Famadumuinaa fei Rawerawe
3
Ena lofuu, lomi na rawani ba watauda hamuꞌou feroia, uaa hamona aida ba oꞌou eni feroia, oꞌaa tonaa fei dududua na awatadiai. 2 Uaa minaa oꞌou na alabe aꞌa watauda manumanu. Nabaa nemea lomi na upaꞌi hafeloꞌaa ei wareana, hia, lomi tatana ma na aweifarawaninaa minaa fei hudi ununa. 3 Ena ona fau wao poaa fei hosi sifei ba famomoꞌii fei baua manulelele ba nei neneraa fei nunumiaa oꞌou. 4 Aleꞌei ei baua wa, faꞌua ba ronamina bauanai ma ei baua lalarena na fataleaa roꞌou, maꞌuaa rona rapinaa hepalo pusuꞌo pore ba nei neneraa fei nunumiaa mei rapiꞌa. 5 Ana aleꞌei, fei rawerawe, hepalo pusuꞌo manumanu aꞌa fei hudi unu, maꞌuaa, namina rata fei mamaguguana. Naramaꞌaia ba minaa fei podu, na hawiaa hepalo pusuꞌo hafi ba i guꞌapedugia. 6 Fei rawerawe, ana hepalo hafi ma aleꞌei hepalo tao hafeloꞌa aꞌa minaa fei hudi unu ma namina fafeloaa mei ramaꞌa ma minaa ei tatalaiana na faweguweguia. Ma fei hafi wagii fei rawerawe, noramiana i waduhero.
7 Watauda ei mau manulelele, manufidufidu, ataꞌata ma hefiꞌa manumanu i lama, ei ramaꞌa, rona fagupaꞌaa roꞌou 8 maꞌuaa, lomi nemea iwe famadumuipaꞌaa fei rawerawe. Fei rawerawe aleꞌei hemea lomi i gutafagugutoo. Ina hafelo ma na rata fei siafana.
9 Aꞌa fei rawerawe, ona uduginaa mei Fasu, mei Amaa oꞌou. Ma ana aꞌa fei rawerawe, ona umuaa ei ramaꞌa, ei rona mamaraimai aꞌa fei maumau mei Haidaa. 10 Laloo hepalo ua umu na asiꞌamai udugia ma umua. Ena lofuu, ineiꞌaa aleꞌei. 11 Haa—ana laguꞌaa ladifipuimai fei ranu ma fei agia aꞌa hepalo ua ranu agiꞌagi? 12 Ena lofuu, fei haihai figi i fuanaa fuaa olive, o hepalo paꞌapaꞌaa grape i fuanaa fuaa figi? Ana lomi i ladimai ranu aꞌa hepalo wediwedii agi.
Guapaloei Mau Apaꞌa
13 Hini na paꞌi apaꞌana ma na anoꞌanoi dupuaa hamuꞌou nei famaꞌaia aꞌa fei rawaniꞌa tatalaiana ma ei bigiꞌana wagii fei panimadumuiana, fei noramiana wagii fei apaꞌa. 14 Maꞌuaa nabaa na nanamai pudaa hamuꞌou ma naraꞌuaiaa ana hamuꞌou, apuna faꞌupeꞌupei wagina, o suabaduinaa fei faꞌuaia. 15 Fei mau apaꞌa aleꞌei, abaa noranarai pafea, uaa manumanuu malagufu, abaa manumanuu spiriti, uaa noramiana aꞌa mei haniꞌu. 16 Uaa, nabaa hamona paꞌi fei nanamaia puda ma naraꞌuaiaa ana hamuꞌou, ana i ude fei mau bibiyeia ma minaa ei mau hafeloꞌa bigiꞌa.