bigiꞌia ma lomi na bigiꞌia, ina tata.