Feni, i dinaa aꞌa ei hefua ma guapaloei pai, ei rona fawawadidi i dupuaa ei baua gufu:

Mafufuo i aꞌa hamuꞌou.

2 Ena lofuu, hamonei nara ba paꞌaa manumanuu niꞌeniꞌea ena hamona bapaꞌaa watauda mau awataa 3 uaa hamona aida ba ei manimaniaa fei narafaweꞌiaa hamuꞌou i fagipeaa fei ofasisiaa hamuꞌou. 4 Fei ofasisiaa hamuꞌou nei fapedugaa ana fei bigiꞌana ba hamonei aꞌu ma wawanene ma ei maumau hamuꞌou iwe poꞌaifarawani. 5 Nabaa nemea hamuꞌou lomi apaꞌana, inei iꞌiginaa mei Haidaa, mei i fani ua aꞌa minaa ei ramaꞌa, mei lomi i narapaꞌaa ei tataa roꞌou. Ma nabaa nemea na iꞌiginia aleꞌei, te, iwe to. 6 Maꞌuaa ena na iꞌigai, inei weꞌi naranarana ma neiꞌaa hamamagua. Uaa hini i hamamagua, hia aleꞌei ei hapaniu lama, ei na agifababasuweia fei lalarena. 7 Mei ramaꞌa aleꞌei, ineiꞌawe nara ba i tonaa hepalo manumanu aꞌa mei Fasu; 8 hia ramaꞌa fahelalagui, lomi na oafagugu aꞌa tamanu ina bigiꞌia.

9 Mei lofu lomi manumanuna nei mamagugu, uaa fei gutanana na pafeai. 10 Maꞌuaa mei watauda manumanuna neiꞌaa mamagugu, uaa fei gutanana na fafau. Uaa hia i hole aleꞌei ei fotaa ei guana. 11 Uaa fei halo na asiꞌaa fininaa fei baua babaiana ma na faholeaa ei guana; ei fotana na pasi ua ma fei fananamaiana na pedu. Ana aleꞌei, mei watauda manumanuna iwe paꞌai ei ana fi bigiꞌaa ei bigiꞌana.

12 Ina paꞌi hawegiana mei i ofasisia wagii ei manimania. Uaa ena na muaidigaa ei manimania, ipowe tonaa fei tao harenua, fei na faꞌunainia mei Haidaa ba i fanaa ei rona haguia.

13 Ena na nomai ei manimania aꞌa nemea, ineiꞌaa ware ba, “Mei Haidaa fi manimaniau.” Uaa fei hafeloꞌa, lomi i manimaniaa mei Haidaa ma ana lomi ba hia, i maniaa nemea; 14 maꞌuaa hememea i tonaa ei manimania ana wagii ei hafeloꞌa nunumiana, ei na faꞌereꞌereia ma fasuaugania. 15 Ma nenee fei ba na udedii fei nunumiana, ipowe nomai fei hafeloꞌa; ma ena na nogipelao fei hafeloꞌa, ipowe nomai fei maꞌea.

16 Ena rawaniꞌa lofuu, hefiꞌa manumanu neiꞌaa sifiꞌaa hamuꞌou. 17 Minaa ei rawaniꞌa ma fafaꞌaraia fana, manumanu pafea, noranarai aꞌa mei Ama, mei na famamaraiaa ei weꞌaiaa pumanugawe, mei lomi na filogii aleꞌei ei hanunu. 18 Ina fanaa oꞌou fei manufau harenua wagii fei faꞌuai warea ba oꞌou aleꞌei rawarawa fua aꞌa minaa ei famamarana.

19 Ena rawaniꞌa lofuu, naramaꞌaiaa feni: Minaa ei ramaꞌa nei balabala adiaa roꞌou ma roneiꞌaa ware babatafa ma ana roneiꞌaa siba maduare, 20 uaa ei sibaa ei ramaꞌa, lomi i fanoramii fei mau wanewanea gutana, fei i nunuminia mei Haidaa. 21 Siꞌei, hamonei diꞌininaa minaa ei mau lolo ma hafeloꞌa, ei namina udepepesu. Ma fininaa fei mau fafefefanaa, hamonei tonaa fei warea, fei na faro laloo iaa hamuꞌou, fei ba i fatelaꞌanaa hamuꞌou.

22 Apuna guaiꞌuaiaa fei warea ma sifiꞌaa ana hamuꞌou. Neneraa tamanu ina wareia. 23 Uaa hini i guaiꞌuaia, maꞌuaa lomi na nenegia, hia aleꞌei hemea ramaꞌa na igoꞌuaiaa fei hanununa 24 ma na fanunudigaa fei maumauna, na aunu ma ana ei na madiꞌinia ba batanai fei maumauna. 25 Maꞌuaa mei na fanunumaꞌaiaa fei rawaniꞌa law, fei na alaraa ei ramaꞌa ma na u bigiꞌia aleꞌei ranimai ma lomi i madiꞌinaa tamanu ina guainia, maꞌuaa na nenegia—i paꞌi hawegiana aꞌa tamanu ei bigiꞌana.

26 Hini na nara ba hia losuia, maꞌuaa lomi na wagiꞌinaa fei rawerawena, ina sifiꞌaa anaia ma fei losuiana, lomi hanuna. 27 Fei mau losuia na nunuminia mei Haidaa, mei Amaa oꞌou, fei na fafaꞌarai ma lomi tatana i pudana, sifei ba: onei roiroinaa ei baduu lomi ama ma inaa roꞌou mawe ei pifine maꞌesuabea, ei rona paꞌi ei mau awataa ma abaa faloloa aꞌa ei hafeloꞌaa feni ano.