Mei Barafea
2
Wagii fei noramiaa mei Fasuu oꞌou Jesus Christ ma fei ba oꞌaa figupui aꞌana, haiꞌouna iꞌiginaa hamuꞌou, ena lofu, ba 2 hamoneiꞌaa naranara watauda o maꞌau aꞌa hefiꞌa diwareꞌauga, uꞌuga, o neꞌiaa ramaꞌa nabaa rona warefasifi ba haiꞌouna neꞌinia ba fei arewaa mei Fasu na nodigimai. 3 Apuna guaitonaa sifisifii nemea aꞌa hefiꞌa tala, uaa fena arewaa fena, lomi ba i nomai hawina na asiꞌaa fei au barafea ma mei barafeaa nawe arewa, mei fi aununaa aꞌa fei fagianana. 4 I faduge ma poronaa hia pafea pafoo minaa ei manumanu wagii mei Haidaa o tamanudiai rona losuinia ma ba i guta i laloo fei humuu mei Haidaa ma ware ba hia mei Haidaa. 5 Haa, lomi hamona nonominia ba ei afidoꞌo guta i aꞌa hamuꞌou na warefanaa hamuꞌou eni manumanu eni? 6 Ma eni hamonawe aida ba tamanu fei nadoꞌo utofaꞌainia uaa ba i we faꞌarewaia aꞌa fena paꞌaa au. 7 Uaa fei faufau fei mau barafea, fei i ude opaꞌai, ifi bigi eni, maꞌuaa mei ifi utofaꞌainia idoꞌo panarofia nopaꞌaloo fei ba ina putotoginia. 8 Ma nenee fei, ipowe arewa mei barafea, mei iwe hugusiminia mei Fasu Jesus wagii fei fawenaiana ma fapedugia aꞌa fei haweraa fei noramiana. 9 Fei noramiaa mei barafea iwe nofininamii fei bigiꞌaa Satan ma watauda mau sifisifi foigia, hilala ma fananawalaa puda 10 fininaa watauda ei mau hafeloꞌa, ei na sifiꞌaa ei roi fagiana eni. Rona to fagianaa uaa lomi rona haguaa fei faꞌuaia ba roꞌaa tela. 11 Aꞌa fei, mei Haidaa i fapoapoainaa tabaa roꞌou ba roꞌaa neneraa fei sifisifi 12 ma ba minaa ei lomi rona neneraa fei faꞌuaia maꞌuaa rona niꞌeniꞌe ua aꞌa fei hafeloꞌa, ropowe fagiana.
Ufaweꞌi
13 Maꞌuaa ranimai haiꞌouna ware ‘ta’ aꞌa mei Haidaa uaa hamuꞌou, ena lofu, hamuꞌou ena haguu mei Fasu, uaa doꞌofamaꞌa mei Haidaa na rafeinaa
hamuꞌoub ba hamonei tela aꞌa fei fafafaꞌaraiaa bigiꞌaa fei Spiriti ma wagii fei narafaweꞌia aꞌa fei faꞌuaia. 14 Ina rafeinaa hamuꞌou wagii feni ba aꞌa fei rawaniꞌa wareaa haiꞌou, hamoꞌaa paꞌi fei haweraa mei Fasuu oꞌou Jesus Christ. 15 Siꞌei, ena lofu, ofafaufau ma panarofaa ei feroia,c ei haiꞌouna wareia ma neꞌinia aꞌa hamuꞌou.