Warefaꞌaia aꞌa ei Rona Paꞌi Watauda Manumanu
5
Guaifarawani hamuꞌou ena hamona paꞌi watauda manumanu. Aiwawasusu ma aiꞌai, uaa ifi nomai aꞌa hamuꞌou fei hafeloꞌa. 2 Ei watauda manumanuu hamuꞌou na wanudii ma ei susuu hamuꞌou na roroꞌia pugoꞌa. 3 Ei gold ma silver hamona paꞌi i poꞌai. Fei poꞌaiaa guapaloei, i uniaa hamuꞌou ma hunugaa dupuu hamuꞌou aleꞌei guꞌaa hafi. Hamona baubauhafelo aꞌa watauda manumanu laloo ei aꞌapoo arewaa. 4 Maꞌaia! Fei ba lomi hamona fani ponoꞌaa ei ronaꞌo robaiaa ei peꞌihapee hamuꞌou aleꞌei hepalo manumanu i dududuaa hamuꞌou. Ei aigaa ei hufuꞌa naree paꞌaa adiaa mei Fasu, mei Faufaua. 5 Hamona guta pafoo watauda manumanu yeni malagufu ma farawaninaa ana hamuꞌou. Hamona fagipeaa ana hamuꞌou aleꞌei rona fagipeaa ei manulelele wagii fei arewaa roꞌaa moroꞌaa roꞌou.a 6 Hamona dududu ma foꞌafamaꞌeaa ei lomi rona tata ma ana lomi rona fadugeaa hamuꞌou.Fawiwiꞌaia Wagii fei Fiꞌia
7 Siꞌei, ena lofuu, hamonei fawiwiꞌai nopaꞌaloo fei noramiaa mei Fasu. Naramaꞌaia ba mei bigibigiꞌaa peꞌihape, na gutafawiwiꞌai nopaꞌaloo fei au hufuꞌaa ma ei au maunu. 8 Hamuꞌou anaa, hamonei fawiwiꞌai ma ofafaufau, uaa fei noramiaa mei Fasu na rafiꞌi. 9 Apuna fibabaꞌui, ena lofuu, o hamoꞌaa tonaa dududua. Mei fadududua na u aꞌa fei gigei!
10 Ena lofuu, naramaꞌaiaa fei mau fawiwiꞌaiaa ei mamamaꞌa, ei rona to fiꞌia uaa rona uꞌugaa fei haraa mei Fasu. 11 Oꞌouna aidadii ba na paꞌi hawegia aꞌa ei rona ofasisia. Hamona guaidigia ba batanai fei ofasisiaa Job ma hamona fanunudigaa tamanu nawe bigiꞌia aꞌana mei Fasu. Namina bauanai fei faloloaꞌia ma fei farawaniaa mei Fasu.
12 Wagii minaa ei, ena lofuu, apuna faꞌunai aꞌa hepalo haraa pafea o yeni malagufu o hitanidiai. Ware ua ba “Hiꞌi” o “Lomi”. Uaa nabaa hamona bigiꞌia aleꞌei, hamoꞌaa paꞌaa aree hamuꞌou.
Lafulafu Fininaa Narafaweꞌia
13 Hini hamuꞌou na paꞌi awatana? Inei lafulafu. Hini na niꞌeniꞌe? Inei laugiꞌuduginaa mei Fasu. 14 Hini hamuꞌou na funu? Inei lalaꞌaa ei bauaniaa fei losuu ba roneimii lafulafu aꞌana ma igi pao pafona wagii fei haraa mei Fasu. 15 Ma fei lafulafua fininaa fei weꞌiaa naranara iwe farawaninaa mei funua. Mei Fasu, ipowe faꞌasiꞌania ma nabaa na paꞌi hafeloꞌana, ana i futoia. 16 Siꞌei, hamonei wareaa ei hafeloꞌaa hamuꞌou aꞌa hememea hamuꞌou ma lafulafunaa hememea hamuꞌou ba hamopowe rawani. Fei lafulafuaa hemea wanewanea ramaꞌa na paꞌi faufauna ma ipaꞌaa bigi.
17 Elijah, hia ana ramaꞌa aleꞌeni oꞌou. Ina iꞌigifaweꞌi ba neiꞌaa ropa fei maunu ma lomi na ropagio yeni pu laloo oduai ma hesuwi igisimasi. 18 Ma ina lafulafudiai ma na ropa ma na habe manumanu yeni malagufu.