Neiꞌaa Paꞌi Papaꞌaa Unu
2
Ena lofuu, siꞌei ba ona narafaweꞌi aꞌa mei Fasuu oꞌou Jesus Christ, mei na paꞌi hawerana, ineiꞌaa paꞌi papaꞌaa unu. 2 Uaa nabaa na waduꞌainaa humuu losuu hamuꞌou nemea na paꞌi gold alatai ma rawaniꞌa susuna ma ana na waduꞌai hemea lomi manumanuna ma na waramuramu susuna 3 ma hamona fagutafarawaninaa mei na rawani ei susuna ma ware ba, “Sifeni, feni rawaniꞌa gutanamu,” maꞌuaa, aꞌa mei lomi manumanuna hamona ware ba, “Ufalarai yena,” o “Guta pafoo eꞌea yeni pineu,” 4 nabaa aleꞌei, hamona fapapaꞌinaa unuu hamuꞌou mei na paꞌi rawaniꞌa hawera laraa mei lomi manumanu ma ei hafeloꞌa bigiꞌaa hamuꞌou na bigiꞌia ba hamuꞌou hafeloꞌa fadududua. 5 Guai, ena rawaniꞌa lofuu: Haa—mei Haidaa lomi ba na rafeinaa ei lomi manumanuu roꞌou yeni ano ba neimina bauanai fei narafaweꞌiaa roꞌou ma ba ropowe tonaa fei haparaiana, fei nadii faꞌunainia aꞌa ei rona haguia? 6 Maꞌuaa hamona fafeloaa ei lomi manumanuu roꞌou. Haa, aꞌa ba ei rona paꞌi watauda manumanu ei rona fafeloaa hamuꞌou? Aꞌa ba roꞌou, ei rona noduginaa hamuꞌou dududua? 7 Aꞌa ba roꞌou, ei rona warefafeloaa fei rawaniꞌa haraa mei hamona oafipui aꞌana?
8 Nabaa hamonapaꞌaa neneraa fei law mei hapara, fei laloo fei Buꞌu Apuna ba, “Haguaa nemeadiai aleꞌei ona haguio,” hiꞌi, nawe wanewane ei bigiꞌaa hamuꞌou. 9 Maꞌuaa, nabaa hamona fapapaꞌinaa unuu hamuꞌou hefiꞌa, hamona bigifatata ma na ware fei law ba hamona barafeia. 10 Uaa hini na neneraa minaa ei law, maꞌuaa na alabe aꞌa hepalo ua law, ana aleꞌei ba ina barafeaa minaa ei law. 11 Uaa mei na ware ba, “Apuna fiharoharoipaꞌai,” ana mei na ware ba, “Apuna foꞌafamaꞌe.” Nabaa lomi ona fiharoharoipaꞌai maꞌuaa, ona foꞌafamaꞌe, yoi hemea barafeaa fei law.
12 Ei warea ma bigiꞌaa hamuꞌou nei famaꞌaia ba fei law i dududuaa hamuꞌou, fei na alaraa hamuꞌou. 13 Uaa hini lomi na faloloaꞌinaa hefiꞌa, ana iwe tonaa fei dududuana, fei lomi faloloaꞌia wagina. Fei faloloaꞌia na muainaa fei dududua!
Fei Narafaweꞌia ma ei Bigiꞌa
14 Ena lofuu, tamanu rawaniꞌana nabaa nemea na ware ba na weꞌi naranarana, maꞌuaa lomi na bigi? Fei mau narafaweꞌia aleꞌei, ana i fatelapaꞌia? 15 Nabaa nemea lofu o agi, lomi susuna ma hanana 16 ma nabaa nemea hamuꞌou na ware ua aꞌana ba, “Aunufaꞌaꞌa ua; gutafarawani ua ma hananafaweꞌi,” maꞌuaa lomi na roinia, tamanu rawaniꞌana? 17 Ana aleꞌei, nabaa fei narafaweꞌia ana unaia, fei lomi na nofipuimai aꞌa fei bigiꞌa, lomi hanuna.
18 Maꞌuaa nemea i ware ba, “Yoi, na weꞌi naranaramu; maꞌuaa yau, na bigifaweꞌi.”
Famaꞌaiau fei weꞌiaa naranaramu, fei lomi na nofipuimai aꞌa fei bigiꞌa ma yau, a famaꞌaio fei weꞌiaa naranarau aꞌa tamanu una bigiꞌia. 19 Yoi, ona aida ba na paꞌi hemea ua Haidaa. Na rawani! Ei pigea, ana rona aida fei ma rona funurere.
20 Mena poapoa, a famaꞌabatanainia aꞌamu ba fei narafaweꞌia, fei lomi na nofipuimai aꞌa fei bigiꞌa, ana lomi hanuna?a 21 Mei upuu oꞌou Abraham na wanewane i pudaa mei Haidaa, uaa ina fanaa mei naꞌuna Isaac pafoo fei tawahafi na apunai, na? 22 Hamona fanunuꞌapaꞌia ba fei narafaweꞌiana ma fei bigiꞌana, namina fiboꞌii. Ma fei bigiꞌana na famaꞌaia ba na paꞌi narafaweꞌiana. 23 Ma nawepaꞌaa faꞌuai fei neꞌia laloo fei Buꞌu Apuna ba, “Abraham, na narafaweꞌi aꞌa mei Haidaa ma wagii fei, ina wanewane i pudaa mei Haidaa,” ma mei Haidaa na ware ba hia, tafina. 24 Hamona fanunuꞌapaꞌia ba i pudaa mei Haidaa, nemea na wanewane wagii tamanu ina bigiꞌia ma aꞌa ba fei weꞌiaa naranara ua.